Luke 6
6
Ɔbɔŋ Sabbath
(Matthew 12.1-8; Mark 2.23-28)
1Ekem ke Sabbath chied edide, Jesus asaŋa ebe ke iŋwɔŋ ikuokuod, mbed nsie okubi ikuokuod afiak ke ubɔk mmɔ ata.
2Ede ndusuk mme pharisee ɔdɔhɔ mmɔ ete, “nsonam mbufo inamde se inenke owo inam ke usen sabbath?”
3Ndien Jesus ɔbɔrɔ mmɔ ete, “nte mbufo ikekopke se David akanamde, ke ini ɔbiɔŋ ɔdɔŋde-e ma mben eke odude ma-e.
4Ini ekɔdukde ke ufɔk Abasi, emen uyo iso Abasi adia, afiak ɔnɔ mben eke odude ma-e, uyo eke ikenyeneke owo idia, ke ebede mme oku Abasi ɔkpɔŋ?”
5Jesus ɔdɔhɔ mmɔ ete, “eyen owo ede ɔbɔŋ Sabbath.”
6Ekem ke sabbath afin eduk ke itie ukpono mme Jew, ndien owo chied eke ubɔk nnecha nsie akpade odu do.
Ukɔk Udɔŋɔ Ke Sabbath
(Matthew 12.9-14; Mark 3.1-6)
7Ede mme ekpep mbet ma mme Pharisee, ekpeme Jesus, mme inanam udɔŋɔ ekwere owo ke usen sabbath, ma mmɔ okud ŋkpɔ eke mmɔ adade odori-e ikɔ.
8Ede ediɔŋɔ ekikere mmɔ, ndien edɔhɔ owo odo ubɔk nsie akpade ete, “daha ke ɔnyɔŋ wɔrɔ di mi ke ufɔd” ndien owo odo adaha ke ɔnyɔŋ ɔwɔrɔ ada.
9Ede Jesus ɔdɔhɔ mmɔ ete, “nyem ibip mbufo nte enen owo inam eti mme idiɔk ŋkpɔ ke usen sabbath, iŋyaŋa uwem owo mme ibiad?”
10Ndien esuan anyin eche mmɔ kpukpru, ndien edɔhɔ owo odo ete, “neŋede ubɔk mfo.” Enam ntoro, ndien ubɔk nsie akabade eyie.
11Ndien echid ofud mmɔ eti-eti, mmɔ atiŋ ma idem mmɔ abaŋa se mmɔ inam ma Jesus.
Mbed Duopeba
(Matthew 10.1-4; Mark 3.13-19)
12Ekem ke mme usen odo, Jesus ɔwɔrɔ ɔdɔk ke akwa ɔbud ibɔŋ akam, efiri itudoyo odo ekaiso ɔbɔŋ akam ɔnɔ Abasi.
13Ke ini oyo echierede, e-okuod mbed nsie, ndien emek owo duopeba ndien ekuod mmɔ mme apostle.
14Enyiŋ mmɔ oduomi, Simon eke ekuode Peter, ma Andrew eyen eka; James ma John, Philip ma Bartholeomew.
15Matthew ma Thomas, James eyen Alphaeus, Simon eke ekerede aŋwana ekɔŋ unen obio mmɔ.
16Judas eyen James ma Judas Iscariot eke akadade Jesus ɔnɔ mkpa.
Jesus Ɔkɔk Akwa Otu Owo
(Matthew 4.24,25; Mark 3.7-12)
17Ekem Jesus asaŋa ma mmɔ edida ke una isɔŋ ma otu mbed nsie, ma ata uwak owo eke odude ma mmɔ eke otode ke kpukpru Judea ma Jerusalem, ma mben inyaŋ Tyre ma sidon eke ekedide ikop ikɔ nsie ma enam udɔŋɔ ekwere mmɔ.
18Ndien mmɔ eke idiɔk odudu ɔtuhɔrede afiak ekop nchɔŋidem.
19Ndien kpukpru owo eyem ituk-e ubɔk, siak enyenede odudu nnam udɔŋɔ ekwere mmɔ kpukpru.
Edidiɔŋ
(Matthew 5.1-12)
20Ndien emehere anyin eche mbed nsie, afiak ɔdɔhɔ ete,
“Abasi idɔdiɔŋ mbufo nditɔŋ ubuene,
Koro obio ubɔŋ Abasi enyene mbufo
21Abasi idɔdiɔŋ mbufo eke itiede ɔbiɔŋ kami,
Koro nsia iyɔyɔk mbufo.
Abasi idɔdiɔŋ mbufo eke ituade eyed kami
Koro mbufo isasak imam.
22Abasi idɔdiɔŋ mbufo ke ini owo asuade mbufo,
Afiak ɔkɔbɔrede mbufo ke idem mmɔ efep, afiak osuoŋi mbufo,
Ndien atiŋ idiɔk abaŋa mbufo,
Ke ntak ichienede min eyen owo.
23Idara ke usen odo ifiak itɔrɔ ke idaraechid:
Koro utup mbufo ke obio ubɔŋ ikpokpon,
Koro mme ete mmɔ akanam suhɔ ntoro ma mme asiak uduak ke ini eched.
24Ede Imafanke inɔ mbufo mben inyene,
Koro mbufo imeyene ndɔŋechid mbufo mi ke isɔŋ.
25Imafanke inɔ mbufo eke inyenede kpukpru ŋkpɔ kami,
Koro mbufo inana ɔbiɔŋ. Imafanke inɔ mbufo eke isakde imam kami,
Koro mbufo iseseme ifiak itua eyed
26Imafanke inɔ mbufo eke kpukpru owo atiŋde se afande abaŋa mbufo,
Koro mme ete mmɔ akanam ntoro ma mme asiak uduak abiaŋa.”
Ma Mme Asua Mfo
(Matthew 5.38-48)
27“Jesus aka iso ekpep mmɔ ŋkpɔ ete: ndɔhɔ mbufo eken ikopde ikɔ mmi nte, ima mme asua mbufo, ifiak inam mfan inɔ mben eke asuade mbufo,
28Idiɔŋ mben eke osuoŋide mbufo, ndien ibɔŋ akam iyem mfan mben eke esuenede mbufo.
29Mese owo amiade fin ke mfuk chied, wɔŋɔde edem edieken nnɔ-e. Owo ama ɔbɔ fin ɔfɔŋ mfo, kuchin inɔ-e iyen ɔfɔŋidem mfo.
30Owo eke ebeŋede fin ŋkpɔ, nnɔ-e, owo eke ɔbɔde fin ŋkpɔ mfo, kufiak ubup-e ŋkpɔ odo ɔkɔnɔde owo esie.
31Ede se mbufo iyemde owo anam ma mbufo, ibom iso inam ntoro ma owo afin.
32Ede mese mbufo imade owo eke amade mbufo ɔkpɔŋ, nso udori se mbufo inyene? Koro mme idiɔk owo amade owo eke amade mmɔ ɔkpɔŋ.
33Mese mbufo inamde mfan inɔ owo eke anamde mfan ɔnɔ mbufo ɔkpɔŋ, nso itoro se mbufo inyene, koro mme idiɔk owo anamde suhɔ ntoro.
34Ede mese mbufo inɔde owo ebuɔd, eke inyenede idoranyin ke inɔnɔ mbufo usiene, nso itoro se mbufo inyene, koro mme idiɔk owo ɔbuɔde owo ebuɔd, ma mmɔ ɔtɔŋɔ ntak ɔbɔ se mmɔ ɔkɔnɔde owo.
35Ede ima mme asua mbufo, iyem ŋkpɔ mfan inam innɔ mmɔ, ibuɔd mmɔ ŋkpɔ ikikere itɔŋɔ ntak mbɔ, ma utup mbufo okpon, mbufo idede nditɔŋ Akwa Abasi, koro Abasi afande ido ma mmɔ eke ikɔmke-e ma mme idiɔk owo
36Ntoro itua owo mbɔm, suhɔ nte Abasi mbufo atuade owo mbɔm.”
Kubiere Ikpe Unɔ Owo
(Matthew 7.1-5)
37“Jesus ɔdɔhɔ mmɔ ete, Ikibiere ikpe innɔ owo, bak owo ibiere ikpe innɔ mbufo. Ikitup owo ikpe ke unana ntak, bak owo itup mbufo ikpe ifen inɔ owo, ma Abasi efen ɔnɔ mbufo.
38Mese inɔde owo ŋkpɔ, owo inɔnɔ suhɔ mbufo ŋkpɔ. Mmɔ idodome ɔyɔk udome eke efikde ɔsuhere ma afin ɔduk, eke owo enyeŋede ɔsuhere afiak esin ɔyɔk ɔduɔhɔ, esin mbufo ke etaŋ. Siak udome eke mbufo idade idome inɔ owo, Abasi idada idome inɔ mbufo.”
39Jesus otop ŋke ɔnɔ mmɔ ete, “nte nnan ekeme ida nnan usuŋ? Nte mmɔ mba-mba imɔduɔ iduk ke obube?
40Mbed eke ɔbɔde ukpep ŋkpɔ ikponke ikan owo eke ekpepde-e: ede eti eyen ukpep ŋkpɔ itetie nte owo eke ekpepde-e ŋkpɔ.
41Nsonam inyenede mbubehe ma mbio eke odude ke anyin eyen usɔ, ede ukereke ɔbukpɔk eke ekubɔde fin ke anyin?
42Anam didie ɔdɔhɔ eyen usɔ ete yak nsioŋo fin iyen mbio ke anyin mfo, ke mukwe ɔbukpɔk eke odude ke anyin mfo? Ofo anam ŋkpɔ anyin owo, bomiso sio ɔbukpɔk eke odude ke anyin mfo fep, ma okud usuŋ osio iyen mbio eke odude ke anyin eyen usɔ.”
Ɔdiɔŋɔ Eto Ke Mfri Nsie
(Matthew 7.15-20)
43“Jesus ekpep mmɔ ete, inyeneke eti eto eke onwumde idiɔk mfri, idiɔk eto ikanke iwum eti mfri. 44Koro owo ada mfri eto ɔdiɔŋɔ se eto edede, siak owo itetke eti mfri nte fig ke nkukum, owo itetke grape ke mbare ekpe. 45Eti owo osioŋo kpukpru eti ŋkpɔ eke ekonumde ke echid nsie, suhɔ nte idiɔk owo osioŋode idiɔk ŋkpɔ eke ekebonde ke echid nsie. Koro oto ke uyuhɔ echid, inua osio atiŋ.”
Bup Ke Ɔnyɔŋ Itiad
(Matthew 7.21-27)
46“Jesus afiak ɔdɔhɔ mmɔ ete, nenso anam mbufo ikuode Min ɔbɔŋ, ɔbɔŋ, ndien mbufo inamke se ndɔhɔde.
47Owo eke amade ichiene Min, eke okopde ikɔ mmi eke anamde se ntiŋde, nwawiri mbufo utɔ owo eke ebietde.
48Ebied ɔbup ufɔk eke otibide isɔŋ otuŋe, eke ɔwukde adaha ufɔk nsie ke itiad, ndien ke ini ukwɔ, udiɔŋ edim eberide ufɔk odo, ndien ufɔk odo ɔchɔŋ-ada, siak andinyene ɔtumde ɔbup.
49Ede owo eke okopde ikɔ mmi, minamke mmɔ, ebied owo eke obupde ufɔk nsie ke ɔnyɔŋ ntan minyenke itiad ke idak ufɔk ndien ŋwak edim ebere ufɔk ɔkpɔsɔŋ, ndien ŋwure ufɔk odo okpon.”
Currently Selected:
Luke 6: UKQ
Highlight
Copy
Compare
Share
Want to have your highlights saved across all your devices? Sign up or sign in
Ukwa Bible by Beyond Translation is licensed under Creative Commons Attribution-ShareAlike 4.0 License.
