Luke 5
5
Jesus Okoud Akpa Mbed Nsie
1Usen chied, ke ini otu owo ɔfutde-e ke idem ma mmɔ okop ikɔ Abasi, eda ke akamba mkpɔdiɔhɔ mmuɔŋ ke Gennesaret.
2Ekut ubom iba, anade ke mkpɔdiɔhɔ inyaŋ, ede mme owod iyak ama ɔwɔrɔ, mmɔ ɔsuhɔ eyed iyire mmɔ.
3Jesus ɔduk ke ubom chied eke enyenede Simon, ndien ɔdɔhɔ-e ete nuk ubom fo kpɔŋ obod iyeyen, esuhere etetie ke ubom ekpep otu owo ŋkpɔ.
4Ke ini etiŋde ikɔ ama, ɔdɔhɔ Simon ete, “awad ubom aka ke utuŋe mmuɔŋ ma esin iyire owod iyak.”
5Simon ɔbɔrɔ ete, “Ete ufɔk, ikataba idap ke itudoyo ikpa utom, imumke iyak chied-chied, ede ke uyo mfo nsesin iyire.”
6Ndien ke ini mmɔ anamde se Jesus ɔdɔhɔde mmɔ, mmɔ omum uwak iyak, ndien iyire mmɔ ɔtɔŋɔ iwaha.
7Ndien mmɔ anam idiɔŋɔ ke ubɔk okuod mben nsaŋa mmɔ eke odude ke ubom afin, ete ediwam mumɔ, mben odo edi, ndien ubom mba-mba ɔyɔk ma iyak, tutu ubom eyem isube.
8Ke ini Simon okutde ntoro, eduɔ Jesus, ke ukod iwiri ukpono ete, O Ɔbɔŋ mi, “daha kpɔŋ min, koro ndede idiɔk owo!”
9Siak idem akpa Peter ma mben nsaŋa nsie ke uwak iyak eke mmɔ okowotde.
10Ede idem akpa suhɔ James ma John, nditɔŋ Zebedee, mben nsaŋa Simon, Ndien Jesus ɔdɔhɔ Simon ete, “kufɔhɔ ndik, ɔtɔŋɔde ke ini eken ofo ukɔkɔ owo.”
11Ndien ke mmɔ awatde ubom ibedi ke esuk, mmɔ ɔkpɔŋ kpukpru ŋkpɔ echiene Jesus.
Jesus Anam Akpamfia Asana
(Matthew 4.18-22; Mark 1.16-20)
12Ekem ke ini Jesus odude ke obio Galilee chied, che-che owo chied eke ɔdɔŋɔde akpa-mfia, ke ini ekutde Jesus, eduɔ ke isɔŋ ɔkubi iso nsi, awiri ukpono, ekpe Jesus ubɔk ete, “mese eyimede nam min nsana.”
13Ndien Jesus ada ubɔk ɔtuk-e ete, mmeyime sana, nde-nde odo, owo akpamfia ɔbɔ edikɔk.
14Ndien Jesus ɔdɔhɔ-e ete, itatiŋ inɔ owo chied-chied, “ede ekawiri oku Abasi idem nsie, ndien ewa uwa nte moses etemede ma awiri ke mmɔ asana.”
15Ede etop Jesus asuana akan nte ekedede, akwa otu owo edi ikop ma mmɔ ɔbɔ nchɔŋidem oto ke mme udɔŋɔ mmɔ.
16Ede Jesus ɔkpɔŋ mmɔ, nte ido nsie edede, aka eke itie ke nchad isɔŋ ɔkpɔŋ ɔbɔŋ akam.
Jesus Efen Afiak Ɔkɔk Akpaubeŋ
(Matthew 9.2-8; Mark 2.1-12)
17Ke usen chied, nte Jesus ekpepde owo ŋkpɔ, mme pharisee ma mme ekpep mbet mme Jew, eke otode ke mme obio Galilee ma Judea ma ke Jerusalem, mmɔ etiedo, ndien odudu Abasi odu ma-e ma enam udɔŋɔ mmɔ ekwere.
18Ndien ini odo mme owo obiom ɔdɔŋɔ akpa-ubeŋ chied ke nkpana edi, mmɔ eyem ida-e nduk ndinum ke iso Jesus.
19Ede nte mmɔ mikwe usuŋ nte mmɔ adade-e ɔduk echiene uwak otu owo, mmɔ ɔdɔk ɔkɔm ufɔk, ɔkubɔde ekpaŋ, ɔsukɔre-e ke nkpana ke ufuɔd otu owo, ke iso Jesus.
20Ke ini Jesus okutde mbuɔdidem mmɔ, edɔhɔ owo odo ete, “ufan, efen mme idiɔk ŋkpɔ mfo.”
21Ede mme ekpep mbet ma mme pharisee, ɔtɔŋɔ itiŋ ke idem mmɔ, ete “Ne-enye owo osuoŋi Abasi, ne-enye owo ekeme ifen idiɔk ŋkpɔ owo, midaha Abasi.”
22Jesus ɔdiɔŋɔ se mmɔ ekerede, edɔhɔ mmɔ ete, “nsonam mbufo ikerede utɔ ŋkpɔ eken ke echid mbufo?
23Ewe emem akan, mme idɔhɔ ite efen mme idiɔk ŋkpɔ mfo, mme idɔhɔ ite dadaha ke ɔnyɔŋ saŋa?
24Ede ma mbufo idiɔŋɔ ete eyen owo enyene odudu ke isɔŋ ifen mme idiɔk ŋkpɔ e-ɔdɔhɔ ɔdɔŋɔ Akpaubeŋ ete, daha ke ɔnyɔŋ men mbri fo nyɔŋ ufɔk.”
25Nde-nde odo edadaha ke ɔnyɔŋ ke iso mmɔ, emen nkpana nsie ɔnyɔŋ ufɔk, ɔnɔ Abasi itoro.
26Ndien idem akpa kpukpru owo, mmɔ etoro Abasi, ndik ɔyɔk mmɔ ke echied, mmɔ ete, “nnyin imokut mme echen ŋkpɔ mfin!”
Jesus Okuod Levi Ede Mbed Nsie
(Matthew 9.9-13; Mark 2.13-17)
27Ekem ke mme ŋkpɔ eken ebede, Jesus ɔwɔrɔ aŋwa, ekud ɔbɔ utup isɔŋ chied ekerede Levi (Matthew), etiede ke itie ubɔ-ɔkuk, Jesus ete-e, chiene Min.
28Ndien Levi adadaha, ɔkpɔŋ kpukpru utom nsie, echiene Jesus nte mbed.
29Ndien Levi anam akwa uchɔrɔ ke ufɔk nsie ɔnɔ Jesus, akwa otu mme ɔbɔ etube ma mben efen etietie adia udia ma mmɔ.
30Ndien ndusuk pharisee ma ekpep mbet mme Jew, ɔsuk-e uyo ɔnɔ mbed nsie ete, “nso anam mbufo idiade ŋkpɔ ma iŋwɔŋde ŋkpɔ ma mme idiɔk owo ma mme ɔbɔ utup isɔŋ?”
31Jesus ɔbɔrɔ mmɔ ete, “mmɔ eke enyenede nchɔŋidem iyemke abia ibɔk, ede mben eke ɔdɔŋɔde eyem.
32Nkedie ikuod mme nnenen owo, ede nkedi nnɔ mme idiɔk owo ma mmɔ akabade echid.”
Jesus ekpep Abaŋa Uture Udia
(Matthew 9.14-17; Mark 2.18-22)
33Mmɔ ɔdɔhɔ-e ete, “mbed John ama iture udia afiak anam mkpe ubɔk ke akam, ma mme pharisee suhɔ, ede mbed mfo adia ŋkpɔ ewɔŋ ŋkpɔ kpukpru ini?”
34Ede Jesus ɔbɔrɔ mmɔ ete, “imekeme inam mme ufan ufɔk ndɔ oture udia ke ini ebe ndɔ odude ma mmɔ?
35Ede usen osuk edi eke ibɔde mmɔ ebe ndɔ, mmɔ itoture udia ke mme usen odo.”
36Ndien Jesus otop ŋke ɔnɔ mmɔ ete, “owo chied iwakke ubak ɔbufa ɔfɔŋ ida ikum idian ke akani ɔfɔŋ, koro obufa ɔfɔŋ isaŋake ikikem ma akani ɔfɔŋ, ndien mba-mba iwawaha.
37Ede Jesus otop ŋke afin ɔnɔ mmɔ ete, owo chied-chied isinke obufa ukɔd ke akani ikpa, amanam ntoro obufa ukɔd ama akpa, isasiak akani ikpa, ndien ikpa ibabiara, ukɔd atak.
38Ede ana nte esin obufa ukɔd ke obufa ikpa bak obufa ukɔd ma obufa ikpa ibiara.
39Owo eke edede eke ɔkɔwɔŋde akani ukɔd iyemke ɔbufa, koro idɔdɔhɔ ete ke akani enem akan.”
Currently Selected:
Luke 5: UKQ
Highlight
Copy
Compare
Share
Want to have your highlights saved across all your devices? Sign up or sign in
Ukwa Bible by Beyond Translation is licensed under Creative Commons Attribution-ShareAlike 4.0 License.
