Luke 23
23
Pilate Ebip Jesus Mbime
(Matthew 27.1,2,11-14; Mark 15.1-5; John 18.28-38)
1Ndien kpukpru Ikpɔ owo mme Jew, adadaha ke ɔnyɔŋ, ada Jesus ɔsɔk Pilate adaukara.
2Ndien mmɔ ɔtɔŋɔ isu-nsu ndian Jesus ete, “nnyin ikud owo eken nte atiŋde ikɔ abiad mme owo ke obio nnyin echid, afiak uture mme owo ikpe utup isɔŋ nnɔ akamba adaukara, afiak atiŋ ete, emɔ ide Christ, ma Ɔbɔŋ.”
3Ede Pilate ebip-e ete, “nde ofo ede Ɔbɔŋ mme Jew?” Ede Jesus ɔbɔrɔ-e, ete, “ofo atiŋ.”
4Ndien Pilate ɔdɔhɔ ikpɔ oku ma kpukpru owo, ete, “owo eken idue.”
5Ede mmɔ ɔchɔŋɔ eyire, ete, “owo eken otumere mben owo, ekpep ŋkpɔ ke kpukpru Judea, ɔtɔŋɔde ke Galilee osum mi.”
Jesus Ada Ke Iso Herod
6Ke ini ada usuŋ mme Jew ɔdɔhɔde ete ke Jesus ɔkɔtɔŋɔ ukpep ŋkpɔ ke Galilee. Pilate ebip ete, nte owo eken oto Galilee?
7Ke ini Pilate ɔdiɔŋɔde ete, ke Jesus oto Galilee, eke Herod Antipas akarade, enɔ-e ɔsɔk Herod, koro enye ke idem nsie ama odu ke Jerusalem ke ini odo.
8Ndien ke ini Herod okutde Jesus, enem echid etieti, ke ntak amadɔŋ-e ikud Jesus ke anyan ini, ede ama okop abaŋa-e, ndien eyene idoranyin i-kud nte inamde utube ŋkpɔ.
9Ndien ebip-e uwak-uwak mbime, ede ibɔrɔke ikɔ.
10Ndien mme ikpɔ oku ma mme ekpep mbet ada Jesus ke nkaŋ, odori-e ɔkpɔsɔŋ ikɔ.
11Ndien Herod, ma mben ekɔŋ nsie, anam Jesus ŋkpɔ esuene afiak esin-e nsaha, nte mmɔ esinede-e ɔfɔŋ ubɔŋ ke idem, afiak ɔnɔ-e ɔsɔk Pilate.
12Ndien Herod ma Pilate akabare ede ufan ma chied eken, koro mmɔ ekede mme asua ke usen edem.
Ada Itie Barabbas
(Matthew 27.15-26; Mark 15.6-15; John 18.38-19.16)
13Ndien Pilate okuod mme ikpɔ oku ma mben ukara ma mme Jew afin.
14Ndien edɔhɔ mmɔ, “mbufo imen owo eken idi nte owo eke ɔwɔŋɔrede mme owo echid, ndien ede, nte nduŋɔde ke iso mbufo, nkwe ŋkpɔ chechied ke se mbufo itiŋde idian-e.
15Herod ke idem nsie, ikwe ndudue ke idem Jesus, efiak ɔnɔ-e esɔk nnyin. Ede akpanikɔ Jesus inamke ŋkpɔ eke akpanade ebiere mkpa ɔnɔ-e.
16Ede mmamia-e ufen, nyak-e enyɔŋ.”
17Ede Pilate atiŋ ami koro ke ido mmɔ enyene i-yak owo ufɔk ŋkpɔkɔbi chied ɔnyɔŋ ke kpukpru ini uchɔrɔ passover.
18Ede kpukpru mmɔ amua nkpo ini chied, ete, “da owo eken fep, ede nɔ nnyin Barabbas!”
19Barabbas ekesine ke ufɔk ŋkpɔkɔbi ke ntak ntume okotube ke obio, ma ke uwod owo.
20Ndien Pilate afiak ɔtɔŋɔ ntak atiŋ ikɔ ma mmɔ, koro udɔŋ nsie ekede iyak Jesus.
21Ede mmɔ ɔsuhɔ amua nkpo, ete, “kɔŋ-e ke cross, kɔŋ-e ke cross.”
22Ndien etiŋ ikɔ ma mmɔ ɔyɔhɔ ikata, “nsutɔ idiɔk ŋkpɔ se ufan eken anam? Nkwe ŋkpɔ eke enamde eke odotde mkpa. Ndien mmamia-e, nsana-e nyak.”
23Ede mmɔ aka iso amua mkpo ke ɔkpɔsɔŋ uyo, ete owod-e ke cross, ndien uyom mben owo ma mme ikpɔ oku akan.
24Ndien Pilate ebiere inam se mme owo eyemde.
25Ndien Pilate osio owo eke ekerede Barabbas owo eke esinede ke ufɔk ŋkpɔkɔbi, ke ntak ntume ma uwod owo, eke mmɔ ekeyemde, ede asana Jesus ayak ɔnɔ nte mmɔ ekeyemde.
Ewod Jesus Ke Cross
(Matthew 27.32-44; Mark 15.21-32; John 19.17-24)
26Ndien nte mben ekɔŋ emende Jesus ɔwɔrɔ, mmɔ osobe ma owo chied ekerede Simon, eke otode Cyrene nte esetde iŋwɔŋ, mmɔ omum-e emen cross ɔnɔ-e, echiene Jesus ke edem.
27Ndien ata uwak owo echiene-e, ma mme iban eke ɔfuhɔde afiak atua ke ntak nsie.
28Ede Jesus ɔwɔŋɔre, ete, “iban Jerusalem, ikitua ibaŋa Min, ede itua ibaŋa idem mbufo ma nditɔŋ mbufo.
29Koro, mme usen ɔsuhɔ edi eke mmɔ idɔhɔde, ke ifafan inɔ iban eke inyeneke eyen, nsia eke imanke eyen ma eba eke eyen iwɔpke!
30Ndien mmɔ itɔtɔŋɔ itiŋ ma mme ikpɔ ɔbud, ite, iduɔ itɔ nnyin, iyeyen ɔbud duɔ fuk nnyin!
31Mese mmɔ ɔnɔde owo eke idue ŋkpɔ utɔ ufen eken, ikere abaŋa owo eke eduede ɔkpɔsɔŋ ŋkpɔ nte mmɔ inamde ma owo esie?”
32Mme idiɔk owo iba efen, akasaŋa ma-e aka-a itie eke mmɔ iwotde.
33Ndien nte mmɔ edide edisum itie eke okuode ŋkpɔkpɔrɔ, do ke mmɔ owod-e ke cross, ma mme idiɔk owo chied ke ubɔk nnecha ma chied ke ubɔk ufien.
34Ede Jesus ete, “Ete, fen nɔ mmɔ, siak mmɔ idiɔŋɔke se mmɔ anamde.” Ede, mben ekɔŋ omum ndome edeme ɔfɔŋidem nsie.
35Ndien mme owo ada eche, ndien mme andikara suhɔ anam-e ŋkpɔ nsaha, ete, “aŋyaŋa mben afin, nyaŋa idem Mfo, mese edede Christ, eke Abasi emekde.”
36Ndien mben ekɔŋ asak suhɔ-e, mmɔ asaŋa edinɔ-e idod mmuɔŋ vinegar.
37Ete, “mese edede Ɔbɔŋ mme Jew, ŋyaŋa idem Mfo.”
38Ede ewed ŋwed ɔbukpɔk adian ke etiŋ ibuod, ke usem Greek, ma Latin, ma Hebrew: AMI EDE ƆBƆŊ MME JEW.
39Ndien chied kotu mme idiɔk owo eke ekɔŋde adian Jesus esin-e nsaha, ete, “mese edede Christ? Ŋyaŋa idem mfo-e ma nnyin.”
40Ede idiɔk owo enye oko ɔbɔrɔ, asua ɔnɔ-e, ete, “nente uyeneke ndik unɔ Abasi, siak odude suhɔ ke ukem ntup ikpe?
41Ede nnyin, ke idem nnyin ibɔ ufen eke odotde ma se nnyin inamde, ede owo eken inamke idiɔk.”
42Ndien ete, “Jesus, ti min ke ini utɔŋɔde ida ukara ke obio ubɔŋ mfo.”
43Ede edɔhɔ-e, ete, “ke akpanikɔ se ndɔhɔ fin nte, mfin eken udodu ma ami ke paradise.”
Jesus Akpa
(Matthew 27.45-56; Mark 15.33-41; John 19.25-30)
44Ke ekperede nkanika duopeba uwemoyo, ndien okum ɔfuk kpukpru isɔŋ tutu osum nkanika ita uwemoyo.
45Utun inɔ-ɔ aba unwana, ndien ikpehe temple asiaha iba.
46Ede Jesus amua ke ɔkpɔsɔŋ uyo ete, “Ete, mayak uwem mmi nɔ fin.” Nte etiŋde ntee ama, ekpa.
47Ntoro se, akwa owo ekɔŋ, okutde se otubede, e-nɔ Abasi ekɔm, ete, “ke akpanikɔ owo eken ekede nnenen owo!”
48Ede ke ini otu owo ekedide iche, mmɔ okutde se otubede, mmɔ ɔnyɔŋɔ, etem ubɔk iba ke iboud ke mfuhɔ.
49Ede kpukpru mme ufan eke ekperede Jesus, ma mme iban odo echienede-e tɔŋɔ ke Galilee, ada nsansan, eche se akade iso.
Ɔbuk Jesus Ke Udi Joseph
(Matthew 27.57-61; Mark 15.42-47; John 19.38-42)
50Ke ini odo eden chied eke ekerede Joseph, eke edede owo chied ke otu osop mme Jew, ede eti owo eke anamde se enende.
51Owo eken ikeyimeke ubiere ma e-inam mme ada usuŋ ke osop mmɔ, ke abaŋa Jesus. Joseph okoto Arimathea, obio mme Jew chied ke Judea ami eke etiede ebed obio ubɔŋ Abasi.
52Owo eken, ama aka ebine Pilate, andikara Rome ebeŋe abaŋa okpo Jesus.
53Ndien nte emende-e ɔsuhɔde, ebup-e ke nchɔŋ udua ɔfɔŋ ndien esin-e ke udi eke ekapde ke itiad, eke tɔŋɔ nte ide owo ibuhɔke do.
54Usen odo ekede usen mbeŋeidem, ndien ekpere Sabbath (usen ukpono mme Jew) ekede ini utun ochopde eke Sabbath ɔtɔŋɔde.
55Ede mme iban odo akasaŋade ma-e tɔŋɔ ke Galilee, edian mmɔ ke edem ada okud udi ma nte mmɔ okonumde okpo Jesus.
56Ndien, nte mmɔ ɔnyɔŋde ufɔk, mmɔ akanam mme enem utebe ntɔŋ ma arin. Ndien ke usen Sabbath mmɔ ɔduɔk odudu, nte mbet atiŋde.
Currently Selected:
Luke 23: UKQ
Highlight
Copy
Compare
Share
Want to have your highlights saved across all your devices? Sign up or sign in
Ukwa Bible by Beyond Translation is licensed under Creative Commons Attribution-ShareAlike 4.0 License.
