Luke 22
22
Judas Enyime Itap Jesus Nɔ
(Matthew 26.1-5,14-16; Mark 14.1,2,10,11; John 11.45-53)
1Ekem ke ini uchɔrɔ uyo eke isineke leaven ekperede, eke ekerede uchɔrɔ passover.
2Ndien mme ikpɔ oku ma mme ekpep mbet eyem usuŋ nte mmɔ okpowotde Jesus ke ndube, siak mmɔ abakde mben obio.
3Ede andidiɔk ɔduk ke echid Judas eke mmɔ okuode adian Iscariot, eke edede owo chied ke otu mbed duopeba.
4Ndien ewɔrɔ ekeneme nneme ma me ikpɔ oku ma mme etubom mben ekɔŋ ke temple, abaŋa nte isaŋade ida Jesus iyak inɔ mmɔ.
5Ndien mmɔ enem echid, afiak enyime i-nɔ-e ɔkuk.
6E-nyime afiak eyem eti ifed nte idade ete ufɔk nsie iyak inɔ mmɔ ke ini mben obio idu-e ma-e.
Jesus Adia Akputre Udia Ma Mbed Nsie
7Ndien ekem Usen uyo eke inyeneke leaven, eke Jew iwotde edɔŋ eke mmɔ itade ke uchɔrɔ passover.
8Ndien Jesus osio John ma Peter ete, “ika-a ikɔtum uchɔrɔ passover inum inɔ nnyin, ma nnyin idia.”
9Ede mmɔ ete Jesus, “nde ke mmɔ se eyem nnyin ibeŋeidem?”
10Ndien edɔhɔ mmɔ ete, “nte mbufo idukde Jerusalem, owo eke obiomde abaŋ mmuɔŋ, isosobe ma mbufo ichiene-e iduk ufɔk eke edukde.”
11Idɔhɔ enyene ufɔk ite, Andikpdep etewo, “ubed echen-owo odu ke mmɔ eke ndiade uchɔrɔ passover ma mbed Mmi?”
12“Ndien iwawiri mbufo akamba ubed ɔnyɔŋ, eke mmɔ ɔdiɔŋde ama, ineŋede ŋkpɔ inum do.”
13Nte mmɔ akade, mmɔ okud nte ekɔdɔhɔde mmɔ, ndien mmɔ eneŋede ŋkpɔ onum ɔnɔ idia uchɔrɔ passover.
Jesus Anam Obufa Ediemi Ma Mbed Nsie
14Ndien ke ini ekemde Jesus ma mme apostle duopeba ɔsuhɔde etie-tie ke okpokoro udia.
15Ndien edɔhɔ mmɔ ete, “ama ɔdɔŋ Min ɔkpɔsɔŋ i-dia uchɔrɔ passover eken ma mbufo mbomiso ntɔŋɔ ibɔ ntutuhɔ.
16Ede ndɔhɔ mbufo nte mmadia-aba tutu ewɔrɔ osu ke obio ubɔŋ Abasi.”
17Ekem emen omuŋi e-nɔ ekɔm, edɔhɔ ete, “ida ami ideme ke otu idem mbufo.
18Ede mma ndɔhɔ mbufo nte, tɔŋɔde kami mmɔwɔŋke aba mfri vine eken, tutu obio ubɔŋ Abasi edi.”
19Ndien emen uyo ɔnɔ ekɔm, ebuŋ ɔnɔ mmɔ, ete, “Ami ede ikpɔk idem Mmi, eke enɔde ke ntak mbufo, inam ntee ida iti Min.”
20E-nam suhɔ ntoro ma omuŋi ke ini mmɔ adiade ama, ete, “omuŋi eken ede ɔbufa ediemi ke eyip Mmi, eke ɔduɔhɔde ke ntak mbufo.
21Ede che-che, owo eke idade Min inɔ odu mi ma Ami ke okpokoro udia eken.
22Ede ke akpan Ami, Eyen Owo mkpakpa nte Abasi okonumde, ede imafanke inɔ owo eke idade min inɔ!”
23Ndien mmɔ ɔtɔŋɔ i-bip ke otu idem mmɔ ete, ne-ewo ke otu mmumɔ inam ŋkpɔ eken.
Mme Mbed Efaŋa Abaŋa Owo Eke Ikponde Ikan
24Ke ini ebede mme mbed ɔtɔŋɔ mfaŋa ke otu idem mmɔ, ete, ne-ewo ke otu nnyin ikpon ikan.
25Ede Jesus ɔdɔhɔ mmɔ ete, “mbɔŋ ererimbon akara uben mmɔ, mben odo eyenede unen i-kara okuod idem mmɔ mben eke aŋwamde owo.
26Ede idaha ntoro ma mbufo, ede yak eke okponde akan ke otu mbufo akabare etie nte odup eyen, ma eke etiede nte etubom akabare etie nte anam utom.
27Koro ne-ewo okpon akan, eke etiede ke itie udia, mme eke anamde utom? Nte idaha etie ke itie udia okpon akan? Ede Ami ndu ke otu mbufo nte owo eke anamde utom.”
28“Ede mbufo ide mben eke ɔchɔŋɔde ada ma Ami ke idome Mmi.
29Nte Ntete Mmi ekemekde Min nde Ɔbɔŋ ke obio ubɔŋ nsie, suhɔ ntoro se Ami nnɔ mbufo obio ubɔŋ.
30Ke ntoro se mbufo idia ŋkpɔ ifiak iŋwɔŋ ŋkpɔ ke okpokoro Mmi ke obio ubɔŋ mmi. Ma itie ke ifum ubɔŋ ikpe-ikpe inɔ esien Israel duopeba.”
Jesus Atiŋ Ete Ke Peter Ikakaŋ-e
(Matthew 26.31-35; Mark 14.27-31; John 13.36-38)
31Ede Jesus ete, “Simon Peter, Simon, Simon, kpaŋ utɔŋ, andidiɔk ebeŋe unen idome fin nche, ma ebahade fin ma ami, nte ɔtɔ iŋwɔŋ abahade ikuokuod ma ifed nsie.
32Ede mɔ ɔbɔŋ akam nnɔ fin nte, bak ofo uture inum min ke akpanikɔ ke ini ofo akabare echiene min, ofo aŋwam nditɔŋ usɔ ma mmɔ aka iso onum min ke akpanikɔ.”
33Ede Peter ete, “Ɔbɔŋ, mmeyime ichiene fin ke ŋkpɔkɔbi ma ke mkpa.”
34Ede Jesus ete, “Peter, ndɔhɔ fin nte, ɔkikɔ imɔ kpɔke itudoyo eken tutu ofo akaŋ min ikata ete ke emɔ idiɔŋɔke Min.”
35Ndien Jesus ebip mbed nsie ete, “ke ini nkosiode mbufo ndɔŋ utom ke nsioŋo-nsioŋo obio nte ikikama ekpad ɔkuk, ma ekpad isaŋ, ikpa ukod afin, iminana ŋkpɔ?” Ndien mmɔ ete, “nnyin inanake ŋkpɔ chied-chied.”
36Ndien edɔhɔ mmɔ ete, “ede kami owo eke enyenede ekpad ɔkuk yak emen, afiak ada ekpad isaŋ suhɔ, ede owo eke inyeneke ikwa eyam ɔfɔŋidem nsie edep chied.
37Koro ndɔhɔ fin nte, se mmɔ ewed-de abaŋa Min ete ami nsine kotu mme abiad ibed ana nte ɔwɔrɔ osu koro mme ŋkpɔ eke abaŋade min iwɔwɔrɔ isu.”
38Ndien mmɔ ete, “Ɔbɔŋ, che ikwa iba mi.” Ndien edɔhɔ mmɔ ete, “odo ekem ikitiŋ aba ntoro afin.”
Jesus Ɔbɔŋ Akam Ke Iŋwɔŋ Esa
(Matthew 26.36-46; Mark 14.32-42; John 18.1)
39Ekem Jesus ɔwɔrɔ ke Jerusalem aka ke ɔbud Olive nte ido nsie edede, mbed nsie echiene aka-a.
40Ke ini esumde do edɔhɔ mmɔ ete, “ibɔŋ akam ibeŋe ite mmumɔ idɔduk ke idome.”
41Ndien esik ɔkpɔŋ mmɔ ke idaha utop itiad chied, e-tɔŋɔ edɔŋ ɔ-bɔŋ akam.
42Ete, “Ete, mese eyimede, men omuŋi ntutuhɔ eken fep nɔ Min, idede nte Ami nkerede, yak ede nte ofo eyimede.”
43Ndien angel oto ke ɔnyɔŋ ɔbiɔŋɔde-e ke iso ma echɔŋɔ-e idem.
44Ndien nte edude ke ɔkpɔsɔŋ mfina, ekaiso ɔbɔŋ akam ɔkpɔsɔŋ, ndien eyiyo nsie akabare etie nte ntɔi eyip eke ɔduɔde ke isɔŋ.
45Ndien nte edahade ke akam, edi ebine mbed nsie, ede okud nte mmɔ adiede idap ke ukud.
46Ndien ete mmɔ, “ntak-e mbufo idiede idap? Nte mbufo ideme, ibɔŋ akam bak mbufo iduk ke idome.”
Mmɔ Ɔmum Jesus
(Matthew 26.47-56; Mark 14.43-52; John 18.1-11)
47Nte Jesus akade iso atiŋ ikɔ ma mbed, che-che, mme otu owo; ma enyeken ekuode Judas, chied ke otu mbed nsie, akada ma mmɔ ndien esaŋa ekpere ekɔm Jesus ma ntum inua.
48Ede Jesus ete-e, “Judas, nde nte atap eyen owo ɔnɔ mkpa ke ekɔm ntum inua?”
49Ndien mbed odo odude ekpere, ekud se otubede, ete, “Ɔbɔŋ, nde nnyin ikpi-e ke ikwa?”
50Ede chied ke otu mmɔ ekpi eyen ufɔk akwa oku, ndien e-sube utɔŋ nnecha osio.
51Ede Jesus ɔbɔrɔ ete, “kunam aba ntoro.” Ndien nte etukde-e utɔŋ ekɔk-e.
52Ndien Jesus ɔdɔhɔ ikpɔ oku, ma mme etubom ukpeme temple, ma mme ikpɔ owo obio eke edide ebine-e, ete “imɔwɔŋɔ idi, ma ikwa ma eto nte ibinede inɔ?
53Ede nkodu ma mbufo kpukpru usen ke osop temple mkpep mme owo ŋkpɔ, mbufo ikanyanke ubɔk imum Min. Ede ini mbufo oduomi, ma ukara okum.”
Peter Akaŋ Jesus
(Matthew 26.69-75; Mark 14.66-72; John 18.13-18,25-27)
54Ndien mben ekpemede temple omum Jesus, mmɔ ada-e ɔwɔrɔ afiak emen ɔduk ke ufɔk akwa oku. Ede Peter echiene-e edem-edem.
55Ndien ke ufɔk akwa oku ndusuk owo abaraikaŋ ke ufuɔd ekwere ede mmɔ etetie itie chied ma idem mmɔ ofiop, Peter echiene etetie ke otu mmɔ.
56Ede eyen ufɔk aŋwan chied, eke okutde Peter nte etiede ekpere ikaŋ, e-wuk anyin eche-e ete, “Owo eken okodu suhɔ ma-e.”
57Ede e-kaŋ, ete, “Aŋwan, Ami ndiɔŋɔke-e.”
58Ndien ke iyeyen ini ebede owo afin, okud-e, ete, “ofo eken asaŋa ma mmɔ.” Ede Peter, ete, “Eden, idaha Ami!”
59Ndien ke ŋkpɔ nte ŋkanika chied ebede, owo afin, ɔchɔŋɔ eyire ete, “ke akpanikɔ, owo eken akasaŋa ma-e, ede suhɔ owo Galilee.”
60Ede Peter ete, “Eden, ndiɔŋɔke se atiŋde!” Ke ikpad odo chied, nte ekade iso atiŋ, ɔkikɔ unen ɔkpɔk.
61Ede Ɔbɔŋ, ɔwɔŋɔde eche Peter, ndien Peter eti ikɔ Ɔbɔŋ, nte ekɔdɔhɔde-e, “mbomiso ɔkikɔ ikpɔk, ke itudoyo u-kakaŋ Min ikata.”
62Ntoro se Peter ɔwɔrɔ aŋwa, e-tua eti-eti.
Mmɔ Asak Jesus Afiak Amia-e
(Matthew 26.67,68; Mark 14.65)
63Ede mben ukpeme odo omumde Jesus esin-e nsaha afiak amia-e.
64Ede nte mmɔ adade ŋkpɔ ɔfuk-e anyin, mmɔ amia-e ke iso ebip-e mbime, ete, “asiak uduak siak! Ne enyewe ɔtɔ fin itai?”
65Ndien mmɔ atiŋ uwak-uwak ikɔ isue adian-e.
Jesus Ada Ke Iso Ikpe Ma Mme Ikpɔ Owo Mme Jew
(Matthew 26.57-68; Mark 14.61-64; John 18.12-14,19-24)
66Ede ke oyo echerede, mme ikpɔ owo ke obio obono itie chied, mme ikpɔ oku ma mme ekpep mbet, ndien mmɔ emen-e oduk ke akamba osop mmɔ ete.
67“Mese edede Christ, tiŋ nɔ nnyin.” Ede ebɔrɔ mmɔ nteken ete, “mese ntiŋde nnɔ mbufo, mbufo imikemeke-keme inum ke akpanikɔ.
68Ede mese mbipde mbufo, mbufo imima-a ibɔrɔ Min mme i-yak Min nka.
69Ede tɔŋɔde ka-mi, Ami, Eyen Owo ntetie ke ubɔk nnecha ke odudu Abasi eke Okponde akan.”
70Ndien kpukpru mmɔ ete, “Nne Ofo ede Eyen Abasi?” Ede ebɔrɔ mmɔ ete, “Ofo ɔdɔhɔ ete ke Ami nde.”
71Ede mmɔ ete, “nenso ede ntak nnyin ifiakde iyem ikɔ ntienche? Koro nnyin imada utɔŋ nnyin ikop se ɔwɔrɔd-e ke inua nsie.”
Currently Selected:
Luke 22: UKQ
Highlight
Copy
Compare
Share
Want to have your highlights saved across all your devices? Sign up or sign in
Ukwa Bible by Beyond Translation is licensed under Creative Commons Attribution-ShareAlike 4.0 License.
