Luke 24
24
Jesus Odu Uwem
(Matthew 28.1-10; Mark 16.1-8; John 20.1-10)
1Ede ke akpa usen udua, ke tuhi usen ubɔk, mmɔ asaŋa edi ke udi, mmɔ asaŋa ma enem ufuk arin eke mmɔ akanamde.
2Ndien mmɔ okud ete ke mmɔ amakpad itiad osio ke udi.
3Ede nte mme iban odukde, mmɔ ikwe aba okpo Ɔbɔŋ Jesus.
4Nte mmɔ adade ke mben udi ma mkpaidem ke utɔ ŋkpɔ eken, ndien che-che, iden iba eke ɔfɔŋidem mmɔ esemdesem ada mmɔ ke nkaŋ.
5Ndien nte ndik anamde mmɔ, mmɔ otuk iso mmɔ ke isɔŋ, mmɔ ɔdɔhɔ ete, “nenso anam mbufo iyemde odu uwem kotu mme akpa mkpa?
6Ede idue-e mi, ama eseri, iti nte ekatiŋde ma mbufo ke ini mbufo idude ma-e ke Galilee.
7Ete, idada Eyen Owo isin mme idiɔk owo ke ubɔk ma mmɔ owod-e ke cross, ndien ke ɔyɔhɔ usen ita eseri ke mkpa.”
8Ndien mmɔ eti mme ikɔ nsie.
9Nte mmɔ ɔnyɔŋɔde edi ke udi, mmɔ atiŋ kpukpru se okotube ke udi ɔnɔ mme mbed duopechied eken ma mben afin eke okodude do. 10Ndien mmɔ ekede, Mary Magdalene, ma Joanna, ma Mary eka James, ma mme iban afin odude ma mmɔ, mmɔ atiŋ mme ikɔ eken ɔnɔ mme apostle.
11Ede mme ikɔ eken etie nte ndisime ikɔ ke utɔŋ mmɔ, ndien mmɔ iyimeke i-num ke akpanikɔ.
12Ede Peter, adaha ini chied, ɔfɔhɔ aka udi, ndien enuhɔ eche, okud nchɔŋ udua ɔfɔŋidem odo kpɔd. Ndien adaha ɔnyɔŋ ufɔk nsie, idem akpa-e se otubede.
Jesus Awiri mbed Iba Idem
(Mark 16.12,13)
13Ede ke usen odo suhɔ, owo iba ɔkɔnyɔŋ ayan usuŋ obio ekerede Emmaus, eke oyomde usuŋ ɔkpɔŋ Jerusalem ke ŋkpɔ nte itiad itiahaba.
14Ndien mmɔ atiŋ ikɔ ma chied eken abaŋa kpukpru se okotubede.
15Ede ŋkpɔ otube, nte mmɔ enemede nneme esie, Jesus ke idem nsie, asaŋa ekpere mmɔ, adasaŋa ma mmɔ.
16Ede anyin ikatarake mmɔ, eke mmɔ ɔkpɔdiɔŋɔde-e.
17Ndien edɔhɔ mmɔ ete, “nenso se mbufo ineme ma idem mbufo nte mbufo isaŋade ke usuŋ, iden iba ada eche ma mfuhɔ echid?”
18Owo chied ekerede Cleopas ɔbɔrɔ-e ete, “ede ɔbufa owo ke Jerusalem udiɔŋɔke se akade iso ke mme usen eken?”
19Ede e-bɔrɔ mmɔ ete, “nenso oduodo? Mmɔ ete-e, mme ŋkpɔ abaŋade Jesus eyen Nazareth, ekedede, asiak uduak Abasi ma odudu ke utom ma ikɔ ke iso Abasi ma otu owo.
20Ma nte mme ikpɔ oku ma mme akama ukara ayakde-e ɔnɔ ikpe mkpa afiak ɔkɔŋ-e ke cross.
21Ede nnyin ima-inyene idoranyin ke iŋyayaŋa Israel. Ede inamke, mfin anam usen ita mme ŋkpɔ eken okotubede.
22Ede ke akpanikɔ, ndusuk iban ke otu nnyin anam nnyin ŋkpɔ mkpaidem, siak mmɔ akakade udi ke ata tuhi usen ubɔk itie eke okpo Jesus akanade.
23Ede mmɔ ikwe okpo nsie, ndien mmɔ edidɔhɔ nnyin ke mmumɔ imokud angel ke nkukud ami ɔdɔhɔde mmɔ ete odu ke uwem.
24Ede mben ikodude ntoro adaha aka udi okokud ke ede ntoro, nnenen nte iban odo akatiŋde, ede mmɔ ikekwe-e.”
25Ndien Jesus ɔdɔhɔ mmɔ ete, “o mbufo mben ndisime ɔchɔŋ mbufo ɔkpɔsɔŋ inum kpukpru se mme asiak uduak Abasi akatiŋde ke ŋwed Abasi!
26Nte ikadaha nnenen ŋkpɔ ete ke Christ i-bɔbɔ mme ufen eken, ma eduk ke itie ubɔŋ nsie?”
27Ndien e-tɔŋɔ ke Moses ma kpukpru mme asiak uduak Abasi, atad ɔnɔ mmɔ abaŋade idem nsie se ŋwed Abasi kpukpru enemede abaŋa-e.
Anyin Aŋwaŋa Mbed Nsie
28Ndien Jesus ma mbed nsie iba asaŋa ekpere obio eke mmɔ akakade, ede Jesus anam nte ke itie e-kade odu ke iso.
29Ede mmɔ ete-e, “tie ma nnyin koro mbubreyo edi ndien utun ochop.” Ndien eduk eketie ma mmɔ.
30Ndien nte etiedetie edia ŋkpɔ ma mmɔ, emen bread, e-bɔŋ akam ɔdiɔŋ, ndien e-sube ɔnɔ mmɔ.
31Ndien anyin mmɔ atara, ede mmɔ ɔdiɔŋɔ-e, echop mmɔ kanyin.
32Ede mmɔ atiŋ ma idem mmɔ, “nte echid nnyin ikasake ma idadechied nte e-tiŋde ikɔ ma nnyin kusuŋ, nte etad-de ŋwed Abasi awiri nnyin?”
33Ntoro se mmɔ ɔdɔk ɔnyɔŋ usen odo suhɔ, mmɔ ɔnyɔŋɔ aka Jerusalem, mmɔ okud mme mbed duopechied ataŋde idem mmɔ ɔbɔk, ma mben afin eke odude ma mmɔ.
34Ete, ke akpanikɔ “Ɔbɔŋ eseri ke mkpa, koro Simon okud-e!”
35Ede mmɔ eneme ŋkpɔ eken ke usuŋ, ma nte akawiride mmɔ idem ke ini esubede bread ɔnɔ mmɔ.
Jesus Awiri Mbed Nsie Idem
(John 20.19-23; Acts 1.3-5)
36Ndien nte mmɔ akatiŋde mme ŋkpɔ eken, Jesus ke idem nsie ɔwɔrɔ ada ke ufuɔd mmɔ ete, “emem odu ma mbufo.”
37Ede ndik ma nnyek idem anam mmɔ, ede mmɔ ekere ke mmumɔ ikekud ekpo.
38Ede edɔhɔ mmɔ ete, “ntak-e ndik anamde mbufo, ma ntak eke eyikhe ɔdukde ke echid mbufo?
39Che Min ubɔk ma ukod, ke ede Ami. Tuŋ ma okud, koro spirit inyeneke ɔbuk ma ɔkpɔ nte ikutde Min nyenede.”
40Ke ini etiŋde ama, ewiri mmɔ ubɔk ma ukod nsie.
41Ede mmɔ eke ebede iso inumke ke akpanikɔ ke ntak inemechid, ma mkpaidem, ete mmɔ, “imeyene se owo adiade mi?”
42Ndien mmɔ ɔnɔ-e ikpid iyak chied eke etemde ma otu arin ɔkwɔk.
43E-bɔ ata ke iso mmɔ.
Ikɔ Abasi Ayarade
44Ndien edɔhɔ mmɔ ete, “mme ikɔ eken se nkatiŋ ma mbufo ke ini ŋkodude ma mbufo nte, ke kpukpru se mmɔ eke ewed-de abaŋa min ke ŋwed mbet Moses, ma mme asiak uduak, ma Psalms, ana ɔwɔrɔ awiri idem.”
45Ede enam ŋwed Abasi aŋwaŋa mmɔ.
46Ndien ɔdɔhɔ mmɔ ete, “ntoro se ekewed: Christ ibɔbɔ ufen, ifiak iseri ke mkpa ke ɔyɔhɔ usen ita.
47Ndien ema ewed, ikabare echid ŋkpɔŋ idiɔk ŋkpɔ ma mfen-nɔ ide ukwɔrɔikɔ ke enyiŋ nsie inɔ kpukpru mme idud, tɔŋɔde ke Jerusalem.
48Mbufo idede nchiense inɔ kpukpru owo ke ŋkpɔ eken.
49Ndɔdɔŋ Ewɔŋɔ Ntete mmi nsɔk mbufo, ede itie ke obio eken tutu edisana spirit oto ke ɔnyɔŋ edi.”
Jesus Afiak Ɔnyɔŋ Ke Ɔnyɔŋ
(Mark 16.19,20; Acts 1.9)
50Ede ada mmɔ isaŋ tutu ekpere Bethany, ndien emeŋede ubɔk nsie ke ɔnyɔŋ, ɔdiɔŋ mmɔ.
51Edikem nte ediɔŋde mmɔ, asik ɔkpɔŋ mmɔ, ndien emen-e ɔdɔk ke ɔnyɔŋ.
52Ede mmɔ, atuak ibuod ɔnɔ-e, mmɔ afiak ɔnyɔŋ Jerusalem ma akamba idaraechid.
53Ndien kpukpru mmɔ odu ke temple, otoro Abasi. Amen.
Currently Selected:
Luke 24: UKQ
Highlight
Copy
Compare
Share
Want to have your highlights saved across all your devices? Sign up or sign in
Ukwa Bible by Beyond Translation is licensed under Creative Commons Attribution-ShareAlike 4.0 License.
