Luke 19
19
Jesus Edi Ke Ufɔk Zacchaeus
1Ekem Jesus ma mbed nsie ɔduk ke obio Jericho asaŋa ebe.
2Ndien owo chied do ekerede Zacchaeus odu do, ede etubom mme ɔbɔ etube, ede suhɔ owo inyene.
3Ndien eyem usuŋ nte esaŋade okud Jesus, ma ediɔŋɔ utɔ owo eke Jesus edede, ede ikanke ke ntak uwak owo, siak edede ikpid owo.
4Ndien efɔhɔ ebe iso ɔkɔdɔk eto sycamore ete ikud Jesus, koro isaŋade ke usuŋ odo ibe.
5Ndien ke ini Jesus osumde itie odo, emeŋede anyin ke ɔnyɔŋ ɔdɔhɔ “Zacchaeus ete sɔsɔp suhɔre di, koro nyem idu ke ufɔk mfo mfin.”
6Zacchaeus ɔsuhɔde usɔp-usɔp ada Jesus ɔnyɔŋ ufɔk ma idarechid.
7Ede ke ini mmɔ okutde, kpukpru mmɔ ɔsuk uyo ete, “aka akanana ma idiɔk owo.”
8Ede Zacchaeus ada ke iso Ɔbɔŋ, ete, “che, Ɔbɔŋ, nnɔnɔ mme ubuene ubak inyene mi, mese ŋkɔbɔde owo ŋkpɔ ke ŋkan ubɔk, nsosio usiene utum ikanaŋ.”
9Ede Jesus ɔdɔhɔ-e ete, “Mfin eken Abasi aŋyaŋa fin ma ufɔk mfo, siak e-dede ubon Abraham.
10Koro ami eyen owo nkedi iyem ma iŋyaŋa mben eke adade nsansan ma Abasi.”
Mbuk Abaŋade Nditɔŋ Ufɔk Ita
(Matthew 25.14-30)
11Ndien nte mme otu owo akpaŋde utɔŋ okop kpukpru ikɔ eke Jesus atiŋde, etiŋ ke ŋke, koro ekpere obio Jerusalem ede mme owo ekere ete obio ubɔŋ Abasi iwɔwɔrɔ iwiri idem ini chied ke ini Jesus ɔdukde obio.
12Ndien e-dɔhɔ ete, “Akpan owo chied ama odu eke, akade isaŋ ke anyan idud i-bɔ unen ke ubɔk akamba adaukara ma ekara obio nsie, nte ebɔde efiak ɔnyɔŋ edi ikara.
13Mbomiso edaha e-kuod nditɔŋ eyen ufɔk nsie owo duop, e-nɔ mmɔ ɔkuk duop, ekedede ɔkuk utom ɔfiɔŋ ita, ete mmɔ ikama iyam udua tutu nyɔŋ ndi.
14Ede mben obio nsie asua-e, mmɔ ɔdɔŋ mme isuŋ utom echiene ke edem ete, nnyin iyemke owo eken akara nnyin.”
15“Ede akamba adaukara anam ede andikara ndien enyɔŋ edi nte adaukara, ekuod nditɔŋ eyen ufɔk nsie odo eke ayakde ɔkuk ɔnɔ mmɔ ma ediɔŋɔ udori eke mmɔ akadiade ke mbubehe mmɔ.
16Akpa eyen ufɔk edidɔhɔ ete, Ete ufɔk, ɔkuk duop odore ke iso ɔkuk mfo.
17Ndien edɔhɔ ete, ɔmɔtum anam eti eyen ufɔk sia akanamde akpanikɔ ke iyeyen ŋkpɔ, mmɔnɔ fin unen ikara ke obio duop.
18Udiana eyen ufɔk edidɔhɔ ete, Ete ufɔk, ɔkuk ition odore ke ɔkuk mfo.
19Ndien edɔhɔ ete, mmɔnɔ fin unen ikara ke obio ition.”
20“Ndien ɔyɔhɔ eyen ufɔk ita edidɔhɔ ete, Ete ufɔk, che ɔkuk mfo mi, eke ŋkɔbupde ke ubak ɔfɔŋ nnum.
21Koro nkababak fin siak ofo edede owo nchɔŋido. Akataŋ se ukonumke afiak ɔdɔk se ukɔtɔ-ɔ.
22Ede edɔhɔ owo odo ete, ndada ikɔ inua mfo mkpe ikpe nnɔ fin, ofo idiɔk owo. Ama ɔdiɔŋɔ ete nde owo nchɔŋido eke ntaŋde se mme nkonumke, ndɔkde se nkɔtɔ-ɔ.
23Nde nso ede ntak ukemenke ɔkuk mi usin ke itie unum ɔkuk, mkpimbɔ iso ɔkuk ma udori ke ini nyɔŋde ndi.”
24“Ndien edɔhɔ mmɔ eke adade ekpere ete, ibɔ-e ɔkuk okoro imen inɔ owo eke enyenede ɔkuk duop.
25Ndien mmɔ ete-e, Ete ufɔk, enyeyene ɔkuk duop.
26Ndɔhɔ mbufo nte inɔnɔ kpukpru owo eke enyenede, ede ibɔbɔ owo eke iyeneke se ekeyenede.
27Ede da mme asua mmi eke iyemke nkara mmɔ, iwod mmɔ ke iso mmi.”
Jesus Ɔduk Jerusalem Nte Ɔbɔŋ
(Matthew 21.1-11; Mark 11.1-11; John 12.12-19)
28Ndien ke ini Jesus atiŋde ikɔ eken ama, ebom mmɔ iso aka ke obio Jerusalem ma mbed nsie.
29Ekem, ke ini ekperede Bethphage ma Bethany, ke ɔbud eke ekerede ɔbud Olive, esio mbed nsie iba.
30Ete, “Ika-a ikeduk ke obio iŋwɔŋ eke asakde iso eche mbufo, ndien ke ini idukde mbufo ikokud eyen enaŋ mbakara (ass) eke mmɔ eyiride tɔŋɔ nte ide owo chied idoroke-e ke edem nsie, itad-e ida idi.
31Ndien owo eke edede eke ebipde mbufo, nde nsonam mbufo itade-e mbufo idɔhɔ ite Ɔbɔŋ eyem-e.” 32Ntoro se mme mbed odo aka okokud suhɔ nte Jesus ɔkɔdɔhɔde mmɔ.
33Ede nte mmɔ atade eyen enaŋ mbakara odo, mben eyenede ɔdɔhɔ mmɔ ete, “nde nso anam itade eyen enaŋ mbakara?”
34Ndien mmɔ ɔdɔhɔ ete, “ɔbɔŋ eyem-e.”
35Ndien mmɔ ada-e ɔsɔk Jesus, mmɔ afiak ada ɔfɔŋidem mmɔ ɔfuk eyen enaŋ mbakara ke edem emen Jesus odori.
36Ede nte edorede aka iso mmɔ ebri ɔfɔŋidem mmɔ ke ɔkpɔ usuŋ.
37Ekem ke ini ekperede isum mben ɔbud Olive, kpukpru mbed ɔtɔŋɔ idad echid ntoro Abasi ke ɔkpɔsɔŋ uyo kabaŋa kpukpru utom odudu eke mmɔ okutde.
38Ete, “Itoro enyene ɔbɔŋ eke edide ma odudu Abasi. Emem odu ma Abasi ke ɔnyɔŋ yak ubɔŋ odu suhɔ ma Abasi eke oduŋde ke ɔnyɔŋ!”
39Ndien ndusuk mme Pharisee eke asaŋade ma otu owo ɔdɔhɔ-e ete, “Andikpep, sua nnɔ mbed mfo itiŋ ntoro.”
40Ede ebɔrɔ mmɔ ete, “ndɔhɔ mbufo nte mese mben eken odopde uyo, mme itiad imuamua nkpo itoro min.”
Jesus Atua Abaŋa Jerusalem
41Ke ini Jesus esaŋade ekpere obio Jerusalem, ekud, etɔŋɔ etua eyed abaŋa obio ma mben obio.
42Ete, mbufo mben Jerusalem, “mese ikpɔdiɔŋɔ usen eken, ma ŋkpɔ eke anamde fin odu ke emem! Ede kami mmɔ odube fin ke anyin.
43Koro mme usen idedi eke mme asua mfo ibupde mbene ikanade fin, ndien mmɔ akan fin ɔkuk afiak abara fin ke kpukpru itie.
44Ndien mmɔ iwowuri obio mfo inum ke isɔŋ ifiak iwod kpukpru mben obio mfo eke esinede fin ke idem, ndien mmɔ imɔkpɔŋke itiad chied ke ɔnyɔŋ itiad eken koro ofo udiɔŋɔke ini eke Abasi idide idiche fin.”
Jesus Ɔduk Ke Temple
(Matthew 21.12-17; Mark 11.15-19; John 2.12-25)
45Ndien Jesus eduk ke temple, etɔŋɔ ibin mben ayamde mme unam eke edade anam mme ŋkpɔ uwa.
46Edɔhɔ mmɔ ete, “ema ewed ete, ufɔk mmi ekede ufɔk akam ede imanam-e akabare ede ufɔk mben inɔ.”
47Ndien ekpep mmɔ ŋkpɔ kusen-kusen ke temple. Ede ikpɔ oku ma mme ekpep mbet ma mme etubom mben obio eyem usuŋ nte mmɔ okpowotde-e.
48Ede mmɔ ikwe nte mmɔ akpanamde siak ɔdɔŋde kpukpru owo i-kop ikɔ nsie.
Currently Selected:
Luke 19: UKQ
Highlight
Copy
Compare
Share
Want to have your highlights saved across all your devices? Sign up or sign in
Ukwa Bible by Beyond Translation is licensed under Creative Commons Attribution-ShareAlike 4.0 License.
