Luke 20
20
Ikpɔ Owo Mme Jew Ebip Abaŋa Odudu Jesus
(Matthew 21.23-27; Mark 11.27-33)
1Usen chied, nte Jesus ekpepde ŋkpɔ ke temple ma nte ekwɔrɔde Etimbuk ɔnɔ mmɔ, ikpɔ oku ma mme ekpep mbet adiana ma mme ikpɔ owo ɔbiɔŋɔ unen eke Jesus enyenede.
2Mmɔ ɔdɔhɔ-e, ete, “tiŋ nɔ nnyin ada nsutɔ unen anam mme ŋkpɔ eken? Newo ɔnɔ fin utɔ unen eken?”
3Ndien ebɔrɔ mmɔ ete, “Ami mbebip mbufo mbime suhɔ, ibɔrɔ Min.
4Uduɔk mmuɔŋ John okoto Abasi mme okoto owo, ibɔrɔ Min?”
5Ede mmɔ ɔtuk-utɔŋ ete, “mese nnyin idɔhɔde ite, okoto Abasi idɔdɔhɔ nnyin ite, nde nsonam mbufo ikonumke kakpanikɔ ndien?
6Ede nnyin idɔhɔ ite, okoto owo mben obio itɔtɔŋi nnyin ke itiad, koro mmɔ onumde ete John ekede asiak uduak Abasi.”
7Ntoro se mmɔ ɔbɔrɔ ete, nnyin idiɔŋɔke itie otode.
8Ndien Jesus ɔbɔrɔ mmɔ ete, “ami nde ntiŋke nnɔ mbufo unen eke ndade nnam mme ŋkpɔ eken.”
Ŋke Abaŋade Idiɔk Ɔdiɔŋ Iŋwɔŋ
(Matthew 21.33-46; Mark 12.1-12)
9Ndien Jesus otop ŋke ete, “owo chied ekenyene iŋwɔŋ grape, eyak ɔnɔ mme ɔtɔ iŋwɔŋ edaha aka idud efen ekebihi do.
10Ndien ekem ini idɔk edɔŋ eyen ufɔk ɔnɔ mme ekpeme iŋwɔŋ, ma mmɔ ɔnɔ-e udeme mfri iŋwɔŋ grape nsie, ede mme ekpeme iŋwɔŋ amia-e afiak ebin-e enyɔŋ ubɔk ikpu.
11Ndien enyene iŋwɔŋ grape afiak osio eyen ufɔk efen ɔdɔŋ, mmɔ amia-e suhɔ afiak anam-e ŋkpɔ esuene, ebine-e enyɔŋ ubɔk-ikpu.
12Ede efiak osio ɔyɔhɔ eyen ufɔk ita ɔdɔŋ, ndien mmɔ ɔnɔ-e unan osio ke iŋwɔŋ ɔduɔk.”
13“Enyene iŋwɔŋ ɔdɔhɔ, nnam didie? Ndɔdɔŋ eyen ima mmi, iso ifan-e mmɔ ikpokpono-e.
14Ede ke ini mme ɔtɔ iŋwɔŋ okutde-e, mmɔ ɔtuk utɔŋ ke otu idem mmɔ ete, nnyin imokud adia akpa nsie, idi, inam nnyin iwod-e ma nnyin ida ŋkpɔ akpa-mkpa inyene.
15Ndien mmɔ ebin-e osio ke iŋwɔŋ grape, owod suhɔ-e. Nenso ndien se enyene iŋwɔŋ vine inam ma mmɔ?
16Enye idedi iwod ɔtɔ iŋwɔŋ odo ifiak iyak iŋwɔŋ grape inɔ mben efen.” Ke ini mmɔ okopde, mmɔ ete, Abasi akan. “Abasi imayake ŋkpɔ eken utube!”
17Ndien Jesus ɔwuk anyin eche mmɔ, afiak ɔdɔhɔ mmɔ ete, “ikɔ eken ewed-de ɔwɔrɔ didie.
Itiad eke mme ɔbup ufɔk echinde
Akabare ede etubom inuk?
18Kpukpru mben ɔduɔde ke itiad esie enuehe nditɔ-nditɔ, ede owo eke edede eke itiad esie ɔduɔde ɔtɔ ikɔkɔk-e nte obu.”
19Ndien mme ekpep mbet ma mme ikpɔ oku eyem imum-e ke ini odo, ede mmɔ abak mben obio, sia mmɔ ɔdiɔŋɔde ete ŋke nsie abaŋa nmumɔ.
Mbip Abaŋade Ubɔ Utup
(Matthew 22.15-22; Mark 12.13-17)
20Ndien mme ikpɔ oku ma mme ekpep mbet atiŋ anyin ekpeme-e, koro mmɔ ekeyem iyak-e nnɔ adaukara Rome, ntoro se mmɔ ɔdɔŋ mben eke anamde idem nte mmumɔ ide nti owo. Ede mmɔ ede ata mben uyeb eke eyemde imum Jesus nte itiŋde idiɔk ikɔ.
21Ede mmɔ ebip-e ete, “Andikpep, nnyin imɔdiɔŋɔ ite ke ofo atatiŋ afiak ekpep owo ke usuŋ eke enende, uteŋeke suhɔ owo anyin, ede eteme owo usuŋ Abasi ke akpanikɔ.
22Tiŋ nnɔ nnyin, kami nte mbet nnyin edede, mede unen mme idaha owo ikpe ude isɔŋ nnɔ adaukara Rome?”
23Ede ekut ŋkari mmɔ, efiak ɔdɔhɔ mmɔ ete, “nso anam idomede min.
24Iwiri min coin Rome. Nde ŋkpukpɔŋ enyewo ma se ede se mmɔ adian do? Ndien mmɔ ɔbɔrɔ ete, ede ŋkpukpɔŋ ma enyiŋ adaukara Rome.”
25Ndien edɔhɔ mmɔ ete, “imen se inyenede adaukara Rome inɔ-e, inɔ suhɔ Abasi se edede eke Abasi.”
26Ndien mmɔ ikanke ibɔ-e ikɔ ke inua ke iso mben obio, idem akpa mmɔ ke ibɔrɔ eke Jesus ɔbɔrɔde mmɔ, mmɔ ikanke aba uyo isio.
Abasi Mme Odu Uwem
(Matthew 22.23-33; Mark 12.18-27)
27Ede ndusuk mme Sadducee, suhɔ mben odo eninide ete ke iseri ke mkpa idue, ndien mmɔ ebip-e.
28Ete, “Andikpep, Moses ama ewed ete, mese eyen ete owo ɔdɔde aŋwan ndien akpa ɔkpɔŋ ke ini inyeneke eyen, yak owo odo ada aŋwan eyen-ete ɔdɔ obon nditɔŋ ke enyiŋ nsie.
29Ede nditɔŋ ete itiahaba ama odu, akpa ɔdɔ aŋwan e-kpa inyeneke eyen.
30Ndien ɔyɔhɔ iba ada-e ɔdɔ akpa inyeneke eyen.
31Ndien ɔyɔhɔ ita afiak ada-e, tutu mmɔ owo itiahaba ɔdɔ-e ama akpaŋa mmɔ inyeneke eyen ito-e.
32Akputre aŋwan odo akpa suhɔ.
33Ndien, ke iseri ke mkpa ide ŋwan enyewe kotu mmɔ? Koro mmɔ owo itiahaba ɔdɔde-e nte aŋwan.”
34Ndien Jesus ɔbɔrɔ mmɔ ete, “nditɔŋ oyo akpa ami ɔdɔ ndɔ ɔtɔŋɔ ntak ada mmɔ ɔnɔ ke ndɔ.
35Ede amade mmɔ eke owo abatde ete mmɔ odod inyene ini iso ma iseri ke mkpa, mmɔ idɔ-ɔ ndɔ, owo ida-a suhɔ mmɔ inɔ ke ndɔ.
36Koro mmɔ ikpa-a aba, ede mmɔ etie nte mme angel, sia mmɔ edede nditɔŋ Abasi ma nditɔŋ ediseri.
37Ede awiri Moses ke ikɔt eke atade ikaŋ ke ini etiŋde abaŋa mme akpa mkpa ised, ke ini ekuode Ɔbɔŋ ete, Abasi Abraham, Abasi Isaac, ma Abasi Jacob.
38Ede idaha Abasi mme akpa mkpa, ede eke mme oduwem, koro kpukpru odu uwem ɔnɔ-e.”
39Ndien usuk mme ekpep mbet ɔbɔrɔ ete, “Andikpep, ɔmɔtum atiŋ.”
40Ke odo ebede ndik anam mmɔ ibip Jesus mbip efen.
Nde Christ Ede Ɔruk David
(Matthew 22.41-46; Mark 12.35-37)
41Ndien Jesus ɔdɔhɔ ikpɔ owo mme Jew ete, “nso ede ntak eke mbufo idɔhɔde ite Christ ede ɔruk David?
42Koro David ke idem nsie ɔdɔhɔ ke ŋwed Psalms ete,
Abasi ɔdɔhɔ Ɔbɔŋ mmi ete
Tie kubɔk nnecha mmi,
43Tutu nda mme asua mfo nnum nte ŋkpɔ udori ukod.”
44“Ndien David okuod-e Ɔbɔŋ, e-nam didie ede ɔruk David?”
Ikpeme Ma Mme Ekpep Mbet
(Matthew 23.1-7; Mark 12.38-40)
45Ndien Jesus ɔdɔhɔ mbed nsie ke utɔŋ kpukpru owo ete.
46“Ete ikpeme idem mbufo ma mme ekpep mbet eke amade isaŋa ma ewiri, eke amade ekɔm ke mme aŋwa-udua, ma ikpɔ itie ke mme itie ukpono mme Jew, ma itie ukpono ke okpokoro udia.
47Mmɔ eke ɔtukde mme ebe-akpa, eke amade ibɔŋ anyan akam ke mbubuk. Mmɔ ibɔbɔ ntup-ikpe eke okponde akan.”
Currently Selected:
Luke 20: UKQ
Highlight
Copy
Compare
Share
Want to have your highlights saved across all your devices? Sign up or sign in
Ukwa Bible by Beyond Translation is licensed under Creative Commons Attribution-ShareAlike 4.0 License.
