Luke 18
18
Ŋke Ebekpa Eke Ɔchɔŋɔde Eyire
1Ekem Jesus otop ŋke ɔnɔ mmɔ, nte mme mbed ɔkpɔbɔŋde akam kpukpru ini, echid idɔduɔ mmɔ.
2“Ebierikpe chied ama odu ke obio chied; eke ibake Abasi, ikponoke suhɔ owo.
3Ede ebekpa chied odu ke obio, ndien echiene ebiere ikpe odo, ete sio owo utɔk mmi usiene nɔ min.
4Ede iyimeke ke ndusuk ini; ede ekem edɔhɔ ke echid nsie ete, ɔkpɔsuk ede nte mbake Abasi, nkponoke owo.
5Siak ebekpa eken afinade min, nsosio usiene nnɔ-e bak mfina nsie inɔ min mmemidem.”
6Ndien Ɔbɔŋ Jesus ɔdɔhɔ ete, “ikop se ukwaŋ ebierikpe ɔdɔhɔde.
7Nde nte Abasi imosio usiene inɔ uben nsie eke e-mekde, eke ɔbɔŋde akam ɔnɔ-e uwemoyo ma itudoyo, ɔkpɔsuk ede nte e-mede anyan ime ma mmɔ?
8Ede ndɔhɔ mbufo nte iwawara isio usiene inɔ mmɔ. Ndien ke ini eyen owo idide nte ikokud mbuɔdidem ke isɔŋ?”
Ŋke Mme Pharisee Ma Ɔbɔ Utup Isɔŋ
9Ndien Jesus otop ŋke eken ɔnɔ ndusuk owo eke oburede ete ke mmumɔ ide nnenen owo, afiak esin mben eken ke ndek.
10“Owo iba ɔkɔdɔk aka temple i-bɔŋ akam, chied ede Pharisee enyeken ede ɔbɔ etube.
11Owo Pharisee, ada ɔbɔŋ akam ke idem nsie ete, Abasi, mɔkɔm fin sia ntie nte owo afin, mben ŋwo, ma mmanam ukwaŋido, ma esin efube suhɔ nte ɔbɔ etube eken.
12Nture udia ikaba ke udua, nsosio chied ke ubak duop ke kpukpru se nyenede nnɔ Abasi.
13Ede ɔbɔ etube ada nsansan, iyimeke imeŋere anyin nsie nche ɔnyɔŋ, ede emia ubɔk ke ikpen echid nsie ete, Abasi, tua min idiɔk owo mbɔm!
14Ede ndɔhɔ mbufo nte owo eken ɔsuhɔde ɔnyɔŋ ufɔk ma ntebe ikpe akan owo Pharisee. Koro kpukpru mben ŋkohoridem isɔsuhɔre mmɔ inum, ede owo eke ɔsuhɔde idem nsie imemeŋere-e.”
Jesus Ɔdiɔŋ Nditɔŋ
(Matthew 19.13-15; Mark 10.13-16)
15Ede menyene eyen ada nditɔŋ mmɔ ɔsɔk Jesus ete etuk mmɔ ubɔk, ede ke ini mme mbed nsie okutde akpan mben odo adade nditɔŋ mmɔ edi.
16Ede Jesus okuod nditɔŋ, edɔhɔ mbed nsie ete, “yak nditɔŋ echiene min ikikpan mmɔ koro obio ubɔŋ Abasi enyenede ɔruk eken.
17Ke akpanikɔ, ke ndɔhɔ mbufo nte, owo eke ibɔ-ɔ obio ubɔŋ Abasi, nte odup eyen imɔduke ke echid.”
Ɔchɔŋ Owo Inyene Iduk Obio Ubɔŋ
(Matthew 19.16-22; Mark 10.17-22)
18Ekem ada usuŋ mme Jew chied ebip Jesus ete, “Eti Andikpep, nnamso ma nyene nsinsi uwem?”
19Ndien Jesus ɔbɔrɔ-e ete, “nsonam okuode min eti? Eke edede eti idue ibɔhɔke chied, suhɔ Abasi.
20Ɔmɔdiɔŋɔ mme mbet, kusin efube, kuwod owo, kuyup inɔ, kude ntienche nsu, kpono ntete mfo ma Mma mfo.”
21Ede edɔhɔ ete, “mma nnonum kpukpru eken tɔtɔŋɔ ke ini odup eyen mmi.”
22Ntoro ke ini Jesus okopde edɔhɔ ete, “ŋkpɔ chied ananana fin, nyam kpukpru se enyenede deme nɔ mme ubuene, ndien uyeyene inyene ke ɔnyɔŋ; fiak chiene min.”
23Ede ke ini ekopde ikɔ eken, ekabare ɔfuhɔ eti-eti, sia eyenede uwak inyene.
Ke Abasi Kpukpru Ŋkpɔ Ede Mmemem
(Matthew 19.23-30; Mark 10.23-31)
24Ede ke ini Jesus okutde nte efuhɔde, E-dɔhɔ ete, “Ɔchɔŋ didie ma mben inyene i-duk obio ubɔŋ Abasi!
25Koro ede mmem-mem ŋkpɔ, enaŋ ibe-e ke ndudu ebusa, nkan owo inyene iduk ke obio ubɔŋ Abasi.”
26Ede mben eke okopde ɔdɔhɔ ete, “nde-enye ndien ikan ibɔhɔ?”
27Ede Jesus ɔdɔhɔ ete, “Se ɔchɔŋde akan owo ikanke Abasi.”
28Ede Peter ɔdɔhɔ ete, “che nnyin imɔkpɔŋ kpukpru se nnyin ikeyenede ichiene fin.”
29Ntoro Jesus ɔdɔhɔ mmɔ ete, “ke akpanikɔ owo chied-chied eke ɔkɔkpɔŋde ufɔk, mme aŋwan, mme nditɔŋ-eka, mme ete, mme eka, mme nditɔŋ ke ntak obio ubɔŋ Abasi.
30Eke imɔbɔ-ɔ se awakde akan odo, kami, ma oyo eke idide ma nsinsi uwem.”
Jesus Atiŋ Abaŋa Mkpa Ma Iseri Ke Mkpa Nsie
(Matthew 20.17-19; Mark 10.32-34)
31Ndien Jesus ada mbed duopeba asik ada edem chied, edɔhɔ mmɔ ete, “che-che, nnyin idɔdɔk ika ke Jerusalem, ndien kpukpru se me asiak uduak Abasi akatiŋde abaŋa Eyen Owo iwɔwɔrɔ isu.
32Koro mmɔ iyayak-e inɔ mme Gentile ifiak esin-e nsaha, inam suhɔ-e ŋkpɔ obud ifiak ifiari-e etap.
33Ke ini mmɔ imiade min ima, mmɔ iwowod min, ndien ke ɔyɔhɔ usen ita, nseseri ke mkpa.”
34Ede mme mbed idiɔŋɔke ŋkpɔ chiechied, ikɔ eken odube mmɔ, iŋwaŋake mmɔ se etiŋde.
Jesus Ɔkɔk Nnan Ebeŋe-Ebeŋe
(Matthew 20.29-34; Mark 10.46-52)
35Ekem nte Jesus ma mbed nsie esaŋade ekpere Jericho, nnan chied etie ke mben usuŋ ebeŋe mme owo ɔkuk.
36Ke ini owo nnan odo okopde nte otu-owo asaŋade ebe, ebip mmɔ ete nde nso otube?
37Ntoro se mmɔ ɔdɔhɔ-e ete Jesus eyen Nazareth ɔsuhɔ ebe.
38Ndien efieri ete, “Jesus, ɔruk ɔbɔŋ David tua min mbɔm!”
39Ede mmɔ eke ebede iso akpan-e ete, kubi inua, ede aka iso efieri akan ete, “Eyen David, tua min mbɔm!”
40Ntoro Jesus aŋyaŋada ɔdɔhɔ ete ida-e isɔk Min, ndien ke ini esaŋade ekpere, Jesus ebip-e.
41“Eyem nnam nso nnɔ fin?” Ete, “Ɔbɔŋ, nyem ikud usuŋ.”
42Jesus ete-e, “kud usuŋ; mbuɔdidem mfo aŋyaŋa fin.”
43Ede ibihike bihi ekut usuŋ, echiene Jesus otoro Abasi. Ndien kpukpru owo, ɔnɔ Abasi itoro ke ini mmɔ okutde ŋkpɔ eken.
Currently Selected:
Luke 18: UKQ
Highlight
Copy
Compare
Share
Want to have your highlights saved across all your devices? Sign up or sign in
Ukwa Bible by Beyond Translation is licensed under Creative Commons Attribution-ShareAlike 4.0 License.
