Luke 17
17
Jesus Akpan Abaŋa Ndudue
(Matthew 17.19-21; Mark 9.28,29)
1Ndien Jesus ɔdɔhɔ mbed nsie, ete, “ana nte ŋkpɔ iduɔ odu ede ifankefan inɔ owo eke adade mmɔ edi.
2Akpafafan ma owo esie, owo ida itiad-ukɔk ikokuod ŋkɔŋɔ-e ke itɔŋ ndien ɔduɔk-e ke inyaŋ, akan inam nditɔŋ eken chied ɔduɔ.
3Itum ikpeme idem mbufo; mese eyen usɔ eduede fin, sua nɔ-e; ndien mese etuade mkpɔfiɔk ifen nɔ-e.
4Ede mese eduede fin utum ikatiahaba ke usen chied, afiakde echiene fin utume ikatiahaba ke usen chied edidɔhɔ ete, mmatua mkpɔfiɔk; ana ofo ifen ɔnɔ-e.”
Mbuɔdidem Ma Utom
(Matthew 17.19-21; Mark 9.28,29)
5Ekem mme apostle ɔdɔhɔ Ɔbɔŋ Jesus ete, “nam mbuɔdidem nnyin okpon akan.”
6Ntoro Jesus ete, “mese mbufo inyenede mbuɔdidem eke asiŋde nte mkpata mustard, mbufo ikpidɔhɔ akamba eto eken ite, wuhɔre mi ke itie-eken, ka kɔwuhɔ ke inyaŋ; ndien ikpinam uyo mbufo.
7Ede nne-e owo ke otu mbufo, eke enyende eyen ufɔk eke ɔfuŋde isɔŋ mme ɔbɔkde erɔŋ, idɔhɔ-e, ke ini etode iŋwɔŋ edi, ke nde-nde odo, di tietie adia ŋkpɔ?
8Nte ime ɔdɔhɔke ite, kpuhɔre ɔfɔŋ mfo nam udia nɔ min ndia, beŋe idem, fak ɔfɔŋ mfo, da bed tutu ndia mfiak ŋwɔŋ ŋkpɔ; ikem udadia ufiak uŋwɔŋ okuo?
9Ikɔkɔm eyen ufɔk siak anamde uyo nsie? Nnumke.
10Suhɔ ntoro se mbufo, ke ini mbufo inamde kpukpru se nkedɔhɔde mbufo, idɔhɔ ite, nnyin ide eyen ufɔk eke inyeneke udori; inam se edede utom nnyin.”
Akpamfia Duop Asana
11Ekem Jesus asaŋa aka Jerusalem, ma mbed nsie ebe ke ufuɔd samaria ma Galilee.
12Ndien nte edukde ke obio chied, owo akpa mfia duop edisobe ma-e, ada nsan-nsan.
13Mmɔ okoud ke ɔkpɔsɔŋ uyo ete, “Jesus, Ete ufɔk, tua nnyin mbɔm!”
14Ede ke ini ekutde mmɔ, edɔhɔ mmɔ ete, “ika-a, ikawiri mme oku idem mbufo” ede nte mmɔ asaŋade aka enam mmɔ asana.
15Ede ke ini owo mmɔ chied okutde ete ke anam udɔŋɔ ekwere, e-yurɔ editoro Abasi ke ɔkpɔsɔŋ uyo.
16Eduɔ ɔfuk iso nsie ke isɔŋ ke ukod, Jesus, ɔkɔm-e. Ndien ede eyen samaria.
17Ede Jesus ɔbɔrɔ-e ete, “ikadaha owo duop se nkanam mmɔ asana? Owo usukchied nye?
18Nte owo chied-chied idue eke afiakde editoro Abasi, ebede echenowo eken?”
19Ndien edɔhɔ owo odo ete, “Daha, nyɔŋ okuo; mbuodidem mfo aŋyaŋa fin.”
Ididi Obio Ubɔŋ Abasi
(Genesis 6.5-8.22; 19.12-24)
20Ede ndusuk mme pharisee ebip Jesus ini eke obio ubɔŋ Abasi idide, ebɔrɔ mmɔ ete, “Obio ubɔŋ Abasi idie-e nte ido eke okutde ke anyin.
21Owo imedɔhɔke ite, che-e mi; midaha, che-e do; koro che-che, obio ubɔŋ Abasi odu ke otu mbufo.”
22Ndien edɔhɔ mme mbed nsie ete, “ini idedi eke mbufo iyemde ikud usen eyen owo chied, ede mbufo imekwe.
23Ede mmɔ idɔdɔhɔ mbufo ite, che-e mi, che-e ko! Ikiwɔrɔ ika-a, ikufɔhɔ ibine mmɔ.
24Koro nte amini-mini ɔwɔrɔde ke ŋkaŋ ikpa-ɔnyɔŋ chied ayama osum edem edie oko, suhɔ ntoro se Eyen owo idi ke usen nsie.
25Ede nyene ibom-iso nkud uwak ikuri, mben emana eken iche-chin min.
26Ndien nte ekedede ke oyo Noah, suhɔ ntoro se ide ke usen Eyen owo.
27Mmɔ akadia ŋkpɔ afiak ɔnwɔŋ ŋkpɔ, mmɔ ɔdɔ ndɔ afiak ada owo ɔnɔ ke ndɔ tutu osum usen eke Noah ɔdukde ke ubom, ndien ukwɔ edisobo mmɔ kpukpru.
28Suhɔ nte eke edede ke oyo Lot; mmɔ akadia ŋkpɔ, ɔŋwɔŋ ŋkpɔ; mmɔ edep, afiak ayam, ɔtɔ iŋwɔŋ, ɔbup ufɔk.
29Ede ke usen odo Lot ɔwɔrɔde ke Sodom, ikaŋ ma itai oto ke ɔnyɔŋ edep edi wod mmɔ.
30Suhɔ ntoro se ide ke usen eke Eyen owo iyarade idem nsie.”
31“Ke usen odo, owo eke odude ke ɔkɔm ufɔk, ŋkpɔ nsie odude ke echid ufɔk, isɔsuhɔrede iditaŋ mmɔ: suhɔ ntoro owo eke odude ke iŋwɔŋ iyeyurɔ ika.
32Mbufo iti aŋwan Lot.
33Owo eke eyemde iŋyaŋa uwem nsie iyeduɔk, ede owo eke ɔduɔkde uwem nsie iŋyaŋa-e.
34Ndɔhɔ mbufo nte, ke itudoyo owo iba inana ke mbiri chied, idada chied ikpɔŋ chied.
35Iban iba ikɔkɔk ikokuod: idada chied ikpɔŋ chied.
36Iden iba idodu ke iŋwɔŋ idada chied ikpɔŋ chied.”
37Ndien mmɔ ɔbɔrɔ-e ete, “Ɔbɔŋ, ke mmɔmmɔ?” Ete mmɔ, “itie eke okpo anade do ke mme utere oboho.”
Currently Selected:
Luke 17: UKQ
Highlight
Copy
Compare
Share
Want to have your highlights saved across all your devices? Sign up or sign in
Ukwa Bible by Beyond Translation is licensed under Creative Commons Attribution-ShareAlike 4.0 License.
