Luke 16
16
Ŋke Eyen Ufɔk Eke Inamke Akpanikɔ
1Ede Jesus efiak ɔdɔhɔ mbed nsie ete, “owo inyene chied amadu eke enyenede owo eke adade iboud ke utom; ndien atiŋ ɔnɔ-e ete, ada iboud utom edue koro esuande inyene nsie.
2Ntoro se enyene ŋkpɔ owo odo ekoud-e ɔdɔhɔ-e ete, nde nso se ŋkop ami mbaŋa fin? Nɔ min ibad ŋkpɔ eke odude fin ke ubɔk, koro idaha aba ofo ede ada iboud utom mi.”
3“Ekem ada iboud utom odo ɔdɔhɔ ke echid nsie ete, Nnam didie? Koro ete ufɔk mi ɔbɔ min itie utom nsie? Nnyeneke idem ifuŋ isɔŋ, ibeŋe-ebeŋe ede min ŋkpɔ obud.
4Mmɔdiɔŋɔ se namde, ma ini eke ete ufɔk mi isiode min ke utom, owo ada min esin ke ufɔk mmɔ.”
5“Ntoro se okuod kpukpru mme akama isɔn ete ufɔk nsie, ɔdɔhɔ akpa owo ete, Akama ete ufɔk mi ɔkuk ifaŋ?
6Ndien ete, Abaŋ arin olive ichie, ada iboud utom odo ɔdɔhɔ-e ete, Bɔ ŋwed isɔn mfo, tetie ini chied, wed abamaduop.
7Ede ɔdɔhɔ owo afin ete, ofo akama ifaŋ? Ɔdɔhɔ-e ete, ekebe ikuokuod ichie. Edɔhɔ owo odo ete, Bɔ ŋwed isɔn mfo, wed anaŋ.
8Ntoro se ete ufɔk odo ɔdɔhɔ ada iboud utom eke inamke akpanikɔ, koro enyenede eti iboud; Koro mben ererimbon eken enyene eti ibuod ke mbubehe mmɔ ma mben emana mmɔ, akan nte nditɔŋ unwana edede.”
9“Ede ndɔhɔ mbufo nte, ida inyene ererimbon mbufo ikɔ mme ufan inum inɔ idem mbufo; ma ini odo ukpade, ukanke aba ida inyene odo inam ŋkpɔ, ma mmɔ ada mbufo ɔduk ke nsi-nsi iduŋ.
10Owo eke anamde akpanikɔ ke ata iyeyen ŋkpɔ inanam akpanikɔ ke akwakwa ŋkpɔ; owo eke akwaŋde ke ata iyeyen ŋkpɔ ikwakaŋ suhɔ ke akwakwa ŋkpɔ.
11Ntoro mese mbufo ida-a inyene ererimbon eken inam akpanikɔ, nnewo inɔ mbufo ata inyene?
12Mese mbufo inamke akpanikɔ ma se edede eke owo afin, nnewo inɔ mbufo se edede eke mbufo?”
13“Inyeneke eyen ufɔk eke inamde utom inɔ ete iba, koro mese esuade chied, imama enyeken; mese idaha ntoro, iyeda mma chied, isin chied ke ndek. Mbufo imikanke inam utom Abasi ma inyene ererimbon.”
Mbet, Mme Asiak uduak, Ma Obio Ubɔŋ
14Ede mben Pharisee eke edede mme ama inyene okop kpukpru se Jesus atiŋde, ede mmɔ esin-e nsaha.
15Ndien edɔhɔ mmɔ ete, “mbufo ide mben eke inamde owo abat mbufo nte nti owo, ede Abasi ɔdiɔŋɔ echid mbufo. Koro se okponde owo ke anyin ede mbubiam ke iso Abasi.”
16“Mbet Moses ma mme asiak uduak eke ede se adade mbufo usuŋ tutu John ɔduɔk mmuɔŋ edi. Ede kami ŋkwɔrɔ etimbuk obio ubɔŋ Abasi, kpukpru owo inyene udɔŋ iduk ke echid.
17Ede mmemem ŋkpɔ ɔnyɔŋ mma isɔŋ ibe-e mfep akan iyen ntoi mbet chied iture isu.”
18“Owo eke edede eke osiode aŋwan nsie ndɔ afiakde ɔdɔ efen esin efube; owo eke ɔdɔde aŋwan eke osiode ndɔ esin suhɔ efube.”
Owo Inyene Ma Lazarus
19“Owo inyene chied ama odu eke esinede eti ɔfɔŋidem eke ɔchɔŋɔde udua, afiak adia inem udia kusen-kusen.
20Ede ebeŋe-ebeŋe chied eke ekerede Lazarus, eke unan ɔyɔkde ke idem, emen ekenum ke anyin usuŋ nsie.
21Eyem eda mbubud udia eke oduɔŋɔde ke okpokoro owo inyene ebɔk-e, ede ebua edidia anyin unan nsie.
22Ekem Lazarus akpa, ndien mme angel emen-e okonum ke ikpen-echid Abraham. Owo inyene odo akpa suhɔ, ndien ebuk-e.
23Ndien ke itie eke mme akpa mkpa odude edu ke itie ufen, afiak emeŋede anyin okud Abraham ke anyan itie mma Lazarus ke ikpen-echid nsie.”
24“Ede efieri ete, Abraham tua min mbɔm, dɔŋ Lazarus ekedebi iso nnun ubɔk ke mmuɔŋ edidebe min edeme, koro ndude ke ufen ke ikaŋ eken.
25Ede Abraham ɔdɔhɔ-e ete, Eyen, ti nte okokutde mfan mfo ke ini uwem mfo, mma nte Lazarus okokutde idiɔk, ede kami okop ndɔŋechid, ede ofo odu ke ufen.
26Akan odo, akwa obube odu ke ufuɔd nnyin ma mbufo ma mben eke eyemde ito mi nsum mbufo ikakan, ma owo itotodo idi ken.”
27“Ede ɔdɔhɔ ete, mme-kpe fin ubɔk, Ete, nte, ɔdɔŋ Lazarus aka ke ufɔk ntete mi.
28Koro mmenyene nditɔŋ ete iden ition, ma ekatiŋ ɔnɔ mmɔ bak mmɔ idi itie ufen eke odude ke ediemi.
29Ede Abraham ete-e, mmɔ enyene mbet Moses, ma se mme asiak uduak eke wedd-e; yak nditɔŋ usɔ akpaŋutɔŋ ɔnɔ mmɔ.
30Ede edɔhɔ ete, ih-ih, Ete Abraham, ede owo ito mi ke otu mme akpa mkpa ika ke itie mmɔ, mmɔ ikakabare echid.
31Ede edɔhɔ ete mese mmɔ ikpaŋke utɔŋ inɔ moses, ma mme asiak uduak, owo ikpototo ke otu mme akpa mkpa ika-a, mmɔ imonumke ke akpanikɔ.”
Currently Selected:
Luke 16: UKQ
Highlight
Copy
Compare
Share
Want to have your highlights saved across all your devices? Sign up or sign in
Ukwa Bible by Beyond Translation is licensed under Creative Commons Attribution-ShareAlike 4.0 License.
