Luke 15
15
Ŋke Eyen Eden Eke Ochopde
(Matthew 18.10-14)
1Ndien kpukpru mme ɔbɔ etube ma mme anam idiɔk akasaŋa ekpere Jesus, ikop ikɔ nsie.
2Ndien mme pharisee ma mme ekpep mbet atiŋ ma chied eken ete, “owo eken adara mme anam idiɔk, afiak adia ŋkpɔ ma mmɔ.”
3Ede etop ŋke eken ɔnɔ mmɔ ete.
4“Ewe owo ke otu mbufo inyene erɔŋ ichie, ndien chied ochop, imɔkpɔŋke anaŋ ma efurenaŋ ke nchad isɔŋ, ibine erɔŋ odo ochopde, tutu ekud?
5Ndien ikud, edori-e ke afara ada ɔnyɔŋ ufɔk ma idaraechid.
6Ndien ke ini esumde ufɔk ekuod mme ufan ma mbɔhɔiduŋ nsie edi, ete mmɔ adara ma emɔ, koro mma ŋkud erɔŋ mmi oko-chopde!
7Ndɔhɔ mbufo nte, suhɔ ntoro se idara idu ke obio ubɔŋ Abasi ibaŋa idiɔk owo chied eke ikabarede echid, ikan nti owo anaŋ ma efurenaŋ eke inyeneke ntak ikabare echid.”
Ŋke Abaŋade Ɔkuk Utom Usen
8“Ndien Jesus atiŋ ŋke afin ete, ewe aŋwan, inyene mbak silver duop, ede chied ɔbɔhɔ-e ochop, idomoke utuenikaŋ ikpɔri ufɔk itum iyem, tutu-efiɔk?
9Ndien ifiɔk okuod mme ufan ma mbɔhiduŋ nsie edi, ete mmɔ, idara ma ami, koro mma mfiɔk ɔkuk odo eke chopde!
10Ndɔhɔ mbufo nte, suhɔ ntoro se idara odu ke iso mme angel Abasi abaŋa owo chied eke akabarede echid.”
Ŋke Eyen Eden Eke Ochopde
11Ndien Jesus atiŋ ŋke afin ete, “owo chied ekenyene nditɔŋ-iden iba.
12Ndien udo ɔdɔhɔ ntete nsie ete, Ete, nɔ min udeme ŋkpɔ eke enyenede min, ntoro se ete edeme inyene nsie ɔnɔ mmɔ.
13Ibihike udo ataŋ udeme nsie, adaha aka anyan idud; ndien do se esin inyene nsie ke ndisime usuŋ.
14Ede ke ini asuande kpukpru ama, ɔkpɔsɔŋ akaŋ otube ke idud odo; etɔŋɔ ndidu ke unana.
15Ndien eda idem akadian ma eyen idud odo, owo odo ɔdɔhɔ-e eka inwɔŋ ɔkɔbɔk mme edi.
16Ndien eyem idia udia eke mme edi adiade, siak owo inɔ-e ŋkpɔ.”
17Ede ke ini anyin aŋwaŋade-e, ekud idem nsie, ete, che-che, uwak nditɔŋ utom eke Ntete mi enyenede ma uwak udia, eke awakde akan mmɔ idia, ede che ɔbiɔŋ mi owod min!
18Nyɔyɔŋ nchiene Ntete mi, mfiak ndɔhɔ-e, “Nte, mmedue Abasi ma ke iso mfo.
19Ede ndotke aba ikere eyen fo: Da min nte owo utom mfo chied.” 20“Ndien edaha ke ɔnyɔŋ echiene Ntete nsie. Ede ke ini edude nsan-nsan Ntete nsie okud-e, mbɔm nsie anam-e, efɔhɔ, akawaŋa-e ke itɔŋ, otum-e inua.
21Ede eyen ɔdɔhɔ ete, Ntete, mmanam idiɔk-ŋkpɔ ndian Abasi ma ke iso mfo, ndotke aba ikere eyen mfo.”
22“Ede Ntete nsie ɔdɔhɔ eyen ufɔk nsie ete, iwara ida eti ɔfɔŋidem edisine-e; ifiak isine-e mkpanuen ke ubɔk ma ikpa-ukod ke ukod.
23Ndien ida-enaŋ eke enyenede idem iwod, iyak nnyin idia ifiak idad echid.
24Koro eyen mi ama akpa, afiak ɔtɔŋɔ ntak odu uwem; ama ochop, ndien nnyin ikud-e. Ntoro se mmɔ ɔtɔŋɔ mbre.”
25“Ede akpan nsie odu ke iŋwɔŋ: ndien nte esaŋade ekpere ufɔk, ekop ikwɔ ma unek.
26Ndien ekuod eyen ufɔk chied, ebip-e se otubede.
27Ndien ɔdɔhɔ ete, Eyen-uka esed ufɔk Ntete mfo ama owod eyen-enaŋ eke eyiede idem, koro okutde-e ma nchɔŋidem.”
28“Ede akpan mmɔ akpak echid, inyimeke iduk; ntoro se Ntete nsie ɔwɔrɔ edikpe ma-e.
29Ede ɔbɔrɔ Ntete nsie, ete, che-che mmanam utom nnɔ fin ke uwak isua, inyeneke ini eke nninide fin uyo: ede nte idede unamke ŋkpɔ inemechid unɔ min, mme iyen ebed chied nda nnem echid ma mme ufan mi.
30Ede ke ami eyen mfo edide, eke akediade inyene mfo ma mme akpara, ofo owod eyen-enaŋ eke eyiede idem ɔnɔ-e.”
31“Ede ntete nsie ɔdɔhɔ ete, Eyen mi, ofo odu ma-ami kpukpru ini, kpukpru inyene mi eyene fin.
32Ede odod nnyin idara ma inemechid, koro eyen uka eken ama akpa, efiak odu uwem; ama ochop, ndien ikud-e.”
Currently Selected:
Luke 15: UKQ
Highlight
Copy
Compare
Share
Want to have your highlights saved across all your devices? Sign up or sign in
Ukwa Bible by Beyond Translation is licensed under Creative Commons Attribution-ShareAlike 4.0 License.
