Luke 14
14
Jesus Ɔkɔk Udɔŋɔ Eke Sabbath
1Edikem ke ini Jesus ɔdukde ke ufɔk ɔbɔŋ mme Pharisee ma ekpep mbet chied ke Sabbath idia ŋkpɔ, mmɔ ɔtɔtum ekpeme-e.
2Ndien che-che, owo chied eke ɔdɔŋɔde mfuri odu-e ke iso.
3Jesus ɔbɔrɔ mme ekpep mbet ma mme Pharisee ete, “odod inam udɔŋɔ ekwere ke Sabbath mme idotke?”
4Ede mmɔ ododop, Ndien enyan ubɔk omum owo odo anam udɔŋɔ ekwere-e ɔdɔhɔ-e ete enyɔŋ.
5Jesus ɔdɔhɔ mmɔ ete, “newo ke otu mbufo inyene ass me enaŋ, eke ɔduɔde ke obube, eke imosio-e ke Sabbath?”
6Ndien mmɔ ikanke inɔ-e ibɔrɔ ŋkpɔ eken.
Da Usuɔhɔre Itie
7Ntoro se Jesus otop ŋke ɔnɔ mben eke ekuode udia, ke ini ekutde nte mmɔ emekde akamba itie, ete mmɔ.
8“Ke ini owo okuode fin edi udia ndɔ, kutie-tie ke akamba itie; mbak ndusuk ekuod akpan owo eke okponde akan fin.
9Ndien owo eke okuode fin ma akpan owo ididɔhɔ fin ete, Nɔ owo eken itie, ini odo ofo utɔtɔŋɔ ma obud isuɔhere nka ke itie eke asiŋde akan.
10Ede ke ini ekuode fin, ka itie eke asiŋde akan, ke ini owo eke okuode fin edide ma edɔhɔ fin ete, ufan, dɔk diken: ini odo ndien unyeyene ukpono ke iso kpukpru owo eke odude ke itie udia ma ofo.
11Koro kpukpru owo eke emeŋede idem nsie, isɔsuhɔre-e inum, ndien owo eke ɔsuhɔde idem nsie, owo imemeŋede-e.”
12Ndien Jesus ɔdɔhɔ owo eke okokuode-e udia ete, “ke ini ɔnɔde udia uweme-oyo me eke mbubreyo, kukuod mme ufan mfo ɔkpɔŋ mme nditɔŋ usɔ, mme uben mbufo mme mbɔhɔiduŋ mfo eke edede enyene ŋkpɔ owo, mese idaha ntoro mmɔ ikuod suhɔ fin.
13Ede ke ini ɔnɔde udia kuod mme ubuene, ma mben eke inyeneke ukeme, mbuŋɔ, mma nnan.
14Ndien ifafan ma ofo; Koro mmɔ inyeneke se idade isio fin usiene; ede isosio fin usiene ke usen eke nti owo iseride ke mkpa.”
Ŋke Akwa Uchɔrɔ
(Matthew 22.1-14)
15Ede ke ini owo chied eketiede ma-e ke itie udia okopde mme ikɔ eken, e-ete, “ifafan inɔ owo eke idiade ŋkpɔ ke obio ubɔŋ Abasi!”
16Ede Jesus atiŋ ŋke ɔnɔ-e ete, “owo eke ɔnɔde akamba udia, afiak okuod uwak owo.
17Ndien ke ini ekemde ini udia, edɔŋ eyen utom ɔkɔdɔhɔ mben eke ekuode, idi, ke anam udia ama.”
18Ede kpukpru mmɔ afaŋa ma echid chied, Akpa ete-e, mme dep iŋwɔŋ, ndien nyem ika nke che; mmankanke ndi.
19Afin ete, mme dep eŋaŋ duop, ndien; nka idome mmɔ nche; mmankanke ndi.
20Afin ete, mmɔdɔ aŋwan; mmankanke ndi.
21Eyen utom odo edi editiŋ kpukpru ŋkpɔ ɔnɔ ete ufɔk nsie. Ekem ete ufɔk ayad echid, afiak ɔdɔhɔ eyen utom odo ete, wawara wɔrɔ ka ke mme ekwere, ma efak ke obio, da mme ubuene, ma mben eke edede mbuŋɔ, ma nnan, ma mben ŋkpɔ nnam da di.
22Ndien eyen utom odo edidɔhɔ-e, ete, Ete ufɔk mmanam nte ɔkɔdɔhɔde, ede itie aka-a ɔsuhɔ.
23Ede ete ufɔk odo ɔdɔhɔ eyen utom nsie ete-e, wɔrɔ ka mme ɔkpɔ usuŋ, ma ke mben ɔkɔ, yire suhɔ mmɔ ɔduk edi; ma ufɔk mi ɔyɔk.
24Koro mɔdɔhɔ mbufo nte, owo chied-chied ke otu mben odo okokuode imatabike udia mmi.
Ide Mbed Jesus
(Matthew 10.34-39)
25Nte Jesus akade Jerusalem akwa otu owo asaŋa ma-e, ewɔŋɔde afiak ɔdɔhɔ mmɔ ete.
26“Mese owo eyemde ichienede Min, amade Ntete nsie ma Mma nsie, ma aŋwan nsie, ma nditɔŋ nsie, ma nditɔŋ eyen eka eden ma iban, ma uwem nsie akan min, ikemeke ide mbed Mmi.
27Owo eke edede eke imenke cross nsie echiene min ikemeke ide mbed Mi.
28Ndewo ke otu mbufo eke eyemde ibup tower, eke ibomke iso itietie ibad se itak-e mbomiso etɔŋɔ utom.
29Ndusuk utom akan-e ke ini ɔtɔŋɔde ibup ufɔk koro ikanke ibup isio, ndien mme owo ɔtɔŋɔ isak-e imam.
30Ete, owo eken ɔtɔŋɔ ikɔk ufɔk, ede ikanke inam ima.
31Afin, ewe ɔbɔŋ, iwɔrɔ ika ekɔŋ ma ɔbɔŋ afin, mme ibomke iso itie ikere mme ikakan ida tɔsin owo duop iŋwana ekɔŋ ma owo eke asaŋade ma tɔsin owo edup iŋwana ma-e?
32Ndien mese imakanke asua nsie ini esuk odude ke anyan usuŋ, edɔhɔ mme eyen utom ete, ebip nte owo inamde ma emem odu.
33Ntoro owo mbufo ekedede, eke isanake kpukpru se enyenede iyak imakanke ide mbed Mi.”
Inuŋ Eke Inyeneke Ufan
(Matthew 5.13; Mark 9.50)
34“Ndien Jesus ete, inuŋ afan: ede inuŋ ibiara idaso inam-e enem?
35Ifanke ke isɔŋ, ifanke suhɔ ke mfum, ebede itop-e nduɔk. Owo eke enyenede utɔŋ ikop yak ekop!”
Currently Selected:
Luke 14: UKQ
Highlight
Copy
Compare
Share
Want to have your highlights saved across all your devices? Sign up or sign in
Ukwa Bible by Beyond Translation is licensed under Creative Commons Attribution-ShareAlike 4.0 License.
