Luke 13
13
Ikuod Ikabarechid
1Ndusuk owo odu do ke ini odo eke atiŋde ɔnɔ Jesus abaŋa mben Galilee eke Pilate ɔkɔduɔkde eyip mmɔ ke ini ewade uwa ufene.
2Ndien Jesus ɔbɔrɔ mmɔ ete, “ikere ite mben Galilee eken ɔdiɔk akan efiri mben Galilee, koro mmɔ okutde utɔ ikuri okoro?
3Ndɔhɔ mbufo nte, idaha ntoro: mese mbufo ikabakare echid mbufo, kpukpru iyetak suhɔ ntoro.
4Ede didie ke abaŋa owo efureta eke tower siloam ɔkɔduɔde ɔtɔ mmɔ owod, mbufo ikere ite ke mmɔ ede mben eke anamde idiɔk akan kpukpru mben eke ɔduŋde Jerusalem?
5Ndɔhɔ mbufo nte, idaha ntoro: ede mese mbufo ikabakere echid, kpukpru mbufo itatak suhɔ ntoro.”
Ŋke Eto Fig Eke Iŋwumke Mfri
6Ndien Jesus otop ŋke ɔnɔ mmɔ ete, “owo chied ekenyene eto fig eke ɔtɔde ke iŋwɔŋ nsie, ke ini ekemde eto iŋwum mfri, eka-a iche me eto fig odo oŋwum mfri, ede ikwe mfri.
7Ekem edɔhɔ ekpeme iŋwɔŋ vine nsie ete, che, mmedi isua ita ndiyem mfri ke eto eken, ndien nkwe; kpeŋe-e duɔk; ada mi didie abiad isɔŋ ikpikpu?
8Ede ekpeme-iŋwɔŋ-vine ɔbɔrɔ-e ete, Ete ufɔk yak-e eda do ke isua eken, tutu ntubi isɔŋ ŋkanare-ŋkuk, ndien nduɔŋɔ mbio ke echid.
9Ndien mese eŋwumde mfri isua efen, ifafan, ede miŋwumke, mkpeŋe-e nduɔk.”
Spirit Mmemidem
10Ndien Jesus ekekpep mmɔ ŋkpɔ ke itie ukpono mme Jew chied ke sabbath.
11Aŋwan chied ama odu ami idiɔk odudu adade-e usuŋ, anam-e ede mbuŋɔ ke isua efureta, enuhɔ, ikanke imeŋere idem nsie ke-ɔnyɔŋ.
12Ede ke ini Jesus okutde-e, okuod-e ete, “aŋwan owo, Abasi ɔkɔk fin.”
13Ndien edori-e ubɔk ke idem; nde-nde odo idem nsie eneŋede, ndien etoro Abasi.
14Ede ada ibuod ke itie ukpono mme Jew iyadechid koro Jesus anamde udɔŋɔ ekwere ke sabbath; ndien ɔdɔhɔ mben odo ete, “usen itiochied odu ke udua nte owo akpanamde utom ke echid. Idi idibɔ ukɔk udɔŋɔ ke mme usen odo, inenke ibɔ ukɔk udɔŋɔ ke sabbath.”
15Ede Ɔbɔŋ ɔbɔrɔ-e ete, “mme anam ŋkpɔ anyin owo, nte mbufo chechied itadke enaŋ ma ass mbufo ke ufɔk-enaŋ ke sabbath, ida mmɔ iwɔrɔ ika itie uŋwɔŋ-mmuɔŋ?
16Ede ama ede aŋwan eken, eke edede ubon Abraham, eke andidiɔk ɔbupde-e, kere nche ke isua efuteta, eke ikpatatke-e uruk ke usen sabbath?”
17Ndien ke ini edɔhɔde ikɔ eken, obud anam kpukpru mme asua nsie. Kpukpru mben obio adatechid ke kpukpru mme utube ŋkpɔ eke enamde.
Ŋke Mkpata Mustard
(Matthew 13.31,32; Mark 4.30-32)
18Ntoro se Jesus ɔdɔhɔ ete, “obio ubɔŋ Abasi ebiedso? Nda-so ndome ma-e?
19Ebied mkpata mustard chied, eke owo adade ɔtɔ ke iŋwɔŋ esa nsie, ndien ekɔri akabare akamba eto, mme inuen ɔnyɔŋ ɔbup efɔk ke mme ŋkɔk nsie.”
Ŋke Eke Yeast
(Matthew 13.33)
20Ndien Jesus afiak ɔdɔhɔ ete, “nenso se nda ndomo ma obio ubɔŋ Abasi? 21Ebied yeast eke aŋwan emende esin ke udome ndom-uyo ita, tutu yeast ofuri ɔyɔk efiri ndom uyo.”
Mkpafaha Usuŋ
(Matthew 7.13,14)
22Ekem Jesus asaŋa ebe ke mme obio-ekpep owo ŋkpɔ, afiak asaŋa aka Jerusalem. 23Ede owo chied ebip-e ete, “nte Abasi inyayaŋa ndusuk owo? Ebɔrɔ mmɔ kpukpru ete.”
24“Mbufo iŋwana eti-eti ibe ke mkpafaha usuŋ iduk, koro ndɔhɔ mbufo nte, uwak owo iyeyem iduk, ndien mmɔ ikanke.
25Ke ini chied eke Ete ufɔk adahade ke ɔnyɔŋ akwi usuŋ, ndien mbufo itɔŋɔ ida ke aŋwa ntuak usuŋ ite, Ɔbɔŋ kwɔhɔde usuŋ nɔ nnyin, ndien ibɔbɔrɔ mbufo ite, ndiɔŋɔke mbufo ma itie eke mbufo itode.
26Mbufo itɔtɔŋɔ idɔhɔ ite, nnyin ima idia ifiak iŋwɔŋ ŋkpɔ ma, ofo ama ekpep ŋkpɔ ke mme ekwere nnyin.
27Ede itatiŋ ete, ndɔhɔ mbufo nte, ndiɔŋɔke mbufo ma itie eke mbufo itode, daha kpɔŋ Min, kpukpru mbufo mme anam idiɔk ŋkpɔ!
28Do se ntuaŋa ma ntaŋi edet idu ke ini mbufo ikutde Abraham ma Isaac ma Jacob ma kpukpru mme asiak uduak ke obio ubɔŋ Abasi, ndien esio mbufo ke idem mbufo ɔduɔk ke aŋwa.
29Uwak mben eke idiɔŋɔke Abasi itoto ke efiri ererimbon, iditetie idia ŋkpɔ ke uchɔrɔ ke obio ubɔŋ Abasi.
30Ndien-kakpan, mme ekperedem ibobom iso, mme ebomiso ikpekpere edem.”
31Suhɔ ke usen odo ndusuk mme Pharisee edi edidɔhɔ-e ete, “wɔrɔ, daha, kpɔŋ edem eken, koro Herod andikara eyemde iwod fin.”
32Ede ɔdɔhɔ mmɔ ete, “ika, ikɔdɔhɔ Herod nkikaba ebua ikɔt, kpaŋ utɔŋ, mme-bin idiɔk odudu nduɔk mfiak nnam udɔŋɔ ekwere mfin ma ŋkpɔŋ, ndien ke ɔyɔhɔ usen ita inanam uduak mmi ɔyɔk.
33Ede mmenyene isaŋa isaŋ mi mfin ma mkpɔŋ ma okud, koro ikemeke ide ete asiak uduak akpa midaha ke Jerusalem.”
Jesus Eseme Abaŋa Jerusalem
(Matthew 23.37-39)
34“Mbufo mben Jerusalem eke owotde mme asiak uduak, afiak ɔtɔŋide mben eke Abasi ɔdɔŋde echiene fin ke itiad, Ata uwak ini mmanyem itaŋ nditɔŋ mbufo mbon itie chied, nte unen obonde nditɔŋ nsie ke idak mba nsie, ndien mbufo ikeyimeke!
35Abasi iche-chin temple mbufo, ke akpanikɔ, ndɔhɔ mbufo nte, mbufo imikwe Min, Tutu osum ini eke mbufo idɔhɔ ete, afafan ɔnɔ enyemi edide ke enyiŋ Ɔbɔŋ Abasi.”
Currently Selected:
Luke 13: UKQ
Highlight
Copy
Compare
Share
Want to have your highlights saved across all your devices? Sign up or sign in
Ukwa Bible by Beyond Translation is licensed under Creative Commons Attribution-ShareAlike 4.0 License.
