Luke 12
12
Kpeme Ma Mme Anam Ŋkpɔ Anyin Owo
(Matthew 10.26,27)
1Ke ini odo, ata uwak otu owo obono, mmɔ ɔtɔŋɔ idio mme owo ke ikpad, Jesus atiŋ ma mbed nsie ke akpa ŋtɔŋɔ ete, “Ikpeme idem mbufo ma yeast mme Pharisee, eke edede mme anam ŋkpɔ anyin owo.
2Ede ŋkpɔ idue-e eke owo ɔfukde fuk eke imeyarakede, ŋkpɔ idue-e suhɔ eke owo odupde odup owo imɔdiɔŋɔke.
3Mmɔdo ikɔ eke edede eke atiŋde ke okum, owo ikokop ke unwana, odu eke mbufo idɔŋde ke utɔŋ ke ndube ubed, owo iyekop ke ɔnyɔŋ ɔkɔm.”
Jesus Ekpep Mbak Abasi
(Matthew 10.8-31)
4“Ndien matiŋ nnɔ mbufo, mme ufan mi nte ikibak mben eke owotde ikpɔk-idem, ndien akande odo mmɔ ikanke inam ŋkpɔ afin.
5Ede ŋwawiri mbufo eke mbufo ikpabakde, ibak eke owotde, afiak enyene odudu ida nsin ke nsi-nsi ufen; ntoro se ndɔhɔ mbufo, ibak-e!”
6“Nte inyamke nditɔŋ inuen ition ke okuk iba? Ede chied ke otu mmɔ Abasi ifireke.
7Ede amabad ided iboud kpukpru mbufo, ikifɔhɔ ndik, mbufo imɔchɔŋ udua ikan kpukpru nditɔŋ inuen.”
Yarade Christ Nɔ Mme Owo
(Matthew 10.32,33)
8“Ndien Jesus aka iso atiŋ ete, owo eke ayarade min ke aŋwa onum min ke akpanikɔ, Ami Eyen Owo nyayarade-e aŋwa-aŋwa suhɔ ke iso mme angel Abasi nte ke onum min ke akpanikɔ suhɔ.
9Ede owo eke akaŋde Min ke iso owo, mmɔ ikakaŋ suhɔ-e ke iso mme angel Abasi.”
10“Ede kpukpru owo eke itiŋde ikɔ idian Eyen owo, ifefen inɔ-e, ede owo ke itiŋde ikɔ-isuoŋi idian edisana spirit, imefenke inɔ-e.”
11“Ke ini mmɔ idade mbufo ika ke itie ukpono mme Jew ma mme adaukara ma mme enyene odudu, ikutumere echid mbufo ibaŋa nte mbufo isaŋade ma ŋkpɔ eke mbufo ibɔrɔde mmɔ, mme se mbufo itiŋde iŋyaŋa idem mbufo.
12Koro ke ndende odo edisana spirit iyeteme mbufo se mbufo itiŋde.”
Jesus Akpan Idiɔk Udɔŋ
13Ndien owo chied ke otu owo ɔdɔhɔ Jesus ete, “Andikpep, tiŋ ma eyen eka mi abahade udeme ŋkpɔ ete nnyin ma ami.”
14Jesus ɔbɔrɔ-e ete, “ufan mmi, newo onum min nte ebierikpe ma edeme udeme ke ufuɔd mbufo?”
15Ede ɔdɔhɔ mmɔ ete, “Ineŋere ikpeme idem mbufo ke ɔkpɔsɔŋ isinanyin ke ŋkpɔ owo, Koro owo enyene se enyeyene, uwem nsie isineke-e ke ubɔk.”
16Ndien atiŋ ŋke ɔnɔ mmɔ ete, “owo inyene chied ama odu eke isɔŋ nsie oŋwumde ŋkpɔ eti-eti.
17Ede ekere ke echid nsie ete, nnam didie, Koro nyeneke itie eke mbonde mfri inwɔŋ mi?
18Ndien edɔhɔ ke idem nsie ete, nwowuri mme itie unum udia mi, ntɔŋɔ ntak mbup eke okponde akan odo, ma mbon kpukpru udia ma inyene mmi do.”
19Ndien edɔhɔ ukpɔŋ nsie ete, “ukpɔŋ mi, monum uwak ŋkpɔ nnɔ fin eke uwak isua; bɔ nduɔk odudu, dia, ŋwɔŋ ŋkpɔ ma idad echid.”
20Ede Abasi ɔdɔhɔ-e ete, ofo anana iboud owo! Imomum ukpɔŋ mfo ke itudoyo eken, ndien newo idia ŋkpɔ eke ɔkɔde onum?
21“Ntoro se itie ma owo eke ɔkɔde inyene onum ɔnɔ idem nsie ede inyeneke inyene ke nkaŋ Abasi.”
Kunyene Mfina
(Matthew 6.19-21,25-34)
22Ede Jesus ɔdɔhɔ mbed nsie ete, “ntoro se ndɔhɔ mbufo, ikifina idem ibaŋa uwem, ite ndiaso, mme abaŋade ikpɔk idem, se isinede.
23Uwem akan udia, ikpɔk idem akan edisine ŋkpɔ.
24Che mme inuen ɔnyɔŋ mmɔ itɔtɔ idɔke-dɔk, inyeneke ise unum udia; ede Abasi ɔnɔ mmɔ udia. Nte mbufo ichɔŋke udua ikan mme inuen?
25Ede newo ke otu mbufo ikan ida usen chied ndian ke isua uwem nsie?
26Mese ukanke unam iyeyen, nenso anam otumere echid abaŋa ŋkpɔ afin?
27Che mkpɔŋ idum, nte ɔkɔride: mmɔ inamke utom, inamke ɔfɔŋ, ede ntiŋ nnɔ mbufo, Solomon ke efiri ubɔŋ nsie isineke ŋkpɔ eke eyiede nte chied ke otu mmɔ.
28Mese Abasi esinede mbied iŋwɔŋ ŋkpɔ nte mfin, ndien mkpɔŋ emen esin ke ikaŋ usaŋ uyo, nsonam Abasi imesineke mbufo ŋkpɔ ikan odo, O nditɔŋ eke mbuodidem edede iyeyen.”
29“Mbufo ikiyem se mbufo idiade, ma se mbufo iwɔŋde, ikiyak eyikhe odu ke echid mbufo.
30Koro mben ererimbon eyem kpukpru ŋkpɔ eken, ede ete mbufo ɔdiɔŋɔ ke mme ŋkpɔ eken anana mbufo.
31Ede iyem obio ubɔŋ Abasi, ndien idadian mme ŋkpɔ eken inɔ mbufo.”
32“Ikifɔhɔ ndik, iyen eboho mme mbed, ede eti ekikere Ete Mbufo ke ɔnyɔŋ iyak obio ubɔŋ nsie nnɔ mbufo.
33Inyam se mbufo inyenede, ida ifanido ma mme ubuene, inam ekpad ɔkuk eke imabiareke inɔ idem mbufo, ibon inyene ke ɔnyɔŋ eke imɔkpuɔ mbufo, ke itie eke inɔ imasaŋake ikpere, eke utaŋkpɔ imebiatke.
34Koro itie eke ŋkpɔ uto mbufo odude, suhɔ do se echid mbufo odu.”
Eyen Ufɔk Akpanikɔ Ma Idiɔk Eyen Ufɔk
(Matthew 24.42-51)
35“Ndien Jesus ete, ifak ɔfɔŋ ke isin mbufo ɔchɔŋ ada inam utuenikaŋ mbufo asak.
36Mbufo ke idem mbufo ibied mben eke etiede ebed ete-ufɔk mmɔ, ke ini ituakde usuŋ mmɔ eberede ɔnɔ-e ini chied.
37Afafan ɔnɔ mme isuŋutom eke ete ufɔk idide, okutde nte mmɔ etiede ekpeme, ke akpanikɔ se ndɔhɔ mbufo, ifafak ɔfɔŋ inam mmɔ etetie adia ŋkpɔ, ede idedi ma enam ŋkpɔ ɔnɔ mmɔ.
38Mese edide ke ufɔt itudoyo, ma ke usen ubɔk, se edi, ekut mmɔ anamde ntoro afafan ɔnɔ mme nditɔ ufɔk esie.
39Ede idiɔŋɔ ite, mese enyene ufɔk ɔkpɔdiɔŋɔde ini eke inɔ idide ikpikpeme, ikpeyake mmɔ abiad ufɔk nsie ɔduk.
40Mbufo nde ibeŋe idem, koro eyen owo idedi ke ini mbufo idorike anyin.”
41Ede Peter ɔbɔrɔ-e ete, “Ɔbɔŋ, ofo otop ŋke eken ɔnɔ nnyin, mme otop ɔnɔ kpukpru owo?”
42Ndien Ɔbɔŋ ɔdɔhɔ ete, “nede akama ukpɔhɔre eke anamde akpanikɔ eke edede suhɔ owo eti ibuod eke ete-ufɔk nsie inumde-e ete akara kpukpru ufɔk nsie, ma edeme udia ɔnɔ mben ufɔk ke ekem ini?”
43“Afafan ɔnɔ eyen-ufɔk eke ete ufɔk nsie idide ekutde-e anamde ntoro.
44Ke akpan-ikɔ se ndɔhɔ mbufo nte, ete ufɔk nsie inanam-e ekara kpukpru se enyenede.
45Ede mese eyen ufɔk nsie ɔdɔhɔde ke echid nsie ete, Ete ufɔk mi ibebihi idi, etɔŋɔ imia nditɔŋ ufɔk eden ma eyen ufɔk aŋwan ufen, afiak adia ŋkpɔ ɔnwɔŋ ŋkpɔ nte ɔyɔkde-e.
46Ete ufɔk odo idedi ke usen eke idorike anyin ma ke ini eke idiɔŋɔke, ndien imemia-e akamba ufen afiak ɔnɔ-e udeme ke otu mmɔ eke inumke ke akpanikɔ.
47Ede eyen ufɔk eke ɔdiɔŋɔde mbet ete ufɔk nsie, ndien ibeŋeke idem, inamke suhɔ nte uduak ete ufɔk nsie etemede, iyemia-e uwak ubɔk ikpa.
48Ede enyemi idiɔŋɔke, ndien enam ŋkpɔ eke odotde ufen, mmɔ imamia-e ubɔk ikpa eke iwakke ede owo eke mmɔ ɔnɔde uwak ŋkpɔ, mmɔ iyeyem uwak ŋkpɔ ito ubɔk nsie, suhɔ nte owo eke mmɔ ayakde uwak-uwak ŋkpɔ ɔnɔ-e, ubɔk nsie se mmɔ iyem ŋkpɔ eke awakde akan.”
Jesus Esin Ubahade
(Matthew 10.34-39)
49“Jesus aka iso atiŋ, ŋkedi isin ikaŋ ke isɔŋ, ikaŋ esie akpaka obumere ata!
50Ede menyene uduɔk mmuɔŋ mkpa eke, mmɔ inumde min, mmɔduɔke odudu tutu ewɔrɔ osu!
51Mbufo ikere ke nkedi inɔ emem ke isɔŋ? Ndɔhɔ ke idaha ntoro, nkada ubahade ndi.
52Koro tɔŋɔde ke ami ubahade idodu ke ufɔk, ke otu owo ition ke ufɔk, owo ita idada itie chied, owo iba eken ada isio.
53Ete iyadiaŋade ma eyen-eden nsie, eyen-eden iyadiaŋade suhɔ ma ete, eka iyadiaŋade ma eyen aŋwan nsie, eyen-aŋwan iyadiaŋade ma eka, eka-ebe iyediaŋade suhɔ aŋwan eyen nsie, aŋwan eyen iyadiaŋade ma eka-ebe suhɔ.”
Diɔŋɔ Ini
(Matthew 16.1-4)
54Ndien Jesus ɔdɔhɔ mme otu owo ete, “ke ini ikutde idiɔk ɔnyɔŋ ɔwɔrɔde ke edem usop utin, ndende odo mbufo ete edim ɔsuhɔ edi; ewɔrɔ osu nte idɔhɔde.
55Ke ini ofum usuk ofumde, mbufo ite oyo ifofiop, ewɔrɔ osu suhɔ ntoro.
56Mme anam ŋkpɔ anyin owo, imekeme itiŋ nte oyo etiede ke ichede ɔŋyɔŋ ma isɔŋ nde nso anam mbufo idiɔŋɔke ukabade ŋkpɔ eke otubede kami?”
Nam Emem Ma Owo Utɔk Mfo
57“Nso ede ntak eke mbufo idomoke kpukpru ŋkpɔ ibire se inende?
58Ke ini asaŋade ma owo utɔk mfo aka iso ebierikpe, nam emem ma-e ke usuŋ bak imen fin isɔk ebierikpe, ebierikpe ayak fin ɔnɔ isuŋutom, ndien isuŋutom emen fin esin ke ufɔk ŋkpɔkɔbi.
59Ndɔhɔ fin nte, umɔwɔrɔke tutu ofo osio akputre ɔkuk isɔn mfo.”
Currently Selected:
Luke 12: UKQ
Highlight
Copy
Compare
Share
Want to have your highlights saved across all your devices? Sign up or sign in
Ukwa Bible by Beyond Translation is licensed under Creative Commons Attribution-ShareAlike 4.0 License.
