Luke 11
11
Jesus Ekpep Nte Ɔbɔŋde Akam
(Matthew 6.9-15)
1Ekem ke ini Jesus ɔbɔŋde akam ke itie chied, ke ini ekwerede, owo chied ke otu mbed nsie ɔdɔhɔ-e ete, “Ɔbɔŋ, kpep nnyin nte owo ɔbɔŋde akam nte John ekpepde mbed nsie.”
2Ede e-dɔhɔ mbed nsie ete, “nte mbufo ibɔŋde akam, idɔhɔ ite,
Ete nnyin eke odude ke ɔnyɔŋ
Yak ikpono enyiŋ mfo,
Yak obio ubɔŋ mfo edi,
Yak uduak mfo osu,
Ke isɔŋ suhɔ nte edede ke ɔnyɔŋ.
3Nɔ nnyin udia eke ekemde nnyin ke usen ke usen.
4Fen nnɔ nnyin ke idiɔk ŋkpɔ nnyin, suhɔ nte nnyin ifende inɔ kpukpru owo eke anamde nnyin idiɔk ŋkpɔ, kuda nnyin usin ke idome ede sio nnyin ke idiɔk ŋkpɔ fep.”
Ufan Edi Ke Ufuɔd Itudoyo
5Ndien Jesus edɔhɔ mmɔ ete, “ne-e enyene ufan eke idahade ika ke ufɔk ufan nsie ke ufuɔd itudoyo, ikɔdɔhɔ ufan nsie ete ufan mi buɔd Min uyo ita.
6Siak ufan mi afin eke asaŋade isaŋ, edi ke ufɔk mi, ede nnyeneke se numde-e ke iso edia.
7Ede ɔbɔrɔ ke echid ufɔk ete, kunɔ min mfina, mafak usuŋ, ami ma nditɔŋ mi, imɔduk inana, makanke ndadaha nnɔ fin?
8Ndɔhɔ mbufo nte-wo, ɔkpɔsuk ede nte mikakanke idadaha inɔ-e ke ntak ufan ede ke ntak odo eyirede-e ɔkpɔsɔŋ idadaha inɔ-e nte eyemde.”
Ka Iso Beŋe, Yem, Tuak
(Matthew 7.7-11)
9“Ntoro se ndɔhɔ mbufo nte ibeŋe, Abasi inɔnɔ mbufo, iyem mbufo ikokud, ituak, Abasi ikwɔkwɔhɔre usuŋ inɔ mbufo.
10Koro, kpukpru owo, eke ebeŋede Abasi ibɔbɔ, owo eke eyemde Abasi ikokud, ndien Abasi ikwɔkwɔhɔre usuŋ inɔ kpukpru owo eke atuakde.
11Ne-wo Ete inɔ eyen nsie itiad, ke ini eyen nsie ebeŋede uyo? Me inɔnɔ eyen urukikɔt ke ini ebeŋede-e iyak?
12Me, ete inɔnɔ eyen itutubom ke ini eyen ebeŋede-e nchen unen.
13Ndien, mese mbufo eken idiɔkde, idiɔŋɔde inɔ nditɔŋ mbufo nti enɔ nso anam Ete mbufo eke odude ke ɔnyɔŋ, imayake edisana spirit inɔ mmɔ eke ebeŋede-e!”
Jesus Ɔchɔŋ Odudu Akan Andidiɔk
(Matthew 12.22-30; Mark 3.22-27)
14Ndien Jesus ebin idiɔk odudu eke echienede owo imum ke idem ɔduɔk, ke ini idiɔk odudu ɔwɔrɔde owo imum ke idem, etiŋ ikɔ, idem akpa mmɔ kpukpru.
15Ede ubak mmɔ ete, “Jesus ada beelzebub etubom mme idiɔk odudu, ebin mme idiɔk odudu ɔduɔk.”
16Ubak mmɔ odomo-e ete, ewiri mmɔ idiɔŋɔ eke otode ke ɔnyɔŋ.
17Ede, ke ini ediɔŋɔde ekikere mmɔ, edɔhɔ mmɔ ete, “kpukpru obio eke abaharede idem nsie aŋwana ma chied eken iwowure, ufɔk eke abaharede aŋwana ma ufɔk enyeken, iduɔduɔhɔ.
18Mese andidiɔk abaharede aŋwana ma idem nsie, isaŋa didie ichɔŋ ida? Siak mbufo idɔhɔde ite nda beelzebub mbin idiɔk odudu nduɔk.
19Ede mese Ami ndade beelzebub mbin mme idiɔk odudu nduɔk, nditɔŋ mbufo ada ewe ebin mmɔ ɔduɔk, mmɔ ibebiere ikpe inɔ mbufo.
20Ede mese ndade odudu Abasi, mbin mme idiɔk odudu nduɔk, Ke akpanikɔ obio ubɔŋ Abasi idisum mbufo.
21Ke ini ɔkpɔsɔŋ owo ɔbɔbɔde mbɔbɔ ekɔŋ ekpeme ufɔk nsie, ŋkpɔ nsie odu ke emem.
22Ede ke ini owo eke ɔchɔŋde idem akan-e edide enwan ma enyene ufɔk, ke ini ekande-e, ibɔbɔ owo odo kpukpru ŋkpɔ ekɔŋ nsie eke ebereidem ke echid afiak edeme mbume inyene nsie ma mben efen.
23Owo eke ida-a ma ami, aŋwaŋwana ma ami, owo eke itaŋke ibɔk ma ami, asasuan.”
Idiɔk Odudu Afiak Edi
(Matthew 12.43-45)
24“Jesus aka iso atiŋ, ke ini idiɔk odudu ɔwɔrɔde owo ke idem, esaŋa ɔyɔrɔ eyem itie eke achade ma eduɔk odudu; mese ikwe, ete yak mfiak nka ke itie odo ŋkotode ndi.
25Ke ini edide, ekut ete, ke mmɔ ama ɔkpɔri ufɔk, anam eyie.
26Ndien eka akada idiɔk odudu itiahaba afin eke ɔdiɔkde akan spirit odo, mmɔ aka ɔkɔduŋ do. Ndien akputre itie owo okoro ɔdiɔk akan akpa.”
Mben Eke Abasi Ɔdiɔŋde
27Ndien nte Jesus ɔsuk ekpepde ŋkpɔ eken, aŋwan chied ɔwɔrɔ ke otu mben obio emeŋede, uyo ete, “afafan ɔnɔ idubi odo akamande fin ma eba eke ɔkɔwɔpde!”
28Ede Jesus ete, “aka afan ma mben eke okopde ikɔ Abasi afiak nnam mmɔ!”
Mme Owo Eyem Idiɔŋɔ
(Matthew 12.38-42)
29Ke ini mme owo obonode awak, Jesus ete, “emana eken ede idiɔk emana eke eyemde idiɔŋɔ, ede owo imɔnɔ mmɔ ebede idiɔŋɔ asiak uduak Jonah.
30Koro nte Jonah ekedede idiɔŋɔ ɔnɔ mben Nineveh, suhɔ ntoro se eyen owo ide idiɔŋɔ inɔ emana eken.
31Ɔbɔŋ aŋwan usuk-usuk iyadadaha ikpe-ikpe ma mben emana eken afiak otup mmɔ ikpe, siak etode obio eke oyomde edi ikop eti iboud solomon. Ndien eke okponde akan solomon odu mi.
32Mben Nineveh iyadadaha ikpe-ikpe ma emana eken afiak otup mmɔ ikpe. Koro mmɔ akabare echid ke ukwɔrɔikɔ Jonah; ndien owo eke okponde akan Jonah odu mi.”
Utuenikaŋ Ikpɔk Idem
(Matthew 6.22,23)
33“Ndien Jesus ete, owo chied-chied idomoke utuenikaŋ imen inum ke ndube ubed mme ke idak abaŋ, ede onum ke uwuk utuenikaŋ, ma mmɔ eke ɔdukde edi okud unwana.
34Anyin mfo etie nte utuenikaŋ eke ɔnɔde ikpɔkidem unwana ede anyin mfo ama afan ikpɔkidem mfo iyɔyɔk ma unwana akpanikɔ ede mese anyin mfo ɔdiɔkde ikpɔkidem mfo iyɔyɔk ma okum idiɔk ŋkpɔ.
35Che anyin, bak unwana eke odude fin ke idem ikabade okum.
36Ede mese kpukpru idem mfo edede unwana, ndien okum idue ke idem mfo, kpukpru idem mfo iyayama nte utuenikaŋ ayamade ɔnɔ owo unwana.”
Jesus Asua Ɔnɔ Mme Pharisee Ma Mme Ekpep Mbed
37Nte Jesus ɔsuk atiŋde ikɔ ama, Pharisee chied okuod-e ete edidia ŋkpɔ ma emɔ ndien etetie ke itie udia.
38Ede ke ini Pharisee okutde, idem akpa-e, nte Jesus ibomke-iso iyed ubɔk nsie ini adia ŋkpɔ.
39Ede Ɔbɔŋ ɔdɔhɔ ete, “kami mbufo mme Pharisee eyetde edem omuŋi ma edem usan asana, ede echid mbufo ɔyɔk ma ŋwo ma ibak.
40Mbufo mme anana ibuod, nte idaha Abasi odo anamde edem anam echid?
41Ndien ida se mbufo inyenede inɔ mme ubuene ndien kpukpru ŋkpɔ isa-sana inɔ mbufo.”
42“Ede imafanke inɔ mbufo mme Pharisee siak mbufo isiode ubak ikɔŋ ma etidod ma kpukpru utɔ ikɔŋ udia chied ke tie duop inɔ Abasi, ndien mbufo ichin unen ikpe ma ima Abasi. Mbufo ikpa anam ami, ikpotreke inam eke ɔsuhɔde.
43Imafanke inɔ mbufo mme Pharisee siak mbufo imade itie ukpono ke itie ukpono mme Jew mbufo, ma ekɔm ke aŋwa-udua.
44Imafanke inɔ mbufo mme ekpep mbet ma mme Pharisee mme anam ŋkpɔ anyin owo, siak mbufo ibietde udi eke odubede ke anyin, eke owo asaŋade ke ɔnyɔŋ mmɔ ebe idiɔŋɔke.”
45Ede owo chied ke otu mme ekpep mbet ɔbɔrɔ-e ete, “Andikpep, ikɔ eke ofo atiŋde, ma nnyin emesuene nnyin.”
46“Imafanke inɔ mbufo mme ekpep mbet suhɔ, siak mbufo ibupde mbiome eke odobide idori mme owo ke idem, ede mbufo idomoke inum mbet esie.
47Imafanke inɔ mbufo, siak mbufo ibotde udi inɔ mme asiak uduak ndien mme ete mbufo owod mmɔ.
48Ntoro se mbufo ide ntienche ibaŋa utom ete mbufo, ifiak ida ma se mmɔ anamde koro mmɔ okowod mme asiak uduak, ke akpanikɔ ndien mbufo ibod udi mmɔ.
49Mmɔdo, Abasi ke eti ibuod nsie ete, ndɔdɔŋ mme asiak uduak ma mme apostle, echiene mmɔ ndien mmɔ iwowod ifiak ikɔbɔ ndusuk mmɔ.
50Abasi ebebip eyip kpukpru mme asiak uduak eke ekeduɔkde tɔtɔŋɔ ke ntɔŋɔ ererimbon ke ubɔk emana eken.
51Tɔŋɔde ke eyip Abel tutu osum eyip Zachariah, eke mmɔ okowotde ke ufuɔd itie uwa ma temple, ke ata akpanikɔ ke ndɔhɔ mbufo ibebip eyip mmɔ ke ubɔk emana eken.”
52“Imafanke inɔ mbufo mme ekpep mbet, siak mbufo idiɔŋɔke-e, ede iyakke mben eke eyemde iduk ɔduk.”
53Ke ini Jesus atiŋde ikɔ ama, mme ekpep mbet ma mme Pharisee eyire afiak afak-e ŋkaŋ ma ɔkpɔsɔŋ mbip.
54Mmɔ etie ekpeme, ma mmɔ omum-e. Se itiŋde.
Currently Selected:
Luke 11: UKQ
Highlight
Copy
Compare
Share
Want to have your highlights saved across all your devices? Sign up or sign in
Ukwa Bible by Beyond Translation is licensed under Creative Commons Attribution-ShareAlike 4.0 License.
