Luk 22
22
Yudas Achime Aditab Chisọs Nnọ
(Mat 26:1-5,14-16; Mak 14:1,2,10,11; Yọn 11:45-53)
1Akede mkpere ini se mme-Yu etie enam usọrọ usun̄-uchio amo Lifịn miisịneke amo mme-an̄we enan̄ ekwuodde usọrọ N̄kaǝn̄a mkpun̄. 2Nnien mme-ikpọ oku mme mme-akpeb iped nne Mosis ekese edomo ukeme enan̄ ekere mfọn-nkan ayed dan̄a mmọ ewusan̄a ukwod Chisọs ke ayed se ade mpen an̄we imaha udiọn̄ọ ke mme-imọ ekwod Chisọs, sia mmọ eken̄yie ndịk eban̄a se mme-an̄we ewunam udeake mmọ emọmde Chisọs ke eferife. 3Nnien ke ini alo, Andidiọk akeluk akikere ekịd nne Yudas, amo aketode idun̄ se ekwuod Keriod. Yudas n̄ko akede chi ke otu mme-mped nne Chisọs luob mme ipa. 4Anam, Yudas akekaa akuneme mme mme-ikpọ oku mme mme-ala iwuo mpen ukpeme tempịl aban̄a dan̄a an̄ye awusan̄a un̄wam mmọ adimọm Chisọs. 5Mme-ikpọ oku mme mme-ala iwuo mpen ukpeme tempịl ekenin̄e ekob inemekịd enan̄ echime adinọ Yudas aye ke an̄ye adin̄wam mme-imọ imọm Chisọs. 6Yudas akechime anan̄ atun̄o adifed ufan̄ se ifọn man ada Chisọs anọ kini se otu an̄we miitiǝhe.
Chisọs Alia Akpatre Mkpọalia Isio mme Mme-Mped Isio
7Usen usọrọ usun̄-uchio ake lifịn miisịneke adiukem, amo akedeǝhe ini se anaa nte efọb uwa N̄kaǝn̄a mkpun̄.
8Ke usen alo, Chisọs awo Pita mme Yọn, “Ikaa ke Yeruselem ikupeen̄e mkpọalia N̄kaǝn̄a mkpun̄ man afịd achi ikan idọn̄ upọk ilia.”
9Mmọ ebịb Chisọs ewo, “Abọn̄, mbọk dọǝhọ achi itie se Afo afed achi ipeen̄e inọ Fi.”
10Chisọs awo mmọ, “Ikpan̄utọn̄, kini an̄yi ilukde idun̄ a-Yeruselem, an̄we se ibiom apan̄ mmun̄ akusoobo mme an̄yi, ikọọn̄ọ an̄ye iluk ufọk se an̄ye awuluk. 11Nnien iwo nnin̄yie ufọk alo ntomo, Andikpeb achi afed fi akwad achi ubed-ichen amo An̄ye akemede adilia mkpọalia N̄kaǝn̄a mkpun̄ mme achi mme-mped Isio 12Nnin̄yie ufọk alo akukwad n̄yi akwuaha ubed-an̄yọn̄ se ekepana ema enịm enọ achi, ipeen̄e mkpọalia lo.”
13Nnien mmọ ekaa idun̄ alo, enan̄ ekaukwịd kpukpro mkpọ nte Chisọs akewoǝho, nnien mmọ epeen̄e mkpọalia N̄kaǝn̄a mkpun̄ lo.
Chisọs Anam Ufa Ediomo Mme Mme-Mped Isio
14Ini adilia mkpọalia N̄kaǝn̄a mkpun̄ akekem, Chisọs mme mme-isun̄utom Isio ekekaa ke ubed-an̄yọn̄ alo enan̄ etie ke akpokoro. 15Nnien Chisọs awo mmọ, “Aketie anin̄e alọn̄ Mi adilia mkpọlia N̄kaǝn̄a mkpun̄ amo mme an̄yi kiso nkwịd nnutuho mme mkpa. 16Kolo ndọǝhọ n̄yi nte ke mmaha mmaana nlia mkpọalia N̄kaǝn̄a mkpun̄ aba tutu se an̄ye ala anọ akwuọ akwad ide ke ukara Abasi.”
17Nnien An̄ye akepen akoob-wain ke upọk, anọ Abasi ekọm aban̄a nnien An̄ye awo mme-isun̄utom ate, “iwọ wain amo ikeene ke otu an̄yi. 18Kolo ndọǝhọ n̄yi nte ke mmaha nn̄wun̄ wain aba tutu ukara Abasi adi.”
19Chisọs anan̄ apen usun̄-uchio ke upọk Isio, anọ Abasi ekọm, nnien awaǝk anan̄ anọ mmọ ate, “Usun̄-uchio amo ade ekpọkide Ami amo nnọde ke ntak an̄yi. Ikaa iso inam amo ke aditoon Mi.”
20Ke ukem ayed alo, ekelia mkpọ-mmubi ema, Chisọs apen akoob nnien awo, “Akoob-wain amo ala anọ ufa ediomo amo Abasi anamde mme mpen Isio. Ufa ediomo amo atun̄o mme ichiib Ami amo akọbọde nte uwa ke ufọn an̄yi. 21Ade ikpan̄utọn̄, An̄we se iwuda Mi unọ mme-asua Ami mmọ-mo, asalia mkpọ mme Ami. 22Ami Ochio An̄we ke akpanikọ nkukpa nte upoono-mkpọ Abasi adede ade adiọk mme-an̄we alo amo awudade Mi unọ mme-asua Ami.” 23Mme-mped eketun̄o adibịb ke otu ide nne mmọ ete, “Anie ke otu achi ke amese ade amo aduakde adinam utọ idiọkmkpọ alo?”
Efaǝn̄a Kaban̄a Mped Se Ikpon Ikan
24Alo akekpun̄, mme-mped eketun̄o adifaǝn̄a ke otu ide nne mmọ mban̄a an̄we se emeda nte mkpon-nkan mped. 25Ade Chisọs awo mmọ ate, “Ndidem mpen amo miideǝhe mpen-Yu ekara mmọ nlab-nlab, mme-ada ayed nne mmọ ekara mmọ ke adudu, nnien efed chak ekwuod mme-imọ ‘Mme-an̄wam an̄we.’ 26Ade inaǝha an̄yi itie nte mmọ. Utu ke alo, ataa an̄yie-ukpono an̄we ke otu an̄yi ana asuughide nte nsugho-nkan an̄we. An̄we akedede amo adade ayed ana anam mkpọ anọ kpukpro an̄we ke nsuughide mme ke uchime ima ekịd. 27Kolo an̄yi idiọn̄ọ iwo ke an̄we se itie ke akpokoro ilia mkpọ ade mkpon-n̄kan, idọghọ ochio-ufọk amo apene mkpọalia adi. Ade Ami, ala-iwuo an̄yi nsentie nnam ukwadmkpọ nnọ n̄yi ke adinam mkpọ nnọ n̄yi ke adan̄a ini amo nsentiǝhe ke otu an̄yi. 28An̄yi ide mpen se ikikaa iso itie mme Ami ke mme-ini idomo Ami. 29Anam, nninnọ n̄yi unen adikara nte mbọen̄, kpa ukem dan̄a Ọsọ-Ami akenọ Mi unen alo adikara nte Abọn̄. 30Nnien an̄yi ikulia inan̄ in̄wun̄ mme Ami ke ubọn̄ Ami, ikunan̄ utie ke mme-ebekpo nte mme-abiere ikpe ukara mme-esien Isrel luob mme ipa.”
Chisọs Atan Ke Pita Akukan̄ Imọ
(Mat 26:31-35; Mak 14:27-31; Yọn 13:36-38)
31Nnien Chisọs awo Saimọn Pita, “Saimọn, Saimọn, kpan̄utọn̄ kob Mi, Andidiọk akebeen̄e unen adikara kpukpro an̄yi man itre adiwọọd ide mme Ami. An̄ye akuken̄ n̄yi nte atọ-in̄wan̄ aken̄ mbio asuun̄o ke abakpa. 32Ade Ami nkepọn̄ akam nnọ fi, Saimọn, man afo akaiso an̄yie n̄wọọdide ke Ami. Anam, kini afo akaabade ekịd anan̄ atuno abịne Mi, ana afo an̄wam mme-mped mme mmọ ako ke adinam nọ n̄wọọdide nne mmọ achọn̄ ke Ami.”
33Ade Saimọn Pita awo Chisọs, “Abọn̄, ami mpeen̄eide adika ufọk mkpọkọbọ mme Afo, nnan̄ mpeen̄eide adikpa mme Afo.”
34Chisọs awo an̄ye, “Pita, nnam fi adiọn̄ọ ke itịdechio amo, kiso akpọọn-unọn akpọk uchiere, afo akudọǝhọ mme-an̄we nka ita, uwo, ‘ami ndiọn̄ọke an̄we alọ.’ ”
Mkpọ Adikama Nkaa Isan̄
35Nnien Chisọs abịb mme-mped Isio awo, “Kini nkedọn̄de n̄yi ikaa ke mme nsio-nsio idun̄ ika ukwọrọ eti-etob ke an̄yi miikikamake ekpa aye, mee ekpa ukaisan̄, mee ikpaukod, nte an̄yie se ikinana n̄yi?” Mme-mped ewọọnọ ewo, “In̄h-in̄h, achi ikinanake mkpọ ntechi.”
36Chisọs awo mmọ, “Ade komo, mme-an̄we imaha un̄wam n̄yi. Anam, an̄we akedede amo an̄yiede ekpa aye, mme ekpa ukaisan̄ chak apen akama, nnien an̄we akedede amo miin̄yiǝhe ntu, chak an̄yam afun̄ide isio ada aye alo aleb. 37Ami nnam n̄yi idiọn̄ọ iwo ke se ekekwed ke n̄kwed Abasi an̄yie adikwuọ nsu ke ide Ami, Ekekwed ete, ‘Mmọ ekepad An̄ye esịn ke otu mme-abiad iped.’ Ke akpanikọ, kpukpro se mme-ayara uchio Abasi ekekwed eban̄a Mi eninda itie ke ini miikpeneke.”
38Anam mme-mped Isio ewo an̄ye, “Abọn̄, chie ntu ipa mo.” Chisọs awọọnọ mmọ ate, “Alo akem.”
Chisọs Apọn̄ Akam ke Abod Ọlif
(Mat 26:36-46; Mak 14:32-42; Yọn 18:1)
39Chisọs akekwuọ lo ke idun̄ Yeruselem adi. An̄ye aliene akaa ke abod mme-Ọlif nte ido Isio atie adede nnien mme-mped Isio ekọọnọ An̄ye. 40Mmọ ekesịm esak alo, Chisọs awo mme-mped Isio, “Ipọn̄ akam man Abasi an̄wam n̄yi ka an̄yi unam idiọk kini edomode n̄yi.” 41Akem An̄ye asịghe itọ akpun̄ mmọ ilaha upọk ichrọ chi. Nnien An̄ye atọọn̄ eliọn̄ anan̄ apọn̄ akam anọ Abasi. 42An̄ye awo, “Ọsọ-Mi, ude ke uchime Afo, pen akoob ukuud amo siene kpun̄ Mi. Ade mbọk ka nam se Ami mfed. Nam se Afo afed.” 43Akem enyel Abasi abiọn̄ọ anọ An̄ye anan̄ achiọn̄ọ An̄ye ide. 44Nnien nte asekaǝha iso afịghe Chisọs ke ekịd, An̄ye asịn ifịk apọn̄ akam tutu ibiak adeb An̄ye ke ide nte ntọi ichiib akọbọ ke isọn̄.
45Chisọs akepọn̄ akam abiere, alaha ala akaa esak se mme-mped Isio eketie. An̄ye akwịd nte mmọ eselaǝn̄a ato ke ekaha mfugho. 46An̄ye atun̄ mmọ awo, “Nsinam an̄yi ilaǝna! Ilaha ila ipọn̄ akam man Abasi an̄wam n̄yi ka an̄yi unam idiọk kini edomode n̄yi.”
Yudas Ada Chisọs Anọ
(Mat 26:47-56; Mak 14:43-52; Yọn 18:1-11)
47Nte Chisọs asetan̄a ikọ anọ mme-mped Isio, etichie, ekwịd otu an̄we nte edi lo. Nnien Yudas alo akedede chi ke otu mme-Isun̄utom luob mme ipa nne Chisọs akeda mmọ ayed. An̄ye akesan̄a akpere, akọm Chisọs ekọm utọm inua. 48Ade Chisọs awo an̄ye, “Yudas, akwuọ afo ada utọm inua atab Ami Ochio An̄we anọ mme-asua Ami.”
49Kini mme-mped se ikila lo mme Chisọs ekwidde mkpọ se ifed aditịbe alo, mmọ ewo an̄ye “Abọn̄, ade se achi ikpi mmọ ke ntu?” 50Nnien Chisọs atiwọọnọ mmọ, chi ke otu nne mmọ mme-mped Isio afaǝha ntu akpi ochio-ufọk nne akwaha oku nnien akpeghe an̄ye utọn̄ ulom.
51Ade Chisọs awo, “Chak akem nnien!” Akem An̄ye atuuk utọn̄ ochio-ufọk alo anan̄ anam afọn.
52Nnien Chisọs awo mme-ikpọ oku, mme mme-ala iwuo mpen ukpeme tempịl, mme mme-ikpọ an̄we mpen Yu amo ekekwuọghọ ebịne An̄ye ate, “An̄yi ikama ntu mme itio ikwuọn̄ọ idi adimọm Mi nte ifed adimọm inọ? 53Nketie mme an̄yi ke akwere tempịl kwa usen ke afịd ini amo ade an̄yi ikimọmọ Mi lo. Ade ini amo adiude ini an̄yi mme ake adudu ekịm.”
Pita Akan̄ Ke Imọ Idiọn̄ọ Chisọs
(Mat 26:69-75; Mak 14:66-72; Yọn 18:13-18,25-27)
54Mpem ukpeme a-tempịl ekemọm Chisọs, eda An̄ye ekaa ufọk nne akwaha oku. Nnien Pita akọọnọ mmọ nsan-nsan. 55Ekesịm lo, usuk an̄we etuno ikan̄ ke aten̄ akwere ufọk nne akwaha oku etie ekaana ekwebe ikan alo nnien Pita n̄ko adiutie ke otu nne mmọ. 56Akem adan̄a Pita asetiǝhe lo, an̄wan̄wa ochio-ufọk chi akekwịd an̄ye nte akwebe ikan̄, nnien akuugh an̄yie achie an̄ye kiso awo mpen se ikitie lo, “An̄we amo n̄ko akesan̄a mme Chisọs!”
57Ade Pita akan̄ awo, “An̄wan̄wa ndiọn̄ọke An̄ye!”
58Ichie ikpre ini akekpun̄, afee an̄we akwịd Pita nnien awo, “Afo n̄ko ade an̄we chi ke otu ipon An̄we se ekemọm alo.” Ade Pita awo “Abọn̄-an̄we, ndeəhe”
59Mkpọ nte ufan̄ awa chi akekpun̄, afee an̄we achiọn̄ọ ate, “Abian̄a ade akpanikọ ke an̄we amo aketie asan̄a mme Chisọs kolo an̄ye n̄ko ato nkan-nkwuk a-Ghalilii”
60Nnien Pita awo “Abọn̄-an̄we ndiọn̄ọke mban̄a se afo atan̄ alo.” Inichi, adan̄a Pita asetan̄a ikọ amo, akpọọn-unọn akpọk. 61Ke ifed ini alo, Abọn̄ Chisọs akaana an̄yie achie Pita. Lo ke Pita atoon ikọ alo Abọn̄ akewoǝho an̄ye ate, “Kiso akpọọn-unọn akpọk itịdechio mfịn, afo akukan̄ n̄ka ita uwo ke imọ idiọn̄ọke Mi.” 62Akem Pita akwuọ ke akwere akutua afugho eti-eti.
Mpen Ukpeme Tempịl Edọen̄ Chisọs Ndọk
(Mat 26:67,68; Mak 14:65)
63Mpen ukpeme a-tempịl se ikimọm Chisọs edọen̄ An̄ye ndọk enan̄ etịm An̄ye 64Mmọ eda mkpọ epọb An̄ye ke an̄yie nnien ebịb An̄ye ete, “Tan̄ nte ayara uchio Abasi! Siak achịn an̄we se ichọb Fi!” 65Nnien mmọ esekaiso aditan̄ ikọ usuuk-nlaha edian An̄ye.
Chisọs Ala Ke Iso Ikpe Ke Esop Mme-Yu
(Mat 26:57-68; Mak 14:61-64; Yọn 18:12-14,19-24)
66Echio akechiere, esob mme-ikpọ an̄we mpen Yu epoho chi. Mme-ikpọ oku mme mme-akpeb iped nne Mosis ekediana chi esiene Chisọs ekwuuk ke iso esob nne mmọ. 67Akem mmọ ewo An̄ye, “Tan̄ nọ achi ude afo ade Kraist.” Chisọs awo mmọ, “Ude ntan̄de nnọ n̄yi ke Ami nde Kraist, an̄yi imaha uma adinịm se ntan̄. 68Nnien ude mbịbde n̄yi mbime mban̄a mme-mkpọ amo, an̄yi imaha uma adiwọọnọ Mi. 69Ade amo ukuse upen ukpun̄, Ami, Ochio An̄we nwutie ke itie adudu ke upọk ulom Abasi Andikpon Nkan.”
70Akem afịd nne mmọ ebịb Chisọs ewo, “Akwuọ Afo ade Ochio Abasi?” Chisọs awọọnọ, “An̄yi inen adiwo ke Ami nde.”
71Mmọ ebịb ke otu ide nne mmọ ete, “Nsii ntienchie ke achi imaana ifed? Kolo achi ke ide achi ikob ikọ ntienchie ito inua Isio.”
Currently Selected:
Luk 22: IBN
Highlight
Copy
Compare
Share
Want to have your highlights saved across all your devices? Sign up or sign in
Ibino (Ibono) Bible by Beyond Translation is licensed under Creative Commons Attribution-ShareAlike 4.0 License.
