Zaburi 47
47
Uhoraho ni umwami wa Israheli n’uw’isi yose#47.1 . . . n’uw’isi yose: ni zaburi iri mu zisingiza ubwami bw’Uhoraho. Dore uko twashobora kuyumva: Abayisraheli, bamaze gutsinda kimwe mu bihugu bito bibakikije, bagarukana i Yeruzalemu n’Ubushyinguro bw’Isezerano bari bajyanye ku rugamba; babucyura mu Ngoro mu mutambagiro ukomeye (4–7). Imiryango yose rero, itumiriwe kurata Uhoraho (2–3) kandi n’umuririmbyi wa zaburi arazirikana hakiri kare, uko bizaba bimeze igihe isi yose izaba yamenye ko Imana ari yo Mwami (8–10).
1Igenewe umuririmbisha. Ni zaburi y’abahungu ba Kore.
2Miryango mwese, nimukome yombi,
musingize Imana mu rwamu rw’ibyishimo,
3kuko Uhoraho, Umusumbabyose, ari Ruterabwoba,
akaba Umwami w’igihangange ku isi yose.
4Atuyoborera imiryango, tukayihaka;
amahanga akayashyira mu nsi y’ibirenge byacu.
5Adutoranyiriza umugabane udukwiye,
ukaba ishema rya Yakobo, inkoramutima ye. (guceceka akanya gato)
6Imana izamutse bayiha impundu,
Uhoraho azamutse avugirwa n’impanda.
7Nimucurangire Uhoraho, nimucurange!
Nimucurangire Umwami wacu, nimucurange!
8Kuko Imana ari yo mwami w’isi yose;
nimucurange mwimazeyo, mubyamamaze.
9Uhoraho ni Umwami ugenga amahanga,
Imana itetse ku ntebe yayo yuje ubutungane.
10Abatware b’ibihugu bakoranye,
bishyira hamwe n’umuryango w’Imana ya Abrahamu,
kuko Imana ari yo Nyir’ingabo zose zibaho ku isi,
ikaba yatumbagiye hejuru ya byose.
Currently Selected:
Zaburi 47: KBNT
Highlight
Share
Copy
Want to have your highlights saved across all your devices? Sign up or sign in
Kinyarwanda Bibiliya Ntagatifu, Verbum Bible © The Bible Society of Rwanda, Rép. Dém. du Congo, 2012.
