ລູກາ 21
21
ປຣັກຖວາຍແມ່ໝ້າຍທ໋ອກຍາກ
(ມຣກ 12:41-44)
1ເມື່ອພຣະອົງຊົງຮາເລຼກເຕິກ ກໍປິດຕາຍບັນດາປີນຸ໋ຍທີ່ຮັ່ງໃມ໋ ກຳລັງຖວາຍປຣັກເຕືອຍນືຫີບຖວາຍ, 2ແລະ ພຣະອົງປິດຮາເລແມ່ໝ້າຍທີ່ທ໋ອກຍາກມີຣາ ນາງຈ໋ອກຫລຽນທອງປາຕືກທິດຊ໋ອກປຣຽຣ໌ຫລຽນຖອຼກຮານືຫີບ. 3ພຣະເຢຊູເຈົ້າເບົ໋າເກິເອີນສາວົກວ່າ, “ນາເບົ໋າໄປໂຕດສະເນ໋ະຕາມຄວາມມາດວ່າ ແມ່ໝ້າຍທີ່ທ໋ອກຍາກປີນຸ໋ຍແນັ ປິດປ່ອນປຣັກທີ່ໃມ໋ຄ່າທຳເປີງປີນຸ໋ຍອື່ນໆໂຕດແອ. 4ເພາະປີນຸ໋ຍອື່ນເຢຍ ປິດຈ໋ອກປຣັກທີ່ຫາມາຍເລຼີໃຊ ເຈິະຖວາຍ ແຕ່ຕາເຣປີນຸ໋ຍແນັ ເຖິງແມ່ນວ່ານາງທ໋ອກຍາກທີ່ສຸດກໍຕາມ ນາງກໍນະຈ໋ອກປຣັກທີ່ຕົນໃມ໋ໂກຼສຳລັບຈຽມຊີວິດເຢຍຖວາຍແກ່ພຣະເຈົ້າຈົນໂຕດ.”
ພຣະເຢຊູເຈົ້າເບົາເຖິງການທຳລາຍພຣະວິຫານ
(ມທ 24:1-2; ມຣກ 13:1-2)
5ໃມ໋ບາງຄົນເບົ໋າ ຍ້ອງຍໍພຣະວິຫານວ່າທີນຽມມາດ ແລະຕົບແຕ່ງດ້ວຍຕາມໍມຶນເຣາະເກິເຄື່ອງຖວາຍແກ່ພຣະເຈົ້າ, 6ພຣະອົງຈຶ່ງຊົງເບົ໋າວ່າ “ເມື່ອຕະໃງເວລາຈະເຈິະພຶ໋ ໂກ່ະຕາມໍ ຊຶ່ງໄປຕາຍຊ້ອນທັບກັນໂກຼແນັຈະຢີເຫຼືອພໍມີກອນ ໂຕດສິ່ງຈະຕໍຼປາລາບໂຕດແອ.”
ໝາຍສຳຄັນ ແລະ ການຂົ່ມເຫັງ
(ມທ 24:3-14; ມຣກ 13:3-13)
7ເອີນສາວົກປິດເຕືອນພຣະອົງວ່າ, “ອາຈານເອີຍ, ເຫດການເຫຼົ່າແນັຈະເກີດຕຶກເຮິເວລາເຕ? ແລະສີນາຈະຕາຍເມ໋າະເຜີສີນາຈະຈືວ່າ ເຫດການເເຫຼົ່າແນັຕາຕຽບຈະບັງເກີດຕຶກແລ້ວ.”
8ພຣະເຢຊູເຈົ້າເພຼີບຫາມາຍວ່າ, “ຈົ່ງລະວັງເນເຣາະ ມະເນກັອນລອກລວງໄປ. ເພາະວ່າໃມ໋ທຳຣາຈະອ້າງນາມທີເນາະທິນາໂດຍເບົ໋າວ່າ, ເອືອແນັແຫຼະ ‘ເອືອເກີດພຣະຄຣິດ, ແລະ ເວລາທີ່ໂລກແນັຈະສິ້ນສຸດລົງເຈິະພຶ໋ສະ.’ ມະເຊີເຮິສິ່ງທີ່ຫາມາຍເບົ໋າ. 9ເມື່ອໄປປິດຊ໋ອງເລື່ອງເສິກສົງຄາມ ແລະ ໃມ໋ປີນຸ໋ຍກະບົດຕໍ່ລັດຖະບານ. ມະໂຕຼງ. ເພາະວ່າສິ່ງເຫຼົ່າແນັຕ້ອງເກີດຕຶກນອຣ໌, ແຕ່ຕະໄງສິ້ນໂລກຈະຢີເຈິະທັນທີ່.”
10ແລ້ວພຣະເຢຊູເຈົ້ານະເບົ໋າແກ່ຫາມາຍວ່າ, “ປະເທດ ຕໍ່ປະເທດ ອານາຈັກ ຕໍ່ອານາຈັກ ຈະຕໍ່ສູ້ກັນ, 11ຈະໃມ໋ແຜນດິນໄຫວຢ່າງເຣງ, ເວລາອັນຮ້າຍແຮງທິຄວາມອຶິດໂງນຈະເຈິະພືຶ໋, ແລະໂຣກລະບາດຢ່າງຮ້າຍແຮງແຜ່ລາມເຕິກໂຕດທີ່ໂຕດບ່ອນໂທຼໂລກ. ສັນຍານອັນໜ້າໂຕຼງ ແລະ ໜ້າອັດສະຈັນໂຕດປະເພດຈະເກີດຕຶກເກິດກົຼມສະຫວັນ. 12ແຕ່ນອຣ໌ເຫດການໂຕດແອເຫຼົ່ານັ້ນເກີດຕຶກ ຫາມາຍຈະຮັບຈັກເຕິກ ແລະປະຕິບັດຕໍ່ໄປຢ່າງໂຫດຮ້າຍ, ຫາມາຍຈະເບົ໋າໄປບາງຄົນຮານືທຳມະສາລາ ແລະໄປຈະຕຼໍກາຣັນເຮິຄົກ. ຫາມາຍຈະຈຽງໄປທິມັດກະສັດ ແລະເຈົ້າເມື່ອງ ເພາະໄປເປຼີຍສາວົກທິນາ. 13ເຫດການເຫຼົ່າເຢຍຈະເກີດຕຶກແກ່ໄປ ເຜີໄປຈະເປຼີຍພະຍານ. 14ດັ່ງນັ້ນໄປ ຕ້ອງຕຽມເກຼີມທົວະເນໝັ້ງຄົງ ເຜີຢີເນໄປກະວົນກະວາຍໃຈວ່າ ຈະເບົ໋າປ້ອງກັນຕົວເອງເປະເຕ 15ເພາະນາຈະອຳປັນຍາແກ່ໄປເຮິການຈືສິ່ງທີ່ຈະເບົ໋າ. ຢີໃມ໋ກັອນສາມາດທີ່ສ້າງເບົ໋າໄປ ແລະຈະຢີສາມາດຕໍ່ຕ້ານໄປ ຫຼືເບົ໋າວ່າໄປຜິດ. 16ແມ່ນແຕ່ບະເບະ, ເມ໋າະເອ໋າະຢາຍ, ແລະເມົ໋າທິໄປກໍຈະມອບອຳສັດຕູທິໄປ ແລະບາງຄົນເຮິໄປຈະຕໍຼປະຫານຊີວິດ. 17ປີນຸ໋ຍໂຕດສະເນ໋ະຈະຢີຕານອກໄປ ເພາະໄປເກີດສາວົກທິນາ. 18ແມ່ນແຕ່ຊ໋ອກມີເສັ້ນກໍຈະຢີຮາຢັກເຕິກເກິດໂຕ໋ຍທິໄປພຣະເຈົ້າຈະຮັກສາໄປເນປອດໄພຈາກອັນຕະລາຍຕະຫຼອດໄປ. 19ເມື່ອໄປຜ່ານຜ່າຄວາມຫຍຸ້ງຍາກມະເປຼຕັກຄວາມເຊີເພາະວ່າພຣະເຈົ້າຈະອຳຊີວິດນິລັນດອນແກ່ໄປ.”
ພຣະເຢຊູເຈົ້າເບົາຕໍໃປວ່າເມື່ອໃປຕາຍນະຄອນເຢຣູຊາເລັມຈະຕຼໍປາລາບ
(ມທ 24:15-21; ມຣກ 13:14-19)
20“ຈາກນັ້ນ ພຣະເຢຊູເຈົ້າເບົ໋າເກີບວ່າ ເມື່ອໃປຕາຍທະຫານທິສັດຕູເລີ່ມອ້ອມຮອບນະຄອນເຢຣູຊາເລັມ, ໄປຈະຈືວ່າຫາມາຍກຳລັງຈະປາລາບເມືອງເຢຍ. 21ຈາກນັ້ນ ປີນຸ໋ຍທີ່ໂກຼເຮິແຂງຢູດາຍຕ້ອງຕູເຕິກທີ່ກວຣ໌ເຜີຢີເນຕຼໍກາເຈດ, ແລະປີນຸ໋ຍທີ່ໂກຼນືເມືອງເຢລູຊາເລັມຕ້ອງເຍືອຍເຕິກທັນທີ ແລະປີນຸ໋ຍທີ່ໂກຼເຮິເຂດຊົນນະບົດອ້ອມຂ້າງຢີຕ້ອງມູດຮານືເມືອງ. 22ເພາະວ່າ ຕະໄງເຢຍຈະເກີດຕະໄງ ‘ລົງໂທດຈາກພຣະເຈົ້າ.’ ເຜີເນມ໋ອມຕາມທີ່ໃມ໋ຂຽນທົວະເຮິພຣະຄຳພີກ່ຽວກັບເລື່ອງແນັຈະເປຼີຍຄວາມມາດໂຕດຢ່າງ. 23ເຮິສະໄໝອາໃສໂຕຼງແກ໋ສຳລັບເບະທີ່ເຕວ ແລະເມະທີ່ໃມ໋ກອນກາເລດ ຄວາມລຳບາກອັນຕາເມ໋ະຈະເຈິະພຶ໋ປຼີປະເຕ໋ຍແນັ ແລະພຣະເຈົ້າຈະລົງໂທດປີນຸ໋ຍເຫຼົ່າເຢຍຢ່າງໜັກໜ່ວງ. 24ບາງຄົນເຮິຫາມາຍຈະຕຼໍກະເຈດໂດຍທະຫານດ້ວຍດາບ, ແລະບາງຄົນຈະຕໍຼຣັບ. ຈຽງເຕິກເປຼີຍຊະເລີຍເກິປະເທດຕ່າງໆຮານືໂລກ ຫາມາຍຈະເອົາຊະນະ ນະຄອນເຢຣູຊາເລັມ ແລະ ປົກຄອງໂດຍປີນຸ໋ຍທີ່ຢີເກີນຊາວຢິວ ຈົນກວ່າຈະຄົບກຳນົດເວລາທີຫາມາຍປົກຄອງສິ້ນສຸດລົງ.”
ການບີງເຈິະທິກອນກາລໍທິມະນຸດ
(ມທ 24:29-31; ມຣກ 13:24-27)
25“ໃມຈະຕາຍສິ່ງທີ່ແປກປະຫຼາດເກີດຕຶກເກິດວງອາທິດ ແລະດວງຈັນ ແລະດວງດາວທັງປ່ວງ ແລະຈະໃມ໋ຄວາມທ໋ອກປານູຍປຶງປຼີປະເຕ໋ຍໂລກຕາມປະເທດຕ່າງໆຊຶ່ງໃມ໋ຄວາມສັບສົນວຸນວາຍ ເພາະສຽງກ້ອງອັນຕະເມ໋ະທິທະເລ ແລະຄື້ນຟອງທິມະຫາສະມຸດ. 26ປະຊາຊົນຈະເປັນລົມຍ້ອນຄວາມໂຕຼງ ແລະຫາມາຍຈຳເຫດການຕ່າງໆທີ່ກຳລັງຈະເກີດຕຶກໂທຼປຶງປຼີປະເຕ໋ຍໂລກ. ດ້ວຍວ່າ, ສິ່ງທີ່ໃມ໋ອຳນາດເຮິກົຼມສະຫວັນ ຈະສະທ້ານຫວັ່ນໄຫວ. 27ເມື່ອນັ້ນຫາມາຍຈະຕາຍກອນມະນຸດສະເດັດເຈິະປາກົດເຮິອາມູກດ້ວຍຣິດອຳນາດທີ່ມຶນຕາເມ໋ະ ແລະດ້ວຍສະຫງ່າຣາສີອັນຮຸ່ງຈະນະ. 28ເມື່ອເຫດການເຫຼົ່າແນັເລີ່ມເກີດຕຶກ ໄປຈົ່ງຕຶກເຊິງແລະເງີຍມັດຕຶກເພາະຄວາມພົ້ນທິໄປຕາຕຽບສາບັດເຈິະພຶ໋ສະ.”
ບົດຮຽນຈາກເຕີມຕຣົງເທດ
(ມທ 24:32-35; ມຣກ 13:28-31)
29ຈາກນັ້ນ ພຣະອົງກໍຊົງເບົ໋າຄຳອຸປະມາແນັແກ່ຫາມາຍວ່າ, “ຈົ່ງພິຈາລະນາຮາເລເຕີມຕຣົງເທດ ແລະເຕີມລອງຊະນິດອື່ນໆ. 30ເມື່ອໄປຕຼຸບສະເນ໋ະຕາຍຮາລາທິໄອສາບັດຣອນ ໄປກໍຈືວ່າຕາຕຽບຈະພຶ໋ລະດູປານູຍ. 31ດັ່ງນັ້ນ, ເມື່ອໄປຕາຍເຫດການເຫຼົ່າແນັກຳລັງເກີດຕຶກ ໄປຈົ່ງຈືວ່າອານາຈັກທິພຣະເຈົ້າບັັດເຈິະພຶ໋ສະ.”
32“ນາເບົ໋າໄມຕຼຸບສະເນ໋ະຕາມຄວາມມາດວ່າ ປີນຸ໋ຍທັງປວງທີ່ໃມ໋ຊີວິດເຮິເວລາແນັຈະຢີເກດນອຣ໌ທີ່ເຫດການໂຕດແອແນັຈະເກີດຕຶກ. 33ກຼົມ ແລະປະເຕ໋ຍຈະລົ້ມເຫລວ ແລະຖ້ອຍຄຳຂອງພຣະອົງຈະຄົງຢູ່ຕະຫຼອດໃປ.”
ກຽມພ້ອມສະເໝີສຳລັບການບີງເຈິະທິພຣະເຢຊູ
34“ຈົ່ງລະມັດລະວັງວ່າໄປຈະດຳລົງຊີວິດເປະເຕ ມະເສຍເວລາມ່ວນຊື່ນເກິຄວາມມ່ວນຊື່ນ, ແລະພູຕະເພຍ, ແລະວິຕົກວັງວົນນືຊີວິດແນັມື້ນັ້ນຈະຣັບໄປຢ່າງກະທັນຫັນເປະຕຼໍກັບດັກ. 35ດ້ວຍວ່າ, ຕະໃງອາໃສ່ຈະເຈິະຕຼໍມະນຸດຕຼຸບສະເນ໋ະໂທຼປີຼປະເຕ໋ຍໂລກ ເປະປ໋ອງຕຼື. 36ດັ່ງນັ້ນ ຈົ່ງລະວັງ ແລະພາວັນນາອະທິຖານໂກຼທຸກເວລາ, ເຜີວ່າ ໄປຈະພົ້ນເກິດເຫດການໂຕດຢ່າງທີ່ຕາຕຽບຈະເກີດຕຶກເຮິໄວໆແນັ ແລະເຊິງໂກຼທິມັດກອນມະນຸດ.”
37ຕາໃງພຣະອົງຊົງສັ່ງສອນນືພຣະວິຫານຄູ່ໆຕະໃງ ແລະນືຕອນເຣງມັງພຣະອົງປິດເຍືອຍຈາກເມື່ອງ ແລະຕຶກໂກຼປຶງກວຣ໌ທີ່ກາເລົາວ່າກວຣ໌ໄປລຕາປວນເທດ. 38ພໍປຣາງສະອາງປະຊາຊົນຕຼຸບສະເນ໋ະກໍປິດເຈິະທີ່ພຣະວິຫານເຜີຕາເມິງພຣະອົງ.
Currently Selected:
ລູກາ 21: LVI
Highlight
Copy
Compare
Share
Want to have your highlights saved across all your devices? Sign up or sign in
La vy Bible by Beyond Translation is licensed under Creative Commons Attribution-ShareAlike 4.0 License.
