Lukka 8
8
Ijamajako mee mmana too
1Badda tee saa fulaniya, Yesu dukur ruwa fih meddina milaan mee karni milaan ligo uwo alim injil mee kelem nee annas kalama tee mamlaka tee Rabbana. Mee Swahaba too itinashar kaan fih mowo.
2Kaan fih nuswaana al Yesu kaan jaa amrugu min ummon roho albatal mee ab kaan uwo jaa ponyesha ayan fih ummon, yaa kaan fogo mee Mariyam al kaan ggi naadi Magadalena ab uwo jaa turuju min uwo roho albatal saba. 3Mee Joana mariya tee Kuza ab kaan kebir tee juwa tee Kerode Sultan, mee Suzana, mee nuswaana taanin milaan ab jaa amrugu min mali tomon kede awn Yesu mee Swahaba too.
Ijamajako tee ajol ab jaa ajirra tirra
(Matthew 13:1-9; Mark 4:1-9)
4Dukur yom wayyi, kom tee annas milaan kaan lim ummon ligo ummon ggi jaa fih ayinu Yesu, ummon taala min meddina barraw-barraw. Dukur Yesu wonus noomon ligo uwo ggi tummiya ijamajako. 5Yom wayyi “ajol tee kuruju ruwa fih shamba fih ajirra tirra. Bakaan uwo kaan ggi ajirra, tirra taanin wagga fih toruf sika, dukur annas dusu-dusu ummon mee teeran tee foo akul kuul. 6Mee tirra taanin wagga fih bakaan al tee laagera, ummon gum lakin ummon abis kalam kaan endis moyo maa. 7Tirra taanin wagga fih soo. Tirra tee soo jaa rabba bakaan wayyi mee tirra ab duga dukur ataan tirra dee. Dukur tirra dee maa amrugu fogo matunda yoyote. 8Lakin tirra taanin wagga fih tura ab kuweesi dukur gum, kutu fogo akil ab kuweesi mara miya ligo ggi sinda ab ajirra dee. Badda Yesu kalas kelem noomon ijamajako weede, okelem, ab endis adan tee asmma kede asmma.”
Yesu ggi alim mmana tee Ijamajako
(Matthew 13:10-17; Mark 4:10-12)
9Swahaba too dukur asaadu uwo mmana tee ijamajako dee.
10Dukur Yesu jibisha ummon gali, “itakkum endis baraka tee arfu siri tee mamlaka tee Rabbana. Lakin annas taanin anaa ggi wonus noomon fih ijamajako, kede ummon ggi ayinu lakin maa ayinu sokol, ummon asmma lakin ummon maa ggi faham.
11Yaa, maana tee ijamajako dee yaa weede: tirra yaa kalama tee Rabbana. 12Annas taanin fih jee torof sika ab tirra wagga fogo. Ummon asmma kalama lakin sitan jaa sulu kalama dee min gelbba tomon fih abbusu ummon min amin mee ponyesha. 13Annas taanin fih jee tura tee laager ab tirra wagga fogo. Ummon yaa annas ab ggi asmma kalama tee Rabbana, wu kaman ummon ggi furaayi mowo lakin ummon maa ggi sibbu kalama tee Rabbana kee rabba fih gelbba tomon. 14Annas taanin fih jee bakaan tee soo ab tirra ggi wagga fogo. Ummon yaa annas ab ggi asmma kalama tee Rabbana lakin jee saa ggi futu, ummon abidu feker fih tajir mee raha tee hayyi. Mee fayyida, ummon maa rabba seme fih roho. 15Annas taanin ummon fih jee tura ab kuweesi ab tirra wagga fogo. Ummon yaa annas ab ggi asmma kalam tee Rabbana fih addil mee gelbba ab kuweesi. Mee uwo zidu amin kutu fogo matunda mee subra.”
Ijamajako tee Taa
(Mark 4:21-25)
16Yesu zidu kelem gali, “kaan ajol waala taa, ummon maa kati mee gufo. Lakin uwo kutu fih bakaan ab fadi kee waala nee killa ajol ab dakul fih juwa dee. 17Killa sokol ab dusu beenu naara, mee sokol ab fih siri beenu naara bi kutu killa wayyi kee faham. 18Yaa fih jeedde asmma kum seme alim tayi, kalam annas ab aju faham sokol ab anaa ggi alim, Rabbana bizidu wedi noomon faham, lakin annas ab maa aju faham, Rabbana bi sulu min ummon faham tomon siya dee.”
Mamma tee Yesu mee akwaana too jaa nee uwo
(Matthew 12:46-50; Mark 3:31-35)
19Yom wayyi, ligo Yesu kaan ggi alim, mamma too mee akwaana too jaa fih wonus moo. Lakin ummon maa jaa geri mee uwo kalam annas milaan kaan lim geri mee moo.
20Ajol wayyi kelem noo, “mamma takki mee akwaana takki ummon jaa fih wonus mee itaa, dukur ummon yegif baara.”
21Yesu ggibisha ummon kuul, “annas ab ggi asmma kabar tee Rabbana mee leyin fogo ummon fih jee mamma tayi mee akwaana tayi.”
Yesu ggi yegif guddrra tee loobu
(Matthew 8:23-27; Mark 4:35-41)
22Yom wayyi, Yesu kelem nee Swahaba too gali, “kede inna gata Bahari Geresenereti kede inna ruwa fih safa taani.” Dukur ummon panda fuluka, ummon abidu ruwa. 23Wakati ummon kaan ggi ruwa, Yesu num. Dukur fih gwaam lobbu tee guddrra abidu afuku fih bahari mee fuluka tomon abidu amla mee moyo ummon kaan tabu tee guddrra.
24Dukur Swahaba dee ruwa toruuwo ligo ummon ggi kelem, “siddi! Awn inna kalam inna giruwa muttu.” Dukur uwo gum foo uwo weri nee lobbu dee mee moyo kede sibbu jeedde, dukur bahari dee adul. 25Dukur Yesu kelem nee Swahaba too gali, “ley itakkum maa ggi amin anaa? Yaa Swahaba dee kaffu mee hayiru mee wonus fih badum, weede kiligga tee ragi yatu weede! Laid lobbu mee moyo ggi leyin nee sharia too.”
Yesu ponyesha ragi ab kaan endis roho ab batal
(Matthew 8:28-9:1; Mark 5:1-20)
26Yesu mee Swahaba too ummon rasul fih torof tee Bahari geeri mee Bele tee Geresenereti bakaan annas ggi geni fogo ab fih-fih safa tee bahari min Bele tee Galilaya. 27Bakaan Yesu mee Swahaba too taala min fuluka, ragi ab kaan endis roho albatal jaa noo. Ragi dee kaan ggi geni fih meddina tee Geresenereti fih juwa lakin aseede uwo ggi geni fih kabri mee kaman uwo maa kaan ggi lebisi gumas mudda towwhil. 28Waakati ragi dee ayinu Yesu, owonus mee sauti foo dukur osujud tee tey kura tee Yesu dukur owonus mee sauti foo, “Yesu nyereku tee Rabbana ab tee foo, Rabbana sunu yaa itaa aju min inna? Matta keregi inna.”
29Dukur ragi dee kelem gali, kalam Yesu amrisha roho albatal kee taala fih ragi dee. Zaaman annas kaan ggi robutu uwo mee nyororo fih idda too lakin uwo kaan ggi gata yororo dee. Marri milaan, roho albatal dee bi taban uwo laid bi sulu uwo fih bakaan ab pengele.
30Dukur Yesu asaadu uwo, “asmma takki yaa munu?” Ragi dee jibisha, “inna askeria.” Kelem asmma dee kalam kaan amla mee roho albatal milaan. 31Dukur, roho albatal dee zidu mee naangu Yesu gali uwo maa kee amrisha ummon dakal fih lufura ab maa ggi kalas.
32Ligo kalama dolde giruwa gidaam, kaan fih kom kebir tee goduru ligo lim fih bakaan tee saraa fogo. Dukur roho albatal dee naangu Yesu kee rudu ummon kee dakul fih goduru uwo rudu kee dakal fugu ummon. 33Yaa roho albatal taala min ragi dee dukur dakal fih goduru. Dukur goduru kuul jerre zaidi min gala sakar laid fih bahari dukur ummon kuul muttu. 34Waakati rujala ab ggi chunnga goduru dee ummon ayinu sunu yaa soh. Ummon jerre min kalam kuwaf. Ummon ruwa fih meddina tomon mee karni ummon kelem nee killa wayyi sokol ab soh. Dukur ummon ruwa fih meddina mee bakaana taanin dukur ummon kelem nee killa wayyi sunu yaa kaan soh.
35Dukur annas ruwa naa kede ummon ayinu sunu yaa jaa soh naa. Ummon jaa fih bakaan ab kaan Yesu fogo yaa ummon ayinu ragi ab Yesu ponyesha roho albatal ligo ogeeni fih torof tee Bahari ligo olebisi gumas uwo kaman pona. Bakaan annas ayinu kalama dee ummon abidu kaffu Yesu.
36Dukur annas ab ayinu kalam ab soh dee, ummon kelem nee annas taanin jee Yesu ponyesha ragi ab kaan endis roho albatal. 37Dukur annas ab kaan geeri mee karni tee Geresenereti ummon kelem nee Yesu, “awn inna mee kee itaa wassa min bakaan teena” Kalam ummon kaan ggi kaffu uwo. Dukur Yesu mee Swahaba too ummon panda fuluka dee dukur ummon ruwa fih torof tee Bahari.
38Kabbla Yesu mee Swahaba too taala min bakaan dee, ragi ab Yesu ponyesha roho albatal, uwo naangu uwo, kede inna ruwa sawa, lakin Yesu aba dukur okelem noo, 39“Aarja nee annas takki wu kede itaa kelem nee annas killa kalam ab Rabbana soh neetaa.” Ini yaa ragi dee ruwa fih meddina ligo oggi kelem nee killa ajol kalama ab tee guddrra ab Yesu soh noowo.
Binniya tee Yailo mee mariya ab ayan
40Waakati Yesu mee Swahaba aarja fih Bele tee Galilaya, annas milaan karibisha uwo mee furaayi kalam ummon kaan gistenu uwo fih aarja. 41Fih waakati naade, ragi ab ggi naadi Yailo ojja nee Yesu. Yailo okaan kebir min kubarina tee Sinagoga. Dukur ojja osujud fih tey tee kura tee Yesu, uwo asaadu noowo ligo oggi kelem gali, “taali fih beyy tayi” 42Kalam binniya too kaan ayan wu uwo geeri mee muttu. Okaan binniya tee saana itinashar wu kaman uwo yaa kaan nyereku too baara. Yesu dukur ruwa mowo, fih waakati kaan oggiruwa annas kaan ggi asuru Yesu fih killa bakaan.
43Fih annas abkan milaan kaan fih inna mariya abkan endis ayan tee nuswaana tee domu ligo okalasmo mudda tee saana itinashar. Okaan tummiya ssente too kuul nee diktara lakin uwo maa ligo ajol ab ponyesha uwo. 44Dukur ojja mee siri min wara tee Yesu uwo amsuku fih torof tee gumas too fih mara wayyi dukur domu dee gata dukur opona.
45Yesu dukur asaadu kom tee annas, “munu amsuku fugu anaa?” Annas ruwa gidaam mee kelem noowo ata lissa mafih ajol ab amsuku fugu itaa. Ini yaa Pita kelem nee Yesu gali, “Siddu teena, annas lifu itaa milaan ladi ummon ggi asuru itaa taasil agddear kun fih ajol ab amsuku fugu itaa” 46Yesu ruwa gidaam mee kelem gali, “anaa arfu fih ajol ab amsuku fugu anaa kalam guddrra tayi tee ponyesha taala min anaa.” 47Mariya dee faham kalam osoh nee Yesu, ojja gidaam uwo ligo oggi rogusu mee kuwaf dukur osujud gidaam tee Yesu ligo killa ajol ggi asmma, owonus sabab ley uwo amsuku fih Yesu mee nammna ab uwo pona moo gwaam.
48Yesu dukur kelem nee mariya dee gali, “mariya weede sabab tee amin fugu anaa, itaa kaala pona kaala. Ruwa kede Rabbana zidu nee itaa amaani.” 49Yesu waakati lissa ggi wonus mee mariya dee, ajol wayyi dukur taala min beyy tee kebir tee Sinagoga Yailo, okelem nee Yailo, “binniya takki ata mafih faida tee taban malim ruwa naa.”
50Yesu waakati asmma kalam tee ragi dee ab uwo kelem, okelem nee Yailo, “matta kaffu, lakin amin mee anaa kalam anaa bi awn binniya takki min muttu.”
51Ini bakaan Yesu lasulu fih juwa too Yailo, uwo sulu Swahaba too talata; Pita, Yokana, mee Jemusi, mee wazazi tee binniya dukur ummon ruwa fih juwa bakaan ab kaan binniya num fogo. 52Bakaan ummon dakal fih juwa, annas ab kaan fih inna ummon kaan endis singa mee kore fih isi tee foo kalam muttu tee binniya. Lakin Yesu kelem nee ummon gali, “sibbu kum kore; binniya dee maa muttu, uwo num mee num!”
53Bakaan annas asmma kalama dee, ummon atakku uwo zaidi kalam ummon arfu gali binniya muttu. 54Lakin Yesu amsuku binniya ab kaan muttu fih idda uwo naadi binniya mee isi tee foo, “binniya sakar gum!” 55Fih gwaam uwo geri hayyi uwo gum uwo yegif. Yesu kelem kee wedi noowo sokol tee akul. 56Wazazi tee binniya hairru zaidi, lakin Yesu kelem nee ummon kee maa kelem nee ajol yoyote kalam ab kaan fih.
Currently Selected:
Lukka 8: KCN
Highlight
Copy
Compare
Share
Want to have your highlights saved across all your devices? Sign up or sign in
Nubi Bible by Beyond Translation is licensed under Creative Commons Attribution-ShareAlike 4.0 License.
