Lukka 7
7
Yesu ponyesha mee alim fih Galilaya
(Matthew 8:5-13)
1Baada Yesu kalas alim killa sokolinna nee annas, dukur ojja fih meddina tee Kaperenawum bakaan wayyi mee Swahaba too. 2Fih meddina naade, kaan fih inna labbi tee kebir tee askeria tee Romu abkan uwo aju zaidi lakin kaan uwo ayan zaidi ligo kaan uwo geeri mee muttu. 3Ini yaa kebir tee askeria tee Romu waakati uwo asmma gali Yesu fih-fih meddina wedede, uwo liju kubarina tee diin tee nas Yudaaya kede ummon ruwa kelem nee Yesu gali, “taali kede itaa ponyesha labbi tayi ab ayan” 4Waakati ummon jaa nee Yesu ummon wagga-wagga noowo kede uwo jaa gwaam mowo kede ummon awn kebir naade. Dukur kelem noowo gali, “kebir tee askeria tee Romu gifa kede awn uwo fih nammna weede” 5Kalam uwo aju annas teena wu kaman uwo abinu Sinagoga.
6Ini yaa Yesu jaa ruwa moo ummon fih juwa tee kebir tee askeria tee Romu. Waakati Yesu kaala rasul geeri mee juwa kebir tee askeria tee Romu oliju sabiyana too kede ruwa kelem nee Yesu gali, “malim, matta karab waakati takki fijaa fih juwa tayi kalam anaa maggi tim kede anaa jaa naadi itaa fih juwa tayi. 7Wu kaman anaa maja neetaa, lakin wonus kalam fih bakaan ab itaa fih fogo anaa amin jee labbi tayi bijja pona. 8Anaa arfu dolde kalam anaa ragi ab fih tee tey tee rujala ab endis hukkum wu kaman anaa endis askeria ab fih tee tey tayi. Mee kaan anaa kelem nee wayyi gali, ‘ruwa,’ uwo bi ruwa, mee taani gali, ‘taali,’ uwo bijja, mee killa waakati ab anaa ggi kelem nee labbi tayi soh kidima wedede, oggiso.”
9Waakati Yesu asmma kalama dolde ab ragi dee kelem, oshanga zaidi dukur uwo agilibu uwo nee annas abkan ggi masi wara uwo, okelem, “fih hakki anaa ggi kelem neetaa, anaa lissa maligo ajol wayyi fih Israel ab endis amin ab tee guddrra fugu anaa sinda ajol ab maa tee Yudaaya weede.” 10Aseede bakaan sabiyana tee kebir tee askeria aarja fih juwa too ummon loggo labbi too ligo uwo pona.
Yesu gum yowele tee mariya ab ragi too jaa muttu
11Fih yom taani, Yesu ruwa fih meddina ab ggi naadi Nayin. Swahaba too mee kom tee annas milaan ruwa mowo. 12Waakati Yesu kaan ggi jaa geeri mee babbu tee meddina, uwo ayinu annas ligo ummon arfu mee itaa tee nyereku yowele ab mamma too ragi too muttu mee kom tee annas milaan kaan gija mee mariya dee fih dofun. 13Ini yaa waakati siddu teena Yesu ayinu mariya dee, singa sowo, okelem noowo gali, “matta kore.”
14Yesu dukur jaruwa fih bakaan ab fogo janaza dee dukur uwo amsuku fogo rujala abkan arfa janaza dee, ummon agif ini yaa Yesu dukur kelem gali, “yowele, anaa ggi amrisha itaa gali, gum foo!” 15Fih gwaam zaidi, yowele abkan muttu dee uwo aarja kun hayyi ogeeni dukur uwo abidu wonus. Ini yaa Yesu aarja uwo nee mamma too.
16Ini yaa annas ayinu sokol ab Yesu soh, ummon kuul shannga mee kuwaf dukur ummon shukur nee Rabbana ligo ummon ggi kelem, “Nebbi ab tee guddrra offih bakaan wayyi mee inna! Rabbana jaa awn annas too” 17Dukur kabar tee Yesu setetu fih Bele tee Yudaaya mee karni kuul ab ggi torof.
Yesu mee Yokana ab ggi batiza
(Matthew 11:2-19)
18Waakati Yokana ab ggi batiza kaan fih-fih jela, Swahaba too kelem noowo killa sokol ab Yesu kaan gihso. Yaa Yokana naadi tinen min Swahaba too.
19Dukur uwo rasul ummon nee Siddu Yesu kede asaadu uwo gali, “Itaa yaa Kristo ab kaan inna gistenu kede itaa jaa, amaa kede inna steenu taani?”
20Ini yaa Swahaba tee Yokana ab ggi batiza waakati ummon rasul fih bakaan ab Yesu kaan fih fogo, ummon kelem noowo gali, “Yokana ab ggi batiza rasul inna kede inna jaa asaadu itaa gali, Itaa yaa Kristo ab kaan inna ggi steenu amaa kede inna steenu taani?”
21Fih waakati naade ligo Swahaba tee Yokana lissa fih inna, Yesu ponyesha annas milaan ab kaan endis ayan tee fawti mee taani ab kaan taban mee roho albatal dukur okutu annas ab amyaanin kede ayinu. 22Ini yaa Yesu aarja nee Swahaba tee Yokana, “ruwa tokum nee Yokana kede itakkum kelem noowo sokolinna ab itakkum ayinu mee ab itakkum asmma. Nas amyaanin ggi ayinu, ab keregi ggi masi, annas ab endis ayan tee gildu tee guddrra pona, aterreesa kuul ggi asmma, meitin aarja ummon fih hayyi mee kabar ab seme kelem nee miskiinin. 23Kelem kum nee Yokana gali, Rabbana ggi wedi baraka nee killa ajol ab ggi amin anaa.”
24Waakati mursalin tee Yokana dee ruwa, Yesu dukur abidu wonus mee kom tee annas milaan kalama ab ggi amsuku nee Yokana ligo oggi kelem gali, “Ligo Yokana ggi batiza, itakkum ruwa fih ayinu sunu fih bakaan ab pengele, lagada ab ggi hizzu mee lobbu?” 25Kaan itakkum maja ruwa fih ayinu dolde, itakkum jaa ruwa fih ayinu sunu? Itakkum ruwa fih ayinu ajol ab lebisi gumasa ab tee beyy? Tasil ata maa! Kalam annas ab ggi lebisi gumasa tee beyy ggi kun tajirin dukur ummon ggi geni fih midani tee Sultan. 26“Sunu yaa itakkum ruwa baara fih ayinu? Itakkum ruwa fih ayinu Nebbi? Ayi taasil. Lakin anaa ggi kelem nee itakkum, Yokana ggi singa Nebbi? 27Kalam Yokana yaa mursali ab katib wonus fuguwo zaaman ligo ggi kelem, ‘Ayinu, anaa ggi rasul mursalin tayi gidaam takkum,’ obijja adul annas fih jaa tee siddu.”
28“Anaa ggi kelem nee itakkum, fih ustu tee annas ab jaa eesh mafih ajol ab tee maana jee Yokana. Lakin ajol ab fih-fih mamlaka salakun uwo ggi beenu maa endis maana, uwo ggi shinda Yokana.”
29Waakati annas kuul mee annas tee lim musoro asmma kalama ab Yesu ummon amin gali sika tee Rabbana yaa tee addil kalam Yokana jaa batiza ummon. 30Lakin nas Farasin mee malima tee sharia tee Musa ummon aba ab Rabbana adul noomon kalam ummon jaa aba Yokana kee batiza ummon.
31Ini yaa Yesu zidu kelem noomon gali “Annas tee waakati weede anaa ggi fananisha ummon mee sunu? Ummon ggi beenu jeedde. 32Ummon ggi beenu jee yaala ab geni falaata fih bakaan tee sulu ligo ummon ggi alabu. Wayyi min ummon ligo ggi wonus mee sauti ab tee foo nee aku taani Inna gunna kungu tee jooju lakin itaa maa alabu, inna gunna kungu tee singa lakin itaa maa jaa kore.”
33Anaa ggi kelem dolde kalam Yokana ab batiza ojja onigitu akul ab tee rayisi mee aba asurub merisa lakin itakkum jaa kelem “uwo kaan endis roho albatal.” 34“Fih nammna taani anaa nyereku tee ajol anaa ggi akul anaa ggi asurub wu itakkum kelem, ayinu weede ab ggi akul zaidi wu kaman ggi asurub zaidi uwo kaman sabi tee annas ab ggi lim musoro mee annas taanin ab soh zambi. 35Lakin agil ggi kun addil fih hayyi tee ummon ab ggi faatiya agil.”
Yesu ggi sama mariya tee soh zambi.
36Yom wayyi, Simon wayyi min kom tee Farasin okaribisha Yesu kede akul mowo akil tee fileli, Yesu ruwa fih juwa too dukur uwo geni fih akul. 37Fih meddina naade kaan fih inna mariya wayyi ab kaan ggi eesh fih maisha tee zambi waakati uwo asmma gali Yesu fih-fih akul fih juwa tee Farasin, uwo sulu chupa ab amla dikin tee beyy dukur oruwa naa. 38Uwo ruwa fih juwa dee dukur uwo yegif jambu Yesu dukur uwo abidu kore ladi okutu kura tee Yesu kede bilu mee moyo enna dukur uwo abis moyo enna min kura tee Yesu mee suraas too dukur uwo chum ummon dukur okubu fih kura dee ab kaan endis reeha ab kuweesi.
39Ini yaa Farasin ab kaan karibisha Yesu waakati uwo ayinu jeedde, owonus minjuwa gelbba too ligo oggi kelem, “kaan-kaan ragi weede taasil Nebbi, okaan bi faham gali mariya ab ggi amsuku fuguwo kaan ajol tee soh zambi.”
40Ini yaa Yesu kelem noowo “Simon anaa endis kalama tee kelem neetaa, dukur Simon jibisha okelem gali, ayi malim kelem naana”.
41Ini yaa Yesu kelem noowo ijamajako gali, “kaan fih inna ragi wayyi ab jaa deni annas tinen ssente. Wayyi owedi noowo feza kamsaa miya, mee taani dee owedi noowo kaamsin.
42Waakati rujala tinen dee maa jaa agddear lippa ssente nee ragi siddu deenu. Dukur uwo sama ummon tini kuul deni dee. Yaa fih jeedde jibisha kum anaa,” itakkum ggi feker gali fih tinen dolde munu yaa bijja aju siddu ssente dee zaidi?
43Simon aarja fogo, “anaa ggi feker ajol dee ab jaa sama deni ab milaan” yaa Yesu kelem nee Simon, “majib takki addil.”
44Yesu agilibu nee mariya dee dukur okelem nee Simon, “feker fih sokol ab mariya dee soh. Waakati itaa karibisha anaa fih juwa takki, itaa maa wedi naana moyo tee kasuru tura min kura tayi. Lakin mariya dee kasuru kura tayi mee moyo enna too lakin abis ummon mee sulu rasu too. 45Itaa maa karibisha anaa mee salam tee sabi. Lakin mariya dee chum kura tayi min jee anaa dakal. 46Itaa maa massa dikin fih kura tayi, lakin mariya dee massa dikin ab tee reeha kuweesi fih kura tayi. 47Fih sabab wedede, anaa ggi kelem nee itaa gali sama uwo zambi too milaan ab uwo jaa soh, mahaba too yaa giweri lakin ajol ab uwo jaa soh uwo bijja weeri mahaba siya.”
48Ini yaa Yesu jaa kelem nee mariya dee gali “Mariya anaa ggi sama zambi kuul ab itaa jaa soh.”
49Yaa annas kuul ab kaan ggi akul mowo ummon asaadu badum tomon “ragi weede ginadi uwo munu” uwo suluwo gali “uwo agddear sama zambi ab Rabbana yaa gihso.”
50Yaa Yesu ruwa gidaam kelem nee mariya dee, “amin takki fugu anaa awn itaa min zambi takki ruwa kede Rabbana wedi neetaa amaani.”
Currently Selected:
Lukka 7: KCN
Highlight
Copy
Compare
Share
Want to have your highlights saved across all your devices? Sign up or sign in
Nubi Bible by Beyond Translation is licensed under Creative Commons Attribution-ShareAlike 4.0 License.
