Lukka 23
23
Ggi wedi Yesu nee Pontius Pirato
(Matthew 27:1; 11-14; Mark 15:1-5; Yokana 18:28-38)
1Dukur kubarina tee Yudaaya jibu Yesu nee gavana tee Romu, asmma tee munu yaa Pirato. 2Dukur ummon abidu asiki Yesu gidaam Pirato ligo ummon ggi kelem gali, “Inna ligo ragi wedede ggi taban annas teena. Uwo kelem gali batal wedi musoro nee Sultan kebir tee Romu, wu uwo kabas gali uwo yaa Kristo, Sultan ab tee guddrra.” 3Yaa Pirato asaadu Yesu gali, “Taasil itaa yaa Sultan tee Yudaaya?” Dukur Yesu ggibisha Pirato ligo oggi kelem gali, “Taasil anaa fih jee itakkum wonus.” 4Pirato dukur kelem nee kebir tee kahin mee annas tee naa gali, “Anaa maa loggo makosa yoyote fih ragi dee.” 5Lakin ummon zidu asiki uwo ligo ummon ggi kelem gali, “Uwo jibu taabu nee annas tee Yudaaya mee alim ab uwo alim ummon annas. Uwo abidu alim jeedde fih Galilaya ladi fih meddina tee Jerusalem!” 6Wakati Pirato asmma weede, uwo asaadu ummon gali, “Ragi wedede tee Galilaya?” 7Wakati Pirato faham gali Yesu ajol tee Galilaya, bakan ab Sultan Kerode yaa ggi hukum, uwo liju uwo nee Kerode ab kaman kaan fih-fih meddina tee Jerusalem fih wakati dee. 8Kerode furaayi wakati uwo ayinu Yesu kalam uwo asmma fogo mee uwo kaan aju ayinu uwo mudda towwhil mee ayinu noo ligo uwo ggi soo kalama tee majjab. 9Yaa uwo asaadu Yesu maswil milaan, lakin uwo maa ggibisha uwo ladi wayyi. 10Fih saa wayyi dee, kebir tee kahin mee malima tee sharia tee Musa ummon kaan fih inna ligo ummon ggi asiki Yesu. 11Dukur Kerode mee askeria too ummon abidu wonus kalam batal nee Yesu mee alis uwo mee lebisi uwo mee gumas ab ggi waala-waala dukur Kerode aarja uwo nee Gavana Pirato. 12Fih yom naade mara Kerode mee Pirato kun sabiyan kalam kabbla yom dee killa wayyi kaan adduyi tee aku.
Pirato ggi gata nee Yesu muttu
(Matthew 27:15-26; Mark 15:6-15; Yokana 18:38-19:16)
13Dukur Pirato rasul mursalin nee kebir tee kahin, kubarina tee Yudaaya mee annas. 14Yaa uwo kelem noomon gali, “itakkum jibu ragi weede naana mee asiki uwo gali uwo kaan ggi kelem nee annas kee dusman mee gavana tee Romu. Aseede anaa asaadu gidaam itakkum kuul, anaa ayinu ragi dee endis maa makosa. 15Kerode kaman maa ligo makosa batal ab uwo soo. Yaa ley uwo aarja uwo naana. Yaa ggi weeri gali ragi dee maa soo makosa yoyote ab mee katul uwo.” 16Yaa fih jeedde, anaa bi amrisha dugu uwo dukur yaa anaa bi seebu uwo. 17Pirato soo jeedde kalam killa jooju tee futu fogo uwo endis tee fikku mobuusu wayyi min annas tee Yudaaya. 18Lakin annas kuul dugu kilele gali, “Katul ragi dee kede itaa fikku neena Balaba.” 19Balaba kaan fih jee llaa kalam dusman mee annas taanin fih meddina tee Jerusalem mee katul ajol. 20Pirato kaan lissa aju fikku Yesu yaa uwo wonus mee annas dee mara taani. 21Lakin ummon zidu dugu kilele ligo ummon ggi kelem gali, “Kutu kum uwo fih msalaba! Kutu kum fih msalaba.” 22Pirato dukur wonus mee ummon tee mara talata ligo uwo ggi kelem gali, “Ley? Makosa sunu yaa uwo soo? Anaa maa ggi ayinu makosa ab ggi faa izabu tee muttu. Yaa anaa ggi ruwa amrisha dugu dukur anaa bi seebu uwo.” 23Lakin uwon zidu wonus mee sauti foo zaidi gali Yesu endis tee kutu uwo fih msalaba, fih mwisho dugu kilele tomon futu fogo. 24Yaa Pirato soo sokol ab annas kaan aju. 25Jeedde ummon asaadu, Pirato fikku ragi dee asmma too Balaba, uwo ab kaan robutu fih jela kalam karab mee katul. Yaa Pirato amrisha annas sulu Yesu mee soo sokol ab ummon kaan aju.
Ggi kutu Yesu fih msalaba
(Matthew 27:32-44; Mark 15:21-32; Yokana 19:17-24)
26Ligo askeria tee Pirato ggi sulu Yesu fih bakan ab ummon kaan ggi ruwa kutu uwo fogo fih msalaba, ummon ligo ragi wayyi asmma too Simon uwo kaan taala min Kulene ligo uwo ggi ruwa fih meddina tee Jerusalem min safa naade. Ummon yegif uwo, kutu msalaba foo gowu kutu uwo arfa msalaba dee ligo uwo ggi masi fih waara tee Yesu. 27Annas milaan masi mee Yesu. Kaan fogo nuswaana ab kore noowo mee sauti tee foo. 28Lakin Yesu agilibu uwo noomon okelem noomon gali, “itakkum nuswaana tee Jerusalem, matakkum kore naana! Lakin, kore kum kalam sokol ab ruwa sowo nee itakkum mee yaala takkum! 29Asmma kum yom bijja jaa ligo annas ggi kelem, Furaayi kum nuswaana ab kaan maa endis yaala mee rada ab maa ponyesha yaala ummon endis baraka. 30Dukur ummon bijja kelem nee gala mee gala ab duga gali, Wagga fugu inna mee dofun inna! 31Kore kum nee itakkum badum kalam kaan dee yaa sokol ab giruwa soo naana, munu yaa fih jee shedel ab abis, mee sunu yaa bi soo nee itakkum ab fih jee shedel ab abis.” 32Kaan fih inna rujala taani tinini abkan sulu bakan wayyi mee Yesu fih katul. Ummon kuul kaan kasuru sharia. 33Waakati ummon rasul fih bakan ggi naadi Kalikale, Ummon dugu mee msumari fih msalaba kede uwo muttu bakan wayyi mee annas tinini dee ab kasuru sharia. Ummon kutu wayyi dee fih idda yomin, mee taani dee fih idda suman. 34Dukur Yesu kelem gali, “Babba tayi, sama ummon, kalam ummon maa faham sokol ab ummon ggi soo.” Yaa askeria gesim gumasa too noomon siddu. 35Annas milaan yegif geeri ummon ggi ayinu, lakin kubarina tee Yudaaya atakku uwo ligo ummon ggi kelem gali, “Uwo ponyesha annas taanin. Kee uwo ponyesha kaan taasil uwo yaa Kristo ab Rabbana nigitu.” 36Mee askeria kaman abidu sakal atakku Yesu, ummon jibu noowo wayini ab karab ummon kelem kee uwo asurub. 37Dukur ummon kelem noowo gali, “kaan taasil itaa yaa Sultan tee Yudaaya, ponyesha itaa!” 38Fih foo tee rasu tee Yesu fih msalaba, ummon kutu fogo alma mee kalama dolde gali, “WEDEDE YAA SULTAN TEE YUDAAYA.” 39Wayyi min annas ab kasuru sharia ab kaan kutu uwo mowo fih msalaba alis uwo ligo ggi kelem gali, “itaa yaa maa Kristo? Kaan yaa itaa dukur ponyesha itaa mee inna!” 40Lakin aku taani ab kaan fih safa taani tee Yesu kelem gali, “itaa maa endis tee wonus jeedde. Itaa endis tee kaffu Rabbana kalam amrisha itaa kede muttu jee ragi weede. 41Seyi ggi faa mee inna izabu nammna wedede kalam inna tinini ggi ligo izabu ab inna soo batal. Lakin ragi weede maa soo sokol ab batal yoyote.” 42Dukur ragi dee kelem nee Yesu gali, “siddi, kumbuka anaa, kaan itaa abidu hukum fih mamlaka takki.” 43Yesu kelem noomon gali, “Anaa ggi kelem neetaa hakki, naare itaa giruwa kun mee anaa fih shamba tee Rabbana ab fih samayi!”
Yesu muttu fih msalaba
(Matthew 27:45-56; Mark 15:33-41; Yokana 19:25-30)
44Waakati minahara tim, dukur duluma amsuku ladi badda saa talata fih minahara. 45Kalam semsi seebu jeedde waala. Fih wakati naade, kartain tee Yeekalu seretu fih ustu fih meddina tee Jerusalem. 46Dukur Yesu wonus mee sauti tee foo ligo ggi kelem gali, “Babba tayi, Anna ggi wedi roho tayi fih idda takki,” bakan okalas kalama dolde, uwo muttu. 47Waakati askeria tee Romu ab chunnga askeria ab dugu Yesu fih msalaba ayinu sokol ab sowo, ummon shukur Rabbana ligo ummon ggi kelem gali, “Taasil ragi weede kaan adil.” 48Kom tee annas lim fih ayinu ragi ligo ggi muttu bakan ummon ayinu sokol ab sowo, ummon aarja fih beyy tomon, ligo ummon ggi dugu tomon fih weeri tomon. 49Ummon kuul ab arfu kuweesi mee nuswaana ab jaa mee uwo min fih Galilaya ummon yegif boyyi fih ayinu sokol ab ggi sowo.
Dofun tee Yesu
(Matthew 27:57-61; Mark 15:42-47; Yokana 19:38-42)
50Fih wakati naade kaan fih ragi wayyi asmma too Yusufu uwo kaman kaan fih naa. Uwo kaan wayyi min kubarina tee Yudaaya, mee uwo kaan ajol kuweesi ggi sokol ab adil. 51Uwo maa rudu mee kalama mee sokol ab kubarina soo nee Yesu. Uwo taala min. Alimasaya, meddina tee Yudaaya. Uwo kaan ggi steenu Rabbana kee rasul Kristo mee ayinu mamlaka tee Rabbana. 52Ragi weede ruwa nee Pirato, nee gavana tee Romu, mee asaadu uwo kede ruduwo sulu meiti tee Yesu mee dofun uwo. Yaa Pirato ruduwo. 53Badda Yusufu mee awn tee rujala taanin sulu meiti tee Yesu min msalaba, uwo sulu mee lakato towwhil, gumas mee lifu meiti. 54Wedede kaan fih yom juma tee tayirisha, mee semsi kaan wagga, yom tee Sabbit ggi kun ligo abidu. 55Nuswaana ab jaa mee Yesu min Galilaya faatiya Yusufu ummon dukur ayinu magabil. Ummon ayinu nammna ab dofun moo Yesu fih magabil. 56Badda naade, nuswaana aarja fih beyy tomon fih meddina dukur uwo tayirisha reeha mee dikin tee massa meiti tee Yesu. Dukur ummon amla safa fih yom tee Sabbit fih leyin nee sharia tee Rabbana.
Currently Selected:
Lukka 23: KCN
Highlight
Copy
Compare
Share
Want to have your highlights saved across all your devices? Sign up or sign in
Nubi Bible by Beyond Translation is licensed under Creative Commons Attribution-ShareAlike 4.0 License.
