Lukka 22
22
Nammna tee katul Yesu
(Matthew 26:1-5,14-16; Mark 14:1,2,10,11; Yokana 11:45-53)
1Jooju tee mukati ab maa ggi furuu ggi naadi futu fogo kaan geeri kee jaa. 2Kebir tee kahin mee malima tee sharia kaan ggi gussu nammna tee katul Yesu fih siri, lakin ummon kaffu annas. 3Aseede yaa sitan dakal fih Yuda Iskaliot liyo uwo kaan wayyi min Swahaba itinashar tee Yesu.
4Yaa Yuda ruwa nee kebir tee kahin mee nee askera ab ggi chunnga yakali, fih wonus nammna ab uwo bi wedi noomon Yesu kuweesi. 5Ummon jaa furaayi zaidi mee rudu lippa uwo ssente. 6Yuda rudu mee akikisha ummon, yaa uwo gussu nammna tee wedi Yesu ligo maa annas milaan.
Yesu mee Swahaba too tayirisha jooju tee futu fogo
7Aseede yom tee sadaka tee mukati ab maa ggi furuu tim. Wedede yaa yom ab annas tee Yudaaya endis tee dabba koru ab giruwa akul fih jooju futu fogo. 8Yesu rasul Pita mee Yokana okelem noomon gali, “Ruwa kum adil jooju tee futu fogo dukur inna bi akul bakan wayyi.”
9Yaa ummon asaadu uwo gali, “itaa aju inna kede adul weni?”
10Dukur Yesu ggibisha ummon ligo uwo ggi kelem gali, “Ayinu kum kaan itakkum ggi dakal fih meddina, itakkum bi ayinu ragi ligo arfu guruma moyo ligo oggi masi. Faatiya kum uwo ladi fih yom ab uwo bi dakal fogo. 11Dukur kelem kum nee siddu juwa dee gali, Siddu teena rasul inna mee asaadu itaa sika gujura tee diffaana fogo kalam yaa bakan ab giruwa akul fogo jooju tee futu fogo mee Swahaba too.” 12“Uwo bijja sulu itakkum fih kujuura kebir ab tee foo ligo kalas tayiru inna fih tummiya uwo. Tirisha kum jooju tee futu fogo dee naa.”
13Ummon ruwa fih meddina ummon ligo killa sokol jee nammna ab Yesu jaa kelem moo yaa ummon tirisha jooju tee futu fogo.
14Wakati tee akul bakan tim, Yesu geni falaata fih meeza fih mee Mursalin too fih akul. 15Yaa Yesu kelem nee Swahaba too gali, “Wakati dee kuul anaa kaan ggi feker fih akil tee jooju tee futu fogo ligo anaa aju akul mee itaa ligo saa tayi tee izabu lissa maa tim. 16Anaa ggi kelem nee itakkum weede, anaa maa bi akul jooju taani tee futu fogo mara taani ladi bijja sowo fih mamlaka tee Rabbana.”
17Dukur uwo sulu kubaya tee wayini fih idda too mee shukur Rabbana, uwo kelem nee Swahaba too gali, “Sulu kum weede kede itakkum kesim nee itakkum saadum. 18Anaa ggi kelem nee itakkum gali, Anaa maa bi asurub mara taani wayini ladi mamlaka tee Rabbana bijja.”
19Mara taani uwo sulu mukati, uwo shukur Rabbana, uwo kasuru uwo wedi noomon kuul ligo ggi kelem gali, “Wedede gildu tayi ab wedi saaba takki, soo kum weede ligo itakkum ggi kumbuka anaa.” 20Wakati ummon kaala akul akil, ummon sulu kubaya tee maratinin, fih nammna wayyi uwo wedi noomon ligo oggi kelem gali, “Kubaya wedede dee alma tee ahad mee domu tayi ab ggi massa mee itakkum. 21Lakin asmma kum wedede, ajol ab ggi wedi anaa nee aduya uwo fih ini fih meeza wayyi mee anaa fih kuul. 22Rabbana yaa jaa wedi nyereku tee binadum fih muttu, lakin bijja kun batal nee ajol ab ggi wedi anaa nee aduya.” 23Dukur ummon abidu asaadu badum tomon, munu fih ummon ab agddear soo sokol jaa weede.
Swahaba korokoro fih kebir
24Dukur fih mwisho ummon abidu jurru labil fih badum tomon gali, “Munu fih ummon ab ggi kun tee hishima zaidi?” 25Lakin Yesu kelem noomon gali, “Sultan tee annas ab maa tee Yudaaya uwo kaan ggi hukum ummon batal, mee weeri weezo fih fogo ummon. 26Lakin maa ggi faa kun jee nee itakkum. Wu ajol tee hishima zaidi min itakkum uwo endis tee kun jee ajol tee hishima ab tee tey. Mee ajol ab ggi hukum endis tee kun jee labbi takkum. 27Anaa aju itakkum kede feker, kaan ajol geni fih akul ajol taani wedi noowo akil, ajol yaatu yaa tee hishima? Killa ajol arfu gali yaa ajol ab geni falaata fih akul. Lakin anaa jaa labbi nee itaa. 28Lakin itakkum yaa kaan fih mee anaa fih wakati tee imtihaan tayi. 29Kalam Babba tayi wedi naana mamlaka, yaa anaa ggi kelem nee itakkum gali anaa wedi nee itakkum bakan fih mamlaka. 30Yaa itakkum bi akul mee asurub mee anaa fih meeza tayi fih mamlaka mee itakkum geni fih bambara jee annas tee sharia fih hukum kabila itinashar tee Israel.”
Yesu faham aba tee Pita
(Matthew 26:31-35; Mark 14:27-31; Yokana 13:36-38)
31Dukur siddi Yesu kelem gali, “Simon, asmma anaa! Sitan asaadu nedif itaa jee ab ggi kuruju ggi nedif ngano min kookobo. 32Lakin anaa womba nee itakkum gali itaa maa bi bisebu amin anaa. Mee kaan itaa kalas taala min zambi aarja naana, mee gowu akwaana takki kaman.”
33Lakin Simon Pita kelem gali, “Siddu tayi, anaa tayari ruwa mee itaa fih jela mee muttu mee itaa kaman.”
34Dakal Yesu kelem uwo gali, “Pita anaa ggi fahamisha itaa gali kaan gidida lissa kore maa, itaa bi aba anaa marri talata gali itaa arfu anaa maa”.
Sokolin ab ggi tummiya fih sika
35Badda weede, Yesu kelem nee Swahaba too gali, “Kaan rasul itakkum fih meddina tee fawti fih alim kabar ab kuweesi, billa ssente sala bagi tee safari, sala gezma taani, ley itakkum kaan aju sokol yoyote?” Swahaba dee ggibisha gali, “ata, ini maa ggi kosa sokol yoyote.”
36Dukur uwo kelem noomon gali, “Lakin aseede itakkum bi kun mee ssente mee bagi tee safari mee kaan itakkum endis maa panga itakkum endis tee wuzza gumasa kede itakkum biyo. 37Anaa ggi kelem nee itakkum gali, Sokol ab jaa katif bijja lasulu fih anaa. Uwo katif, ‘Kutu uwo kaman fih annas ab ggi soo zambi,’ fih hakki killa sokol ab Nebbiya katif fih anaa bi sowo gwaam.”
38Yaa, Swahaba too kelem noowo gali, “Siddi teena ayinu ini inna endis panga tenini” Yesu ggibisha gali, “bi tim.”
Yesu ggi womba fih shamba tee zaitun.
(Matthew 26:36-46; Mark 14:32-42; Yokana 18:1)
39Dukur Yesu taala min meddina tee Jerusalem yaa uwo ruwa fih gala tee zaitun jee uwo kaan ggi soo mee Swahaba too kaman faatiya uwo. 40Bakan uwo rasul, Yesu kelem nee Swahaba too gali, “Womba kum nee Rabbana kede awn itakkum kalam itakkum kede maa soo zambi kaan abur itakkum.” 41Dukur Yesu ruwa boyyi min noomon uwo ruwa boyyi siya agddear durubu naa laagera. Mee sujudu fih womba nee Rabbana. 42Uwo kelem, “Babba tayi, kaan dee aju takki, sulu kubaya tee taabu dee anaa. Lakin anaa maa soo sokol ab anaa kaan aju.” 43Dukur Malaika taala nee Rabbana beenu noowo mee wedi uwo guddrra milaan. 44Mee Yesu ligo fih singa, uwo womba zaidi. Dukur harragan too kun jee domu ab ggi nagaa-nagaa falaata.
45Wakati Yesu kalas womba, uwo gum foo oruwa nee Swahaba too, uwo ligo ummon ligo ggi num kalam ummon kaman kaan jaani. 46Dukur Yesu kelem noomon gali, “Ley itakkum ggi num? Gum kum kede itakkum womba nee Rabbana kede uwo awn itakkum min jabir fih soo zambi.”
Ggi amsuku Yesu
47Ligo Yesu kaan lissa ggi wonus mee Swahaba too, kom tee annas jaa naa. Yuda, wayyi min Swahaba itinashar tee Yesu kaan fih gidaam tomon. Uwo jaa geeri mee Yesu uwo selem uwo mee chum. 48Lakin Yesu kelem noomon gali, “Yuda, anaa ggi asmma singa kalam itaa ggi wedi nyereku tee binadum mee chum tee selem.” 49Wakati Swahaba faham sokol ab kaan geeri soo nee Yesu, ummon asaadu uwo, “Siddu teena kede inna tummiya panga teena fih dusman?” 50Dukur wayyi min Swahaba amrugu panga uwo gata adan tee idda yomin tee labbi tee kebir tee kahin. 51Lakin Yesu kelem noomon gali, “Matakkum zidu dusman mee ummon.” Dukur uwo amsuku adan tee labbi dee mee ponyesha uwo. 52Dukur Yesu agilibu uwo nee kebir tee kahin, mee kebir tee annas ab ggi chunnga Yeekalu mee kubarina tee Yudaaya. Uwo kelem nee ummon gali, “Ley itakkum jaa ini mee panga mee lasaya fih jaa robutu anaa? Itakkum ggi feker anaa ajol albatal?” 53“Anaa fih mee itakkum killa yom fih Yeekalu lakin itakkum maa jarrib amsuku anaa lakin weede yaa saa takkum ab sitan tummiya guddrra too albatal.”
Pita aba Yesu
(Matthew 26:69-75; Mark 14:66-72; Yokana 18:13-18)
54Dukur annas ab ggi chunnga Yeekalu amsuku Yesu ummon sulu uwo fih beyy tee kebir tee kahin. Pita faatiya ummon lakin uwo maa ruwa geeri mee ummon. 55Wakati ummon rasul, annas taanin waala harri fih ustu midani tee juwa. Dukur ummon geni falaata geeri mee naari. Pita kaman jaa geni mee ummon. 56Ligo Pita geni naa, labbi ab mariya ayinu uwo fih nuuru tee naari. Uwo ayinu zaidi mee kelem nee annas ab kaan fih geeri mee uwo gali, “Ragi weede kaman kaan fih mee Yesu.” 57Lakin Pita kelem gali maa adil. Uwo kelem gali, “Mariya, anaa maa arfu ragi dee.” 58Badda mudda siya, ajol taani ayinu Yesu mee kelem gali, “Itaa kaman yaa wayyi min ummon ab kaan fih mee ragi weede ab amsuku!” Lakin Pita kelem gali, “Ata, anaa maa kaan fih mee ummon.” 59Badda saa wayyi, ajol taani jaa ligo uwo ggi hakikisha gali, “Fih hakki ragi weede kaan fih mee Yesu, kalam ummon kaman taali fih Galilaya.” 60Lakin Pita kelem nee uwo gali, “Ragi anaa maa arfu ab itaa ggi wonus fogo.” Gwaam gidida kore ligo Pita lissa kaan ggi wonus. 61Dukur siddi Yesu agilibu uwo ayinu Pita, yaa Pita kumbuka kalam ab siddi Yesu kelem noowo, “kabbla gidida kore minsubu tee naare itaa bi aba anaa marri talata.” 62Bakan Pita kumbuka dolde, uwo taala baara mee kore mee singa.
Alis Yesu mee duguwo.
(Matthew 26:57-68; Mark 14:65)
63Dukur annas ab kaan ggi chunnga Yesu abidu alis mee duguwo. 64Annas ab kaan ggi chunnga uwo kati enna too mee gumas mee ummon kelem noowo gali, “Weeri neena gali itaa Nebbi. Kelem neena munu yaa dugu itaa.” 65Mee ummon kelem noowo kalam milaan tee sitim uwo.
Yesu gidaam Sanhedrin
(Matthew 26:57-68; Mark 14:61-64; Yokana 18:12-14; 19-24)
66Wakati lata saba, kubarina tee Yudaaya, mee kebir kahin mee malima tee sharia ummon kuul lim bakan wayyi mee sulu uwo gidaam tomon. 67Dukur ummon kelem nee Yesu gali, “Kelem nee inna kee itaa yaa Kristo” Uwo kelem noomon gali, “Kaan anaa kelem nee takkum gali anaa yaa Kristo,” itakkum maa bi amin anaa. 68“Wu anaa kaan asaadu itakkum, itakkum maa bi ggibisha anaa. 69Lakin gwaam badda dolde, anaa nyereku tee binadum bi geni fih bakan tee guddrra fih safa tee idda yomin tee Rabbana.” 70Dukur ummon kuul asaadu Yesu gali, “Itaa yaa nyereku tee Rabbana.” Yaa Yesu ggibisha gali, “itakkum wonus adil, yaa anaa.” 71Dukur ummon wonus fih badum tomon gali, “Inna maa aju shahidi taani fih itaa. Kalam ini saadum asmma min kasma too.”
Currently Selected:
Lukka 22: KCN
Highlight
Copy
Compare
Share
Want to have your highlights saved across all your devices? Sign up or sign in
Nubi Bible by Beyond Translation is licensed under Creative Commons Attribution-ShareAlike 4.0 License.
