Lukka 24
24
Gum tee Yesu
1Aseede fih yom tee awlan fih wiki minsubu, nuswaana ab jibu reeha mee dikin ab ummon adul ummon ruwa fih magabil bakan ab dofun fogo Yesu. 2Wakati ummon rasul naa ummon ligo laager ab kaan kutu fih babbu ab ggi dakal fih magabil. 3Yaa ummon ruwa minjuwa magabil lakin ummon maa ligo meiti tee siddi teena Yesu. 4Dukur sowo, ligo ummon lissa kaan shannga kalam weede, dukur rujala tinini beenu ummon yegif geeri mee ummon. Ligo ummon lebisi gumas ab ggi waala-waala. 5Nuswaana dukur kaffu zaidi ummon dengiri ummon ayinu falaata fih hishima. Lakin rujala tinen dukur kelem noomon gali, “Ley itakkum ggi gussu ajol ab hayyi min annas ab muttu? 6Uwo maa fih ini kalam uwo aarja fih hayyi mara taani! Kumbuka kum kalam ab uwo kelem nee itakkum ligo uwo lissa fih mee itakkum fih Galilaya. 7Uwo kelem gali, Nyereku tee binadum endis tee wedi uwo fih idda tee annas ab ggi soo zambi kede duguwo fih msalaba, Lakin endis tee aarja hayyi too fih yom tee talata.” 8Yaa ummon kumbuka kalama too. 9Badda weede, ummon aarja min magabil. Ummon asiki killa sokol ab sowo nee Swahaba idashar tee Yesu mee annas taanin. 10Asmma tee nuswaana ab kelem nee naas mursalin yaa Mariyam Magadalena, Joana, mee mamma tee Jemusi Mariyam. Lakin kaan fih inna nuswaana taanin ab ruwa mee ummon. 11Lakin mursalin maa jaa amin mee kalama ab nuswaana kelem noomon. Fih kalam ab ummon kelem asmma moo jee kalam tee awiri noomon. 12Lakin Pita, uwo gum ojere fih magabil. Wakati uwo rasul naa, uwo dengiri falaata mee ayinu minjuwa. Uwo maa ayinu sokol yoyote lakin gumas ab rubutu fogo meiti tee Yesu barraw yaa kaan fih naa. Dukur uwo ruwa fih beyy, shannga fih sokol ab sowo.
Sika tee Emawu
13Aseede, fih yom wayyi dee, Swahaba taanin tinini tee Yesu ummon kaan ggi ruwa fih karni tee Emawu. Kaan kilo mita saba min Jerusalem. 14Wakati ummon ggi masi, ummon wonus fih badum tomon fih killa sokol ab sowo. 15Ligo ummon ggi wonus fih sokolinna ab sowo fih badum tomon, Yesu siddu jaa geeri uwo abidu masi mee ummon. 16Enna tomon kaan ggi ayinu lakin ummon faham uwo. 17Dukur Yesu kelem noomon gali, “Kalama yatu yaa itakkum ggi wonus fogo fih badum takkum? Ummon yegif ligo ummon ggi ayinu mee singa.” 18Dukur wayyi min ummon asmma too Kulopa ggibisha uwo gali, “Itaa yaa baara ab ggi geni fih meddina tee Jerusalem uwo yaa maa arfu sokolin ab ggi sowo naa.” 19Uwo kelem noomon gali, “Sokolinna yatu?” Yaa ummon kelem noowo gali, “Sokolin ab sowo nee Yesu tee meddina tee Nazaresi, uwo yaa kaan Nebbi ab kebir min nee Rabbana. Uwo soo sokolin milaan tee guddrra mee wonus kaba ab tee guddrra gidaam Rabbana mee annas. 20Nammna ab kubarina tee kahin mee kubarina tee diin wedi uwo nee gavana tee Romu kee kata noowo muttu mee duguwo fih msalaba. 21Lakin ini kaan ggi fikila gali, uwo yaa kaan giruwa ponyesha annas tee Israel. Mee badda dolde, naare yom tee talata min sokolin dolde sowo. 22Zidu fih dolde, nuswaana taanin min kom shannga fogo inna kalam naare minsubu ummon ruwa fih magabil tee Yesu. 23Wakati ummon maa ligo meiti too, ummon aarja ligo ummon ggi kelem gali ummon ayinu Malaika ab kelem noomon gali Yesu kaan hayyi. 24Badda naade, taanin min inna ruwa fih magabil ummon loggo jee nuswaana kelem noomon, lakin inna maa ayinu Yesu.” 25“Ohh, itakkum awirin! Itakkum ggi ayinu gowu amin kalama kuul ab Nebbiya wonus fih katif.” 26Itakkum kaan endis tee faham gali kaan faa mee Yesu Kristo ayinu taabu mee muttu mee ligo hishima too. 27Dukur abidu mee kalama ab Musa mee Nebbiya wonus fogo, yaa Yesu abidu wonus killa sokol ab jaa katif fogo fih kitabu.
Enna tee Swahaba fata
28Ligo ummon rasul geeri mee karni bakan ab ummon kaan ggi ruwa fogo, Yesu beenu jee ajol ab ggi ruwa boyyi. 29Lakin ummon nangu uwo ligo ummon ggi kelem, “Geni mee inna, fih jeedde kaala lasiya mee fileli geeri.” Yaa dukur Yesu ruwa fih juwa fih geni momon. 30Badda mudda siya, ligo ummon geni falaata fih akul, Yesu sulu mukati fih idda too, uwo shukur Rabbana badda kasuru mukati uwo wedi noomon. 31Dukur fih gwaam enna tomon fata yaa ummon faham uwo. Lakin fih gwaam uwo woduru mee ummon kalas maa kaan ggi ayinu uwo. 32Ummon kelem noomon saadum gali, “Gelbba teena maa karagu mee furaayi ligo uwo kaan ggi wonus mee inna fih sika mee kelem mee maana tee katif neena?” 33Yaa fih gwaam ummon gum min meza ummon aarja fih meddina tee Jerusalem. Uwo loggo Swahaba tee Yesu Idashar ligo ummon lim bakan wayyi mee annas taanin ab kaan fih mee ummon. 34Mursalin mee annas taanin kaan ggi kelem gali, “Siddi teena hayyi mara taani mee uwo beenu nee Simon.” 35Ummon tinini kelem noomon killa sokol ab sowo fih sika mee nammna ab uwo faham moo ummon fih kasuru mukati.
Yesu beenu nee Swahaba too
36Ligo ummon lissa ggi wonus kalama kuul, gwaam Yesu yegif fih ustu tomon ummon kelem noomon gali, “Amaani kede kun mee itakkum” 37Lakin killa wayyi kaala mee kaffu kalam ummon feker gali ummon ggi ayinu roho. 38Lakin Yesu kelem noomon gali “Ley itakkum kaan fuu? Fih kalama yoyote ab kutu kuwaf gelbba takkum. 39Ayinu kum idda tayi mee gurra tayi kede itakkum faham gali anaa fih ini! Amsuku kum fogo anaa kee itakkum arfu gali taasil dee anaa. Roho maa ggi geni mee gildu mee laadum jee itakkum ggi ayinu anaa.” 40Wakati uwo kalas wonus, uwo weeri noomon idda too mee gurra too. 41Lakin ummon lissa maa amin gali uwo hayyi mara taani mee ummon shannga ayinu uwo. Yaa uwo kelem noomon, “itakkum siya endis sokol tee akul yoyote ini?” 42Yaa wedi noowo nusu tee samaga ab karagu. 43Yaa uwo sulu samaga dukur uwo akul ligo ummon ggi ayinu.
44Dukur Yesu kelem noomon gali, “Dolde yaa kalama tayi ab anaa wonus nee itakkum ligo anaa kaan lissa fih mee itakkum. Anaa ggi kelem nee itakkum gali faa mee killa sokol ab katif fogo anaa fih sharia tee Musa mee fih kitaba ab katif mee Nebbiya mee fih zabuli endis tee jaa adil.” 45Dukur Yesu fata muku tomon gali ummon kee faham ab jaa katif. 46Uwo kelem noomon gali, “jaa katif fih sharia gali kaan ggi faa mee Kristo fih ayinu taabu mee muttu dukur uwo bijja gum mee meitini fih yom tee talata. 47Mee fih asmma too yaa injil tee sama zambi bijja alim belana kuul abidu fih meddina tee Jerusalem. 48Itakkum yaa shahidin tee dolde kuul. 49Anaa ggi rasul ahad nee Babba tayi nee itakkum, itakkum endis tee sitenu fih meddina tee Jerusalem ladi kaan bi wedi neetaa guddrra ab tala min samayi.”
Ruwa fih Samayi
50Dukur sulu ummon baara tee meddina tee Jerusalem ladi ummon jaa geeri mee karni tee Besaniya. Yaa uwo arfa idda owedi noomon baraka. 51Ligo uwo kaan ggi wedi noomon baraka, uwo seebu ummon sulu uwo min ummon ladi fih samayi. 52Yaa ummon shukur uwo dukur ummon aarja fih meddina tee Jerusalem mee furaayi milaan. 53Dukur ummon ruwa fih Yeekalu fih shukur Rabbana.
Currently Selected:
Lukka 24: KCN
Highlight
Copy
Compare
Share
Want to have your highlights saved across all your devices? Sign up or sign in
Nubi Bible by Beyond Translation is licensed under Creative Commons Attribution-ShareAlike 4.0 License.
