Luke 21
21
Edifiak Ndi Christ ke Ikpe
1Nte Jesus ma mme mbed nsie esuk edude ke esa itie ufọp uwa, E-mene anyin ọnyuñ okud nte mbin inyene esinde eno ke ekebe uno eno emi odude k'itie ufọp uwa. 2Ndin Jesus okud nte ubuene ebekpa kied esinde mkpri ọkuk iba emi mikenyeneke ọkpọsọñ ufan. 3Ndin Jesus ete, “ke akpaniko ke ntiñ nno mmufo, Ubuene ebekpa eke ono eno emi ekpinde akan eno mme enyene mkpo owu.” 4“Koro kpukpru mmomi enyenede uwak ọkuk eda akpri ke se mmo enyenede edino. Edi ọkpọsuk edi nte ebekpa eke edide ati ubuene, E-no kpukpru se e-nyenede ndikpada ndu uwem.”
Jesus Ebem Isi Atiñ Abaña Nwure Itie Ufọp Uwa
5Ke oro ama ekebe, Ndusuk mbed Jesus etoño nditiñ iko mbaña itie ufọp uwa. Mmo ete, Sie mme ndiyie itiad k'itie ufọp uwa! Nyuñ sie mme mkpo mbana emi mbin Abasi edade ebana itie ufọp uwa! Edi Jesus ete, 6“Yak ntiñ nno mmufo mbaña mme mkpo mmufo isuk isiede. Mm'usen kedi eke kpukpru eke iwurede ina k'isọñ. Kpukpru mme itiad eke mmufo isuk iturede iyebiara.”
Idiọñọ Ini Ma Utid Eyi
7Mme mbed nsie ebup-e ete, “Andikpep, Ini efe ke mme mkpo emi itibe? Nse ke nnyin ikud, Mbak nnyin idiọñọ ke mme mkpo emi idisọp itibe?” 8Ndin Jesus oboro mmo ete, “Ikpeme mbak ukpọk owu kied idibiaña mmufo ini mkpo emi itibede. Ntiñ ami nno mmufo koro k'ini isi, Adiwak owu iyesu nsu ite ke mmimo imibo odudu itu min. Mmo iyewud nte mmimo idi Messiah. Mmo nde iyedọhọ ite, Utid arimbud ekpere. Edi mmufo ikinim mmo ke akpaniko.” 9“Kini mmufo ikipde ete ke mme idid k'enwana, Inyuñ ikip ete mm'owu k'esọñ ibud ma ukara mmo, Ikufehe ndik. Koro mme mkpo emi iyetibe, Edi utid arimbud imidighe ke ini oro.” 10Ndin Jesus afiak ọdọhọ mmo ete, “mm'owu ke idid kied iyenwana ma mm'owu ke idid mfen, Ntra nde mm'owu ke idak ukara iyenwana ma mm'owu ke idak ukara mfen.” 11“Ke mme nsii-nsii itie ke arimbud, Ọkpọsọñ unyek isọñ iyedu, Ini ọkpọsọñ ọbiọñ iyedi, Ndin mm'idiọk udọñọ iyesuana imum adiwak owu. Kpukpru nsii-nsii idiọñọ mkpo ndik ma mkpaidem iyetibe itu ke ikpa enyoñ.” 12“Edi mbemisi kpukpru emi etibe, Mm'usua mmufo iyemum adiwak mmufo, Enyuñ ediri mmufo uyi k'isi mme etubim itie ubọñ akam mme Jew (synagogue), Enyuñ esin mmufo k'ufọk mkpọkọbi, Mmo iyeda mmufo ika k'isi ndidem ma ibud ukara ke ntak inh. Mmo iyenam mme mkpo emi ma mmufo koro mmufo idide mme mbed nni.” 13“Oro idi ini emi mbufo itiñde akpaniko ino mmo ibaña min.” 14“Ntra ibiere ke esid mmufo ite mmimo imibemke isi ikere se mmimo itiñde ndifaña idem mmufo.” 15“Koro Ami nyeno mmufo nnen-nnen iko ma ifiọk mbak mmufo idiọñọ se mmufo itiñde, Ke ntak emi, Ukpọk owu kied ke otu kpukpru mmomi ediride mmufo iko imikemeke ndifaña ite mmufo imedue.” 16“Edi kpak mme ete ma mme eka, Ma ndito uso, Iman ma mme ufan iyeda mmufo ino ukara, Ndin ukara iyewid ndusuk mmufo.” 17“Adiwak owu iyesua mmufo koro mmufo idide akim.” 18“Edi Abasi iyenyiaña mmufo isi ke nsi-nsi unọmọ.” 19“Edieke mmufo iyode uto ini oro, Itre ndiduọk mbuọdidem mmufo k'ami, Abasi iyeno mmufo nsi-nsi uwem.”
Ndiwuri Ebi Jerusalem
20Ndin Jesus aka isi atiñ ete, “Kini mmufo ikudde nte mbin ekọñ usua ekanadere ebi Jerusalem, Ndin mmufo inim ite ke mbin ekọñ usua oro iyesọp ibiad ebi Jerusalem.” 21“Kini oro, Mmufo mbin oro iduñde ke nkañ Judea iyefeñe ika akamba ebid inyuñ ikedibe.” 22“Koro kini emi, Abasi iyemia mbin ebi Jerusalem ufen. Ufen emi iyenam kpukpru se mme prophet eketiñde enyuñ ewedde ebaña iko Abasi ewọrọ esu.” 23“Idiọk didie ke mme usen oro ma iban emi asañade ma mkpri ndito! Akwa mfina iyedu k'isọñ eke, Ndin Abasi iyeyad esid ma mmomi.” 24“Ndin mbin ekọñ iyewid ndusuk ke efid, Iyemum mbin eken itañ ika mme nsii-nsii idid. Mmomi midighe mbin Jew iyekara ebi Jerusalem enyuñ efik mm'owu tutu esim ini oro Abasi ekenimde ono mmo ete etre.”
Edidi Eyin Owu
25“Ke oro ebede, Mmufo iyekud mm'utibe mkpo itibede ino utin ma ọfiọñ ma nta-nta ọfiọñ, Ndiwud nte ke utid arimbud k'edi. Mm'owu ke mme idid ke efuri arimbud inyenyene eyikhe ma mmem-idem otude ke ọkpọsọñ uyim akpa mmoñ ma akwa mbufud k'inyañ.” 26“Mm'owu iyesuñọ ke ndik nte mmo ibedde akwa unọmọ emi isimde arimbud. Koro kpukpru mkpo ke ikpa enyoñ iyedaha ikpọñ mme itie mmo.” 27“Kini oro mm'owu ke kpukpru itie iyekud inñ, Eyin owu. Ami nyedi ke obubid enyoñ ndiwud akwa odudu ma akwa uboñ.” 28“K'ini mme mkpo emi otoñode ndiwọrọ nsu, Nyene nsọñọnda nyuñ kip uko. Koro Abasi iyesọp ndifak mmufo nsi ke ufen ma idiọk.”
Mbuk Abañade Etu Fig
29Ndin Jesus ono mbuk eke nditiñ mbaña utid ini. E-te, “Kere baña s'itibede ino etu fig me etu mfen.” 30“Ini ekededi ikọñ esehede k'idem mmo, Mmufo iyediọñọ ite ke ukwọ ekpere.” 31“K'ukem usuñ oro, K'ini mmufo ikudde mme mkpo emi etibede, Idiọñọ ndin ite ke ebi uboñ Abasi idisọp ndidi.” 32“Ami ntiñ akpaniko nno mmufo, Ndusuk mbin eyi emi iyedu k'uwem kini mme mkpo emi itibede.” 33“Nim ke akpaniko ete ke enyoñ ma isoñ iyebe ifep, Edi mme iko mmi iyeda ke nsi-nsi.”
Ufan Ukpeme
34“Edi ikpeme idem mmufo eti-eti! Ikuka itie adinam emi mm'owu enamde etime-etime uwem, Me enyuñ ekpade mmin, Ma ekikere uwem emi. Edieke mmufo idude ntra, Mmufo iyetre nditie mbed edidi mmi. Koro usen mfiakde ndi, Iyedi ino fin k'ibabuad.” 35“S'itibede k'usen oro iyesim kpukpru owu emi eduñde ke arimbud.” 36“Beñe idem kpukpru ini, Bọn akam Abasi ono fin odudu ndinam akpaniko ke kpukpru mkpo itibede, Ọnyuñ ọsọñọ ada k'isi mmi, Eyin owu, Ukipke bud, K'usen ikpe.” 37Kpukpru usen, Jesus abiad mme usen oro ndikpep mkpo k'itie ufọp uwa, Ndin isim mbubreyi, Jesus ọwọrọ ọnyuñ akadañ ke ebid Olive. 38Ndin ke ndañ nsiere kpukpru owu enwoño edi ke itie ufọp uwa ndikpañ utọñ nno-e.
Currently Selected:
Luke 21: ITW
Highlight
Copy
Compare
Share
Want to have your highlights saved across all your devices? Sign up or sign in
Ito Bible by Beyond Translation is licensed under Creative Commons Attribution-ShareAlike 4.0 License.
