Johon 21
21
Probhu Jisute satṭeʹ cela napamkeʹkoe
1Niâ tayom Tibirio ganganaʹ kandhare celakoṭheʹ Jisu arho napamne. Nengkaketeʹ ana ghoṭona ghoṭolena. 2Simon Pitor, Thoma (Je jama men hoʹsana) Gâlil oncolrenaʹ Kanna ṭolaren Nathanoel, Sibdioren barya hopontetʹ ar Jisuren barya cela miʹsaote tahalenako. 3Simon Pitorte angko metakeʹkoe, "Ingdo hako goiʹ caʹkâning."
Angko menkedako, "Aleho am saote caʹlehaʹ" Tâkhni angko oṛoʹketeʹ miṭiʹ lâukâre deʹnako, kheʹ inâ nindâ ekegi bang sab dareleʹkoako.
4Setaʹbera, Jisu hiʹketeʹ ganga kandhare tengone. Kheʹ celakote Âni bang cinhu darelidiako je, Ânido Jisukane. 5Inâtayom Jisute angko metakeʹkoe, "Gateko, apete ki hako namkaʹkoape?
Angkote Âni metakidiako, "Bang."
6Ânite angko metakeʹkoe, "Lâukânaʹ jojma hate apeyaʹ jal giṛipe, namkopehaʹ." Tâkhni angkodo jal giṛikedako, ar nâniʹ ḍher hako rakapnako je, angko ana ṭanoketeʹ bang rakap dareledako.
7Jisute je cela dulârisane âni celate Pitor metakidie, "Ânigi Probhukane." Tâkhnigi Simon Pitor lugri soroʹkede, (karon âniaʹ hormore kâṭiʹonaʹ lugri tahalentaya). Anate jâkhni âni atenkede, "Ânigi Probhukane," Tâkhni âni aiʹa lugri soroʹkede ar gangare ṭappoketeʹ ujuʹne. 8Eṭaʹ celako lâukâte hiʹnako, angko ḍâṛi khoiʹ bisi sâhingre bang tahalenako, matro peso fiṭ sâhingre tahalenako. Niâlaʹte eṭaʹ celako jal pereʹ hako ṭano ṭanote kandhare âguleʹkoako. 9Jâkhni angko ḍâṛire rakaplenako angko kaṭnaʹ angra ar sengel cetanre hako lel namkeʹkoako, aṛe piṭhâho tahalena. 10Tâkhni Jisute angko metakeʹkoe, "Nitoʹ je hako sabkeʹkoape ana khoiʹ thoṛa agukope."
11Simon Pitor rakapketeʹ lâukâre cane ar jal ṭanoketeʹ ḍâṛire rakapkede, ana jalre miʹso terpannoṭeʹ marang hako tahalenako. Ar nâniʹ hakoreho jal bang oreʹlena. 12Jisute angko metakeʹkoe, "Hijuʹpe ar setaʹnaʹ jompe." Celako talare ekeyaʹho sâhus bang holentakoaʹ je, Âni kuliako, "Am ekekanam?" Karon angko baṛesanako, Ânido Probhukane. 13Jisu hiʹketeʹ ana piṭhâ engekede ar angko makeʹkoe, ar hakoho makeʹkoe.
14Goiʹ khoiʹ jiuitʹ beretʹ tayom Jisu tesar jhikâ celako napamkeʹkoe.
Jisute Pitor hukum maye
15Angko setaʹnaʹ jom tayom, Jisute Simon Pitor metakidie, "Johonren gidrâ Simon, amte ki Ing niâko khoiʹ bisi dulâringâm?"
Âni menkede, "He, Probhu, Am baṛeyam je ingte Am dulârmiying."
Jisute âni metakidie, "Ingren bhiṛi hoponko âtingkom."
16Arho Jisute âni dosrate metakidie, "Johonren gidrâ Simon, amte ki Ing dulâringam?"
Âni menkede, "He, Probhu, Am baṛeyam je ingte Am dulârmiying."
Jisute âni metakidie, "Ingren bheṛako jotnokom."
17Ânite tesar jhikâ âni metakidie, "Johonren gidrâ Simon, amte ki Ing dulâringâm?"
Pitor niâbar dukne, karon Jisute âni tesar jhikâ kulilidie, "Amte ki Ing dulâringâm?" Âni menkede, "Probhu, Am sanamgi baṛeyam je, Ingte Am dulârmiying."
Jisute âni metakidie, "Ingren bheṛako khaokom. 18Ingte am sâriaʹgi metamkâning, jâkhni am juân tahalenam, tâkhni am nijegi sajoʹsanam ar jeṭheʹ icchâ eṛegi caʹsanam. Kheʹ jâkhni am harmeʹmahaʹ, tâkhni amaʹ ti lahetenmahaʹ ar eṭaʹuniʹte am sajomiheʹ ar jeṭheʹ caʹlaʹ bang namam eṛegi idimkohaʹ." 19Niâ katha menketeʹ Jisu isârakede je, Pitor alkate goiʹketeʹ Issoraʹ gourobheʹ. Niâ katha men tayom Jisute Pitor metakidie, "Ing saote hijup."
20Pitor tayomhate âcurketeʹ lelkede, Jisute je cela dulârisane âni cela tayom tayomte hijuʹkane. Nâido âni celakane, je jom somai Jisuoaʹ sorre duruʹlene, "Probhu, Am jete dusmânkoaʹ tire sabsomheʹ, ânido ekekane?" 21Pitorte âni lelketeʹ Jisu metakidie, "Probhu, nâiaʹ itâʹ hoʹhaʹ?"
22Jisute Pitor metakidie, "Ing judi icchiying ânido Ingâʹ hiʹ dhâbiʹ jiuitʹ tahane, anate amaʹdo itâʹ? Amdo Ing saote hijup."
23Niâlaʹte boihako talare niâ katha roṭona je, âni celado oho gojoʹe. Jisute Pitor bang metakâdie je, âni celado oho gojoʹe, kheʹ, "Ing judi icchiying je âni Ingâʹ hiʹ dhâbiʹ jiuitʹ tahane, anate amaʹdo itâʹ?"
24Âni celagi niâko bisoite sakkho maʹkane ar niâko olkade. Ale baṛeyale âniaʹ sakkho sârigiâ.
25Aṛe Jisu arho aima kâmilede. Anako kâmi judi miṭiʹ miṭiʹketeʹ ol jutuʹahoteʹ, tahale nâniʹ boi hoʹahote je, ingâʹ mone hoʹkana anako niâ dhârtire oho sahaboʹahote.
Currently Selected:
Johon 21: EKL
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh
