Johon 20

Probhu Jisu goiʹ khoiʹ jiuitʹne

(Mothi 28:1-10; Mark 16:1-8; Luk 24:1-12)

1Soptanaʹ palhe din setaʹre, nut tahanrigi Mogdolini Moriom ana topaṭheʹ calone. Âni lelkede, topanaʹ moca khoiʹ diri ocoʹhokana. 2Ana laʹte âni Simon Pitor ar eke cela Jisute dulârisane âni celaṭheʹ dâr caketeʹ menkede, "Âdmikote Probhu topa khoiʹ idikâdiako. Âni akare dohokâdiako ale ana bang baṛeyale."

3Pitor ar âni eṭaʹ cela tâkhni oṛoʹketeʹ topa hate caloʹlaʹ lagonâkin. 4Baranhorgi miʹsaote dâruʹsanaking. Eṭaʹuniʹ celado Pitor khoiʹ laha lahate arho saṭlaka dârketeʹ palhere topaṭheʹ hiʹne. 5Âni bhitârre koyoʹketeʹ lelkede, Jisuoaʹ hormore aka mosina lugriko pidhyo holena anako ujuʹketeʹ menaʹa. Kheʹ âni bhitrire bang calolene.

6Simon Pitorho âniaʹ tayom tayomte hiʹketeʹ topa bhitrire bolone ar mosina lugriko ujuʹ tahante lelkede. 7Âni arho lelkede, Âniaʹ bohoʹre aka mosina lugri pidhyu tahalena ana eṭaʹ mosina lugriko suliʹ bânuʹa, kheʹ aladaketeʹ miʹ jagare guchuketeʹ doho hokana. 8Eke cela palhere topaṭheʹ pâhculene âniho tâkhni bhitrire bolone ar lelketeʹ pâtyune. 9Goiʹ khoiʹ Jisuoaʹ jiuitʹ beretnaʹ je dorkar menaʹa, Pobitro boinaʹ ana katha ângkin lahare bang bujhu darekadakin. 10Niâ tayom ânkin celado oraʹ âcur calonâkin.

Probhu Jisu Mogdolini Moriomṭheʹ sodorne

(Mothi 28:9-10; Mark 16:9-11)

11Kheʹ Moriom topanaʹ barhere tengoketeʹ raglaʹ lagone. Âni raʹ raʹte topa bhitrire koyoʹketeʹ lelkede, 12Jisuoaʹ goiʹ hormo jeṭheʹ gitiʹ holena aṛe poṛ lugri soroʹ barhor sorgodut duruʹmenaʹkinâ, miʹhordo bohoʹhate ar eṭaʹuniʹdo jangahate.

13Ângkinte Moriom metakidiâkin, "Ceklaʹ raʹdam?"

Moriomte ângkin metakeʹkine, "Âdmikote ingren Probhu idikâdiako ar Âni akare dohokâdiako bang baṛeing." 14Niâ katha menketeʹ Moriom tayomhate âcurketeʹ lelkede Jisu tengoketeʹ miniâ, kheʹ Âni je Jisukane ana bang bujhu darelede.

15Jisute âni metakidie, "Ceklaʹ raʹdam? Eke sendradiâm?"

Jisudo baganren mâli moneketeʹ Moriomte metakidie, "Probhu lelme, Amte judi Âni engeketeʹ tahanam tahale menme akare dohokâdiâm. Ingte Âni engeihuʹ."

16Jisute âni metakidie, "Moriom!"

Anate Moriom âcurne ar Ibrio kathate Jisu metakidie, "Robbuni!" (Robbuni mane Guru.)

17Jisute Moriom metakidie, "Ing sabketeʹ alo dohongam, karon Ing nitho cetanre Babaṭheʹ bang cakâning. Am borong Ingren boihakoṭheʹ caloketeʹ lâiokom, Eke ingren ar aperen Baba, Eke ingren ar aperen Issorkane, Ingdo cetanre Âniṭheʹ caʹkâning."

18Tâkhni Mogdolini Moriom celakoṭheʹ caloketeʹ metakeʹkoe, "Ingte Probhu lelkâdiying," ar Ânite ing niâko sanam katha metakâdinge.

Jisu celakoṭheʹ sodorne

(Mothi 28:16-20; Mark 16:14-18; Luk 24:36-49)

19Ana dingi, soptanaʹ palhe din belaḍubu somai celako Jihudi netakoaʹ botorte oraʹnaʹ sanam duâr singketeʹ miʹ jagare jaoralenako. Tâkhni Jisu hiʹketeʹ angko talare tengoketeʹ menkede, "Apeyaʹ sânti hoʹmana." 20Niâ katha menketeʹ Âni Âniaʹ baran ti ar panjar Âniren celako uduʹoʹkoe. Probhu lelnamketeʹ celako aima hubnako.

21Tayomte Jisute arho angko metakeʹkoe, "Apeyaʹ sânti hoʹmana. Babate jemon Ing kolkâdinge Ingteho engkagi ape koleʹpeing." 22Niâ katha menketeʹ Ânido celako cetanre ongketeʹ metakeʹkoe, "Pobitro atta atangipe. 23Ape judi jaheyaʹ pap mapape tahale âniaʹ pap map hoʹtaihaʹ, ar judi jaheyaʹ pap bang mapape tahale âniaʹ papdo oho mapoʹtaia."

Binpâtyu Thomaoaʹ pâtyu

24Jisu jâkhni hiʹlene, tâkhni Thoma nutumte angko baroṭeʹ celako talaren miʹhor, ekedo jama metayako, ânido angko suliʹ bang tahalene. 25Eṭaʹ celakote Thoma metakidiako, "Alete Probhu lelkâdiale." Thomate angko metakeʹkoe, "Ing Âniaʹ baran tire judi kaṭanaʹ cinhât bang lelnaming, ana cinhât talare judi kâṭup bang doheing ar Âniaʹ panjarre ti bang dohekheʹ, tahale alkate ingdo pâtyuʹinghâʹ."

26Miʹ sopta tayom celako arho oraʹ bhitrire jaoranako, ar Thomaho angko suliʹ tahalene. Sanam duârko singgi tahalena taoreho Jisu hiʹketeʹ angko talare tengoketeʹ menkede, "Apeyaʹ sânti hoʹmana." 27Tayomte Ânite Thoma metakidie, "Amaʹ kâṭup naṛe dohoketeʹ Ingâʹ ti baran lelting ar amaʹ ti lahaketeʹ Ingâʹ panjarre doheme. Alo binpâtyuʹam borong pâtyuʹme."

28Tâkhni Thoma menkede, "Probhu ingren, Issor ingren."

29Jisute âni metakidie, "Thoma, amte ki Ing lelkâdiâm mente pâtyukanam? Ekeko bang lelte pâtyuʹako angkodo dhonnogiâko."

Johondo ceklaʹ niâ boi ollede

30Jisu celako samnere cinhâ hisâbte arho aima asarjo kâmi rikâlede, anako niâ guṛyu kagajre ol bang hokana. 31Kheʹ niâko ol hona jate ape pâtyuʹape je, Jisugi Khrisṭokane, Issorren Hopon, ar niâ pâtyute jate Âni talate jiui namape.

Currently Selected:

Johon 20: EKL

Highlight

Copy

Compare