Johon 19

1Tâkhni Pilâtte Jisu idiketeʹ aima câbuk daleilaʹte hukum makeʹkoe. 2Sonnoko jânum latte miṭiʹ mukuṭ banoketeʹ Jisuoaʹ bohoʹre soroʹodiâko. Tayomte angkote Âni beguni rongnaʹ lugri soroʹodiâko. 3Ar Âniṭheʹ caketeʹ metakidiako, "Ohe Jihudi Raja, joi hoʹmana!" Niâ menketeʹ sonnokote Âni thapailaʹ lagonako.

4Pilât arho barhere hiʹketeʹ âdmiko metakeʹkoe, "Lelpe, ingte Âni apeṭheʹ oṛoʹketeʹ âgudiying jate ape bujhu dareʹape je, ing âniaʹ aka dosho bang namding." 5Jisu ana jânumnaʹ mukuṭ ar beguni rongnaʹ lugri soroʹ obostharigi barhere hiʹne. Tâkhni Pilâtte âdmiko metakeʹkoe, "Nâi lelepe! Âni âdmi."

6Jisu lelketeʹ marang purohitko ar kormocâriko cilluketeʹ menkedako, "Kurusre maime, Ânido Kurusre maime."

Pilâtte âdmiko metakeʹkoe, "Apetigi Âni idiketeʹ kurusre maipe, karon ingte âniaʹ aka dosho bang lelnameʹtâing."

7Jihudi netakote Pilât metakidiako, "Aleyaʹ miṭiʹ Mosiaʹ ân menaʹa, ana ân lakagi Âniaʹ goiʹ hoʹaʹ ucit, karon Ânido Aiʹgi Issorren Hopon menkane."

8Pilât jâkhni niâ katha atenkede tâkhni âni arho botorngene. 9Ânite arho oraʹ bhitârre caketeʹ Jisu kulikidie, "Am aka khoiʹ hiʹkanam?" Kheʹ Jisute Pilât aka uttorgi bang malidie. 10Niâ laʹte Pilâtte Jisu metakidie, "Am ki ing suliʹ katha bang menam? Am ki baṛeyam je, Am bâgimaʹ se kurusre mamaʹ khomota ingâʹ menaʹa?"

11Jisu menkede, "Am cetankhoiʹ khomota bang mamiâkohoteʹ, tahale ing cetanre amaʹ aka khomotagihoteʹ oho tahentamaʹ. Niâ laʹte ekete Ing amaʹ tire makâdinge âniaʹ papgi ḍhertaya."

12Niâ katha atenkateʹ Pilâtte Jisu bâgiaʹ cesṭa rikilaʹ lagone, kheʹ Jihudi netako cilluketeʹ menkedako, "Amte judi ni âdmi bâgigiriam tahale amdo Romio rajaren gate bangkanam. Eke nije raja mente dâbiʹako ânido Romio rajaren sotrukane."

13Niâ katha atenketeʹ Pilâtte Jisu barhere âgukidie ar dirite tolonaʹ nutum miṭiʹ jagare bicârnaʹ asonre duruʹne. (Ibrio kathate ana jagado Gabbatha metaʹako). 14Ana din tahalena bacoaʹ porobnaʹ ayojonnaʹ din. Tâkhni bela onuman dupahar. Pilâtte Jihudi netako metakeʹkoe, "Ni leleipe, aperen Raja!"

15Niâte angko cilluketeʹ menkedako, "Sâhinging, sâhinging! Âni kurusre maime!"

Pilâtte angko metakeʹkoe, "Aperen raja ki ingte kurusre maing?"

Marang purohitko menkedako, "Romio raja bâgiketeʹ aleren ar eke rajaho bânuʹkoa."

16Tâkhni Pilâtte Jisu kurusre mailaʹte angkoaʹ tire makidie.

Kurusre Probhu Jisuoaʹ goiʹ

(Mothi 27:32-44; Mark 15:21-32; Luk 23:26-49)

Tâkhni sonnokote Jisu idikidiako. 17Jisu aiaʹ kurus Aiʹgi goʹketeʹ bohoʹnaʹ jang jaga nutum miṭiʹ jagare calone. (Ibrio kathate ana jaga Golgotha metaʹako). 18Aṛe angkote Jisu kurusre makidiako ar Âni saote arho barhor kurusre makeʹkinâko, Jisudo talare ar barhor bar kandhare.

19Pilât miṭiʹ kaṭre olketeʹ Jisuoaʹ kurus cetanre ṭangokede. Anare ol tahalena, "Nasarotren Jisu, Jihudiren Raja." 20Jeṭheʹ Jisu kurusre ma holena ana jaga sohornaʹ sorrigi tahalena mente Jihudiren aima âdmiko anado paṛhokedako. Ana Ibrio, Leṭin, ar Grik kathate ol tahalena.

21Tâkhni Jihudiren marang purohitkote Pilât metakidiako, "Jihudiren Raja, niâ kathado alo olam, borong olme, nâi mensane, Inggiying Jihudikoren Raja."

22Pilât menkede, "Ing akaṭaʹ olkâding anagi olkâding."

23Jisu kurusre ma tayom sonnoko Âniaʹ lugri citriʹko engeketeʹ ako bhitârre pon bhagkedako. Tayomte angko Jisuoaʹ angaho engekedako. Ana angare aka silâigi bang tahalena, cetan khoiʹ latar dhâbiʹ sanamgi galang tahalena. 24Anate sonnoko miʹhorte ar miʹhor metakeʹkoako, "Nado bang oreʹketeʹ borong gulibaṭketeʹ lelabo niâdo ekeyaʹ hoʹhaʹ." Niâdo ghoṭolena jate Pobitro boinaʹ niâ katha puronoʹa,

angko nijeko talare Ingâʹ lugri citriʹko bhagkadako,

ar Ingâʹ anga laʹteho angko gulibaṭkadako.#Siringko 22:18

Ar sârigi sonnoko niâko sanam rikâkadako.

25Jisuren engat, Âniren engatren mesra, Kloparen girthân Moriom ar Mogdolini Moriom Jisuoaʹ kurus sorre tengo tahalenako. 26Jisu Âiʹren engat ar eke dulârisane âni cela tengo tahente lelkeʹkine, tâkhni engat metakidie, "Hâni lelei amren hoponmi." 27Inâ tayom Ânite cela metakidie, "Hâni leleime amren engam." Tâkhni khoiʹ âni celate Jisuren engat aiaʹ nijeyaʹ oraʹre idikidie.

Jisuoaʹ goiʹ

(Mothi 27:45-56; Mark 15:33-41; Luk 23:44-49)

28Niâ tayom sanamaʹgi cabana baṛeketeʹ Pobitro boinaʹ katha jate puronoʹa ana laʹte Jisu menkede, "Ing daʹ tetangdingâ."#Siringko 69:21 29Ana jagare heberte pereʹ miṭiʹ botal tahalena. Tâkhni angko miṭiʹ isponj ana heber daʹre lohotʹkedako ar esob darenaʹ ḍhârrenaʹ agalre ana lagoketeʹ Jisuoaʹ moca sorre sabkedako. 30Jisu ana heber daʹ nuketeʹ menkede, "Cabakana." Inâ tayom Âni bohoʹ tumutʹketeʹ Aiaʹ atta jimâkede.

31Ana din tahalena porobrenaʹ ayojonnaʹ din. Porahiluʹ tahalena jiruʹaʹ din, ar ana jiruʹaʹdin miṭiʹ bises din tahalena mente Jihudiren netako koiledako jate ana dinre goiʹ hormoko kurus cetanre bang tahena. Niâ laʹte angkote Pilâtṭheʹ nehorkedako jate kurusre ekeko menaʹkoa angkoaʹ janga râputʹketeʹ kurus khoiʹ angko latarre agro hoʹa. 32Tâkhni sonnoko hiʹketeʹ Jisu saote eke kurusre ma holena ângkin baranhoraʹ janga râputʹkeʹtâkinako. 33Kheʹ angko jâkhni Jisuoaʹ sorre hiʹketeʹ lelkidiako je, Âni goiʹngekane, tâkhni Âniaʹ janga bang râputʹleʹtayako.

34Kheʹ miṭiʹ sonnote Âni kokhare borsate soboʹkidie, ar tâkhnigi aṛe khoiʹ meyom ar daʹ oṛoʹ hiʹna. 35Eke nijeyaʹ metʹte nako lellede ânigi sakkho maketeʹ menkade, ar âniaʹ sakkho sârigiâ. Âni baṛeye je, âni akaṭaʹ mende ana sârigiâ, jate apeho pâtyu darenape. 36Niâko sanam ghoṭolena jate Pobitro boinaʹ niâko katha puronoʹa, "Âniaʹ miṭiʹ jangho oho râputʹhoʹa."#Jatrapustok 12:46; Siringko 34:20 37Arho Pobitro boinaʹ ar miṭiʹ katha niâkana, "Ekekote Âni soboʹkâdiako angkote Âni lelnameikohaʹ."

Probhu Jisuoaʹ topa

(Mothi 27:57-61; Mark 15:42-47; Luk 23:50-56)

38Niâko sanam ghoṭona tayom Orimâthiâ ṭolaren Josef Jisuoaʹ goiʹ hormo idilaʹte Pilâtṭheʹ onumuti engekede. Josef tahalene Jisuren bai cela, karon ânite Jihudi netako botorokosane. Pilâtte unumuti ma tayom âni hiʹketeʹ Jisuoaʹ goiʹ hormo idikede.

39Ar nindâ eke palhere Âniṭheʹ hiʹlene, âni Nikodimho hiʹne, gondhoros ar aso caboʹaʹ ran mesalonaʹ ânggurnaʹ pâurâ poncas ser laka âgukede. 40Tayomte angkote Jisuoaʹ goiʹ hormo idiketeʹ Jihudikoaʹ topa makoaʹ niom laka ana sanam so sunum jinisko suliʹ goiʹ hormo mosina lugrite pidhyukedako. 41Jisu aka jagare kurusre ma holena ana jagare miṭiʹ bagan tahalena ar aṛe miṭiʹ naoa topa tahalena. Ana topa talare ekeho tisho bang topa hokana. 42Ana din tahalena Jihudikoaʹ porobnaʹ ayojonnaʹ din, ar topaho sorre tahalena mente angkote Jisu ana topare dohokidiako.

Currently Selected:

Johon 19: EKL

Highlight

Copy

Compare