Johon 17
17
Jisu Aiʹren celako laʹte koijongkede
1Niâko katha mentayom Jisu sorgo hate koyoʹketeʹ menkede, "Baba, somai hiʹngekana. Amren Hoponaʹ mohima sodorme jate Hoponho Amaʹ mohima sodor dareʹtame. 2Amte Âni sanam âdmiko cetanre khomota makâdingâm, ekeko Amte Âniaʹ tire makâdingâm angko sanamkhoiʹgi Ânite ononto jiui ma darekoe. 3Ar niâgi ononto jiui jate angkote Am baṛe daremako, miṭiʹ matro sâri Issorgi ar Amte Eke kolkâdiâm, Âni Jisu Khrisṭo. 4Amte Ing aka kâmi makâdiâm, ana cabaketeʹ Ing dhârtire Amaʹ mohima sodorkâding. 5Ar nitoʹ Baba, Amaʹ upostit tahanregi Ingâʹ mohima sodorme, dhârti bano laharigi Amṭheʹ Ingâʹ aka mohima tahalentingâ, Am ana mohimate nitoʹ Ingâʹ mohima sodorme.
6"Dhârtinaʹ tala khoiʹ Am jeko âdmi Ing makâdiâm Ingte angkoṭheʹ Amaʹ nutum sodorkâding. Angko Amrengi tahalenako ar angko Amte Ing makâdiâm ar angko Amaʹ katha palonkadako. 7Nitoʹ angko baṛeyako je, Amte Ing akako makâdiâm anako sanam Amṭheʹ khoiʹgi hiʹkana, 8Amte Ing akako katha makâdiâm Ingte angko anako katha makaʹkoing. Angkote angko engekaʹkoako ar sâriaʹ baṛekadako je Ing Amṭheʹ khoiʹ hiʹkâning ar angko pâtyukanako je Amte Ing kolkâdiâm. 9Ing dhârti laʹte bang koijonging, kheʹ ekeko Amte Ing makâdiâm, Ingte angko laʹtigi koijonging. Ceklaʹ bang angkodo Amrengiâko. 10Akako jinis Ingâʹkana anako sanamaʹgi Amaʹ ar Amaʹ jiniskogi Ingâʹkana, angko talatigi Ingâʹ mohima sodorkana.
11"Ing ar niâ dhârtire ḍherghâṛiʹ bânungâ, Kheʹ âdmikoto niâ dhârtire menaʹkoa ar Ing apeṭheʹ hijuʹkâning. Pobitro Baba, Amaʹ nutumte angko bacokom aka Amte Ing makâdiâm jate angko miʹ hoʹko, jemon aboho miʹgiâbo. 12Jâkhni Ing angko suliʹ tahekâning, Ingte Amaʹ nutumte angko bacokaʹkoing, aka nutum Amte Ing makâdiâm. Ingte angko jogokaʹkoing ar ekeyaʹ dhongsonaʹ katha tahalena âni dhongsongekane, jate Pobitro sastronaʹ katha purunoʹa.
13"Nitoʹ Ing amṭheʹ hijuʹkâning, ar Ing dhârtire tahan somaigi nako sanam katha menkâding jate angko Ingâʹ hubre akoaʹ ontor purunko. 14Ingte angko Amaʹ katha makaʹkoing ar dhârti angko ghrinâ kaʹkoe, karon angko dhârtiren bangkanako, jemon Ing dhârtiren bangkâning.
15"Ingte bang koijong ding je Amte angko dhârti khoiʹ idikom, kheʹ angko Soitanaʹ ti khoiʹ bacokom. 16Ing jemon na dhârtiren bangkâning, angkoho engkagi na dhârtiren bangkanako. 17"Amte angko sâriaʹre Pobitrokom, Amaʹ kathakogi sârigiâ. 18Ingte angko niâ dhârtire kolkaʹkoing, ar Amte Ing niâ dhârtire kolkâdiâm. 19Angko laʹte Ing nijegi pobitrokâning jate angkoho nije sâriaʹre pobitroʹako.
20"Ingdo khâli angko laʹte bang koijonging, kheʹ ekeko nako katha talate Ing cetanre pâtyuʹako angko laʹte koijonging. 21Ceklaʹ bang angko sanamkhoiʹ miʹṭheʹ hoʹako, jemon Am, Baba, Ing talare ar Ing Am talare. Ing koijonging jate angkoho abo talare tahanako, jate dhârtiren âdmiko pâtyuʹako je Amte Ing kolkâdngiâm. 22Aka mohima Amte Ing makâdingâm, ana Ingte angko makaʹkoing, jate angko migoʹako, jemon abo miʹgiâbo. 23Ing angko talare ar Am Ing talare, jate angko migoʹako, jate dhârtiren âdmiko baṛe dareʹako je Amte Ing kolkâdingâm ar angko dularkaʹkoam, jemon Amte Ing dulârkâdingâm.
24"Baba, ekeko Amte Ing makâdiâm Ing asoʹkâning angkoho Ing suliʹ tahanako akare Ing tahaning, Amte Ing ekeko makâdiâm, angkoho jate aṛe Ing suliʹ tahanako, jate angko Ingâʹ mohima lelako, aka Amte Ing makâdiâm, karon dhârti bano lahakhoiʹgi Amte Ing dulârkâdingâm. 25Dhârmik Baba, dhârtiren âdmikote Am bang baṛekaʹmiâko, Kheʹ Ingte Am baṛekaʹmiying, ar angkodo bujhu darekadako je Amte Ing kolkâdingâm. 26Ingdo angkoṭheʹ Amaʹ nutum procarkâding ar Ingte niâ baṛesokoing je Amte aka dulârte Ing dulârkâdingâm, ana jate angko talare tahana ar Ing angko talare tahaning."
Currently Selected:
Johon 17: EKL
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh
