Preritʹ 1
1
Lukaʹ olonaʹ eṭaʹ boi
1-2Manotan Thiofil,
Ingâʹ palhe boire Jisu akako kâmilede ar cetʹaʹ maleʹkoe Âniaʹ kâmi ehob khoiʹ âni sorgore rakap engeyaʹ laha dhâbiʹ ana boire ol menaʹa. Je preritko Ânite bachongeleʹkoe, Âni rakapngeyaʹ lahare angkodo Ânite Pobitro attaoaʹ talate hukum maleʹkoe. 3Goiʹ khoiʹ jiuitʹ beretʹ tayom Jisudo angkoṭheʹ sodorne ar Âni je jiuitʹgie ananaʹ isposṭo proman makade. Cullis din dhâriʹ preritko napamketeʹ angkodo Issoraʹ rajjonaʹ bisoite katha metakosane. 4Ana somai miʹdin Jisudo jâkhni preritko saote tahalene tâkhni angkodo niâ hukum maleʹkoe, "Apedo Jirusalem bâgiketeʹ alo caʹape, borong Ingren Babaoaʹ rikitonaʹ akaṭaʹ dannaʹ katha ape Ingṭheʹ atenkadape ana laʹte ḍahar bengetʹpe. 5Johonte daʹre bâptisma makosane, kheʹ thoṛa din talarigi apedo pobitro attaoaʹ talate bâptismapeheʹ."
Jisu sorgore cane
6Ana somaire preritkodo Jisu saote jaoraketeʹ Âni kulikidiako, "Probhu, niâ somai amte ki Israyelko angkoaʹ rajjo âcur makomahaʹ?"
7Ânite angko metakeʹkoe, "Kebol Baba nijeoaʹ khomotare dohokade, anako bisoido ape bang baṛeso hokâniʹ, 8Kheʹ jâkhni pobitro atta apeṭheʹ hijuʹheʹ, tâkhni apedo âniaʹ khomotate suktisâliʹpehaʹ ar niâtayom Jirusalem ar goṭa Jihudiâ ar Somoriâre, emonki dhârtinaʹ mucitʹ simâna dhâriʹ apedo Ingren sâkkhi hoʹpehaʹ."
9Niâ katha men tayom angkoaʹ metʹ samnerigi Jisu rakabnge hona. Ar miṭiʹ bâdrinaʹ bhitrire cagene. 10Jisu jâkhni rakab caʹsane, tâkhni preritkodo serma hate koyoʹgiriledako, ṭhik ana somai poṛ lugri soroʹ barya âdmido angkoaʹ sorre tengonâkin. 11Ângkin barya âdmitedo preritko metakeʹkoyakin, "He Gâlilren âdmiko, ape serma hate koyoʹgirikadape cekla? Nigie Jisu, ekedo apeyaʹ samne khoiʹ sorgore rakabnge hona, Ânido alkaketeʹ apete sorgore caʹte lelkidiâpe, ṭhik engkaketeʹgi ânido âcur hijuʹheʹ."
Jihudaoaʹ jagare Mottothio
12Niâtayom angkodo joitun buru khoiʹ agroketeʹ Jirusalemre âcur canako. Jirusalem sohor khoiʹ niâ burudo miʹ kilomiṭâr sâhingre tahalena. 13Inâtayom preritkodo sohorre bolonako. Ar angkodo akaṭaʹ cetannaʹ oraʹre tahansanako aṛe canako. Angkodo honako Pitor, Johon, Jakob, Andrio, Filip, Thoma, Bortholomoi, Mothi, Alferen gidrâ Jakob, Simon ekedo disâmren moulobâdi men hoʹsana, ar Jakobren gidrâ Jihuda.
14Nengko sanamkhoiʹ miʹ saote aṛe miʹ uddessote sanam somai koijongsanako. Angko suliʹdo koekṭeʹ reja, Jisuren engat Moriom ar âniren boihako tahalenako.
15Ana somai miʹdin jâkhni Khrisṭore pâtyuonkhoiʹ boiha ar mesrako miʹṭheʹketeʹ koijongsanako, aṛe prai miʹso bis hor jaoralenako. Ana somai Pitordo tengoketeʹ menkede, 16"Boihako, pobitro atta aima din lahare raja Dâudaʹ mocate Jihudaoaʹ bisoite ja menlede, sastrorenaʹ ana katha purunaʹ dorkar tahalena. Ekekote Jisu sablidiako, nâi Jihudatigi angko ḍahar uduʹketeʹ idileʹkoe. 17Âni Jihuda alerengi miʹhor tahalene ar ale saote seoa kâmi laʹte ânido bachonge holena."
18(Niâ kharap kâmiketeʹ Jihuda je paisa namlede ana paisate has kiring holena, ar ânido bohoʹ nicâketeʹ hasre ujuʹne ar âniaʹ laiʹ posaʹketeʹ bhitrinaʹ bhuṛi oṛoʹ cabantaya. 19Jeko Jirusalemre basoʹako, angkodo sanamkhoiʹgi niâ katha atenledako. Niâlaʹte angkodo niâ khetʹ akoaʹ bhasate Akeldama metaʹako niânaʹ ortho hona "Meyomnaʹ khetʹ.") 20Sârigi, "Siringkorenaʹ boire ol menaʹa,
'Âniaʹ oraʹ khâli tahanmana,
aṛedo ekeho jate bang basoʹako.#Siringko 109:8
Arho ol menaʹa, âniaʹ marang pod eṭaʹ âdmi ma hoʹmana."
21,22"Anate Johonte jâkhni bâptisma makolaʹ ehobkede, ana somai khoiʹ Probhu Jisu sorgore bang rakabi dhâbiʹ tiniʹdin Probhu Jisu abo suliʹ tahalene, ana dinkore jeko sanam somai abo suliʹ tahansanako, angko talare miʹhor abote bachongeyaʹ dorkar. Eke aboaʹ dolre salagoʹheʹ, ânido abo suliʹ Jisu goiʹ khoiʹ jiuitʹ beredoaʹ bisoire sâkkhi hoʹlaʹ hoʹtaihaʹ."
23Tâkhni angkote Josef je Barsabba mente ṭâhuiako, jeyaʹ eṭaʹ nutumdo Jusṭo ar Mottothio, nâkin barhoraʹ nutum menkedako. 24,25Niâtayom angkodo niâ mente koijongkedako, "Probhu, Am sanamkhoiʹaʹ ontor baṛeyam. Jihuda âniaʹ upojukto jagare caʹ laʹte prerit podnaʹ seoa kâmi bâgikade. Nitoʹ nâkin barhor talare ana pod laʹte je amte bacho engekaʹkinâm âni ale uduʹolem." 26Niâtayom angkodo ângkin barhor laʹte gulibaṭlekheʹ Mottothioaʹ nutum rakabna. Niâlakaketeʹ ânido egaroṭeʹ preritko saote salaʹne.
Currently Selected:
Preritʹ 1: EKL
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh
