Preritʹ 2

Pobitro atta agro hijuʹkâniʹ

1Niâ tayom poncasoptomi porobrenaʹ dinre celakodo sanam miʹ jagare jaoranako. 2Ana somai hoṭat serma khoiʹ ândhinaʹ saṛe laka miṭiʹ saṛe hiʹna ar angko je oraʹre duruʹ tahalenako, ana oraʹdo saṛete pereʹngena. 3Ar angkoaʹ samnere alang laka sengel lel namkedako, ana alang lakanaʹdo angko cetanre ujuʹna ar alada aladaketeʹ angko sanamkhoiʹaʹ cetanre ujuʹna. 4Angko sanamkhoiʹgi pobitro attate pereʹnako ar aima lakanaʹ bhasate lorlaʹ lagonako. Pobitro attatigi angkodo nengka katha menaʹ sukti makeʹkoe akaṭaʹdo angko lahate bang baṛesanako.

5Ana somaire Jirusalemnaʹ sorkorenaʹ aima disâm khoiʹ Issorbhokto Jihudi âdmiko hiʹketeʹ Jirusalemre basoʹsanako. 6Ana saṛe atenketeʹ angko saote aṛe aima âdmi jaoranako. Angkodo asarjongenako karon akoaʹ nije nijeyaʹ bhasate pâtyuonkhoiʹa moca khoiʹ katha mente atenkeʹkoako.

7Niâte angkodo asarjoketeʹ menlaʹ lagonako, lelpe! Neko âdmi jeko katha mendako, nekodo sanamkhoiʹ ki Gâlilren âdmi bangkanako? 8Tahale abote kalkaketeʹ angko sanamkhoiʹ aboaʹ nijeyaʹ nijeyaʹ bhasate katha mente atenkokanabo? 9Naṛe abo jeko menaʹboa, abodo eṭaʹ eṭaʹ disâmren âdmikanabo, Parthio, Madio, Elomio, Mesopoṭemiâ, Jihudiâ, Kappadokiâ, Ponto, Esia, 10Forugiâ, Pamfuliâ ar Misor, Kurini ar Libiâ sorkoren oncolren thoṛa âdmi, Rom sohor khoiʹ je Jihudi ar Jihudi dhormore pâtyuonkhoiʹ Ojihudi âdmiko, 11Angko Jihudi ar Kriṭ dipren âdmiko ar Arobioko abo sanamkhoiʹtigito nije nijeyaʹ bhasate Issoraʹ marang kâminaʹ katha angko mente atenkokanabo."

12Angko asarjo ar buddhi atʹketeʹ miʹhorte armiʹhor kulikolaʹ lagonako, "Nanaʹ manedo itâʹ?" 13Abar eṭaʹonkhoiʹte angko ṭhaṭṭaketeʹ metakeʹkoako, "Angkodo ânggurnaʹ naoa pâurâ nuketeʹ bulkanako."

Âdmikoṭheʹ Pitoraʹ katha

14Tâkhni Pitor hangko egaroṭeʹ preritko talakhoiʹ tengoketeʹ garjoketeʹ angkoaʹ uddessote menkede, "He ingren Jihudi boihako ar Jirusalemre tiniʹ âdmi basoʹkanape apeyaʹ sanamkhoiaʹ uddessote mending, apeyaʹ naṛenaʹ ortho bujhiaʹ dorkar anate apedo ingâʹ katha monte atenpe. 15Ape ja monekadape anado bang, nengko âdmido ekeho bang bulkanako, karon nitdo setaʹ noṭa bajoʹkana. 16Kheʹ nado ana ghoṭonakana, jeṭaʹnaʹ bisoite Joyel nâbi menkade,

17'Issor menkade,

cabanaʹ kalre nangkagi hoʹhaʹ, cabanaʹ kalre Ingdo sanam âdmiaʹ cetanre Ingâʹ atta dul girihuʹ,

anate aperen hopon ar hoporako nâbiko laka bhobisotnaʹ katha menkohaʹ,

aperen hoponko dorson#2:17 Dorson hoʹkana Issoraʹ sorgio ba addhatik jahanaʹ lelnamhe. namkohaʹ,

ar aperen harme âdmikodo sapna lelkohaʹ.

18Emon ki, ana somai Ingren das ar dâsikoaʹ cetanre Ingdo Ingâʹ atta dul girihuʹ,

Ar angko nâbiko laka bhobisotnaʹ katha menkohaʹ.

19Ingte sermanaʹ cetanre asarjo asarjo ghoṭona uduʹokohuʹ,

Ar latarre dhârtire aima lakanaʹ cinhâ uduʹokohuʹ,

Meyom, sengel ar aima dhumâ uduʹokohuʹ.

20Probhuoaʹ ana marang ar mohimanaʹ din hijuʹ lahare,

Sing cando hende ar nindâ cando meyom laka araʹngenheʹ.

21Ar jahegi Probhuoaʹ nutum ṭâhikohaʹ, engkogi bacoʹkohaʹ.' #Joyel 2:28-32

22"He Israyelren boihako, niâ katha atenpe. Nasarotren Jisu talate Issor aima asarjo asarjo kâmiketeʹ ape talare proman makade je, Ânite Jisu kolkâdie, ar ape niâ ghoṭonako baṛeyape. 23Jisudo apeyaʹ tire ma hona, ar apete Ânido goiʹkâdiape. Kharap âdmiaʹ talate apete Ânido kurus cetanre kaṭate gathosokidiape. Issor baṛesane je niâkodo ghoṭoʹhaʹ, ar inâgi tahalena Issoraʹ purikolpona, ja Ânido lahatigi ṭhiklede. 24Kheʹ Issorte Ânido goiʹnaʹ kosṭo khoiʹ bacokidie. Issorte Jisudo goiʹ khoiʹ jiuitʹ rakapkidie. Goiʹtedo Jisu bang sab doho darelidie.

25Dâuddo âniaʹ bisoite menlede,

'Ingte Probhu sanam somai ing samnere leleiying,

Ânido ingâʹ jojma hate miniâ mente ingdo thir tahanhuʹ.

26Niâte ingâʹ ontor kusigitingâ,

Ar ingâʹ alang hubnaʹ katha mene,

Ar ingâʹ hormoho asa laite bacoʹheʹ,

27Karon amte ingâʹ jiui patalre oho giṛi dohetingâm.

Amte amren pobitro âdmido oho seyasoiam.

28Jiuinaʹ ḍahar amte ing baṛesokâdingâm,

amṭheʹ taharigi ingâʹ pereʹ hub menaʹa.'#Siringko 16:8-11

29"Ingren boihako, niâ katha ing niscitketeʹ men dareʹing je, sederen âdmi Dâud goiʹkane, âni topa hokana ar âniaʹ topa tihinho naṛe menaʹa. 30Kheʹ ânido miṭiʹ nâbi tahalene ar ânido baṛesane Issor rikitketeʹ niâ asa makane je, âniaʹ bongsoren miʹhordo âni laka rajaketeʹ singhâsonre durugiheʹ. 31Tayomte itâʹ hoʹhaʹ ana laharigi baṛe dareketeʹ Dâuddo Khrisṭoaʹ goiʹ khoiʹ jiuitʹ bered bisoite menlede,

'Ânido patalre bang giṛi hokâniʹ

Ar âniaʹ hormoho topare bang seyakâniʹ.'

32Issorte nâi Jisugi goiʹ khoiʹ jiuitʹ beredkâdie, ar abodo sanamkhoiʹ niâ ghoṭonaniʹ sâkkhi menaʹboa. Abodo sanamkhoiʹtigi âni lelkâdiabo. 33Jisu sorgore rakabnge hona ar Ânido nitoʹ Issoraʹ jojma hate miniâ, Issordo Âniaʹ rikit laka Jisu pobitro atta malidie, Nitoʹ Jisute âni pobitro atta dulkidie, ape nitoʹ inâgi leldape ar atendape. 34Dâuddo sorasori sorgore bang rakab hokâniʹ, kheʹ ânido niâ katha menkade,

'Probhute ingren Probhu metakâdie, Amdo Ingâʹ jojma hate durubob.'

35Tin dhârbiʹ bang Ingte amren dusmânko Amaʹ janga latarre dohokoing,

36"Anate Israyelren sanam jât niâ katha niscitte baṛemanako je, Eke apete kurusre malidiape Issorte âni Jisugi probhu ar Khrisṭo hisâbte makâdie."

37Pitor ja menlede, ana katha atenketeʹ âdmiko aima duk namkedako. Angkote Pitor ar eṭaʹ preritko kulikeʹkoako, ''Boihako, aledo itâʹ cikiale?"

38Pitortedo angko metakeʹkoe, 'Apedo pap khoiʹ map namlaʹte apeyaʹ mon âcurtape ar Jisu khrisṭoaʹ nutumte bâptisma engepe, tahale apedo dan hisâbte pobitro atta nampehaʹ. 39Karon niâ rikitdo ape laʹte, aperen gidrâko laʹte ar ekeko sâhingre menaʹkoa angko laʹte. Aboren Issor probhute Aiʹṭheʹ ekeko ṭâhukaʹkoe, niâ dando angko sanamkhoiʹ laʹte."

40Pitortedo angko arho aima katha metaketeʹ nehorketeʹ sabdhankeʹkoe, "Niâ jugren kharap âdmiko cetanre akaṭaʹ sâsti agro hijuʹkana ana khoiʹdo nije bacoʹpe!" 41Ekeko Pitoraʹ katha pâtyulenako angkodo bâptisma engekedako. Niâ laʹte inâ hiluʹ pe hajar laka âdmi Khrisṭore pâtyu âdmiko suliʹ salaʹnako.

Pâtyuonkhoiʹaʹ calobano

42Angko âdmiko preritkoaʹ cedaʹ atangkedako, miʹmotketeʹ milunako ar Probhuoaʹ bhoj atangkedako ar koijongketeʹ somai paromkedako. 43Preritko aima asarjo asarjo kâmi ar cinhât lelketeʹ sanamkhoiʹaʹ ontorre aima bhukti pereʹ botor hiʹnaʹ. 44Sanam pâtyuonkhoiʹgi miʹ saote tahensanako ar sanamgi nijeoaʹ talare hâtingngesanako. 45Angkodo nijeoaʹ sompotti âkringsanako ekeoaʹ alka dorkar analaka hâtingngesanako. 46Angkodo dinâm din Mundirre miʹ saote jaoroʹsanako ar angkodo eṭaʹ eṭaʹ oraʹre caketeʹ hub saote ar sorol monte jom nuisanako. 47Angkodo sanam somai Issoraʹ prosongsesanako ar sanam âdmite pâtyuonkhoiʹko sonmankosanako. Jeko pap khoiʹ baco namsanako probhure pâtyuonkhoiʹ dol saote sanam dingi angkodo salaʹnako.

Currently Selected:

Preritʹ 2: EKL

Highlight

Copy

Compare