Rumi 5

Kaitorni sakangw raidia

1Paitokmani bisingtwise chwng Kaitorni dayo yachakjuai ongkha tei obwni bagwise Subrai Jisu Khristoni bisingtwi Kaitor bai chini bisingw khakchang akha ongkha. 2Khristoni bagwise chwng chini paitokmani bisingtwi Kaitorni khakhamma mangkha tei bachagwi tongdok. Chwng tongthogw je i khadung lagwi chwng salsa Kaitorni chwngsachani bagita ongnw. 3Obw tama jotho dugu tektoni bisingwbw chwng tongthogw, twmwi hinba chwng siyo je i dugu tekto rok chwnw khaloknai lama aita ujairwgwi tilangoi thangw. 4Khalokma chini akkwlnw gam khalayoi tisagw tei i gam akkwlni bagwi chini langmarogw khadung ujio. 5I khadung chwnw oaisabw hel khalaiya, twmwi hinba Kaitor Bini Phala Katharni bisingtwi Chini khanw Bini hamjakma baise kwplwng khalaikha. 6Jephuo chwng pharan kwrwi ongjak aiphuo Khristo chini bagwi singli rwkha. Thi joragw chwngtwi jar chogya basarokni bagwi thwywi thangkha. 7Raidia borogni bagwi hoda kaisabw thwini naigalak, matwr borog gam kaisani bagwi thwini gophwng gosemanw. 8Matwr Kaitor je chwnw hamjagw obwni majri ongkha, chwng sumsok ganang tongtwtwise Khristo chini bagwi singli rwkha. 9Twmwi hinba, Khristoni thwise chwnw Kaitorni dayo yachakjuai khalaikha aithani imw daijw je chwng Khristoni bisingtwise Kaitorni senji daini yoknw. 10Twmwi hinba Chwng jephuo Bini kena tongjak aiphuo Bw Bini sajlani thwimani bisingtwi chwnw Bwbai arwbw oaisa kwrwngrwkha. Aithani, tabok chwng Bwbai kwrwngwi tongjak thani imw arw daijw je Khristoni langmani bisingtwi yoknai.

11Keber obwya, tabok chwng Kaitorbai tongthogw. Jisu Khristo, Je chwnw Kaitorni aphak banaikha, Bini bisingtwi Kaitor jebw khalaikha obwni bagwi chwng tabok tongthok jagw.

Adom tei Khristo

12Kaisani bisingtwi i hayungw sumsok phaikha, tei o sumsokni bisingtwi thwinaibw phaikha. Aithani bagwi, jotho borogni dayo thwinai phaikha twmwi hinba jotho borog sumsok khalaikha. 13Mosini kerong nal phainai aguo hayungo sumsok tongo. Matwr aiphuo kerong nal kwrwi thani Kaitor aiphunini sumsoknw thikiya. 14Matwr Adomni joni jimin Mosini jo jora thwinai jothoni sakagw bugiri khalayoi phaidok. Obw tama Kaitorni tholma maneyagwi jebwrok Adomni kosol sumsok khalaijia bokni sakagwbw thwinai bugiri khalaijak.

Jebw phaidok Adom ongkha Bini mangpli. 15Matwr Adomni sumsok jebwtwi jar Kaitorni khairokmani yakpi obwtwijar ya. Imw kwbwi je o borog kaisani sumsokni bagwi kabangma borog thwikha. Matwr, O borog Kaisa Jisu khristo Jeni bisingtwi Kaitorni Khakhamma tei tekhokmani mangana ruai kabangma borogni bagwi arw kabangma kotor. 16Tei Kaitorni khairokmani yakpini bisingtwi jebw phaikha obw Adomni sumsokni thaimarini kosolya, twmwi hinba kwrwngsa sumsokni bagwi nalchir tei senji akhogwi phaijak, Matwr kabangma borogni sumsokni jerw Kaitorni mangana yakpi phaikha kabangma borognw Kaitorni dayw yachakjuai banaini bagwi. 17Kaisa borog sumsok khalaikha, tei o borog kaisani khatani bagwi jothoni sakagw thwinai bugiri khalaikha. Matwr o Borog kok ongkha Jisu Khristoni bisingtwi khalainai samung bwswkse kotor twmwi hinba jebwrok Kaitorni khakhamma yachagwi lago bok Bini dayo yachakjuai ongw arw Khristoni bisingtwi bugiri khalayo. 18Halai kwrwngsa sumsokni bisingtwi jekhalaywi jotho borognw senjini chugo hinwi rumkha, obwtwi jar khalaywi kwrwngsa raidia samung jotho borognw Kaitorni dayo yachakjuai khalayo tei boknw langma yakpi rwgw. 19Jekhalayoi kaisa borogni gaithalni bagwi jotho borog sumsok ganang hinwi rumjajak. Obwtwijar khalayoi Kaisani kok khananaini bisingtwi jotho borognw raidia hinwi yachagwi lanai. 20Kerong nal rwkha sumsok bangnaitwi. Matwr jerw sumsok bangwi thangkha orw arwse Kaitorni khakhammabw arw kabang bangwi thangkha. 21Halai tabok Kaitorni khakhamma raidattiyani bisingtwi bugiri khalaidok jekhalayoi sumsok thwinaini bisingtwi bugiri khalaijak. Tei obwni thaichlwi ongkha chini Subrai Jisu Khristoni bisingtwi paiphlaiya langma mannai.

Currently Selected:

Rumi 5: TPE

Highlight

Copy