Rumi 4

Abrahamni langmani koknw khanagwi swrwngma

1Halai chini hodaipiri Abrahamni kothoyw chwng tama satai? Bini langma chwnw tama phwrwng? 2Matwr Kaitor jwtini bini samungni bagwi bwnw yachaktilai, halai bini borai karinai jar mwngsaswk tongkhamw. matwr Kaitorni sakangw Abrahamni borai karinai jar mwngsabw kwrwi. 3Kathar elembagw suijak tongw, "Abraham Kaitorni kok paitokha tei imw bini bagwi raidattiya hinwi thikijakha." 4Samung tangwi je srangpai man obw yakpiya, matwr omo bini samungni manthise. 5Matwr Kaitorni dayo yachakjuai ongni bagwi jebw sakni chaitokmani sakao puitonyagwi Kaitorni sakao puiton khalaio, Kaitornw paitokmani bagwi Bini paitokma raidattiya hinwi thikijagw. 6Dayudbw o baksa koknw sajak hamsachak o borogsa jebwnw Kaitor bini samungni bisingtwiya kok ongkhadoi bini paitokmani bisingtwise raidia hinwi goseywi lagw.

7Hamsajak o borog, jebwrokni chaya nakarjajaki

Jebwrokni sumsok phwngwi tonjajak.

8Hamsajak o borog, jebwni sumsok nakarjajak.

9Irw tama keber boknw hamsajak hinjak jebwrokni sunnot khalaijak? Sunnot khalaijiya roknw tama sajiya? Tabok chwng sadok, "Paitokmase Abrahamni bagwi raidattiya hinwi thikijajak." 10Matwr baraijar habao goseoi lajajak, bini sunnot ongnai aguo, na jerw? Sunnot khalainai aguose rumjak, jerwya. 11Sunnot khalaijiya habao bini paitokmani bagwi Kaitor bwnw raidia hinwi rumwi lajak, bini sunnot khalainai ongkha obwni majri tei sidom. Obwni bagwi sunnot khalaijiya phwng keber paitokmani bagwi jebwroknw yachagwi lajak, Abraham bok jothoni apha. 12Matwr sunnot khalainai sakangw Abrahamni jekhalawi paitokma tong, o borogrok Abrahamni o paitokmani lamanw swrwnghalai bokhbw Abrahamni basa.

Kaitorni swmai sokkha

13Abraham tei bini bosong rokni orw Kaitor i swmainw tangjak je, i hayung Abrahamni ongnw. Kerongnal palemani bagwi i swmai bini dayw khalaijiya, matwr bini paitokmani bisingtwi raidia hinwi goseoi lajak tei obwni bagwise i swmai khalaijak. 14Tamni hinba kerongnal paleywi jwtini o swmaini babita ongmanw hingkhlai lai paitokma bagw nangya ongw tei Kaitorni o swmaibw mwngsa man kwrwi. 15Tamni hinba kerongnal Kaitorni senji ringkhogwi twgw. Tei daijw ongkhadoi tama, jedayw kerongnal kwrwi odayw kerongnal maniyanibo mwngsa kwrwi.

16Obwni bagwi borogni paitokmani bisingtwi i swmai sokjagw, jate obw Kaitorni khakhammani yakpi ongmanaitwi. Arw aithani Abrahamni bosongni jothoni bagwi i swmai khamkha sokhnw. Jebwroknw Kerongnal rwjak keber bokni bagwi i swmai tongw obwya, matwr bokni bagwibo i swmai tongw jebwrokni chini apha Abrahamni kosol paitokma tongo. Bw chini jothoni apha, 17jekhalayoi kathar elembakgw suijak tong, "Ang nwnw kabangma dophani apha khalaikha." O swmai Kaitorni mokolw daijw. Bw o Kaitornw paitokgw, Jebw kwthwinw mwthang rwgw tei jebw kwrwi obonw ujirwgw.

18Jephuo pha ongni mwngsa khadung kwrwi ephuo Abraham Kaitorni sakao khadung tonwi paitokjak je bw kodur dophani apha ongnai. Twmwi hinba Kaitor bwnw sajak, "Nini bosongrok nokhani handu gurini kosol thiki manyajar ongnw." 19Abrahamni cha ephuo rasa bisi ongjak, basa manni bagwi bini basakni pharan kwrwikha. Bihik saranibo basa mannaijar cha kwrwikha. Abraham i jotho koknw uansokjak, hekphwng Abrahamni paitokma kebel ongjiya. 20Kaitorni swmainw lagwi bini khao oaisabw mwngsa khahamya kajiya, matwr paitokmao pharan ganang ongkha arw Kaitornw lobkha. 21Abraham srai khalayoi paitokgw je, Kaitor jebwnw swmai tangjak obwnw khalainibo bini pharan tongw. 22Tei imwni bagwi bini paitokma bini bagwi raidattiya hinwi thikijajak. 23Elembagw i kok keber bini bagwise suijak obwya, 24matwr chini bagwibw. Chini paitokmani bagwibw Kaitor chwnw raidattiya hinwi rumnw, tamni hinba jebw chini Subrai Jisunw kwthwi daini mwthangjak, o Kaitornw chwng paitogw. 25Chini sumsokni bagwi Jisunw thwini bagwi abwi rwjak arw chwnw Kaitorni dayw yachak juai khalaini bagwi bwnw kwthwi daini mwthangwi tisajak.

Currently Selected:

Rumi 4: TPE

Highlight

Copy