Luke 15
15
Ukeh Ɔrɔŋ Omu Oki-ukɔ
(Mattiu 18:10-14)
1Ene, awak-iwak ima ɔbɔghɔ utip ma ima omu enwi ede su ima ene udiɔk-kpɔ, ezaŋa ekpɨne Jisɔs idigei su onyi ekpiek.
2Onu ima Farisi ma ima ekpiek-ibed egɔn nsiŋi ememu ogu, “Onwi omu adian ile ma ima ene-udiɔk alagha elie kpɔ ma emu.”
3Ku utɔ ntak onu, Onyi otu ukeh omu ɔnɔ emu, ogu:
4“Onogu ovu omu onji ɔrɔŋ ikie, ki ku otu emu alagha oki, ovu maza aniaŋ-ma evu-miniaŋ ogu ayak ku mkpakaŋa-izɔŋ, ɔnɔŋ agaluŋɔ onyi onu oki onu tutu ovu ogid onyi?
5Onu kini omu onyi ɔluŋɔ aga ogid, onyi ma onni-ogid ebei onyi oduh ku afra, adra.
6Onu kini omu onyi ebei ɔrɔŋ onu ɔnyɔŋ odizɨm uvɔk, onyi ma okuh ovid ima nzaŋ izighi ma nduŋ-ndiana izighi, ɔnɔŋ ɔdɔghɔ emu ogu, ‘Ŋgid ɔrɔŋ omi omu ogoki-en, ene edi uvɔk omi man idine idra ovid enyin!’”
7Jisɔs ɔdɔghɔ ogu, “Ku ukem odighi onu, Abazi ma enjel izighi ku heaven ma enni-ogid ku ubughu onu ene-udiɔk ki omu agabare ogid eliek obine Abazi, oke ŋkpɔzu idighe enwi aniaŋ ma evu-miniaŋ omu numenji su edegɨbare ogid ebaŋa.”
Ukeh Ukip Silva Omu Okih
8Jisɔs otuh onuŋ ukeh, ogu, “Onogu enwa onji ŋkip silva lughu, ki alagha oki, su onyi madetre ididɨme utrigaŋ, ifiaŋa ovid uvɔk, inɔŋ izughɔre-ile iluŋɔ tutu onyi ogid onyi?
9Onu kini onyi ogid, onyi okuh nzizaŋ ma nduŋ-ndiana izighi edi ufine gi, ogu, ‘Edi edidra ma ami ku omi ŋgid ukip silva omi omu ogoki.’
10Jisɔs ogu, ami nne evu avak ku idra mabak ku onji Abazi ma ima enjel izighi abaŋa ene-udiɔk kpɔ ki omu agabare ogid eliek obine Abazi.”
Ukeh Oyo Omu Okih
11Jisɔs otuh onuŋ ukeh ɔnɔ emu ogu, “Onwi gi ogonji eyo enwi nnini iba.
12Ene, eteghetek ku otu emu ɔdɔghɔ eti izighi ogu, ‘Eti omi, bagare ogomi udɨme kpɔ omu onji mi nɔ mi.’ Ene, eti abaghare unji izighi ɔnɔ emu enwi iba.
13Ku ini omu use ivaŋ efei, ulɔ oyo onu ataŋ ovid-ovid unji izighi enjie, alagha izaŋ aga ata ɔnyiɔŋ-odighi okie uduŋ, nonu ku onyi agabiad unji izighi egre ku ntagha-ntagha uwem.
14Onu kini omu onyi ama agabiad ovid ɔkuk izighi egre, ku izɔŋ uduŋ onu, ku ata uyiri-uyiri agaŋ agalagha-ala, onyi agabare onu ufei, mbiɔŋ alagha ɔlɔŋ onyi eke-eke omu.
15Ene, onyi alagha agadian ile ma ɔbɔk odii ki ku uduŋ onu, onyi ɔnɔŋ ɔdɔŋ onyi aga ukɔ izighi aganɔ ima odii ŋkilie.
16Mbiɔŋ ɔdilɔŋ onyi tutu odinu su onyi ɔluŋɔ idilie ŋkilie omu ima odii elie ede ɔmuɔ onyi udib aga, sia ku onwi sugi numenɔ onyi ŋkilie.
17Onu kini onyi odivak ile izighi, onyi ɔdɔghɔ unɔgi ogu, ‘Sese, adaŋa awak-iwak egbi-igbei eyo-uto onu eti omi, enji ŋkilie osu emu ubɔk, enɔŋ enji nyɔghɔ nzughɔ, onu omi ku ndikpa ma mbiɔŋ momu!’
18Ami ma nlagha nla ŋga mbine eti omi, ma nɔŋ ndɔghɔ onyi ŋgu, ‘Eti, nne nlei ku onji Abazi nlagha nne vi udiɔk kpɔ.
19Ene omi ondo su okuh oyo ovu-ou. De mi su onwi ki, ku otu egbi-igbei eyo-uto ovu.’”
20Ene onyi alagha ku ɔnyɔŋ ɔnɔŋ odi obine eti izighi. Onu kini omu onyi ozug azaŋa ata nsese, eti ogid onyi, onji isɨghe abaŋa onyi, ɔnɔŋ abiak agawaŋa onyi ku utɔŋ, ɔnɔŋ azam onyi inue.
21Onu oyo onu ɔdɔghɔ onyi ogu, “Eti, nne nlei ku onji Abazi, nlagha nlei vi, omi ɔnsɔ ondo su eku oyo ovu-ou.”
22Onu eti ɔdɔghɔ eyo-uvɔk izighi ogu, “Ewra-wra egezighi ata ejei-jei useh edidɔŋɔ onyi, enɔŋ efiak onyi ŋkpanuen ku ubɔk, ma ikpeku, ku uku izighi.
23‘Enɔŋ ede uyo anaŋ omu onyi izek oke, ewu enɔ onyi, eyak enyin ine nlie inɔŋ ine idra oyomi omu ɔnyɔŋ odi!
24Kalazu oyo omi omu aga akpa-kpa, onu ulagha omu onyi ɔsɔ odu uwem; alazu onyi ogoki-ekih, onu ulagha omu esɔ egid onyi.’ Emu enɔŋ etɔŋɔ idine idra.”
25Ku ini omu nlie onu aganji, okpe-oyo izighi omu agabak ku ukɔ onu eti eneuto. Ku ini omu onyi ɔnyɔŋ odi ku mbresi ɔnɔŋ azaŋa okpine uvɔk, onyi egei ikwɔ ma uneŋ ma ŋkpɔ-ubre sughu ɔzɔk ku uvɔk.
26“Nonu ku onyi okuh eyo-uvɔk onu eti ki obid sene enwi edelie idra zon ku uvɔk?
27Onyi onu ɔbrɔ onyi ogu, ‘Ulɔ-uga ɔnyɔŋ odi, eti ovu owuh uyo anaŋ omu onji izek oke idine idra sia gu onyi ɔnyɔŋ ɔdi ma ntu ile.’
28Onu kini omu onyi egei kpɔm, onyi eje-ogid, enɔŋ eluŋɔ idiluk uvɔk-ou. Ene, eti izighi ɔwuɔ odi, odikpe onyi ubɔk ogu onyi ɔluk ɔdi uvɔk.
29Onu onyi ɔbrɔ eti izighi ku uje-ogid ogu, ‘Sese, ovid izughe omu omi nne kpɔ nnɔ vi su ɔvɔn; egene-ene ini sugi, onni usi ovu-ou; onu, egene-ene unɔ mi su uyo ofu ki ogu nde nlie idra ma ima nzizaŋa omi-ou.
30Onu nonu oyo ovu omu abiad ovid ɔkuk ovu omu ku ile enwi-mmani ikpra omu ɔnyɔŋ ɔdi, ovu owuh uyo anaŋ omu onji izek oke edene idra ɔnɔ onyi.’
31Onu eti ɔdɔghɔ onyi ogu, ‘Emime oyo omi, ovu abak ma ami ovid-evid ini, ovid-evid su omi nnji, onu ogovu idide ini unɔgi ogid.
32Enen su enyin ine idra inɔŋ ini ogid, ku oyo-uga omu alazu onwi omu aga akpa, onu ulagha omu onyi ɔsɔ odu uwem, onyi alazu ogokiekih, onu esɔ egid onyi.’”
Currently Selected:
Luke 15: ORX
Highlight
Share
Copy
Want to have your highlights saved across all your devices? Sign up or sign in
Oro Bible by Beyond Translation is licensed under Creative Commons Attribution-ShareAlike 4.0 License.
