Luke 14

Jisɔs Ɔkɔk Onwi Ku Use Sabbath

1Ogonu ku use Sabbath, ede odighi ki ku otu onu ima Farisi okuh Jisɔs odi liekpɔ ku uvɔk izighi ma onuŋ enwi, ima Farisi ma ima ekpiek ibed onu Mozes egega onji ese onyi sak-sak nu onyi made enekpɔ omu emu edide imuɔ onyi nlulei.

2Ebuk-ɔbuk-ou, onwi gi omu ɔdɔŋ-ɔdɔŋ uku ma ubɔk alagha ala onyi ku onji.

3Jisɔs obid ima Farisi ma ima ekpiek-ibed onu Mozes ogu, “Ibed onu Mozes onyime onwi ɔkɔk onwi ulɔŋɔ ku use Sabbath, nume-yime?”

4Onu emu ede Jisɔs. Ene Jisɔs ɔtɔu onwi ulɔŋɔ, ɔkɔk onyi, ɔnɔŋ ene onyi ɔnyɔŋ uvɔk.

5Jisɔs ɔdɔghɔ emu ogu, “Samutei, onwi gi ku otu evu omoonji oyo nonu anaŋ-ukiɔ omu ɔmɔdughɔ ɔluk ɔtuŋituŋ ofufei ku use Sabbath. Su onyi muemedɔd onyi ku ulu-ulu onu ezighi?”

6Onu emu egekɨme idibrɔ Onyi su ŋkie sugi.

Sughɔre Ile Lagha Tra Ndu

7Ku ini Jisɔs ogid ku enwi imagu omu onwi Farisi onu ogoku edi uliekpɔ eluŋɔ utei omu emu edikoko edu ku ubughu okpogro. Ene, Jisɔs otu ukeh omu ɔnɔ emu ogu,

8“Kini onwi okuh vi odi uzrɔ nlɔ, kuga idituak-itei ku ima okoŋ-ikoŋ ubi-ou, okiminji ima enwi omu enu okpe-kpe eke vi omu onji uzrɔ ɔgɔkɔŋ okuh edi;

9onogu onwi omu onu okpe-kpe oke vien alagha ɔsɔdi, onji uvɔk-uzrɔ omu ogoku vi ma onyien, ma odidɔghɔ vi, ‘Nɔ onwi omu utei’, ovu ma ɔtɔŋɔ idisɔ iga itei ku ata uzughɔre ubi. Ŋkpɔ-onu ma onji vi okpɨno ekpeŋ.

10Utuk ku onu, kini eku vi, ka tuak tei ku ubi omu ozip oke, ede onu kini onji uzrɔ ogid vi, onyi nu-odidɔghɔ vi, ‘Nzaŋa omi tuh ditei ku ubi omu okoŋ oke.’ Ikie-enwien ma egid ulagha ukpono omu onji uzrɔ onu ɔnɔ vi.

11Ana ovu odu uwem zon sia, onwi sugi omu ɔluŋɔ ididaga ile izighi ku ɔnyɔŋ, Abazi ma etighe onyi onim ku izɔŋ, onu onwi sugi omu odizughɔre ile izighi, Abazi ma adagha onyi ku ɔnyɔŋ.”

12Jisɔs ɔdɔghɔ onwi omu ogoku Onyi onu ogu, “Ku ini ovu ɔnɔ enwi ŋkilie, nene uzrɔ, ku utei umeh idiku ima nzaŋ ovu, ma ima uvɔk ovu, ma ima omu ovu avak, nu-onu eme ovu, nonu mbɔghɔ-uduŋ ovu omu enji kpɔ-ou. Onogu ene zon, emu megɔŋ eku vi ɔgɔŋ odi ogemu, emu ma egɔŋ ezighi uzɔ enɔ vi.

13Utuk ku onu, kini sugi omu onji nlie, ku ima ufei, ima ukwughɔ, utɔd-ɔliɔ, ima nsie.

14Onugu ene zon, Abazi ma ɔfɔ-mfɔ ma ovu, sia enwi onu ovu okuh onu edikɨme idizighi uzɔ inɔ vi-ou; onu Abazi ma ozighi uzɔ ɔnɔ vi ku use omu onyi odine ima enen-inen enwi omu egekpa esɔ enji uwem.”

Ukeh Okpɨno Nlie Mbresi

15Kini emu egei onu, onwi gi ku otu onu ima omu egetei ma onyi ku okpogro ɔdɔghɔ Jisɔs ogu, “Enwi omu edilie nlie ku uduŋ Ufɔŋ Abazi edinji okpɨno mfiso!”

16Jisɔs ɔdɔghɔ onyi mbuk omu, “Ini gi ku, onji onwi omu ogoku okpɨno nlie, onyi okuh awak-iwak enwi edi,

17Kini ovid kpɔ ogobɨno osu, onyi ɔdɔŋ oyo-uvɔk izighi aga okuh ima ikie-enwi omu onyi ɔgɔdɔghɔ edi ogu, ‘Edi nlie, ku ebɨno ovid kpɔ egre.’

18Onu ovid emu etɔŋɔ idinɔ nzighi-nzighi ntak omu emu numa edikime ididi. Akpa onwi ɔdɔghɔ onyi ogu, ‘Ŋgunli ukpok izɔŋ, omu anazu ŋga nse. Mbeŋe vi onyime ma omi.’

19Ɔyɔghɔ onwi iba ɔnɔ oyo-uvɔk ogizighi ntak ogu, ‘Kpaŋ-nlieli azaŋa-iba anaŋ-okpo itɨŋ, omi maŋga ididɨme emu nse sughu emu eneuto. Mbeŋe vi onyime ma omi.’

20Ɔyɔghɔ onwi ite ɔdɔghɔ oyo-uvɔk onu ogu, ‘Kpaŋ nlɔ-lɔ ŋwa, ene ku ntak onu, ondikɨme ndi nlie onu-ou. Mbɔk mbeŋe vi onyime ma izɔŋ ntak omi.’

21Oyo-uvɔk onu odizughu ovid-evid kpɔ omu ɔnɔ eti-uvɔk izighi. Ene eti-uvɔk ege eje-ogid ma emu. Onyi ɔdɔghɔ oyo-uvɔk izighi ogu, ‘Wra-wra, wuɔ ga ku ɔkpɔdighi ma ima efak ku uduŋ omu, nɔŋ de ima ufei, ma ukwughɔ, ma nsie di nlie-m.’

22Kini oyo-uvɔk onu ɔyɔŋ-ɔdi, odidɔghɔ onyi ogu, ‘Eti-uvɔk, nne sughu ɔgɔnɔ usi, onu ima ukpɔk mkputei ku ɔsughɔ-sughɔ.’

23Eti-uvɔk ɔdɔghɔ oyo-uvɔk ogu, ‘Wuɔ ga ku ima ikpɨno eke-odighi ma ntak-ɔkɔ, nɔŋ kpak enwi ogu ononu eluk edi nlie, edene uvɔk omi ɔyɨghɔ ma enwi.

24Ku ndɔghɔ evu ŋgu, sugi ku otu enwi onu ŋgu nzaŋa-nji ŋku onu editɔu ŋkilie omi-ou.’”

Ŋkpɔ Omu Ɔdɔŋɔ Ku Idinu Mbed Onu Jisɔs

(Mattiu 10:34-39)

25Use ki, awak-iwak otu enwi egezaŋa ma Jisɔs ku odighi idika Jeruzelem. Onu Onyi eliek onji ose emu ɔdɔghɔ emu ogu,

26“Onogu onwi sugi odi odiluŋɔ idizaŋa ma mi, ima izighi ma mi ana okpo oke ima omu onyi onji ɔnɔ eti izighi ma eke izighi, ma ŋwa ma eyo, ma nyeke izighi nnini ma nyeke mmani, ile ima omu onyi onji ɔnɔ ile-izighi enazu okpo oke ima omu onji ɔnɔ mi-ou, nume enu zon, onyi ekime idinu mbed omi-ou.

27Ŋgo, onogu ovu numa ubeŋile idibei Krɔs ovu, unɔŋ ukpa ku ntak omu ovu onu mbed omi, edinu omi-ile kpɔ inɔ vi idinu mbed omi.

28Onogu ovu ɔluŋɔ idifuɔ uvɔk ɔnyɔŋ. Anazu ovu azaŋanji etei ku izɔŋ atam ene ibad su oditak vi. Man edevak nu ovu ma enji ukime idifuɔ igre.

29Onogu ovu numa une ibad, okiminu odigɔd idio utighe idak-izɔŋ kpɔd-kpɔd, udusɔ ugɔd uka-onji une uto omu ɔsughɔ ku ntak unina ɔkuk, ndien ovid enwi omu edigid ma enɔ vi inue,

30‘Ma edɔghɔ gu, onwi omu ɔgɔtɔŋɔ ufuɔ uvɔk, onu esɔ ekɨme idifuɔ igre-ou.’”

31Se onuŋ uwuɔkpɔ mu, “Onugu ɔfɔŋ, aga idinwɨna ukiɔ ma onuŋ ɔfɔŋ, ana sonyi azaŋa-onji atuak etei ogre. Nonu ku onyi odibire nu emu ma tazin enwi-ukiɔ izighi lughu, ma itu isu idike ɔfɔŋ onyi ogu uluh omu onji tazin enwi ukiɔ edip.

32Onogu ɔfɔŋ onu odivak ku emu iinji ulu isu idikpɨme ile izighi, onyi ma ɔdɔŋ nzuŋ-uto ɔnɔ ɔfɔŋ onyi ogu omu onu ezughe izighi, kini ima ukiɔ ima ogu ezug ebak nsese. Emu ma ebid onyi sughu edine idikpe emem utuk ku ukiɔ otɨbe.

33Ene, su onu ŋgo, onwi ogu ononu ku otu evu omu nu meza ovid-evid su onyi onji eyak, ekɨme idinu mbed omi.”

Unuŋ Omu Numa Enji ufɔ

34Ene Jisɔs ɔdɔghɔ, “Unuŋ onji ufɔ, onu onogu unuŋ numesɔ enji onni-inni izighi, edisɔ inji ufɔ sugi-ou. Enwi ekime ine onyi ɔsɔ onji inem-ou.

35Utɔ unuŋ onu esɔ efɔ ku ukɔ, enɔŋ esɔ efɔ ku odighi, onu enwi iditu onyi iluɔk. Onwi sugi omu su nzughu omu anwaŋa onyi, yak onyi eniŋ-onji akpaŋ-utɔŋ ɔnɔ mi!”

Currently Selected:

Luke 14: ORX

Highlight

Copy