Luke 16

Ukeh Onu Agra-mbubighe Omu Numa Ene Akpanikwɔ

1Ene, Jisɔs ɔsɔ otuh onuŋ ukeh ɔnɔ mbed izighi ogu, “Onji onwi unji ki omu ogonji agra-mbubighe omu ogosekpɔ abaŋa unji izighi. Onu egezughu nsiŋi etuak agra-mbubighe onu inue, ku onyi mɔgu oyip unji onu eti-uvɔk izighi.

2Ene, eti-uvɔk okuh agra-mbubighe izighi ɔnɔŋ ɔdɔghɔ onyi, ogu, ‘Eeni mi ogid ku su ŋgei mbaŋa vi-ou. Dine ibad ovid kpɔ su ovu ene ma unji omi, kuma ovu ukɨme idisɔ-inu agra-mbubighe omi-ou.’

3Ene agra-mbubighe onu ogre ku ile izighi ogu, ‘Eti-uvɔk omi mmɔgodi izighi mi ku uto, nzi su ndine ulagha omu? Oonji ezizi idine uto ukɔ-ou, alagha onji mi ekpeŋ idikpeh enwi ɔkuk.

4Ulagha omu mvak su ndine! Edenu, onogu uto omi egre, ndenji nzizaŋ omu edibei mi idio ku uvɔk.’

5Kini omu agra-mbubighe onu ama egene ogugre izighi onim ubughu ku su onyi odine, onyi okuh ovid enwi omu ega eti-uvɔk izɔŋ, gigi edi. Kini omu emu edi, onyi obid akpa onwi ogu, ‘Saga eti-uvɔk omi ɔkuk ivaŋ?’

6Onwi onu ɔbrɔ onyi, ‘Ŋka udime ara#16:6 Udɨme ara omu ezughu omu ɔluk ɔgbɔ ara iba ku gallon ki tazin iteh ma ikie itiŋaba.’ Ene agra-mbubighe ɔdɔghɔ onyi ogu, ‘Se ibad omu ovu aga onom, tuak tei wra-wra liek wid ɔkpɔ ara tazin ki ma ikie itɨŋate ma aba lughu.’

7Ene, agra-mbubighe onu ɔsɔ ɔbid onuŋ onwi ogu, ‘Saga eti-uvɔk omi ɔkuk ivaŋ?’ Onwi onu ɔbrɔ onyi ogu, ‘Ŋga udɨme mkpogro#16:7 Udɨme mkpogro omu onu kilogram tazin edib.’ Agra-mbubighe ɔdɔghɔ onyi ogu, ‘Se ibad omu ovu aga mu, sɔliek wid udɨme mkpogro tazin evu ma ki.’

8Kini eti-uvɔk egei su oyo uvɔk onu numenu ene akpan-ikwɔ omu onu agra-mbubighe izighi-en ene, onyi eteh onyi, sia ku onyi onji mvuvak idine kpɔ ibaŋa ini onji-onji izighi. Omu ɔwuɔ ku enwi oduobod enekpɔ enji mvuvak ma ile emu eke enwi omu enu ogu unwɨna.”

9Ene Jisɔs aganji ogu, “Onu ndɔghɔ evu ŋgu, ku unji evu eedibak ma evu ku nzi-nzi-ou. Ku ntak-onu, enwam enwi masu evu enji momu ku izɔŋ omu, elagha ede onyi ene nzaŋ. Man kini ogu evu ekpa, numikɨme idisɔ ide unji ine kpɔ, kini evu egazim ku nzi-nzi uduŋ, emu mebak non ididra evu.

10Onwi omu ene akpanikwɔ ku ntiti kpɔ, onyi ŋgo ma ene akpanikwɔ ku okpɨno kpɔ. Onu onogu onwi numene akpanikwɔ ku ntiti kpɔ, onyi ŋgo edigɔd ine akpanikwɔ ku ikpɨno kpɔ-ou.

11Ene, onogu evu numegɔd ine akpanikwɔ ku idise kpɔ ibaŋa unji omu osi oduobod-em, ebak sughu Abazi odiyak ata nnen-nen unji nzinzi idio evu ku ubɔk-ou.

12Onu onogu evu numa ine akpanikwɔ ku idise kpɔ ibaŋa unji onuŋ onwi, ebak odighi omu Abazi odiyak kpɔ sugi idio evu ku ubɔk-ou.

13Ebak oyo-uvɔk sugi omu okɨme idine kpɔ inɔ eti-uvɔk iba mbɔŋ-mbɔŋ-ou; sia onyi ma ɔzɔu ubughu ɔnɔ ki, ɔnɔŋ otu ubughu ma onyi ogu. Ku ukem odighi onu, evu ikɨme idine kpɔ inɔ Abazi ilagha ikɔŋ unji ɔkpɔ ki-ou.”

Ibed, Ima Prɔved, Ma Ugra Abazi

14Onu ima Farisi, omu egenu ima eme ɔkuk egei su Jisɔs ozughu, emu enɔ onyi inue.

15Onu Jisɔs ɔdɔghɔ emu ogu, “Evu enu ima omu ewuɔ ile evu su enu inin-inen enwi, onu Abazi avak ndiɔk ogugre omu ɔdɔŋɔ evu ku ogid. Ŋkpɔ omu enwi eneŋere ebad okpeh-okpeh, onu mbubia-kpɔ ku onji Abazi.

16Ibed onu Mozes masu ima prɔved egewid ɔgɔnɔ evu nde-odighi tutu Jɔhn Ɔluɔk-onwi-mmɔŋ odi kwrɔ edɨghe etu. Onu ulagha omu omi ŋkwrɔ edeghe etu omu abaŋa Ugra Abazi, onu awak-iwak enwi eneŋere etime idinu enwi omu ebak ku Ugra Abazi.

17Onu ulu ibed onu Mozes ekpughɔ-ou, agap omi-ile ɔnyɔŋ ma izɔŋ idifei, oke uyo nsiŋi ki ku ŋwid ibed idikpughɔ.

18Ku uwuɔ-kpɔ, onogu ebi ozighi ŋwa izighi nlɔ, ɔsɔ ɔlɔ onuŋ enwa, onyi ɔluk ulɔ. Ene, onwi sugi ogu ɔsɔlɔ enwa onu ebi ozighi nlɔ onu, ɔluk ulɔ.”

Ukeh Ku Abaŋa Onwi Unji Ma Lazɔrɔs

19Ene, Jisɔs ɔsɔ otuh onuŋ ukeh ɔnɔ emu ogu, “Ogonji onwi unji ki omu agabak omu egetei ɔdɔŋɔ ata idighe ntu-urue useh, alagha elie idighe ŋkilie ovid-evid use ɔnɔŋ etei okuh nlie.

20Onu onji onwi okpe-kpɔ gi, omu egegre Lazɔrɔs, omu nnduh ɔgɔyɔghɔ onyi ovid ile. Ndizuk enwi egetei ebei onyi egenim ku inue-nniŋi-edighi ɔkɔ uvɔk onwi unji onu,

21Onyi ɔluŋɔ iditei ilie mkpukpogho ŋkilie omu ɔlughɔ ku okpogro onwi unji onu. Ene ima abah onwi unji onu etei edilei onyi nduh ku ile.

22Ene ku akpatre, okpe-kpɔ onu odikpa, ima enjel Abazi edibei onyi egete ku ubi ukpɨno ma Abraham. Onwi unji onu ŋgo odikpa, emu ebei onyi egeluɔk.

23Nonu ku ukpɔŋ izighi azaŋa aga uduŋ-ekpu, onyi agabɔghɔ ata uven nonu, onyi ebei onji, ɔnɔŋ ogid Abraham nsese, onu Lazɔrɔs ku etei ku utei ukpɨno adiana onyi.

24Ene, onwi unji onu ebei usi ku ɔnyɔŋ ɔnɔŋ ɔkpɔk, ‘Eti enyin Abraham mbak ku okpɨno uliɔghɔ ku egaŋ omu, mbɔk fei mi isɨghe, nɔŋ dɔŋ Lazɔrɔs odio ubughu unuŋ-ubɔk izighi ku mmɔŋ ebei odi odibid mi elei.’

25Onu Abraham ɔbrɔ onyi ogu, ‘Oyo, tuei ini omu ovu agabak ku uwem, ovu ogogid mfɔ-kpɔ, onu Lazɔrɔs ogogid uven; onu ulagha omu, Lazɔrɔs ku ɔbɔghɔ ndɔŋ-ogid, onu ovu abak ku uven.

26Ku efei ayak onu, Abazi odio okpɨno ukpeh ku uvɔd enyin ma evu, utuk ku onwi sugi efei momu odibine evu nu-onu, onwi sugi ku ŋkaŋ-onu udunuŋ ukɨme idifei ibine enyin momu ŋgo.’

27Onu onwi onu ɔbrɔ Abraham ogu, ‘Ami ŋkpeh vi ubɔk eti enyin, ŋgu ɔdɔŋ Lazɔrɔs aga uvɔk onu eti omi,

28ku onu nji njeke nnini itɨŋ, yak onyi aga ɔdɔd emu utɔŋ ogu emu egibare ogid, utuk ku emu ŋgo egɔŋ edidio ku okpɨno uven omu.’

29Onu Abraham ɔbrɔ onyi ogu, ‘Njuga enji ibed onu Mozes masu ima prɔved egewid enim; yak emu ekuh enɔŋ ekpaŋ utɔŋ elagha egibare ogid.’

30Onu onwi unji onu ɔdɔghɔ ogu, ‘Ihn-ihn, eti enyin Abraham, emu edizughu inim ku akpanikwɔ inɔŋ egibare ogid-ou; onu onogu onwi osi ku uduŋ-ekpu agadɔd emu utɔŋ, emu ma egɨbare ogid.’

31Onu Abraham ɔdɔghɔ onyi ogu, ‘Onogu emu numegei ibed onu Mozes masu ima prɔved egewid enim, enɔŋ ededɔghɔ ku onwi osi ku uduŋ-ekpu agadɔd emu utɔŋ, emu edinim ilagha egibare ogid-ou.’”

Currently Selected:

Luke 16: ORX

Highlight

Copy