Rô-ma 3

1Ywa nan ka ngak mưnuix Yo Thaic hu hanim haget halei? Ngan gruk khao tan hu lingai haget? 2Hu hanim tal abih gah. Dahlau yatha, mưnuix Yo Thaic bihu jao kloh Panôic Pô Lingik. 3Min bruk haget mưjiơng tabiak mưyah hadôm urang dalam thanôn khol nhu ôh dial? Hu njaup gruk ôh dial khol nhu hu ngak ka ôh thunit gruk khik panôic anưd Pô Lingik halei? 4Ôh bik yau nan! Pô Lingik nạn biak, kanê abih drei jang lor kator, yau panôic hu vak:

“Piêh ka Pô bihu pakrưn nạn kahanôt dalam panôic Bhô bican,

Thong jaiyak tuk gok bican inư.”

5Min mưyah gruk tidak adil khol drei sahadah gruk kahanôt anưd Pô Lingik yơ khol drei mưca đôm yau halei? Hu njaup Pô Lingik ôh kahanôt tuk Bhô jrang binhôr dangih di ngok khol drei halei? (Dahlak đôm tui ganap đôm anưd dunya). 6Ôh bik yau nan! Mưyah kaywa yau nan ka ngak habar Pô Lingik bican inư dunya bihu? 7Dok mưyah nhơ di gruk lor kator dahlak bloh tantu Pô Lingik paƀlwak xêh mưlang, yơ habar dahlak dok padok an yau tha urang glaic? 8Yau nan ka habar khol drei ôh “ngak kabha ag piêh hu kabha siam”? — yau tha thanôn mưnuix krung hu đôm palek laic khol dahlak pato yau nan — Khol nhu gok bican inư nạn đang lô.

Ôh hu thei kahanôt

9Ywa nan ka habar? Khol drei hu kabha haget siam hơl halei? Purmưta thoh; kaywa khol dahlak krung hu pakrưn laic abih mưnuix Yo Thaic thong mưnuix Bôl-Lingiu#3:9 mưnuix Yo Thaic... Bôl-Lingiu: Ngan nạn mưnuix Yo Thaic thong mưnuix đôm xap Hi-lap. jang dok ala xagti danuh glaic. 10Yau hu panôic vak:

“Ôh hu tha urang halei kahanôt trah,

Kanê tha urang lijang ôh.

11Ôh hu tha urang halei dul thau,

Ôh hu tha urang halei pachang dwah Pô Lingik.

12Abih jang xuk calah, jang gilaic jiơng ôh hu hanim;

Ôh hu tha urang halei ngak kabha siam,

Kanê tha urang lijang ôh.”

13“Tarakong khol nhu yau tanum pơh hwơng;”

“Khol nhu angui dalah drei piêh palwô pagat;

Bih ula tanbôm padaup di caƀôi khol nhu.”

14“Pabah khol nhu bak dôm panôic dhao thah thong phik plak.”

15“Khol nhu xamar takai piêh ngak hok darah,

16Khol nhu drāk gruk phak pabrai thong raƀi raƀưp,

17Ôh mưda thau ka jalan thug siam.”

18“Ôh hu gruk hôic taka di Pô Lingik anak mưta khol nhu.”

19Khol drei thau laic dôm kabha hakum jakar đôm, nạn đôm ka thei dok ala hakum jakar piêh ka graup pabah jang xang gađang dhit, thong abih dunya jang ciup glaic di anak Pô Lingik; 20#Ga 2:16.Kaywa ôh hu tha urang halei kaywa bruk ngak tui hakum jakar bloh bihu mong yau kahanôt di anak Bhô, kaywa nhơ di hakum jakar mưnuix urang krưn thau danuh glaic.

Gruk Kahanôt Pô Lingik – Mong yau kahanôt kaywa sagar

(3:21 – 5:21)

Gruk kahanôt Pô Lingik

21Min urak ni, gruk kahanôt Pô Lingik krung bihu sahadah di lingiu hakum jakar. Kabha ni krung bihu hakum jakar thong dôm pakat hôr ngak kaxan bloh. 22#Ga 2:16.Nan nạn gruk kahanôt Pô Lingik kaywa sagar pak Pô Yê-su Krist, ka abih drei hu tian dial, ôh krưn thei trah; 23kaywa abih drei jang krung hu tanrok glaic, u lihik xêh mưlang Pô Lingik; 24nhơ di karun hanim Bhô, thong gruk dong tabuh dalam Dê Krist Yê-su, khol nhu bihu mong yau kahanôt bloh ôh hajat biyar tha yom halei. 25Pô Lingik krung hu padang Bhô ngak athur limah tabuh glaic ka dôm urang hu sagar dalam darah Bhô. Bruk ni sahadah gruk kahanôt Pô Lingik, kaywa Bhô mưk tian pamưrat bloh klāk tapa dôm danuh glaic mưng dahlau dêh. 26Urak ni, Bhô lijang xakrưn êng Bhô nạn kahanôt thong mong yau kahanôt ka urang halei hu sagar pak Pô Yê-su.

27Ywa nan ka hu haget piêh mưyeh halei? Ôh hu haget piêh mưyeh trah. Giƀak tamư hakum jakar halei? Hakum jakar anưd bruk ngak kaic? Ôh njaup, min giƀak tamư hakum jakar anưd sagar. 28Kaywa khol drei dial laic tha urang bihu mong yau kahanôt kaywa sagar mih ôh njaup di bruk ngak tui hakum jakar. 29Njaup kaic Pô Lingik ciêt nạn Pô Lingik bôl Yo Thaic min? Ôh njaup Bhô lijang nạn Pô Lingik mưnuix Bôl-Lingiu gêk ô? Njaup, Bhô lijang nạn Pô Lingik mưnuix Bôl-Lingiu gêk; 30#Ga 3:20.kaywa Pô Lingik nạn tha, nạn Dê mưca ngak ka mưnuix ciup khao tan bihu mong yau kahanôt kaywa sagar, lijang ngak ka mưnuix ôh ciup khao tan bihu mong yau kahanôt kaywa sagar gêk. 31Yau nan, khol drei kaywa sagar, bloh klāk lôi hakum jakar nan habar? Kloh yom yau nan! Gilaic vơk, khol drei ngak khang kajap hakum jakar.

Currently Selected:

Rô-ma 3: CJM2024

Highlight

Copy