II Kô-rinh-tô 2

1Bei nei, hei rwach 'bưn plơq kươi nhjook jah lơh oh bi chhong rmlơng. 2Đươm mơq hei lơh aan oh bi chhong rmlơng, nei 'bơơn laa bnih lơh aan hei broh, mơq 'bưn geh laa bơl bnih hei ja lơh chhong rmlơng? 3Hei ja 'bian aan oh bi bei nei, jah tơt lôh nhjook, hei a kươi 'bưn chhong rmlơng đươm nơơm bơl bnih dip jah phrui lơh aan hei broh. Đươm hei jơ rap laah leq sêch oh bi kot pơih baak broh hei ri lơh baak broh aan oh bi ri. 4Tơt 'bian aan oh bi, chưt hei ji kôr, ơt uôl u daak mat hoor bêêng rlaai; nei geh lah jah lơh aan oh bi chhong rmlơng, dôh jah oh bi gưt laah srlanh hei ri teq u oh bi prêh jru bei êch.

Ta krôih bnih dôih

5Mơq bnih êch lơh aan chhong rmlơng, bnih nei 'bưn dơơn lơh chhong rmlơng aan hei, baah knông di lnhơơn êch nei — 'bưn ir baak laang — ja lơh chhong rmlơng aan leq sêch oh bi. 6Bnih nei ja dol ơk nak oh bi bu ja sngaanh phaat bei nei laa sơp hôm. 7Dôh bei au, oh bi phrui ta krôih u nđum nđiêng bnih nei huôih, jah bnih nei 'bưn dol trơp jlơp knông baak chhong rmlơng đat ir. 8Bei nei, hei dan jjuh oh bi phrui tơrsau chưt srlanh teq u bnih nei. 9A doong hei 'bian aan oh bi, laa jah tuul mơq oh bi geh iat baak knông jôm kaar 'bưn. 10Dôh oh bi ta krôih aan 'bơơn nei hei kot ta krôih. Nha mơq hei ta krôih ntil ơơn nei kot đươm oh bi baah ta krôih a di mat Yaang Krist, 11jah Sa-tan 'bưn lêch luung bơl bơn kươt, đươm bơl bơn 'bưn êêng ơơn pal sơap bu ri.

Chhơm Yaang Krist ri

12Khal hei tơt poh Trô-ach jah chhuôr Baak Sroong Klanh Yaang Krist ri, paich Brah ja pơơk lpôông aan hei tu nei, 13dôh hei 'bưn sroong chưt đươm 'bưn a mơp kươt Tit, bnih oh bi hei ri. Bei nei, hei ja lơơi bơl bnih a nei jah rlach Ma-sê-đô-ni-a.#Kênh 20:1.

14Dôh or Brah Ưn, laa Yaang yoot liêu bôôk bơl hei knông troong han jn'ah knông Yaang Krist; u rlach bơl hei, Pang lơh aan daak chhơm teq u baak gưt jhai Pang a pơk jôm ktôk. 15Đươm bơl hei laa daak chhơm Yaang Krist ri piyơ aan Brah Ưn, lwah bơl bnih kươt đoh kwaai u bơl bah khuich saap. 16Teq u bơl bnih dol khuich saap, bơl hei laa nh'ap baak chhưt, liêu tơt baak chhưt; teq u bơl bnih kươt đoh kwaai, bơl hei laa chhơm baak rêh, liêu tơt baak rêh. 'Bơơn laa bnih sơp lpat lơh pal kaar au? 17Đươm, bơl hei 'bưn tach brôw baak Brah Ưn bei ơk bnih nday. Dôh laa bnih kươt Brah Ưn maanh, bơl hei chhuôr di ndroong ngan nguôn knông Yaang Krist, di mat Brah Ưn.

Currently Selected:

II Kô-rinh-tô 2: SBL2024

Highlight

Copy