II Kô-rinh-tô 3

Kaar pơrnơn mhei ri u kaar pơrnơn ndơm ri

1Geh lah bơl hei leet ptơơm lơơk prêh nơơm 'bưn? Paich bei m'baak bnih nday, bơl hei chkhôm geh khaak tơrsau mat n'hai oh bi, paich khaak oh bi tơrsau mat bơl hei pan? 2Nơơm oh bi laa khaak tơrsau mat bơl hei ri, kươt 'bian knông chưt bơl hei, kươt jôm bnih gưt u chôôl. 3Srlah srlom ngan oh bi laa plơơp khaak Yaang Krist ri, kươt 'bian đươm kaar bơl hei ri, 'bưn geh 'bian n'hai mưk baah drơơl Brah Wêêng Brah Ưn ri rêh yoot; 'bưn geh 'bian lơ pal kơđaar tmau baah 'bian lơ pal kơđaar chưt koon bnih ri.

4Chkhôm Yaang Krist, bơl hei jơ jap bei nei teq u Brah Ưn. 5'Bưn geh bơl hei geh ttih jhai jah gênh laah nơơm awap lơh kươt ơơn, dôh ttih jhai bơl hei ri lôh a Brah Ưn. 6Nơơm Pang ja ươn bơl hei lpat jraih kaar pơrnơn mhei, 'bưn geh pơrnơn n'hai sêr 'bian,#3:6 pơrnơn n'hai sêr 'bian: Mor ot ch'bap Môi-se. baah laa pơrnơn knông Brah Wêêng, đươm sêr ner liêu leet baak chhưt, dôh Brah Wêêng ươn baak rêh.

7Đươm, mơq kaar liêu tơt baak chhưt, kươt chreh sêr lơ pal kơđaar tmau baah nha tơt knông chring chraang, lơh koon raih I-sra-ên 'bưn geh mơq mat Môi-se kươt, đươm aang a chraq lơ mat bu, paich laa aang a chraq gway rlach, 8nei kaar Brah Wêêng ri leet 'bưn tơt knông chring chraang prêh huôih laang? 9Đươm mơq kaar liêu tơt baak pơrkat baah nha kươt chring chraang, nei kaar liêu tơt baak sêch song leet dươn chring chraang huôih gưt pal êch! 10Ngan bei nei, knông ndroong au, ntil ja kươt chring chraang a kươi 'bưn nh'hơơm chring chraang ơơn hôm noor baak chring chraang hao rlach au. 11Đươm mơq ntil gway rlach nha geh kươt chring chraang nei ntil nh'hơơm leet dươn kươt chring chraang huôih gưt pal êch!

Knat krup lơ Pơrnơn ndơm

12Đươm geh baak kơndưng bei nei, mơ bơl hei khwaan đat, 13'bưn bei Môi-se, pơih knat kơndơp mat nơơm jah koon raih I-sra-ên 'bưn sau baak ptut aang a chraq gway luôch. 14Dôh chưt bu nha kraam, đươm aan tơt nar au, khal bu chôôl Pơrnơn Ndơm, plơơp knat nei nha ndah prap rlach bu; đươm dơơn knông Yaang Krist, plơơp knat nei mhei kươt prap teq. 15Ngan bei nei, aan tơt nar au, jôm wưt iat chôôl sm'bưt Môi-se nei plơơp knat leet km'bang chưt bu. 16Dôh tơt mbu bnih plơq kươi n'hai Brah, nei knat nei kươt prap teq. 17Brah laa Brah Wêêng, ktôk êch geh Brah Wêêng Brah ri, ktôk nei geh snôk sroong. 18Leq sêch bơl bơn kot teq mat lưn trôông chring chraang Brah, kươt tơh gơl but bei ruup gui Pang, chring chraang tơt chring chraang; đươm ntil au lôh a Brah laa Brah Wêêng.

Currently Selected:

II Kô-rinh-tô 3: SBL2024

Highlight

Copy