II Kô-rinh-tô 1
1
Baak chah nhjook
1Phao-lô, đươm rnđêch Brah Ưn kươt lơh jơt jơng Yaang Jê-sus Krist ri, u Ti-mô-thê oh bi bơl bơn, dan piyơ Phung Jrah Brah Ưn ri a Kô-rinh-tô, pôl n'hai leq sêch koon sơih a jôm kwaal A-chai.#Kênh 18:1. 2R'bon dan Brah Ưn, Bươp bơl bơn, u Brah laa Brah Jê-sus Krist ươn brêêng smlaang u sroong boong aan oh bi.
I. Chhuôr kơơi kaar brnơ jơt jơng
(1:3 – 7:16)
Baak or gun
3Tư wơơl Brah Ưn, Bươp bơl bơn laa Brah Jê-sus Krist, lah Bươp l'ưt lmư u Brah Ưn ơp ntil nđum nđiêng ri. 4Pang nđum nđiêng bơl hei knông jôm r'baak, jah bơl hei awap nhôq baak nđum nđiêng pa Brah Ưn ja nđum nđiêng bơl hei jah nđum nđiêng bơl bnih nday paich knông r'baak ơơn bu a mơp! 5Đươm bei baak ji kôr Yaang Krist ri bêêng rlaai knông bơl hei bei êch, nei chkhôm Yaang Krist pa baak nđum nđiêng bơl hei kot bêêng rlaai bei nei. 6Mơq bơl hei dol r'baak, nei laa jah oh bi kươt nđum nđiêng u kươt đoh kwaai; paich mơq bơl hei kươt nđum nđiêng, nei laa oh bi kươt nđum nđiêng, lah baak nđum nđiêng baah oh bi ơk grnưt kươt tơt ơt ơl pndol pal ji kôr pa oh bi ja dol. 7Baak kơndưng bơl hei ri ktôk oh bi jap juôn ngan, đươm gưt laah tơt oh bi joq dơơn knông baak ji kôr bơl hei ri nei a kươi kot kươt joq dơơn knông baak nđum nđiêng bơl hei ri.
8Ơi oh bi, hei 'bưn êch oh bi 'bưn gưt pal r'baak pa bơl hei ja rlach tu A-si-a. Bơl hei dol ơt ơl đat ir, leq kmlang pndol, lôh aan 'bưn nh'hơơm kơndưng rêh.#I Kô 15:32. 9Bơl hei mơq sau bei chhak nơơm ja phrui pơih pơrkat jah lưm chhưt; dôh ntil au ja lơh bơl hei 'bưn nha chkhôm teq u chhak nơơm hôm, baah chkhôm lơ Brah Ưn, Yaang lơh bah chhưt rêh kươi. 10Nơơm Pang ja đoh chloong bơl hei rlach baak chhưt ring sm'baang#1:10 baak chhưt ring sm'baang: Knông m'baak plơơp 'bian ti lah pal r'baak rngiêl chhưt bnih. bei nei; Pang ja đoh chloong bơl hei, u bơl hei kơndưng Pang a kươi ndih đoh chloong bơl hei. 11Oh bi kot phrui ta jraih bơl hei dơng baak r'bon dan, jah chkhôm baak r'bon dan ơk bnih ri baah bơl hei pơih kươt 'bun; u rlach nei, ơk bnih a kươi đươm bơl hei baah piyơ baak or gun.
Chưt ngan kaar Phao-lô ri
12Ntil lơh aan bơl hei ha uôt, nei laa chưt nuih bơl hei lơh ndraanh laah bơl hei pơih baak spong#1:12 spong: Knông m'baak plơơp 'bian ti lah sêch jrah. n'hai book aang a Brah Ưn baah gôq rêh knông swich teh au, đat lah teq u oh bi. Bơl hei 'bưn chkhôm teq u baak jhai rpech pêêk pai ri, dôh chkhôm brêêng smlaang Brah Ưn ri. 13Đươm bơl hei 'bưn 'bian aan oh bi ntil ơơn êêng huôih pal ntil oh bi awap chôôl u gưt. Hei kơndưng laah oh bi a kươi gưt srlah srlom. 14Bei oh bi ja gưt bơl hei pak êch: Bơl hei laa baak a uôt oh bi ri, kot bei oh bi lah baak a uôt bơl hei ri knông nar Brah bơl bơn laa Brah Jê-sus.
Rơ kheet Phao-lô ndah tơt Kô-rinh-tô
15N'hai baak jơ rap nei, hei êch lôh nhjook oh bi noor, jah oh bi pơih kươt smlaang huôih dơq. 16Hei êch lôh nhjook oh bi lơ troong lôh Ma-sê-đô-ni-a; ja nei a Ma-sê-đô-ni-a plơq kươi ktôk oh bi, u chkhôm oh bi ndơơp hei tơt Ju-đê.#Kênh 19:21. 17Geh lah hei ndrơơi tơt joq gênh bei nei đêêl? Paich laa hei ja rwach tênh pêêk pai, lôh lơh plah nei mor “Geh” plah nei mor “'Bưn” pan? 18Ngan, bei Brah Ưn laa pleh tur, baak bơl hei mor n'hai oh bi 'bưn geh jơl nei “Geh” jơl nei “'Bưn” laang. 19Đươm Brah Jê-sus Krist, Koon Brah Ưn, Yaang pa bơl hei laa Sin-wanh, Ti-mô-thê u hei ja chhuôr lwah oh bi, 'bưn geh jơl mor nei “Geh” jơl nei mor “'Bưn” laang, dôh knông Pang nei “Geh” nggan nggan.#Kênh 18:5. 20Đươm knông Pang, leq sêch jôm baak pơn Brah Ưn ri kot laa “Geh”. Đươm nei, kot đươm Pang baah bơl bơn kot mor “A-men” jah tư wơơl Brah Ưn. 21Nơơm Brah Ưn, Yaang ja lơh aan leq bơl hei u oh bi jap juôn knông Yaang Krist, ja lơơm pring aan bơl hei. 22Pang kot ja tơn traq Pang lơ bơl bơn, u ươn Brah Wêêng Pang ri lap nuih bơl bơn jah lơh griêng ndraanh.
23Hei r'bon dan Brah Ưn lơh ndraanh aan wêêng yaang hei laah, đươm đing oh bi mơ hei ndah tơt Kô-rinh-tô. 24'Bưn geh bơl hei êch kơlbach chưt jơrnơ oh bi, dôh bơl hei êch ta kơldơk baak broh aan oh bi, đươm oh bi ta yoong khưng knông chưt jơrnơ.
Currently Selected:
II Kô-rinh-tô 1: SBL2024
Highlight
Share
Copy
Want to have your highlights saved across all your devices? Sign up or sign in
© 2024 Bible Society Vietnam. All rights reserved.
