I Kô-rinh-tô 10

Baak riên krung kn'hing a raih I-sra-ên

1Ơi oh bi, hei 'bưn êch oh bi 'bưn gưt laah leq sêch yau yi bơl bơn kot ja kươt gôq a teh nduq; leq sêch kot kươt chloong rlach daak rmưt; 2leq sêch kot kươt bap-tem knông nduq u knông daak rmưt jah tênh Môi-se; 3leq sêch pôl sa mlơm griêng sa wêêng brlơng; 4leq sêch pôl ôn mlơm daak ôn wêêng brlơng; đươm bu ôn di ktôk tmau wêêng brlơng han n'hai bu; tmau nei a ngan laa Yaang Krist. 5Paich bei nei, nha ơk knông nak bu 'bưn klanh chưt Brah Ưn mơ a kơq chhưt knông trenh sngat. 6Leq sêch pal ntil au ja lôh tơt bei di baak pơrjat aan bơl bơn, jah bơl bơn 'bưn gơơ tênh ntil m'oh n'haan ap than bei bơl yau yi. 7Kot khơơm chuh pơsun bei m'baak bnih knông bu, bei baak ja 'bian:

“Raih bu gôq kươi sôông sa,

Ja nei ta yoong njroh rơm.”

8Bơl bơn khơơm jrôq jrơm bei m'baak bnih knông bu, jah dơơn knông di nar geh baar jơt pei ban bnih a kơq. 9Kot khơơm tuul loong Yaang Krist#10:9 Yaang Krist: Knông m'baak plơơp 'bian ti lah Brah. bei m'baak bnih knông bu, jah ja nei dol pai bêh kluôch. 10U kot khơơm l'oong l'eeng bei m'baak bnih knông bu, jah phrui chhưt đươm lênh brah kluôch.

11Leq sêch pal ntil au lôh tơt aan bu bei mlơm baak riên, u kươt 'bian kươi jah pơrjat bơl bơn laa bơl bnih nha rêh a ptut pal klap au. 12Bei nei mơ, 'bơơn kơn ơơn bơn ta yoong, phrui ơn daq a kơq. 13Pal tuul loong lôh u oh bi, 'bưn geh ntil êch huôih ir kmlang koon bnih. Brah Ưn laa Yaang pleh tur, Pang 'bưn teq oh bi dol tuul loong huôih ir kmlang nơơm laang! Dôh knông tuul loong, Pang a kươi pơơk troong aan sot rlach, jah oh bi awap dol kươt.

Bliêng r'bưn Brah ri ta wal n'hai bliêng r'bưn bnih agaih baak jơ ri

14Bei nei, ơi oh bi êch srlanh, phrui het ngngai kaar chuh pơsun. 15Hei mor n'hai oh bi bei mor n'hai bơl bnih jhai blau; oh bi phrui mơq êêng gênh ntil hei mor. 16Tgaan smlaang pa bơl bơn or 'bưn dip laa joq dơơn knông mhaam Yaang Krist ri laang?#Mat 26:26-28; Mak 14:22-24; Lu 22:19-20. Nom pa bơl bơn pak 'bưn dip laa joq dơơn knông chhak Yaang Krist ri laang? 17Đươm dơơn geh di mlơm nom, u leq sêch bơl bơn pôl ta toon nom nei, mơ bơl bơn paich ơk kot dơơn laa mlơm chhak jan. 18Phrui mơq raih I-sra-ên tênh chhei sak: 'Bưn geh bơl bnih sa pai thwaai ja joq dơơn n'hai bliêng r'bưn nei laang? 19Hei mor bei nei geh rnđêch ơơn? Griêng kwaai pơsun geh thlay ơơn, paich laa pơsun geh pi ơơn 'bưn? 20'Bưn pi ơơn leq! Ntil ơơn bnih 'bưn jơ kwaai laa kwaai bơl chaak, 'bưn geh lah piyơ aan Brah Ưn. Bei nei, hei 'bưn êch oh bi joq dơơn n'hai bơl chaak. 21Oh bi 'bưn kươt ôn tgaan Brah ri u kot ôn tgaan bơl chaak ri. Oh bi 'bưn kươt joq sa griêng Brah ri u kot joq sa griêng bơl chaak ri. 22Paich bơl bơn êch lơh aan Brah phrui graang? Bơl bơn kơndang huôih Pang neh?

Kơrnan kaar joq jraih bnih lhok lhơơi

23“Ơp ntil kot kươt ch'bap lơh,” dôh 'bưn geh ơp ntil kot geh thlay. “Ơp ntil kot kươt ch'bap lơh,” dôh 'bưn geh ơp ntil kot ta kơldơk.#I Kô 6:12. 24Khơơm 'bơơn wơng thlay êêng aan nơơm, baah phrui wơng thlay aan bnih nday. 25Leq sêch ntil ơơn tach a pơsaar pai, oh bi khang sa, khơơm đươm chưt nuih baah rkhech; 26đươm “play teh u jôm griêng dơơm knông nei kot pơơn teq u Brah.” 27Mơq geh bnih 'bưn jơ Brah siêr oh bi, u oh bi êch han nei khang sa leq sêch ntil ơơn bu riêp, khơơm đươm chưt nuih baah rkhech. 28Dôh, mơq geh 'bơơn mor n'hai oh bi laah: “Griêng au ja kwaai” nei khơơm sa, đươm bnih nei ja mbơh baak aan oh bi u đươm chưt nuih nha. 29Hei 'bưn mor teq u chưt nuih oh bi, dôh teq u chưt nuih bnih nei. Đươm a hay baak snôk sroong hei ri leet dol chưt nuih bơl nday pơrkat? 30Mơq hei or ja nei sa a hay hei leet dol sngaanh teq u waal sa pa hei ja or? 31Bei nei, oh bi paich sa, paich ôn, paich lơh jôm kaar ơơn đôôi, phrui lơh leq sêch đươm chring chraang Brah Ưn ri. 32Khơơm root baak trơnih aan bnih Jo-thai, paich laa bnih Hi-lap, paich laa Phung Jrah Brah Ưn ri. 33Phrui bei hei, pơrkhom lơh klanh chưt jôm bnih knông jôm kaar, 'bưn wơng thlay êêng aan nơơm, dôh aan ơk bnih jah bu awap kươt đoh.

Currently Selected:

I Kô-rinh-tô 10: SBL2024

Highlight

Copy