I Kô-rinh-tô 9

Preh r'bup jơt jơng ri

1Hei 'bưn kươt snôk sroong laang? Hei 'bưn geh laa jơt jơng laang? Hei kot ja 'bưn sau Brah Jê-sus, Brah bơl bơn laang? Oh bi 'bưn geh laa play kao hei ri knông Brah laang? 2Mơq hei 'bưn geh laa jơt jơng teq u bnih nday nei ndêq nha kot laa jơt jơng teq u oh bi; đươm oh bi laa tơrnêl teq u kaar jơt jơng hei ri knông Brah. 3Au laa baak koh roong hei ri jah dol kươi bơl bah lah waanh hei. 4Geh lah bơl hei 'bưn geh ch'bap sa, ôn laang? 5Geh lah bơl hei 'bưn geh ch'bap liêu pôl sai ur jơ Brah knông pal wưt han, bei bơl jơt jơng nday, kot bei pal oh Brah ri u Sê-pha laang? 6Paich dơơn geh hei u Ba-na-ba laa 'bưn geh ch'bap kươt khơơm lơh kaar joi sa laang? 7Geh 'bơơn sa prak khay nhi baah han pơm kmang pan? Geh 'bơơn tam mir nho baah 'bưn sa play? Paich geh 'bơơn gwaal phung pai siêm baah 'bưn pơih daak beq bu ri pan? 8Hei mor bei nei, geh dip laa tênh ndroong bnih swich teh 'bưn? Ch'bap kot 'bưn mor bei nei laang? 9Đươm ch'bap Môi-se geh 'bian:

“Khơơm kơldêp wiêm pi gôw plah tơl ba.”

Geh lah Brah Ưn gênh aan gôw sa 'bưn? 10Paich đươm bơl bơn baah Pang mor ntil nei? Dip laa đươm bơl bơn baah geh baak nei; đươm bnih chuôr phrui chuôr n'hai kơndưng, bnih prah ba phrui prah ba n'hai kơndưng kươt toon. 11Mơq bơl hei ja siêm pal ntil wêêng brlơng lwah oh bi, nei kaar kach kươt griêng mlơ a oh bi laa kaar huôih ir laang?#Rô 15:27. 12Mơq bơl bnih nday nha geh ch'bap nei lơ oh bi, huôih ơơn laa bơl hei? Paich bei nei, bơl hei 'bưn nhôq ch'bap au; dôh bơl hei pndol jôm baak, jah 'bưn rook a kaang aan Baak Sroong Klanh Yaang Krist ri. 13Oh bi 'bưn gưt laah, nha 'bơơn gênh kaar nhi r'bưn nei sa griêng piyơ knông nhi r'bưn ri, nha 'bơơn gênh kaar bliêng r'bưn nei geh griêng ktôk bliêng r'bưn laang? 14Kot bei nei, Brah geh mbơh laah 'bơơn chhuôr Baak Sroong Klanh nei kươt siêm rêh đươm Baak Sroong Klanh.#Mat 10:10; Lu 10:7.

Pal ntil baak Phao-lô teq lơi

15Dôh hei 'bưn rnhôq ch'bap nei, kot 'bưn 'bian khaak au jah ôp ch'bap nei; đươm hei n'hop n'hal chhưt nha huôih jah aan paich 'bơơn piit hin saap baak a uôt au. 16Mơq hei chhuôr Baak Sroong Klanh, hei 'bưn geh pi ơơn jah a uôt, đươm hei dol ayơơt phrui lơh bei nei; dôh, mơq hei 'bưn chhuôr Baak Sroong Klanh nei kro rngiêl ngan aan hei. 17Mơq hei êch lơh êêng kaar au nei kươt kôm; nha mơq 'bưn êch lơh êêng, kaar kot junh ndơơp aan hei. 18Nei mơ tkôm hei ri laa pi ơơn? Nei laa tơt chhuôr Baak Sroong Klanh, hei chhuôr rơi, 'bưn dan preh r'bup ơơn bnih chhuôr Baak Sroong Klanh ri.

19Paich laah n'hai jôm bnih, hei laa bnih snôk sroong, dôh hei ja but dêch aan jôm bnih jah awap khuôl duôn top ơk bnih. 20N'hai bnih Jo-thai, hei but bei bnih Jo-thai jah khuôl duôn kươt bnih Jo-thai. N'hai bơl bnih a teh ch'bap — paich nơơm hei 'bưn gôq a teh ch'bap — hei but bei mbu bnih a teh ch'bap awap jah khuôl duôn bơl bnih a teh ch'bap. 21N'hai bơl bnih 'bưn geh ch'bap — paich teq n'hai Brah Ưn, hei 'bưn dơơn 'bưn geh ch'bap, đươm hei a teh ch'bap Yaang Krist ri — hei but bei mbu bnih 'bưn ch'bap awap jah khuôl duôn bơl bnih 'bưn geh ch'bap. 22N'hai bơl bnih lhok lhơơi, hei but bei mbu bnih lhok lhơơi awap jah khuôl duôn bơl bnih lhok lhơơi. Hei ja but sơp ndroong aan jôm bnih awap jah koh kươt pal du, 'bưn gưt ndroong êch. 23Hei lơh jôm baak đươm Baak Sroong Klanh awap jah pôl ta toon smlaang Baak Sroong Klanh ri.

24Oh bi 'bưn gưt laah knông kaar tatul mprang a troong, leq sêch kot tuôt dôh dơơn geh mbu bnih pơih kươt tkôm laang? Bei nei, phrui tuôt bei êch jah oh bi pơih kươt tkôm. 25Leq sêch bơl bnih ta prang phrui pơrjat êêng knông jôm baak. Bu dol bei nei jah kươt môôk kao rnđơơih saap. Dôh bơl bơn dol bei nei jah kươt môôk kao 'bưn saap. 26Kot bei nei, hei tuôt, 'bưn geh laa tuôt 'bưn ndroong; hei pơm, 'bưn geh laa pơm mưt u chaal. 27Dôh hei bor chhak jan hei ndroong pơrjat, nhôp bu phrui chôh, ach laah di kươi hei chhuôr kne aan bnih nday, baah nơơm na leet dol dhot lơơi pan.

Currently Selected:

I Kô-rinh-tô 9: SBL2024

Highlight

Copy