I Kô-rinh-tô 11

1Phrui tênh ryơơng hei, bei nơơm hei tênh ryơơng Yaang Krist bei nei.#I Kô 4:16; Phil 3:17.

IV. Pal kaar troop tơt baak chuh th'bưn

(11:2 – 14:40)

Baak kaar khôw tao ao soh dơur ri knông jơl pơrgum

2Hei tư oh bi đươm ja gênh tơt hei knông jôm baak, u tơt tưt tơt bôl pơrkhom pal ndroong ndơm hei ja kne aan oh bi. 3Paich bei nei, hei êch oh bi gưt laah: Yaang Krist laa bôôk bnih klau ri, bnih klau laa bôôk bnih dơur ri, u Brah Ưn laa bôôk Yaang Krist ri. 4Paich bnih klau êch r'bon dan paich mor grnưt noor baah krup bôôk leet nei lơh pnjrơm bôôk nơơm. 5Dôh, paich bnih dơur êch r'bon dan paich mor grnưt noor baah 'bưn krup bôôk nei lơh pnjrơm bôôk nơơm — bei bnih nei dol kaat bôôk bei nei. 6Mơq bnih dơur 'bưn krup bôôk nei phrui kat chhok ơơi. Dôh mơq bnih dơur mơq kaar grach chhok paich kaat bôôk laa prêêng mat nei phrui krup bôôk kươi!

7Bnih klau laa ruup gui u chring chraang Brah Ưn ri mơ 'bưn kươt krup bôôk; dôh bnih dơur laa chring chraang bnih klau ri. 8Đươm bnih klau 'bưn kươt tơmbut a bnih dơur, dôh bnih dơur lôh a bnih klau. 9Bnih klau kot 'bưn kươt tơmbut đươm dơur, dôh bnih dơur đươm bnih klau. 10Đươm nei, bơl lênh brah, bnih dơur phrui ndau lơ bôôk chmlih chmleek ch'bap kmheng ri. 11Đươm bei nei, knông Brah nei 'bưn geh dơur êêng lngat n'hai klau, paich klau êêng lngat n'hai dơur. 12Đươm bei bnih dơur kươt tơmbut a bnih klau, nei kot bei nei, bnih klau đươm bnih dơur lgơơch; u ơp ntil kot lôh a Brah Ưn.

13Oh bi phrui khom gênh êêng, kaar bnih dơur r'bon dan n'hai Brah Ưn baah 'bưn krup bôôk nei geh tưt 'bưn? 14'Bưn geh chưt kmlơt ơơm êêng kne oh bi gưt laah bnih klau teq chhok joong nei dip jah prêêng mat, 15nha bnih dơur teq chhok joong nei leet laa baak a uôt bu ri laang? Đươm chhok joong kươt ươn bu bei mlơm kma krup. 16Mơq geh 'bơơn êch ta rmhanh nei tôw 'bưn geh laa rnđơơih bơl hei ri; pal Phung Jrah Brah Ưn ri kot 'bưn geh rnđơơih nei nha.

Waal sa srlanh u Sa Griêng Jrah

17Nha teq u pal baak tti kne di kươi au, hei 'bưn geh tư oh bi, đươm baak ta pơrgum oh bi ri 'bưn liêu ntil klanh huôih baah nha jrơơk huôih. 18Noor leq, hei ttang laah, jơl pơrgum kươi knông Phung Jrah nei oh bi geh baak pơrlang khach; hei jơ ntil au geh pak dip. 19Kaar kơrleek knông oh bi nei ngan 'bưn geh nggich nggưl ơơn hôm, dôh geh bei nei mơ pơih gưt srlah 'bơơn laa bnih ngan nguôn. 20Tơt oh bi ta pơrgum kươi 'bưn geh laa jah joq Sa Griêng Jrah Brah ri hôm. 21Đươm plah oh bi sa, 'bơơn na kot dil daal sa waal êêng nơơm ri, lôh aan bnih au nei nh'hit, nha bơl tôw nei hơơm bơm. 22Oh bi 'bưn geh nhi êêng jah sôông sa laang? Paich laa oh bi gươm đam Phung Jrah Brah Ưn ri, n'hai đam điêl bơl bnih khwaq khwaat? Hei phrui mor ơơn u oh bi au? Geh kươt tư oh bi knông kaar au pan? 'Bưn, hei 'bưn tư laang!

23Đươm hei geh pơih a Brah ntil hei ja kne aan oh bi: Nei laa knông mang Brah laa Brah Jê-sus dol ndun nhôp, Pang pơih nom, 24or, ja nei pak u lah laah: “Au laa chhak jan Hei đươm bơl 'bei baah ndơơp chhak aan,#11:24 Au laa... baah ndơơp chhak aan: Knông m'baak plơơp 'bian ti lah Au lah chhak jan Hei aan bơl 'bei; Knông m'baak plơơp 'bian ti lah Au lah chhak jan Hei đươm bơl 'bei baah hach. phrui lơh ntil au jah gênh tơt Hei.” 25Pôl di ndroong nei, di kươi sôông sa mang hơơi, Pang nhôq tgaan u lah laah: “Tgaan au laa pơrnơn mhei knông mhaam Hei; khal êch bơl 'bei ôn, phrui lơh ntil au jah gênh tơt Hei.” 26Bei nei, kơơp wưt oh bi sa nom au, ôn tgaan au nei chhuôr baak chhưt Brah ri aan tơt jơl Pang lôh. 27Nei mơ, mơq 'bơơn sa nom, ôn tgaan Brah ri ndroong 'bưn dip klanh nei a kươi ayơơt dôih n'hai chhak u mhaam Brah ri. 28Bei nei, jôm bnih phrui pơrkat êêng chhak nơơm ja nei mơ sa nom, ôn tgaan au. 29Đươm bnih êch 'bưn chưrleek chhak Brah baah sa nom, ôn tgaan au nei laa sa ôn baak pơrkat aan nơơm bơn. 30Đươm rơ kheet nei baah knông oh bi geh ơk bnih tanh ji, kơrmi ap sak u geh ơk bnih chhưt. 31Mơq bơl bơn pơrkat êêng nơơm nei a kươi 'bưn dol pơrkat. 32Dôh tơt Brah pơrkat, Pang iêl phaat bơl bơn jah bơl bơn 'bưn dol pơrkat pôl n'hai swich teh. 33Nei mơ, ơi oh bi hei ri, plah oh bi pơrgum kươi jah sa pôl ta n'hai, phrui cham ta pôl. 34Mơq geh 'bơơn nh'hit, phrui sôông a nhi, jah kaar ta pơrgum oh bi ri 'bưn nhôq pơih baak pơrkat.

Nha pal kaar nday, tơt hei lôh a kươi waat paan.

Currently Selected:

I Kô-rinh-tô 11: SBL2024

Highlight

Copy