Lukas 11

Yexus Qha Txug Keb Thob Vaajtswb

1Muaj is zag Yexus muz thob Vaajtswb qhais is qhob chia. Thaws niz thob Vaajtswb taaz liad, niz is tug thwjtid luz has tu niz tas, “Tuz Tswb, thob koj qha kuas pes paws thob Vaajtswb is yaad ni Yawhaas qha niz cob thwjtid liad.”

2Yexus has tu niz cob thwjtid has tas, “Thaws mej thob Vaajtswb, mej has ni na:

Leej Vaid:

‘Thob kuas tuadtxhij fwd koj lus npe;

thob koj luz teschias taw luz.

3Thob koj naj hnoos pus mo tu pes noj.#11.3 naj hnoos pus mo tu pes noj; lossis pus mo tu hnoos todntej.

4Thob koj zaad txid tu pes,

tu qhob pes ted zaad txid tu tuadtxhij kwg ua txhud tu pes liad.

Thob tsi xod ca tej keb sid sas ntxaz taw pes.’ ”

5Has Yexus has tu niz cob thwjtid has tas, “Thaws is taaz hmo, yog mej cob muaj is tug muz tu tod niz tuz phoojywz tseb has thob has tas, ‘Phoojywz, thob txais koj pes lus ncuab tu kud. 6Tu qhob kud tuz phoojywz kua keb tuaj su hub kud tseb, kud tsi muaj mo tu niz noj!’ 7Yog tuz phoojywz kwg nyos hub tseb tes has tas, ‘Tsi xod tuaj plhob kud! Kud ted laaz qhob rooj, kud has kud cob minyuas ted pw taaz liad. Kud yiad tsi siab muz muas mo tu koj.’ 8Yog ni qhai, kud qha tu mej has tas, txiad yog ostug yog phoojywz zoo npawd nyaab los niz yiad tsi siab muz muas mo tu niz tuz phoojywz, tadsis vid qhob kwg niz tuz phoojywz pheej thob tsi paws thwstxaaj ni. Niz yiad taw muz muas tej kwg niz tuz phoojywz xaab taw tu tuz phoojywz. 9Yog ni qhai, kud qha tu mej has tas: Mej thob, mej ha yiad taw; mej nrhab, mej ha yiad ntsis; has mej khos, lag ha yiad qhes qhob rooj tu mej. 10Tu qhob tuadtxhij kwg thob, yeej yiad taw, tuadtxhij kwg nrhab yeej yiad ntsis, has tuadtxhij kwg khos, lag yeej yiad qhes qhob rooj tu niz. 11Mej cob kwg yog leej vaid, yog mej tej minyuas thob ntsez, mej yiad muas naas tu los? 12Lossis mej tej minyuas thob qai, mej yiad muas phajhab qhuab tu los? 13Txiad yog mej yog neeg txhud los mej tseed paws muas yaad zoo tu mej tej minyuas. Yog ni qhai, mej leej Vaid tuz kwg nyos saw ntuj ceestsheej, niz hajyad yiad muas Vaaj Ntsujplig tuz Diashub tu tuadtxhij kwg thob niz!”

Yexus has Npexenpus

14Yexus liab tuz daas kwg ua tu is tug yiag has tsi taw luz tiad liad; tuz yiag qhai txiad rob has taw luz. Cob neeg coos coos kwg nyos qhais xaab tsi thoos ni. 15Tadsis muaj qeetuz xaab has tas, “Yog Npexenpus kwg yog daas tuz thiaj pus fwjchid tu niz, niz ha liab taw daas.”

16Muaj qeetuz xaab sid Yexus, cud txiad kuas Yexus ua is yaad txujci tseedcees saw ntuj tu tuadtxhij nuad has tas, niz yog tuz kwg Vaajtswb txis luz. 17Yexus ted paws tej kwg cud xaab ces niz has tu cud tas, “Yog is lus teschias twg tiag ua os pes paas, has cob neeg qhai sis ntaws sis tua, ces lus teschias qhai yiad puadtsuaj muz; has tseb neeg twg kwg tsi sishud, ces tseb neeg qhai yeej yiad tiag taaz muz. 18Yog ni qhai, yog Xataas tseed fais ua ntaw paas has rob sis tiadtsaad, cud lus teschias yiad ua caaz khob tawz? Mej has tas yog Npexenpus pus fwjchid tu kud, kud ha liab taw daas. 19Yog tas kud sib Npexenpus lus fwjchid rias cud tiad, yog ni qhai, tuz twg pus fwjchid tu mej cob neeg kwg liab taw daas, liab daas? Mej cob neeg kwg liab taw daas, yog cob kwg yiad txabtxid tu mej! 20Tsi yog ni kwg mej has, tadsis yog kud muaj Vaajtswb lus fwjchid, kud ha liab taw daas, qhob qhai qha tu mej paws has tas Vaajtswb lus Teschias ted luz txug mej liad.

21“Yog muaj is tug yiag kwg muaj zug heeb, niz npaaj ntaaj has rag khob kho zub niz lus tseb, yeej tsi muaj tuz twg yiad muz nyaz taw niz tej qhob txhua chia. 22Tadsis yog muaj is tug kwg muaj zug heeb kua niz, ntaws yeej niz, has txees taw niz tej ntaaj tej rag kwg niz ca sas tu, nqaa muz taaz hubtsig, has tej kwg niz fuas taw, niz yiad coj muz sis fais.

23“Tuz kwg tsi tuaj kud toz, tuz qhai yeej tiadtsaad kud; tuz kwg tsi kood nrug kud, tuz qhai ua kuas tiag paas tiag piag nyaz.

Daas Rob Qaas Luz Nyos hub Lus Qus Tse

24“Thaws daas tiad hub is tug neeg lus ceb muz liad, tuz daas qhai txiad muz tu tod roos mojsaas qhua, has yog niz nrhab tsi taw chia su, niz yiad has tas, ‘Kud yiad rob qaas muz tu tod kud lus qus tse kwg kud tiad tuaj.’ 25Thaws niz rob qaas luz txug niz lus qus tse, ua caaz ted tu du lug ca liad. 26Tuz daas qhai txiad muz coj kua xyaa tuz daas kwg nyud kua niz luz nrug niz nyos hub lus tseb qhai. Thaws kiag tuz neeg qhai hajyaad txodnyed kua thaws chibthiaj.”

Tuz Kwg Taw Kooshmoob

27Thaws Yexus has ni qhai taaz, muaj is tug puj has nrob nrob hub paas neeg coos coos qhai tuaj has tas, “Tuz puj kwg yug koj has pus mi tu koj noj, yog tuz kwg taw kooshmoob!”

28Tadsis Yexus tes has tas, “Tsi yog ni qhai, cob neeg kwg hnob Vaajtswb txujlug has ua rias ni txujlug qhai, ha yog cob kwg taw kooshmoob!”

Cob Neeg Sas Phed Xaab Pud Txujci Tseedcees

29Thaws cob neeg coos coos tuaj siab puagncig Yexus, Yexus has tu cud tas, “Cob neeg tad na ua phed ua qas heeb ni! Cud thob kuas kud ua is yaad txujci tseedcees, tadsis kud yiad tsi ua tu cud pud. Zaaj txujci tseedcees kwg cud yiad pud tsuas yog Yawnas zaaj nyaz. 30Yawnas zaaj ua is lus cid tu cob neeg kwg nyos hub lus nroog Nineves pud nyaab, Neeg Leej Tus yiad ua lus cid tu cob neeg tad na is yaad ni qhai. 31Hnoos kwg Vaajtswb Txabtxid, tuz puj Vaajntxwb kwg kaab teschias Senpas yiad siab qha cob neeg tad na tej keb txhud tu cud. Tu qhob niz tawgkeb puagtid qaas ntuj kiag tuaj noog Vaajntxwb Xalumoos pab niz tej keb txiaj ntse. Kud qha tu mej has tas, muaj is tug nyos qhais na tseed muaj fwjchid luj kua Xalumoos has. 32Hnoos kwg Vaajtswb Txabtxid, cob neeg kwg nyos hub lus nroog Nineves yiad siab qha mej tej keb txhud tu mej, tu qhob thaws cud hnob Yawnas qha, cud tso cud tej keb txhud tseg. Kud qha tu mej has tas, muaj is tug nyos qhais na, niz tseed muaj fwjchid luj kua Yawnas has!

Lus Tees Kwg Ci tu Lus Ceb

33“Tsi muaj tuz twg tias tees has muas phaaj khws tu;#11.33 Tej phaw qus tsi muaj cob luz has tas, muas lus phaaj khws tu. tsuas muaj yiad muas txias tu qhob chia sas nyaz, kuas cob neeg kwg tuaj hub tseb ha pud keb. 34Koj lus qhobmuag yog lus tees kwg ci tu koj lus ceb pud keb. Yog koj lus qhobmuag pud keb tsees, koj lus ceb yeej yiad kaaj nrig. Tadsis yog koj lus qhobmuag pud keb tsi tsees, taaznrhiab koj lus ceb yeej yiad tsaws ntuj nti. 35Koj yiadtsud ceebfaaj zoo, tsi xod pus qhob pud keb kwg koj muaj tsaws. 36Yog koj lus ceb kaaj nrig txhua qhob, tsi muaj is qho tsaws, koj yiad ci ntsaa as thoos pliaz, is yaad ni muaj dluas tees ci tuaj tu koj.”

Yexus Qha Kuas tsi Xod Ua Ni Cob Falixais has Cob Xisfws Kwg Qha Kebcai

37Thaws Yexus qha taaz, muaj is tug Falixais hu Yexus muz nrug niz noj mo; Yexus txiad muz hub niz tseb, has nyos tuasyws qhai rooj mo. 38Thaws tuz Falixais pud has tas Yexus tsi ntxuab tez rias ni kebcai taws maad ni noj, niz xaab tsi thoos ni. 39Tuz Tswb has tu niz tas, “Mej cob Falixais istxwd ntxuab khos ntxuab phaaj saas nraw nyaz, tadsis hub mej lus sas muaj keb phed keb qas pub nkaws. 40Ua nyaab mej yiad ruag ua luaj ni! Mej tsi paws has tas Vaajtswb tuz kwg tsid saas nraw, niz yog tuz kwg tsid saas hub has? 41Mej ca ni muas tej kwg nyos hub mej tej khos has tej phaaj pus tu cob neeg pluag, txhua yaad kwg mej muaj ha yiad hub rias ni kebcai.

42“Cob Falixais, mej yiad rawg keb puadtsuaj! Mej muas plhawshud, luadliaz has txhua yaad txudlod is feed kawd coj tuaj fij tu Vaajtswb, tadsis mej ho tsi ua neeg ncaajnceeg has tsi hlus Vaajtswb. Mej yiadtsud ua tej na has lwd yaad los mej yiad taw ua.

43“Cob Falixais, Mej yiad rawg keb puadtsuaj! Mej nyad xaib tej chia zoo hub tej tseb saaslaaj nyos, thaws mej muz tod tej kas, mej nyad kuas tuadtxhij fwd mej. 44Mej yiad rawg keb puadtsuaj! Mej zoo is yaad ni tej ntxaa kwg tsi muaj daastsi cid tu saw, neeg tsuj muz tsuj luz, cud tsi paws has tas yog ntxaa.”

45Muaj is tug xisfws kwg qha Vaajtswb txuj Kebcai has tu Yexus has tas, “Xisfws, koj has ni qhai, kuj yog koj thuad pes!”

46Yexus tes has tas, “Cob xisfws kwg qha Vaajtswb txuj Kebcai, mej yiad rawg keb puadtsuaj has! Mej muas lus nraa hnyaab kwg tsi yoojyid ris tu cud ris, tadsis mej ted tsi ceb mej tuz nyuas ntibtez muz paas thas tej nraa qhai ni.” 47Mej yiad rawg puadtsuaj! Mej txhid tej ntxaa kwg loz cob ceb Vaajtswb luz kuas zoo nkawj. Cob ceb Vaajtswb luz ted yog cob kwg mej cob yiadkoos muas tua laidtaa liad. 48Mej ua tidkhiab tu tuadtxhij paws has tas mej pud zoo tej kwg mej cob yiadkoos ua luz liad. Tu qhob mej cob yiadkoos yog cob kwg tua cob ceb Vaajtswb luz, has mej yog cob kwg txhid tej ntxaa qhai. 49Vid ni na, Vaajtswb tuz kwg muaj tswbyid ha ni has tas, “Kud yiad txis cob kwg ceb Vaajtswb luz has kud cob tidthiaj muz qha cud, tadsis cud yiad muas cob ceb Vaajtswb luz has cob tidthiaj qeetuz tua, has yiad muas qeetuz tsidtxod.” 50Cob neeg tad na yiad taw ris lus txid kwg cob neeg tad thaws u tua cob ceb Vaajtswb luz, txij thaws tsid lus ntajtes luz txug naj hnoos na, 51suab txij thaws Anpees rawg tua luz txug thaws Xakhaliyas rawg tua qhai lus thaaj fij khood tu Vaajtswb has qhob chia Diashub kig nruasnraas. Kud qha tu mej has tas, cob neeg tad na yiad taw ris cob neeg kwg tua cob ceb Vaajtswb luz qhai lus txid!

52“Cob xisfws kwg qha Vaajtswb txuj Kebcai, mej yiad rawg keb puadtsuaj! Mej muas tuz yudsij kwg qhes keb txiaj ntse zais ca liad; txiad yog mej los mej tsi xaab muz tu hub, has yog lwd tuz yiad muz hub, mej tseed txwb tsi pus cud muz has!”

53Thaws Yexus tiad hub tuz Falixais tseb muz, cob xisfws kwg qha Vaajtswb txuj Kebcai has cob Falixais txiad thuad Yexus heeb has noog Yexus ntaw zaaj nuad niz puas has txhud, 54cud ha yiad nrhab taw txid tu niz.

Currently Selected:

Lukas 11: CQD2024

Highlight

Copy