Lukas 12

Ceebfaaj Cob Neeg Ntsejmuag Ncaaj Sas Nkhaws

1Thaws muaj neeg ntaw txhas tuz tuaj nyos ua ke sis txib qaib, Yexus has tu Yexus cob thwjtid has tas, “Mej yiadtsud ceebfaaj cob Falixais cob xaas. Kud has ni na yog kud has txug cob Falixais kwg ntsejmuag ncaaj sas nkhaws. 2Tej kwg neeg muas npug ca liad, yiad muaj tuz muas nthuab luz tu tuadtxhij nuad, has tej kwg tsi muaj tuz twg paws, yiad muaj tuz muas luz qha tu tuadtxhij. 3Yog ni qhai, txhua yaad kwg mej has hub qhob tsaws ntuj, thaws pud keb yiad muaj tuz muas tej qhai qha tu tuadtxhij, has tej kwg mej sis ntxhi hub tseb, yiad muaj tuz muas tej qhai coj muz qha nrob nrob tu nraw zoob.

Yiadtsud Ntshai Tuz twg

4“Kud cob phoojywz, kud qha tu mej has tas, mej tsi xod ntshai tuz kwg tua taw mej lus ceb, tadsis tod qaas qhai niz ua tsi taw daastsi tshaaj qhob qhai liad. 5Kud yiad qha tuz kwg mej yiadtsud ntshai tu mej. Mej yiadtsud ntshai Vaajtswb tuz kwg tua taw mej has muaj cuaskaab muas mej laid tu hub ntujtiag. Kud qha tu mej has tas, mej yiadtsud ntshai Vaajtswb!

6“Tsis tug noog tseb, lag muas os xus nyaz puas yog? Txiad yog is tug noog tseb nyaz los Vaajtswb yeej nuad ntsoob. 7Txiad yog mej tej plawshaw los Vaajtswb suab txhua txuj hubtsig. Yog ni qhai, mej tsi xod ntshai; mej muaj nqaid heeb kua ntaw tuz noog tseb.

Leez Yuab Yexus Taasmeeg Txhua tuz

8“Kud qha tsees tu mej has tas, tuz kwg leez taasmeeg tuadtxhij has tas niz yog kud ni, Neeg Leej Tus yiad leez tuz qhai taasmeeg Vaajtswb cob tidtswb is yaad ni qhai. 9Tadsis tuz kwg tsi leez kud taasmeeg tuadtxhij, Neeg Leej Tus yiad tsi leez yuab tuz qhai taasmeeg Vaajtswb cob tidtswb.

10“Yog tuz twg thuad Neeg Leej Tus, Vaajtswb zaad txid taw tu tuz qhai. Tadsis yog tuz twg thuad Vaaj Ntsujplig tuz Diashub, Vaajtswb yiad zaad txid tsi taw tu tuz qhai.

11“Thaws cud coj mej muz tu hub tej tseb saaslaaj lossis coj mej muz cuag tej nudtswb, mej tsi xod txhiaj has tas mej yiad has dias mej zaaj nyaab. 12Tu qhob thaws qhai Vaaj Ntsujplig tuz Diashub yiad qha tu mej paws has tas mej yiad has nyaab ha zoo.”

Zaaj Luz Pibtxwb Has Txug tuz Npluanuj Ruag

13Muaj is tug yiag nyos hub paas neeg coos coos qhai has tu Yexus has tas, “Xisfws, thob koj has kuas kud tuz tijlawg fais kud nad kud vaid tej qustxeeg qusteg tu kud has.”

14Yexus tes has tas, “Phoojywz, tuz twg tsaa kud ua tuz txabtxid has fais qustxeeg qusteg tu mej?” 15Yexus has tu tuadtxhij tas, “Mej tuadtxhij yiadtsud ceebfaaj tsi xod ntshia yaad na yaad u. Txiad yog mej muaj nyaj ntxaz has qhob txhua chia ntaw npawd nyaab los tej qhai yeej paas tsi taw kuas mej muaj txujsa nyos nteb.”

16Yexus has is zaaj luz pibtxwb tu cud has tas, “Muaj is tug yiag npluanuj, niz muaj laj muaj tes zoo has saw taw qoosloo ntaw heeb. 17Niz xaab has tas, ‘Kud yiad ua nyaab? Kud tsi muaj chia txaws ntid kud tej qoosloo na.’ 18Niz xaab has tas, ‘Kud yiad ua ni na. Kud yiad lawj kud lus zuz, has muas ua kuas luj kua, ha txaws ntid kud tej qoosloo has qhob txhua chia. 19Ces kud yiad has tu kud lus sas has tas, koj muaj hmoo heeb! Koj ted muaj txhua yaad txhij zoz kwg kaab ntaw xyoos liad. Koj ca ni su nyos noj nyos haws!’ 20Tadsis Vaajtswb has tu tuz npluanuj qhai tas, ‘Tuz neeg ruag, hmo na koj txujsa ted yiad tu; yog ni qhai, tej qhob txhua chia kwg koj npaaj tseg yiad yog tuz twg tug?’ ”

21Yexus xaws luz has tas, “Tuz kwg npaaj nyaj txag qhob txhua chia luz ua niz tuz kuas niz npluanuj, Vaajtswb tsi suab has tas tuz qhai yog neeg npluanuj.”

Ca Sas tu Vaajtswb

22Ces Yexus has tu niz cob thwjtid has tas, “Yog ni qhai, kud has qha tu mej kuas mej tsi xod txhiaj txug mej lus neej has tas mej yiadtsud muaj zaws mo noj ha muaj sa nyos lossis txhiaj txug mej lus ceb yiadtsud muaj rig tsho hnaab. 23Tu qhob txujsa tseedcees kua tej zaws mo, has lus ceb tseedcees kua tej rig tsho. 24Mej ua tuaszoo nuad tej uas laaz: uas laaz tsi cos qoos cos loo, has tsi hlais tsi saw; cud tsi muaj zuz tsi muaj phiab ntid qoosloo ca; Vaajtswb ted yug tej uas laaz! Mej tseed muaj nqai heeb kua tej noog qhai! 25Mej tej keb txhiaj puas yiad paas taw kuas mej muaj sa nyos os pes xyoos ntxib?#12.25 nyos os pes xyoos ntxib; lossis nteb zoz tuaj. 26Yog tej yaad yaw yaw na mej ted ua tsi taw, mej tseed yiad muz txhiaj lwd yaad ua daastsi? 27Mej ua tuaszoo xaab nuad, tej paaj ntoos tiag nyaab? Cud ted tsi ua hujlwd, tsi ntus ntaws hnaab. Tadsis kud qha tu mej has tas, txiad yog Vaajntxwb Xalumoos npluanuj heeb ni los niz ted tsi taw hnaab is ceb rig tsho zoo npawd ni tej paaj ntoos qhai is lus. Ua nyaab mej keb ntseeg yiad tsiag ua luaj? 28Tuz neeg keb ntseeg tsiag es, tej nroj tsuag kwg tsuas nyos hnoos na nyaz, txus kiz lag ted yiad muas laid hliab tu hub qhobcus, ua nyaab Vaajtswb ted pus tu tej paaj ntoos qhai zoo nkawj ua luaj. Yog ni qhai, Vaajtswb hajyaad yiad pus tu mej muaj hnaab zoo kua tej nroj tsuag qhai!

29“Yog ni qhai, mej tsi xod txhiaj has tas, mej yiad muz nrhab daastsi luz noj luz haws. 30(Cob neeg kwg tsi ntseeg Vaajtswb hub ntajtes na naj hnoos nrhab tej na.) Mej Vaid yeej paws has tas mej yiadtsud muaj tej na. 31Tadsis mej yiadtsud xus nrhab Vaajtswb lus Teschias taws, niz maad ni muas tej na ntxib tu mej.

Khiad Nyaj Txaz tu saw Ntuj Ceestsheej

32“Cob minyuas yaaj, txiad yog mej tsi coos los mej tsi xod ntshai, tu qhob mej Vaid ted txaws sas muas niz lus teschias tu mej liad. 33Ca ni muas mej tej qhob txhua chia muag, has muas tej qhai fais tu cob neeg pluag. Ca ni xias lus hnaas raw nyaj kwg tsi txiaj ntua ntid mej tej nyaj tu saw ntuj ceestsheej, qhob qhai mej tej nyaj yiad tsi pluj, tu qhob tusnyas nyaz tsi taw, has ntsawd kaasrws tsi noj. 34Vid mej tej nyaj txag has qhob txhua chia nyos qhob twg, mej lus sas yeej nyos qhob qhai.

Cob Tusqhe Kwg Zub Toz

35“Mej yiadtsud hnaab rig tsho khob kho toz has tias tees ca, 36is yaad ni cob tusqhe kwg npaaj toz cud tuz tswb kwg muz noj tshoos yiad rob luz. Thaws tuz tswb luz txug has hu, taadsij qhai cob tusqhe yiad qhes qhob rooj tu niz. 37Thaws tuz tswb rob luz pud cob tusqhe tseed zub toz, cob tusqhe qhai yiad taw kooshmoob! Kud qha tu mej has tas, tuz tswb qhai yiad sa hlaas khob kho, has yiad kuas cob tusqhe nyos tuasyws qhai rooj, has niz yiad ua tuz zuz zaws zuz mo tu cud noj. 38Txiad yog tuz tswb luz thaws is taaz hmo lossis luz thaws yiad pud keb, yog niz pud cob tusqhe tseed zub toz, cob tusqhe qhai yiad taw kooshmoob! 39Mej ncu ntsoob has tas, yog tuz tswb tseb paws has tas thaws twg tusnyas yiad tuaj, niz yeej yiad zub toz, tsi pus kuas tusnyas luz taw tu hub niz tseb. 40Yog ni qhai, mej los yiadtsud zub toz, tu qhob Neeg Leej Tus yiad luz lus sijhiad kwg mej tsi ceebfaaj.”

Tuz Tusqhe Kwg Ncaaj has tuz Kwg tsi Ncaaj

41Petus noog Yexus has tas, “Tuz Tswb, zaaj luz pibtxwb kwg koj has na, yog koj has tu pes lossis koj has tu tuadtxhij?”

42Tuz Tswb tes has tas, “Tuz tusqhe nuad kwg ncaajnceeg has muaj tswbyid. Tuz tswb yiad tsaa niz ua tuz luj kwg nuad tuz tswb lus tseb. Thaws txug sijhiad noj, tuz qhai yiad ua tuz kwg fais zaws fais mo tu cob tusqhe noj. 43Thaws tuz tswb rob luz tseb has pud tuz tusqhe qhai taastod ua tej hujlwd zoo na. Ces tuz tusqhe qhai yiad taw kooshmoob. 44Kud qha tu mej has tas, tuz tswb yiad tsaa tuz tusqhe qhai ua tuz nuad tuz tswb tej qhob txhua chia. 45Tadsis yog tuz tusqhe qhai xaab has tas tseed tshuab nteb kud tuz tswb maad luz, ces niz txiad muas cob tusqhe ntaws, tsi has puj lossis yiag hubtsig, has niz noj tsaw haws qawg, 46Niz tsi paws has tas lus sijhiad twg niz tuz tswb yiad luz txug, niz ha tsi ceebfaaj. Tuz tswb yiad muas tuz tusqhe qhai hlais ua tej daid,#12.46 hlais ua tej daid; lossis muas laid tusaas nraw. has muas niz laid muz nyos nrug cob neeg kwg tsi noog luz.

47“Tuz tusqhe kwg paws niz tuz tswb lus sas liad, tadsis niz tsi ua rias ni tuz tswb xaab kuas niz ua. Tuz tusqhe qhai yiad maas npliad. 48Tadsis tuz tusqhe kwg tsi paws niz tuz tswb lus sas, txiad yog niz ua txhud txaws npliad los niz yiad tsi maas npliad ntaw. Tuz kwg taw ntaw, tuz qhai yiadtsud pawj ntaw. Tuz kwg taw ntaw kua, tuz qhai yiadtsud pawj ntaw kua.

Yexus Ua Kuas Neeg Nyos tsi sishud

49“Qhob kwg kud luz yog coj hluabtiaz luz hliab lus ntajtes, has kud xaab kuas hluabtiaz ted cig liad! 50Tadsis kud yiadtsud taw ua is qhob kebcai raws dej taws, kud yiad rawg keb tsidtxod, has keb nyuaj sas muz txug thaws lus sijhiad qhai dhaw liad. 51Mej xaab has tas kud coj keb sis hudxees luz tu hub lus ntajtes na los? Kud qha tu mej has tas, tsi yog ni qhai, kud luz ua kuas neeg nyos tsi sishud. 52Txij na muz tseb neeg kwg muaj tsis leez yiad tsi sishud, pes tug yiad tiadtsaad os tug, has os tug yiad tiadtsaad pes tug. 53Vaid yiad tiadtsaad tus, tus yiad tiadtsaad vaid; nad yiad tiadtsaad ntxhais, ntxhais yiad tiadtsaad nad; pus yiad tiadtsaad nyaas, has nyaas yiad tiadtsaad pug.”

Neeg Paws Nuad Caij Nuad Nyoog

54Yexus has tu tuadtxhij tas, “Thaws mej pud fuas tsaws nti saas hnoospoos luz, taadsij qhai mej has tas, yiad luz naag, ces txiad muaj ni qhai. 55Has thaws mej pud cua ntsiaj saas qaastes tuaj, mej has tas, ted yiad txug lus caij ntuj kud, ces txiad muaj ni qhai. 56Cob neeg ntsejmuag ncaaj sas nkhaws! Mej nuad fuas nuad cua qhais qaas ntuj na, mej paws has tas yiad tshaab ntuj lossis yiad luz naag, tadsis ua nyaab tej kwg naj hnoos na muaj, mej ho tsi paws?”

Has Kuas Rob sishud

57“Vid nyaab mej tsi ua tuaszoo xaab nuad yiad ua yaad twg ha zoo? 58Yog tuz twg xyuad phaaj kod koj tu hub tseb tu plaws, has yiad coj koj muz has plaws, ua ntej kwg tsi taw muz has plaws, koj ca ni thob niz kuas mej rob sishud, nyos tsaad niz yiad coj koj muz cuag tuz txabtxid, ces tuz txabtxid yiad muas koj cos tu tuz ceebxwd, has tuz ceebxwd yiad muas koj kia tu hub tseb yuajphuas. 59Kud qha tsees tu koj has tas, koj yiad tiad tsi taw hub tseb yuajphuas muz txug thaws kwg koj thed lus nyaj toog zag kiag.”

Currently Selected:

Lukas 12: CQD2024

Highlight

Copy