Yawhaas 6

Yexus Muas Mo tu Tsib Txhas Tuz Noj

1Tod qaas qhai, Yexus caij nkoj hlaa Habtxwb Kalilais muz tusaas tid u (lus habtxwb qhai muaj kua is lus npe hu ua Tinpeli-as). 2Muaj is cob neeg coos coos rias Yexus qaas muz, tu qhob cud pud tej txujci kwg niz khu taw tej neeg muaj mos zoo. 3Yexus muz tu saw roos has nrug niz cob thwjtid nyos ua ke. 4Thaws qhai, ted yiad txug lus caij kwg cob Yudais ua Kebcai Hlaa Dhaw. 5Yexus tsaa qhobmuag nuad, niz pud neeg coos coos taastod tuaj cuag niz, yog ni qhai, niz txiad has tu Filis has tas, “Pes yiad muz yuab mo qhob twg luz tu cob neeg na noj?” 6(Yexus has ni na, yog niz sid Filis sas; qhob tsees, Yexus ted paws liad has tas, Yexus yiad ua nyaab.)

7Filis tes has tas, “Txiad yog muas os puas tiad lus nyaj#6.7 Lus nyaj: is tug neeg ua hujlwd, is hnoos tsuas taw is lus nyaj nyaz (nuad Mat 20.2). muz yuab mo los ntshai is tug tsuas taw is nyuas qhob yaw yaw nyaz.”

8Yexus cob thwjtid muaj is tug hu ua Aadales, niz yog Ximoos Petus tuz kwb, niz has tas, 9“Muaj is tug minyuas tus nyos qhais na, niz muaj tsib lus ncuab has os tug ntsez. Tadsis yiad tsi txaws cob neeg na noj.”

10Yexus has tas, “Mej ca ni has kuas tuadtxhij nyos twsywd.” (Thaaj chia qhai muaj muaj nyod.) Yog ni qhai, tuadtxhij txiad nyos twsywd; cob yiag kwg nyos qhais yiad lawg muaj tsib txhas tuz. 11Yexus muas tsib lus ncuab qhai luz ua Vaajtswb tsawg, has niz muas fais tu tuadtxhij noj. Niz muas os tug ntsez luz ua is yaad nkaws ni qhai has, tuz kwg yiad noj ntaw npawd nyaab los taw. 12Thaws tuadtxhij noj tsaw liad, Yexus has tu niz cob thwjtid has tas, “Mej ca ni muz saw tej kwg tuadtxhij noj tsi taaz, tsi pus is qho xuad ni.” 13Yog ni qhai, cob thwjtid txiad muz saw tej ncuab seed kwg tuadtxhij noj tsi taaz taw kawd os tias pub nkaws.

14Thaws cob neeg tuadtxhij pud Yexus ua zaaj txujci tseedcees na, cud has tas, “Tuz na yog tuz ceb Vaajtswb luz#6.14 Tuz ceb Vaajtswb luz: Nuad 1.21. kwg nqaiz luz tu hub ntajtes na tag!” 15Yexus paws has tas cud yiad tuaj muas niz yuad tsaa ua vaajntxwb; yog ni qhai, niz tuas tuz txiad muz tu saw roos liad.

Yexus Muz Kuatia saw Nplaid Dej

16Thaws yiad tsaws ntuj, Yexus cob thwjtid muz tu nraaz ntug habtxwb, 17cud nce tu hub lus nkoj, has caij nkoj hlaa habtxwb rob qaas muz tu tid lus nroog Kapena-us. Thaws qhai ted tsaws ntuj liad, Yexus tseed tsi taw luz tu qhais cud. 18Ces txiad muaj cua kaaj cua dus ntsiaj dej ntaas cuag daastsi. 19Cob thwjtid ted nkuad lus nkoj muz kes kwblaad ni tsib raws kilumev liad, thaws cud pud Yexus luz kuatia saw nplaid dej luz ze zuj zug tu qhais cud lus nkoj, cud ntshai heeb ni. 20Yexus has tu cud tas, “Mej tsi xod ntshai, ted yog kud ntag!” 21Cud ha zoo sas ca Yexus luz tu hub cud lus nkoj, taadsij qhai lus nkoj ted muz txug hlo qhais ntug qhob chia kwg cud yiad muz.

Muaj Neeg Muz Nrhab Yexus

22Hnoos tod qaas cob neeg coos coos kwg nyos saas ntug habtxwb tid u pud tuaslus nkoj nyos qhais nyaz. Cud paws has tas Yexus yeej tsi taw nrug niz cob thwjtid caij lus nkoj qhai muz, tsuas yog cob thwjtid caij muz nyaz. 23Muaj kua is co nkoj tuaj tid lus nroog Tinpeli-as tuaj nrez ze tu qhais qhob chia kwg Yexus muas ncuab luz ua Vaajtswb tsawg has muas nkais fais tu tuadtxhij noj. 24Thaws cob neeg coos coos qhai paws has tas Yexus has niz cob thwjtid tsi nyos qhob qhai liad, cud txiad nce tu hub cob nkoj qhai has caij muz nrhab Yexus tu tid lus nroog Kapena-us.

Yexus Yog Cob Mo Kwg Ciad Neeg Txujsa

25Thaws cob neeg qhai muz nrhab taw Yexus saas habtxwb tid u liad, cud has tu Yexus has tas, “Xisfws, thaws twg koj ted tuaj tu qhais na liad?”

26Yexus tes has tas, “Kud qha tsees tu mej has tas, tes yog vid kud muas mo tu mej noj tsaw, mej ha tuaj nrhab kud, tsi yog vid mej pud tej txujci tseedcees kwg kud ua. 27Mej tsi xod ua nud kuas taw cob mo kwg txiaj lwj, tadsis mej ua nud kuas taw cob mo kwg coj muz taw txujsa is txhis. Neeg Leej Tus yiad muas cob mo kwg ciad taw txujsa nteb dhaw muz is txhis tu mej, tu qhob Vaajtswb tuz kwg yog Leej Vaid ted nas hodthiaj tu niz liad.”

28Ces cud noog Yexus has tas, “Pes yiad ua nyaab, pes ha ua taw rias ni Vaajtswb xaab kuas pes ua?”

29Yexus tes has tas, “Qhob kwg Vaajtswb xaab kuas mej ua, yog niz xaab kuas mej ntseeg tuz kwg niz txis luz.”

30Cud tes has tas, “Koj yiad ua yaad txujci tseedcees daastsi tu pes nuad kuas pes ntseeg koj? Koj yiad ua daastsi? 31Thaws u pes cob yiadkoos noj manas tod taj suaspuad rias ni Vaajtswb Txujlug has tas, ‘Niz muas mo saw ntuj luz tu cud noj.’ ”

32Yexus has tas, “Kud qha tsees tu mej has tas, tej mo kwg Mawxes muas tu mej noj, tsi yog tej kwg luz saw ntuj luz; tej mo kwg kud Vaid muas tu mej noj ha yog tej tseed mo kwg luz saw ntuj luz. 33Tu qhob tuz kwg luz saw ntuj luz, niz yog cob mo kwg Vaajtswb muas luz ciad neeg ntajtes txujsa.”

34Cud thob Yexus has tas, “Tuz Tswb, thob koj muas cob mo qhai tu pes noj muz ni.”

35Yexus qha cud has tas, “Kud yog cob mo kwg ciad neeg txujsa. Tuz kwg luz cuag kud, tuz qhai yiad tsi tshais is zag ni; tuz kwg ntseeg kud, tuz qhai yiad tsi nqhes is zag ni liad. 36Kud has tu mej has tas, nizna mej ted pud kud liad, tadsis mej tsi ntseeg kud. 37Txhua tuz kwg kud Vaid pus tu kud, cud yeej yiad luz cuag kud. Txhua tuz kwg luz cuag kud, kud leez yuab hubtsig, 38tu qhob kud luz saw ntuj luz tsi yog luz ua rias ni kud lus sas, tadsis kud luz ua rias ni tuz kwg txis kud luz lus sas nyad. 39Tuz kwg txis kud luz kuas kud nuad cob neeg kwg niz pus tu kud liad, tsi xod ca is tug twg pluj ni, has thaws txug hnoos kiag kud yiad tsaa cud tuadtxhij siab hub qhob tuag rob qaas luz. 40Tu qhob kud Vaid xaab kuas tuadtxhij kwg pud leej Tus has ntseeg niz muaj txujsa nteb dhaw muz is txhis. Has thaws txug hnoos kiag kud yiad tsaa cud siab hub qhob tuag rob qaas luz.”

41Ces cob Yudais txiad nthe Yexus, tu qhob Yexus has tas, “Kud yog cob mo kwg luz saw ntuj luz.” 42Yog ni qhai, cud txiad has tas, “Tuz yiag na yog Yawxej leej tus Yexus los tsi yog? Pes yeej paws niz nad niz vaid hubtsig. Ua nyaab niz yiad has tas niz luz saw ntuj luz?”

43Yexus has tu cud tas, “Mej ca ni tseg tsi xod nthe ni qhai liad. 44Yeej tsi muaj tuz twg luz cuag taw kud, tsuas yog leej Vaid tuz kwg txis kud luz, niz coj tuz twg luz, tuz qhai ha taw luz cuag kud nyaz; has thaws txug hnoos kiag kud yiad tsaa tuz qhai siab hub qhob tuag rob qaas luz. 45Cob ceb Vaajtswb luz saw tseg has tas, ‘Vaajtswb yiad qha tuadtxhij hubtsig.’ Txhua tuz kwg taw hnob Leej Vaid tej luz has ua rias ni niz qha yeej luz cuag kud. 46Kud has ni na tsi yog has tas tuadtxhij puabtsig pud leej Vaid; tsuas yog tuz kwg Vaajtswb txis luz, niz tuas tuz nyaz ha pud leej Vaid. 47Kud qha tsees tu mej has tas tuz kwg ntseeg kud, tuz qhai ted taw txujsa nteb dhaw muz is txhis liad. 48Kud yog cob mo kwg ciad neeg txujsa. 49Txiad yog mej cob yiadkoos taw noj manas tod taj suaspuad los cud ted tuag taaz liad. 50Tadsis yog tuz twg noj cob mo kwg luz saw ntuj luz, tuz qhai yiad tsi tuag. 51Kud yog cob mo kwg luz saw ntuj luz ciad neeg txujsa. Tuz kwg noj cob mo na yiad taw txujsa nteb dhaw muz is txhis; has cob mo kwg kud yiad muas ciad neeg ntajtes txujsa qhai ted yog kud ceb nqaj ntag.”

52Ces cob Yudais txiad sis caab npaw tiaz vod has tas, “Tuz yiag na yiad ua nyaab muas taw niz ceb nqaj tu pes noj taw?”

53Yexus has tu cud tas, “Kud qha tsees tu mej has tas, yog mej tsi noj Neeg Leej Tus ceb nqaj has tsi haws niz cob ntshaab, ces mej yiad tsi taw txujsa. 54Tuz kwg noj kud ceb nqaj has haws kud cob ntshaab, tuz qhai taw txujsa nteb dhaw muz is txhis, has thaws txug hnoos kiag kud yiad tsaa niz siab hub qhob tuag rob qaas luz. 55Tu qhob kud ceb nqaj yog cob tseed mo; has kud cob ntshaab yog cob tseed dej. 56Tuz kwg noj kud ceb nqaj has haws kud cob ntshaab, tuz qhai nrug kud kood is txujsa, has kud nrug tuz qhai kood is txujsa. 57Is yaad nkaws ni Leej Vaid tuz kwg muaj sa nyos is txhis taw txis kud, has kud muaj txujsa yog vid muaj niz ces tuz kwg noj kud ceb nqaj yuab muaj txujsa vid yog muaj kud zoo ni qhai. 58Cob mo na yog cob mo kwg luz saw ntuj luz; cob mo na tsi zoo ni cob mo kwg mej cob yiadkoos noj, has cud tuag taaz liad. Tuz kwg noj cob mo na yiad taw txujsa nteb dhaw muz is txhis.”

59Yexus has cob luz na thaws niz qha hub lus tseb saaslaaj kwg nyos hub lus nroog Kapena-us.

Tej Luz Kwg Ciad Neeg Txujsa

60Thaws Yexus cob thwjtid coos tuz hnob tej luz kwg niz qha qhai, cud has tas, “Cob luz na hnyaab heeb ni. Tuz twg ha yiad noog taw?”

61Tadsis Yexus paws has tas cob thwjtid nthe txug tej luz kwg Yexus has, Yexus txiad has tu cud tas, “Tej luz kwg kud has qhai ua tu mej poos keb ntseeg los? 62Yog has tas mej pud Neeg Leej Tus rob qaas muz nyos saw qhob chia kwg niz istxwd nyos luz liad, mej tsua yiad xaab nyaab? 63Vaajtswb tuz Ntsujplig ua taw tu neeg muaj sa; tadsis neeg nqaj tiab ua tsi taw ni qhai. Tej luz kwg kud qha tu mej qhai, yog ntsujplig has yog txujsa. 64Tadsis mej cob muaj qeetuz tsi ntseeg kud tej luz.” (Yexus has ni qhai, tu qhob thaws chibthiaj niz ted xus paws liad has tas, niz cob thwjtid tuz twg yog tuz tsi ntseeg has tuz twg yog tuz kwg yiad ntxeeb saas tu niz.) 65Has Yexus has ntxib tas “Ted yog vid ni na kud ha has tu mej has tas, yeej tsi muaj is tug luz cuag kud, tsuas yog tuz kwg leej Vaid tshoob niz lus sas ha luz cuag kud nyaz.”

66Vid ni qhai, cob thwjtid kwg rias Yexus qaas muaj coos tuz txiad tso Yexus tseg, has tsi nrug niz muz liad. 67Yog ni qhai, Yexus txiad noog niz kawd os tug thwjtid has tas, “Mej ne, mej yiad tso kud tseg has los?”

68Ximoos Petus tes Yexus has tas, “Tuz Tswb, yog pes tso koj tseg, pes yiad muz cuag tuz twg? Tsuas yog koj tuas tuz tej luz nyaz, ha pus taw txujsa is txhis tu neeg. 69Nizna pes ntseeg has paws tsees has tas koj yog tuz Diashub kwg Vaajtswb txis luz.”

70Yexus tes cud has tas, “Puas yog kud xaib mej kawd os tug na? Tadsis mej cob ko muaj is tug yog Daag Ntxwgnyoog.” 71Yexus has ni qhai, yog has txug Ximoos Ixakali-us leej tus Yudas. Yudas ntaag yog tug kwg tod qaas na ntxeeb sas tu Yexus.

Currently Selected:

Yawhaas 6: CQD2024

Highlight

Copy