Yawhaas 5

Yexus Khu Mos Qhai Lus Paaz Dej

1Tod qaas qhai, thaws txug lus caij kwg cob Yudais ua kebcai, Yexus txiad muz tu nraaz lus nroog Yeluxalees. 2Nyos hub lus nroog Yeluxalees muaj is lus paaz dej nyos ze ze qhais lus Roojvaag Yaaj#5.2 Muaj is lus paaz dej … Roojvaag Yaaj; lossis Ze ze qhais lus Paaz Dej Yaaj … is qhob chia. has muaj tsis lus qaaskhaab nyos ncig lus paaz dej; qhob chia qhai luz Henplais hu ua Npexathas.#5.2 Npexathas; tej phaw qus has tas Npethedas. 3Muaj is cob neeg mos coos coos tuaj pw qhai, cob neeg xyuadtxwb, cob neeg cegtiab, has cob neeg tuag tez tuag tia. Cud tuaj nyos qhais toz nuad thaws twg lus paaz dej ntaad. 4Tu qhob tuz Tswb is tug tidtswb pheej luz dlu lus paaz dej qhai. Thaws lus paaz dej qhai ntaad, yog tuz neeg mos twg xus nqaiz muz tu hub lus paaz dej, ces tuz qhai tej mos zoo.#5.4 Tej phaw qus tsi muaj nqai 3b-4 5Muaj is tug neeg nyos qhais mos taw pes cawg yig xyoos liad. 6Yexus pud niz pw qhai, Yexus paws has tas niz mos taw nteb luz liad; yog ni qhai Yexus txiad noog niz has tas, “Koj puas xaab zoo?”

7Niz tes Yexus has tas, “Tuz Tswb, thaws dej ntaad tsi muaj tuz twg paas tuab kud muz tu hub lus paaz dej; thaws kud taastod yiad nqaiz muz tu hub, ted muaj lwd tuz xus nqaiz ua kud ntej muz tu hub liad.”

8Yexus has tu niz tas, “Koj ca ni siab, yias koj daid leb has muz.” 9Taadsij qhai, niz tuz mos txiad ca ni zoo hlo; ces niz txiad yias hlo niz daid leb has muz liad.

Hnoos qhai, yog hnoos Xanpataws, 10yog ni qhai, cob Yudais tej nudtswb txiad has tu tuz neeg kwg zoo mos qhai has tas, “Hnoos na yog hnoos Xanpataws, koj coj koj daid leb tawgkeb mas txhud pes cob neeg Yudais txuj Kebcai liad.”

11Niz tes cud has tas, “Tuz neeg kwg khu kud zoo has tu kud tas, ‘Ca ni yias koj daid leb has muz.’ ”

12Cud noog niz has tas, “Tuz kwg has kuas koj ua ni na yog tuz twg?”

13Tadsis tuz neeg qhai tsi paws has tas Yexus yog tuz twg, tu qhob muaj neeg coos coos nyos qhais, has Yexus ted muz tu lwd qhob liad.

14Tod qaas qhai, Yexus muz ntsis tuz neeg qhai hub lus Tuadtseb has has tu niz tas, “Koj noog kud has, nizna koj ted zoo liad; koj tseg tsi xod ua txhud liad, nyos tsaad koj rawg keb txodnyed heeb kua qus.”

15Ces tuz neeg qhai txiad tiad muz qha tu cob Yudais tej nudtswb has tas, tuz kwg khu niz zoo mos qhai yog Yexus. 16Yog ni qhai, cud txiad tuabhub ua phed tu Yexus, tu qhob Yexus khu tuz yiag qhai hnoos Xanpataws. 17Yexus tes cud has tas, “Kud Vaid yeej ua hujlwd tsi su ni, yog ni qhai, kud yeej yiad ua hujlwd has.”

18Qhob kwg Yexus has na ua tu cob Yudais tej nudtswb hajyaad xaab muas Yexus tua laidtaa; tsi yog qhob kwg Yexus ua txhud txuj kebcai Hnoos Xanpataws nyaz, tadsis Yexus tseed khaab has tas Vaajtswb yog niz Vaid, has Yexus has ni kwg niz muaj fwjchid sis las zoz ni Vaajtswb ntag.

Tuz Tu Yog tuz Muaj Fwjchid

19Yexus tes cud has tas, “Kud qha tsees tu mej has tas: leej Tus yeej tsi ua is yaad daastsi rias ni niz lus sas; niz tsuas ua tej kwg niz pud niz Vaid ua nyaz. Tej kwg leej Vaid ua, leej Tus ha ua. 20Tu qhob leej Vaid hlus leej Tus has qha is puas tsaab yaad kwg niz ua tu leej Tus. Niz yiad qha tej hujlwd kwg tseedcees kua tej na tu leej Tus, has tej qhai yiad ua tu mej xaab tsi thoos. 21Leej Vaid tsaa cob neeg kwg tuag liad siab rob qaas luz nyaab, leej Tus yiad pus txujsa tu cob neeg kwg niz pud zoo pus tu is yaad ni qhai. 22Leej Vaid tsi txabtxid tu tuz twg, tadsis niz tsaa leej Tus ua tuz txabtxid, 23kuas tuadtxhij fwd leej Tus is yaad ni fwd leej Vaid. Tuz kwg tsi fwd leej Tus, tuz qhai yeej tsi fwd leej Vaid tuz kwg txis leej Tus luz has.

24“Kud qha tsees tu mej has tas: tuz kwg noog kud luz has ntseeg tuz kwg txis kud luz, tuz qhai ha taw txujsa nteb dhaw muz is txhis. Niz yiad tsi rawg txabtxid, tu qhob niz ted tiad hub txuj keb tuag luz taw txujsa liad. 25Kud qha tsees tu mej has tas, lus sijhiad taastod luz has ted luz yiad txug, taadsij na ted luz txug liad, thaws qhai yog thaws kwg cob neeg tuag liad yiad hnob Vaajtswb leej Tus lus suas hu, has tuadtxhij kwg hnob yiad muaj sa. 26Leej Vaid yog lus hawbpawz txujsa nyaab, niz khiad leej Tus ua lus hawbpawz txujsa is yaad ni qhai. 27Has leej Vaid tsaa leej Tus ua tuz txabtxid, tu qhob niz yog Neeg Leej Tus. 28Mej tsi xod xaab tsi thoos tu kud tej luz na; tu qhob lus sijhiad taastod luz, thaws qhai cob neeg kwg nyos qhais tej qhob ntxaa liad yiad hnob leej Tus lus suas hu, 29has cud yiad tiad hub cud tej qhob ntxaa luz: cob neeg kwg ua zoo yiad siab luz taw txujsa, cob neeg kwg ua phed ua qas yiad siab luz rawg keb txabtxid.

Yexus tej Tidkhiab

30“Kud tsi muaj cai ua is yaad daastsi rias ni kud lus sas xaab; kud tsuas txabtxid rias ni Vaajtswb kuas kud txab nyaz, yog ni qhai, kud yeej txabtxid ncaajnceeg, tu qhob kud tsi ua rias ni kud lus sas nyad, tadsis kud tsuas ua rias ni tuz kwg txis kud luz lus sas nyad nyaz.

31“Yog kud rob ua kud tuz tidkhiab, ces yeej tsi muaj neeg ntseeg tej kwg kud has. 32Tadsis yeej muaj is tug ua kud tuz tidkhiab, has kud paws has tas tej kwg niz has txug kud, niz yeej has tsees nyaz. 33Mej txis mej cob neeg muz cuag Yawhaas, has Yawhaas yeej ua tidkhiab has txug qhob tsees. 34Tsi yog kud xaab kuas neeg ua kud tuz tidkhiab, tadsis kud has ni na kuas mej kig mej lus txid. 35Yawhaas zoo ni lus tees kwg tias cig ntsaa as, has mej xaab zoo sas is nyuas ntus thaws kwg mej nyos hub qhob kaaj qhai. 36Tadsis kud muaj is qhob tidkhiab kwg tseedcees kua tej kwg Yawhaas has: tej kwg kud ua yog tej hujlwd kwg leej Vaid muas tu kud ua, tej hujlwd na, qha tu tuadtxhij paws tsees has tas, kud yog tuz kwg leej Vaid txis luz. 37Has leej Vaid tuz kwg txis kud luz, niz yeej ua tidkhiab has txug kud zaaj is yaad nkaws. Mej yeej istxwd tsi taw hnob niz lus suad lossis pud niz lus ntsejmuag, 38has mej yeej tsi khiad niz tej luz ca tu nruas sas, vid mej tsi ntseeg tuz kwg niz txis luz. 39Mej kiad Vaajtswb Txujlug, tu qhob mej xaab has tas txujlug qhai yiad ciad taw mej txujsa muz is txhis; Vaajtswb Txujlug qhai ted tidkhiab has txug kud ntag! 40Tadsis mej tsi yeed luz cuag kud kuas mej taw txujsa.

41“Kud tsi xaab kuas neeg qhuas kud. 42Tadsis kud paws has tas mej tsi muaj lus sas hlus Vaajtswb nyos hub mej. 43Kud yog tuz kwg kud Vaid txis luz, tadsis mej tsi leez yuab kud; tuz kwg tsi muaj tuz twg txis luz, niz luz niz nyaz, mej tsua leez yuab tuz qhai. 44Mej is tug nyad ua tu is tug qhuas, tadsis mej tsi muaj is tug nyad ua tu Vaajtswb qhuas; yog ni qhai, mej yiad ua nyaab ntseeg kud tej luz. 45Mej tsi xod xaab has tas kud yiad nkawg mej tu kud vaid. Mawxes tuz kwg mej ca sas tu, niz yog tuz kwg yiad nkawg mej tu kud Vaid. 46Yog mej ntseeg Mawxes tej luz, mej yeej yiad ntseeg kud, tu qhob Mawxes yeej saw has txug kud. 47Yog mej ted tsi ntseeg tej luz kwg Mawxes saw, mej yiad ua nyaab ntseeg kud tej lug?”

Currently Selected:

Yawhaas 5: CQD2024

Highlight

Copy