Chibkees 37

Yawxej Has Niz Cob Tijlawg

1Yakhawj tseed nyos hub teschias Kana-aas kwg niz vaid istxwd nyos thaws u luz liad. 2Zaaj na yog has txug Yakhawj tseb neeg lus neej.

Yawxej yog is tug tus hluas kwg hnoosnyood muaj kawd xyaa xyoo, niz muz yug yaaj has tshis nrug niz cob tijlawg kwg yog Npilehas has Xilepas kwg yog niz vaid os tug nadyaw cob tus. Yawxej pheej coj tej yaad tsi zoo kwg niz cob tijlawg ua luz pab qha tu niz vaid noog.

3Taaznrhiab Yakhawj cob tus, mas Yakhawj hlus Yawxej tshaaj cob hubtsig, tu qhob niz muaj Yawxej thaws kwg niz lawz heeb liad. Niz xias taw is lus tsho nteb#37.3 lus tsho nteb; lossis lus tsho txaij nteb. tu Yawxej hnaab. 4Thaws Yawxej cob tijlawg pud has tas cud vaid hlus Yawxej tshaaj ni hlus cud liad, cud ha heed cud tuz kwb kiag nkaws ni, has ua tu cud tsi xaab has is lu luz zoo tu Yawxej.

5Muaj is zag Yawxej txiad ua npaw suab, has thaws niz qha zaaj npaw suab qhai tu niz cob tijlawg noog taaz, ua tu cud hajyaad heed niz heeb. 6Yawxej has tas, “Kud yiad pab kud zaaj npaw suab tu mej noog. 7Pes tuadtxhij puabtsig paab pes cob tez nplej hub tes, thaws paab taw liad, kud tez nplej txiad siab nreg nreez. Ces mej cob tez nplej siab luz vij kud tez has ca ni nyo zud ziaz luz pe kud tez nplej.”

8Niz cob tijlawg noog has tas, “Koj xaab has tas koj yiad taw ua vaajntxwb kaab pes na los?” Yog ni qhai, cud ha hajyaad heed niz heeb, vid zaaj npaw suab has tej luz kwg niz pab tu cud noog qhai.

9Ces Yawxej rob ua is zaaj npaw suab kua has niz qha tu niz cob tijlawg noog has tas, “Kud ua kua is zaaj npaw suab, kud pud lus hnoos, lus hli has kawd is lus hnoosqus pe kud zud ziaz.”

10Niz pab zaaj npaw suab na tu niz vaid noog hubtsig has, niz vaid txiad nthe niz has tas, “Ua caaz koj yiad txiaj ua npaw suab ua luaj ni? Koj xaab has tas koj nad pes has koj cob tijlawg pes tuadtxhij yiad taw luz txhud cawg pe koj na los?” 11Yawxej cob tijlawg hajyad khis heeb, tadsis niz vaid xaab ntsoob zaaj npaw suab qhai tu nruas sas.#Tez 7.9

Muag Yawxej Muz tu Teschias Izib

12Muaj is hnoos Yawxej cob tijlawg muz yug cud vaid paas tsaj tu pez Sekhees, 13Yakhawj has tu Yawxej has tas, “Kud yiad txis koj muz pez Sekhees qhob chia kwg koj cob tijlawg yug tsaj.”

Yawxej tes has tas, “Kud maad ni muz!”

14Niz vaid has tu niz has tas, “Koj ca ni muz nuad, yog koj cob tijlawg noj qaas nyos zoo has tej tsaj los nyos txhij txhua, ces koj rob qaas luz qha tu kud paws.” Yog ni qhai, niz vaid ha tso niz siab keb hub lus Haab Henploos muz tu pez Sekhees.

Thaws txug pez Sekhees, 15Yawxej ncig muz ncig luz qhais roos mojsaas, muaj is tug yiag pud niz has noog niz has tas, “Koj nrhab daastsi?”

16Yawxej tes has tas, “Kud tuaj nrhab kud cob tijlawg kwg cud tuaj yug cud cob tsaj, koj puas paws cud nyos qhob twg? Thob koj qha tu kud.”

17Tuz yias qhai tes has tas, “Cud tsi nyos qhais na liad. Kud hnob cud has tas, cud yiad muz tu tod lus nroog Dawthaas.” Ces Yawxej ha rias cob tijlawg qaas muz has pud cud nyos qhais Dawthaas.

18Thaws Yawxej cob tijlawg pud Yawxej tuaj txug tid na, cob tijlawg txiad tuabhub tua Yawxej laidtaa. 19Cud is tug has tu is tug tas, “Tuz kwg txiaj ua npaw suab qhai tuaj liad. 20Zag na, pes muas niz tua laidtaa has muas niz coj muz laid tu hub cob qhobdej qhuab na is lus. Pes maad daag has tas muaj is tug tsaj nyud muas niz tud niz liad. Nuad niz tej npaw suab yiad muaj daastsi tshwd tuaj.”

21Thaws Lunpees hnob cud has ni qhai, niz nrhab tswbyid paas ciad Yawxej, niz ha has tas, “Ca pes tsi xod muas Yawxej tua laidtaa. 22Pes ca ni muas niz laid tu hub lus qhobdej kwg nyos qhais roos mojsaas qhua na nyaz, tsi xod ua kuas niz nqaj nruag ntshaab nrug.” Lunpees has ni na, tu qhob niz xaab paas kuas Yawxej kig qhais cud has tso niz rob muz cuag niz vaid. 23Thaws Yawxej tuaj txug qhais cob tijlawg liad, cud txiad saw nthwb luz ntez niz has muas niz lus tsho nteb kwg muaj tez#37.23 lus tsho nteb kwg muaj tez; lossis lus tsho txaij nteb. hle hlo. 24Ces cud txiad coj niz muz laid tu hub lus qhobdej kwg tsi muaj dej.

25Thaws cud tseed taastod noj mo, cud txiad pud is paas neeg Yisamayees tawgkeb pez lus nroog Nkile-as tuaj muz tu nraaz teschias Izib. Cud caas ntxhuab thuj tej tshuaj tsw qaas has txudlod muz muag. 26Yudas has tu niz cob kwbtij has tas, “Yog pes muas pes tuz kwb tua laidtaa has npug txuj keb tua neeg na ca, pes yiad taw daastsi? 27Pes muas niz muag tu cob neeg Yisamayees qhai ntshai yiad zoo kua. Pes tsi xod ua tu niz nqaj nruag ntshaab nrug, tu qhob niz yeej yog pes tuz kwb has nrug pes kood roj kood ntshaab.” Niz cob kwbtij kuj pud zoo ni niz has, 28thaws cob tus laag tus luad kwg yog neeg Midias tuaj txug, cob tijlawg#37.28 cob tijlawg; phaw Henplais has tas cud. ha ni nquz Yawxej tiad hub lus qhobdej luz has muas niz muag tu cob Yisamayees ua neez nkawd daid nyaj, lag ha coj Yawxej muz tu teschias Izib liad.#Tez 7.9

29Thaws Lunpees rob qaas muz xuj hub lus qhobdej tsi pud Yawxej nyos hub liad, niz ntxhub sas heeb has dua rhe niz lus tsho laidtaa. 30Niz rob qaas luz cuag niz cob kwb has has tu cud tas, “Tsi pud Yawxej nyos hub lus qhobdej liad, xyob kud yiad ua nyaab lawj?”

31Ces cud txiad muas is tug tshis tua has muas Yawxej lus tsho nteb muz raws tu hub cob ntshaab tshis. 32Cud coj lus tsho nteb qhai muz qha tu cud vaid has has tas, “Pes khiad taw lus tsho na. Koj sid nuad puas yog koj tuz tus lus tsho los tsi yog?”

33Yakhawj ncu taw lus tsho qhai zoo has has tas, “Yog tag, lus tsho na yog Yawxej lus! Tej tsaj nyud yeej muas kud tuz tus tud liad tag. Kud tuz tus Yawxej taw rawg dua ua tej daid liad lawj!” 34Yakhawj dua rhe niz lus tsho laidtaa has muas ntaws tsaaj luz npua, ua keb tu sas quaj ntsuag. Niz quaj ncu txug niz tuz tus taw nteb loo. 35Taaznrhiab niz tej tus tej ntxhais puabtsig luz nplig niz sas, tadsis niz yeej tsi noog tuz twg has has niz has tas, “Kud yiad quaj ntsuag kud tuz tus ni na muz txug thaws kud txuj sa tu muz nrug niz nyos.” Yog ni qhai, niz pheej quaj niz tuz tus Yawxej ni.

36Thaws cob tus laag tus luad kwg yog neeg Midias muz txug nraaz teschias Izib liad, cud txiad muas Yawxej muag tu Pawtifas kwg yog Falaws is tug thiaj tusrog nuad cob tusrog kwg zub Falaws lus loog.

Currently Selected:

Chibkees 37: CQD2024

Highlight

Copy

Compare