Chibkees 38

Yudas has Tamaj

1Thaws lus sijhiad qhai Yudas tso niz cob kwbtij tseg has tsib muz nrug is tug yiag hu ua Hilaas kwg yog cob neeg hub lus nroog Adawlaas nyos. 2Nyos qhob qhai Yudas ntsis cob Kana-aas is tug ntxhais, tuz ntxhais qhai vaid hu ua Su-as. Yudas ha yuab tuz ntxhais qhai ua puj, 3has niz yug taw is tug tus tu Yudas, Yudas ha tis tuz tus qhai npe hu ua Eles. 4Tuz puj qhai rob xees tus kua, niz yug taw is tug tus, has niz tis tuz tus qhai npe hu ua Awnaas. 5Niz rob yug taw is tug tus ntxib has niz tis tuz tus qhai npe hu ua Selas. Thaws yug tuz tus qhai Yudas tseed nyos hub lus nroog Akhexis.

6Yudas tuz tus hlus kwg yog Eles yuab taw is tug puj npe hu ua Tamaj. 7Eles ua keb phed keb qas tsi hud tuz Tswb sas, tuz Tswb ha muas niz tua laidtaa liad. 8Ces Yudas ha has tu Eles tuz kwb Awnaas has tas, “Koj ca ni muz yuab koj nyaas, siab koj tuz tijlawg chia kuas koj tuz tijlawg ha muaj caajcez.” 9Tadsis Awnaas paws has tas cob minyuas qhai yiad tsi yog niz tis; ces thaws niz muz nrug niz nyaas pw, niz ca cob kua txuas tu hub aab, kuas muaj tsi tawz minyuas tu niz tuz tijlawg. 10Qhob kwg niz ua ni qhai tsi hud tuz Tswb sas, vid ni qhai tuz Tswb ha ni muas niz tua laidtaa liad has. 11Ces Yudas ha ni has tu Tamaj kwg yog niz tuz nyaas has tas, “Koj ca ni rob qaas muz nrug koj nad koj vaid nyos, ua puj ntsuag toz muz txug thaws kud tuz tus yaw hlus tab vaid taws.” Niz has ni qhai tu qhob niz ntshai nyos tsaad Selas rawg tua is yaad ni Selas os tug tijlawg has. Ces Tamaj ha rob qaas muz nrug niz nad has niz vaid nyos liad.

12Taw nteb loo luz tod qaas na Yudas tuz puj kwg yog Su-as tuz ntxhais txiad tuag liad. Thaws dhaw caij nyuaj sas quaj ntsuag liad, Yudas has niz is tug phoojywz Hilaas kwg nyos hub lus nroog Adawlaas ha muz nuad niz cob neeg txab plaws yaaj kwg nyos hub lus nroog Teenas. 13Muaj neeg muz has qha tu Tamaj has tas, niz tuz yiag leej vaid taastod siab keb tuaj muz txab plaws yaaj tu hub lus nroog Teenas. 14Ces Tamaj ha hloob niz ceb rig tsho puj ntsuag kwg niz naj hnoos hnaab qhai ca, muas ntaws luz npug niz lus ntsejmuag, has muz nyos qhais ntug keb kwg nyos qhais ncawj ke muz tu hub lus zoz Enayees, yog lus zoz kwg nyos qhais txuj keb muz tu hub lus nroog Teenas. Niz yeej paws has tas Yudas tuz tus ntxiag Selas ted hlus tab hluas liad, tadsis Yudas tseed pheej tsi muas Tamaj has Selas txis ua nad txib ni.

15Thaws Yudas pud Tamaj, niz xaab has tas Tamaj yog is tug nadntab, tu qhob Tamaj muas ntaws npug niz lus ntsejmuag hubtsig liad. 16Yudas ha ncaaj nraid muz tu qhais Tamaj has has tas, “Koj ca ni muz, kud yiad nrug koj pw, koj yuab nqai pestsiag?” (Yudas tsi paws has tas Tamaj yog niz tuz nyaas ni liad.)

Tamaj ha tes has tas, “Koj txaws sas yiad muas daastsi tu kud?” 17Yudas tes has tas, “Kud yiad xaa is tug minyuas tshis tuaj tu koj.”

Tamaj has tas, “Ua ni qhai los taw, tadsis koj muas is yaad daastsi tu kud khiad tseg ua puabpheej muz txug thaws koj coj tuz minyuas tshis tuaj tu kud taws.”

18Yudas noog has tas, “Koj xaab kuas kud muas daastsi tu koj pus ua puabpheej tseg?”

Tamaj tes has tas, “Muas koj lus hodthiaj kwg muaj txuj hlua has koj tuz paas nreg tu kud.” Yudas ha muas tej qhai tu Tamaj. Ces ostug txiad muz pw, ces Tamaj txiad ca ni xees tus. 19Tamaj rob qaas muz tseb, tshed niz daid ntaws npug ntsejmuag, has rob qaas muas niz ceb rig tsho puj ntsuag luz hnaab kua.

20Yudas tso niz tuz phoojywz Hilaas xaa tuz minyuas tshis muz txhwb tej khood cogluz kwg niz muas tu tuz puj qhai khiad tseg liad rob qaas luz, tadsis Hilaas nrhab tsi taw niz tis liad. 21Hilaas noog cob yiag kwg nyos hub lus nroog Enayees has tas, “Tuz nadntab kwg pheej muz nyos qhais ntug keb muz tu qhob twg liad?”

Cob yias qhai tes has tas, “Nyos hub lus zoz na yeej istxwd tsi muaj nadntab.”

22Hilaas rob qaas muz cuag Yudas has has tas, “Kud nrhab tsi taw tuz puj qhai ni liad. Cob yiag kwg nyos hub lus zoz qhai has tu kud tas, yeej tsi muaj is tug nadntab nyos hub lus zog na hlo ni.”

23Yudas has tas, “Ca niz yuab kud cob khood qhai muz ni. Pes tsi xaab pus kuas muaj neeg rud pes plig. Kud ted muas tuz minyuas tshis na tu koj coj muz thed niz ntaag, tadsis koj muz nrhab tsi taw niz liad nyaz.” 24Taw pes hlis tod qaas muaj neeg muz qha tu Yudas has tas, “Tamaj kwg yog koj tuz nyaas taw muz ua nadntab, has nizna niz xees tus liad.”

Yudas has tas, “Ca Ni coj Tamaj tiad muz liad nraw ntug nroog has muas hluabtiaz hliab kuas tuag.”

25Thaws cud taastod coj Tamaj tiad muz, Tamaj tso neeg coj cob khood qhai has muz has tu niz vaid yiag has tas, “Kud muaj minyuas luz qhais tuz yiag kwg yog tuz tswb cob khood na. Mej nrug nuad lus hodthiaj kwg muaj hlua has tuz paas nreg na tuaszoo nuad yog tuz twg ni.”

26Yudas ncu taw cob khood qhai has has tas, “Tamaj ua yog cai liad. Kud tsi ua rias ni kud taw cogluz tseg tu niz, tsidnyog kud yiadtsud muas niz txis tu kud tuz tus Selas.” Ces Yudas tsi muz nrug Tamaj pw is zag ntxib ni liad.

27Thaws yiad txug caij Tamaj tu tus, niz paws has tas niz muaj minyuas ntxais nyos hub niz plaas. 28Thaws niz taastod mos plaas yiad yug os tug minyuas, muaj is tug minyuas txhais tez txiad tiad tuaj ua ntej, tuz puj kwg paas dias ceb qhai tuab nkaws txhais tez qhai, has muas taw is txuj xub paaj lag luz khi txhais tez qhai has has tas, “Tuz na yog tuz xus yug.” 29Tadsis niz nkawd niz txhais tez rob qaas liad, niz tuz kwb txiad yug luz ua ntej. Ces tuz puj kwg tuaj paas dias ceb qhai has tas, “Yog ua nyaab koj yiad txees taw keb luz ua ntej!” Yog ni qhai, ha muas niz tis npe hu ua Peles.#38.29 Peles: Lus npe na luz Henplais txhais has tas, “txees tiad ua ntej luz.” 30Ces niz tuz tijlawg maad yug luz txhais tez khi riab is txuj xub paaj las has muas niz tis npe hu ua Zelas.

Currently Selected:

Chibkees 38: CQD2024

Highlight

Copy

Compare