Chibkees 35

Vaajtswb Food Kooshmoob tu Yakhawj

1Vaajtswb has tu Yakhawj has tas, “Koj ca ni muz nyos pez Npethees. Has koj ca ni tees is lus thaaj tu kud, kud yog Vaajtswb tuz kwg tshwd tu koj pud thaws koj tsib koj tuz tijlawg Exaws muz ntaag.”#Chk 28.11-17

2Yog ni qhai, Yakhawj ha has tu niz tseb neeg has taaznrhiab cob neeg kwg nrug niz nyos qhai has tas, “Mej ca ni muas cob neeg txiab teschias tej vaajtswb kwg mej muaj coj muz laidtaa, ua kebcai ntxuab mej kuas hub has hnaab tej rig tsho kwg ntxhua hubsi liad. 3Pes yiad siab keb qhais na muz tu pez lus nroog Npethees, qhob chia kwg kud yiad tees is lus thaaj tu Vaajtswb tuz kwg taw paas kud thaws kud rawg keb txodnyed nyuaj sas, has yog tuz kwg nrugnraid kud txhua qhob kwg kud muz.” 4Yog ni qhai, cud ha muas taaznrhiab cob neeg txiab teschias tej vaajtswb kwg cud muaj has cud tej kawjntseg kwg cud coj qhais qhobntsej hubtsig tu Yakhawj. Yakhawj ha coj muz faws tu qhais qaas tsos ntoo qhes kwg nyos ze lus nroog Sekhees.

5Thaws Yakhawj has niz cob tus taastod siab keb muz, Vaajtswb txiad ua is yaad txaws ntshai heeb luz tu cob neeg hub tej nroog kwg nyos puagncig cud. Cob neeg hub tej nroog qhai ha tsi yeed muz riad Yakhawj cud qaas. 6Yakhawj has niz cob neeg luz txug hub lus zog Luxes kwg nizna yog lus nroog Npethees, hub teschias Kana-aas. 7Nyos qhob qhai, Yakhawj tees taw is lus thaaj has niz tis npe tu thaaj chia qhai hu ua Ees Npethees,#35.7 Ees npethees: Tuz Vaajtswb qhais Npethees. tu qhob Vaajtswb taw luz tshwd tu Yakhawj pud thaws Yakhawj tsib niz tuz tijlawg muz txug qhais qhob chia qhai. 8Lenpekas tuz ntxhais qheb Denpawlas tuag has cud muas loz tu hub qaas is tsos ntoo qhes kwg nyos qhais lus nroog Npethees saas nraag. Yog ni qhai, ha muas tsos ntoo qhes qhai tis npe hu ua, “Tsos Ntoo Qhes Quaj Ntsuag.”

9Thaws Yakhawj rob hub teschias Padaas Alaas luz, Vaajtswb rob luz tshwd tu Yakhawj pud kua is zag ntxib, has food kooshmoob tu niz. 10Vaajtswb has tu niz has tas, “Koj lus npe hu ua Yakhawj, tadsis txij na muz koj lus npe yiad hu ua Yixalayees.” Yog ni qhai, Vaajtswb ha tis Yakhawj lus npe hu ua Yixalayees.#Chk 32.28 11Has Vaajtswb rob has tu Yakhawj has tas, “Kud yog Vaajtswb Tuz Kwg Muaj Fwjchid Luj Kiag Nkawg. Koj ca ni muaj tuski kuas fuadvaad coos. Koj cob xeesntxwz yiad dhaw muz ua ntaw yaad neeg, has koj yiad yog ntaw tuz vaajntxwb tuz yiadkoos. 12Kud yiad muas lus teschias kwg kud muas tu Anplahaas has Ixaj liad pus tu koj, has kud tseed yiad muas tu koj cob xeesntxwz kwg nyos ntaw tad tod qaas koj.”#Chk 17.4-8 13Ces Vaajtswb txiad ncaid niz muz liad. 14Yakhawj txhus taw is tug ncej zes ua cid ncu txug tu qhais qhob chia kwg Vaajtswb luz nrug niz thaad, niz muas ciab txib hmaas has roj txibntoo laws tu saw tuz ncej zes qhai fij tu Vaajtswb. 15Yakhawj ha tis npe tu thaaj chia Vaajtswb has tu niz qhai hu ua Npethees.#Chk 28.18,19

Laxees Tuag

16Yakhawj has niz tseb neeg txiad tiad hub Npethees muz liad, has thaws tseed tshuab kes maad ni muz txug tu hub Efalas, Laxees txiad mos plaas txug caij dias ceb, has zag na niz yug minyuas nyuaj heeb. 17Thaws Laxees mos plaas yiad yug tuz minyuas qhai, tuz puj kwg paas tu minyuas ha has tu Laxees has tas, “Laxees, koj tsi xod ntshai, koj yiad taw is tug tus ntxib nyaz.” 18Tadsis thaws Laxees yiad tuag, has niz fuas paa yiad tu sab niz tis tuz mitus qhai npe hu ua Npee-awnis,#35.18 Npee-awnis: Lus npe na, luz Henplais txhais has tas “tuz tus kwg kud quaj ntsuag.” Tadsis niz vaid tis niz lus npe hu ua Npeenyamees.#35.18 Npeenyamees: Lus npe na, luz Henplais txhais has tas, “tuz tus kwg coj kooshmoob luz.”

19Thaws Laxees tuag, cud ha muas niz muz loz tu qhais is saas ntug keb kwg muz tu hub lus zog Efalas kwg nizna hu ua lus nroog Npelehees. 20Has Yakhawj txhus is tug ncej zes tu saw Laxees lus ntxaa ua cid ncu txug Laxees lus ntxaa luz txug naj hnoos na. 21Yakhawj siab keb muz ntxib has luz tsuad yeej nyos tu qhais tuz pedthuad Edeles is saas.

Yakhawj Cob Tus

(1 Xwdtxheej Vaajntxwb 2.1-2)

22Thaws Yakhawj tiad hub lus teschias qhai muz liad, Lunpees txiad muz nrug Npilehas kwg yog niz vaid tuz nadyaw pw. Thaws Yakhawj hnob txug zaaj na mas niz chid heeb.#35.22 Tej phaw qus txhais has tas, mas niz chid heeb; phaw Henplais tsi muaj cob luz na.#Chk 49.4

Yakhawj muaj kawd os tug tus. 23Le-as cob tus yog Lunpees (Yakhawj tuz tus hlus), Xime-oos, Levis, Yudas, Ixakhas has Xenpuloos. 24Laxees cob tus yog Yawxej has Npeenyamees. 25Laxees tuz ntxhais qheb Npilehas os tug tus yog: Daas has Nathalis. 26Le-as tuz ntxhais qheb Xilepas cob tus yog, Nkaj has Aseles. Cob tus na puabtsig yug pez teschias Padaas Alaas.

Ixaj Tuag

27Yakhawj muz nuad niz vaid Ixaj hub lus nroog Maales kwg nyos ze lus nroog Henploos, yog qhob chia kwg Anplahaas has Ixaj ostug nyos.#Chk 13.18 28Ixaj ua neej nyos taw is puas yid cawd xyoo, 29has tuag thaws niz muaj hnoosnyood lawz heeb liad, niz os tug tus Exaws has Yakhawj ha coj niz lus ceb muz loz.

Currently Selected:

Chibkees 35: CQD2024

Highlight

Copy

Compare