Chibkees 34
34
Dinas Rawg Yuad
1Muaj is hnoos Yakhawj has Le-as ostug tuz ntxhais Dinas txiad tiad muz nuad cob neeg Kana-aas tej puj. 2Hamawles kwg yog neeg Hivis kwg yog tuz thiaj nuad cheestsaad qhai, thaws Hamawles tuz tus Sekhees pud Dinas, niz txiad tuaj coj Dinas muz has muas Dinas yuad. 3Tu qhob Sekhees pud Dinas kwg yog Yakhawj tuz ntxhais zoo nkawj heeb, niz ha ua zaaj ua ntxeeb ntxaz kuas taw Dinas yuab.#34.3 ntxaz kuas taw Dinas yuab; lossis ua kuas niz zoo sas. 4Sekhees ha has tu niz vaid has tas, “Vaid, kud xaab kuas koj muz yuab tuz ntxhais qhai luz ua kud tuz puj.”
5Yakhawj paws has tas niz tuz ntxhais rawg keb thwstxaaj, tadsis vid niz cob tus muz yug tsaj tu nraag tes liad, niz ha tsi has is yaad daastsi txug thaws niz cob tus luz tseb txhij. 6Hamawles kwg yog Sekhees vaid ha tuaj thob Yakhawj, 7tiad thiaj thaws Yakhawj cob tus rob nraag tes luz txug tseb. Thaws cud hnob deeb txug zaaj na, ua tu cud mos sas has chid heeb tu qhob Sekhees taw ua nuad tsi tawz cob neeg Yixalayees kwg yog niz muas Yakhawj tuz ntxhais yuad ni qhai. 8Hamawles has tu Yakhawj has tas, “Kud tuz tus Sekhees nyad koj tuz ntxhais heeb ni liad, thob ca niz yuab koj tuz ntxhais ua niz tuz puj. 9Thob ca pes luz sis cogluz, kuas mej has pes yaad neeg ha muaj keb txis tshoos txis kuz tu pes tej minyuas. 10Ces mej ha taw nrug pes nyos hub pes lus teschias na. Mej yiad nyos thaaj chia twg los nyos qhais mej nyad, tso keb laag luad, has muaj keb ywjpheej tu mej.”
11Ces Sekhees has tu Dinas vaid has niz cob nuz has tas, “Thob mej ua zoo tu kud, has kud yiad muas txhua yaad kwg mej xaab taw tu mej. 12Thob qha yaad kwg mej xaab yuab tu kud, has ca ni has nqai tshoos kuas ntaw npawd ni mej xaab saw, mej xaab kuas thed npawd twg los kud yiad thed npawd qhai tu mej, tsuab yog mej yeed muas mej tuz muad tu kud yuab ua puj nyaz.”
13Vid qhob kwg Sekhees taw ua tu cud tuz muad Dinas rawg keb thwstxaaj, Yakhawj cob tus ha tes daag ntsuab tu Sekhees has Hamawles ostug. 14Cud has tu Sekhees has tas, “Pes tsi pud zoo ca pes tuz muad muz yuab is tug yiag twg kwg tsi taw ua kebcai txab tia ni, yog ua ni qhai mas rhuab pes ntsejmuag heeb. 15Tsuas muaj tuas qho kwg mej ua rias ni pes ua nyaz, mej txhuatuz yiag yiadtsud taw ua kebcai txab tia is yaad ni pes ua hubtsig, 16ces pes ha paws nrug mej ua tshoos ua kuz. Pes ha yiad nrug mej nyos taw ua ke has pes ha yiad nrug mej ua taw is yaad neeg. 17Tadsis yog mej tsi leez ua rias ni pes has has ua kebcai txab, pes yiad coj pes tuz muad luz has tsib tiad hub teschias na muz.”
18Hamawles has niz tuz tus Sekhees pud zoo yuab rias ni cud has qhai, 19ces tuz tus hluas txiad maaj nrooz ua rias ni cud taw has qhai, tu qhob niz nyad Yakhawj tuz ntxhais heeb. Sekhees kuj yog is tug kwg muaj meej mod hub niz tseb neeg.
20Hamawles has niz tuz tus Sekhees ha muz tu tid qhob chia saaslaaj kwg nyos tid roojvaag nroog has has tu cob pejxeed hub lus nroog has tas: 21“Cob neeg na nrug pes sis rawg zoo heeb, ca cud nrug pes nyos hub lus teschias na has ca cud muz luz ywj sas. Lus teschias los kuj kaab txaws cud nyos has. Ca pes tej tus muz yuab cud tej ntxhais has cud tej tus tuaj yuab pes tej ntxhais. 22Cud yeej zoo sas nrug pes nyos has nrug pes kood ua is yaad neeg, tadsis muaj is txuj cai kwg pes yiadtsud taw ua, yog pes txhuatuz yiag yiadtsud taw ua kebcai txab tia ni cud. 23Mej puas xaab taw cud tej tsaj txhu has tej khood kwg yog cud ni luz ua pes tug? Yog mej xaab taw, ca ni leez yuab cud txuj cai has ca cud nrug pes nyos.” 24Taaznrhiab cob pejxeed tuadtxhij puabtsig pud zoo yuab has ua rias ni Hamawles has Sekhees has qhai, txhuatuz yiag ha ua kebcai txab tia taaznrhiab.
25Taw pes hnoos tod qaas kwg cob yiag ua kebcai txab tia qhai tej nqaj tseed mos, Yakhawj os tug tus: Xime-oos has Levis kwg yog Dinas os tug nuz, txiad coj ostug os raas ntaaj nyaz keb tuasyws muz tu hub nroog, has muas cob yiag hub tua tuag taaz, 26nrug tu Hamawles has niz tuz tus Sekhees hubtsig. Ces ostug ha coj Dinas hub Sekhees tseb tiad luz liad. 27Tod qaas kwg Xime-oos has Levis ostug muas cob neeg qhai tua tuag taaz liad, Yakhawj cob tus tseed muz fuas lus nroog ua pawj qhob kwg cud tuz muad rawg thwstxaaj qhai. 28Cud caas taaznrhiab tej tsaj txhu, nyuj, neez luab has muas txhua yaad khood kwg nyos hub nroog has hub tej tes coj hubtsig muz liad. 29Cud coj txhua yaad kwg muaj nqais, ntez tej puj has minyuas, has coj txhua yaad kwg nyos hub cud tej vaaj tse hubtsig liad has.
30Yakhawj has tu Xime-oos has Levis has tas, “Mej ua tu kud taw keb ntxhub sas liad, taadsid na cob neeg Kana-aas has cob neeg Pelixes, has cob neeg kwg nyos hub teschias na yiad heed kud heeb. Kud tsi muaj neeg coos, yog cud sissaw tuaj tiadtsaad has tua kud, mas pes tseb neeg yiad rawg keb puadtsuaj taaz ni.”
31Tadsis ostug tes has tas, “Yiad ca Sekhees coj ws tuz muad muz ntxaz zoo ni tuz nadntab los?”
Currently Selected:
Chibkees 34: CQD2024
Highlight
Copy
Compare
Share
Want to have your highlights saved across all your devices? Sign up or sign in
© 2024 Bible Society Vietnam. All rights reserved.
